2 Chronicles 6

Sòlomòn ɨ koʼsɨ Bôbo Fɨyini

¹Fòyn Sòlomòn nɨ̀n jêm meyn ɨ bè na, “Bôbo Fɨyini wà choʼnɨ meyn na wà na ghɨ antêynɨ̀ mbàʼsɨ̀. ²Ma baʼlɨ meyn ndo sɨ̂ và, yi jofɨ̀ kɨ̀ tèyn, na wà na lum ghɨ kɨ ateyn nô ta ka ghɨ̀ læ̂ ghɨ̀.”

³Fòyn nà n-jêm tì, ghelɨ Isìlæ̀ nô ghɨ̀ jɨ̀m ɨ ti afu, wu jem mèsì ɨ boysɨ àŋena, ⁴ɨ bè na,

“Ikoʼsɨ-i nɨn ghɨ sɨ Bôbo Fɨyini ɨ Fɨyini fɨ ghelɨ Isìlæ̀, wù luynsɨ meyn ìchfɨ̂nɨ̀ zɨ̀ a wù n-læ chfɨ̀nɨ sɨ̂ bò wom Devìt. Wù n-læ bè sɨ̂ Devìt na, ⁵‘Kɨ̀ sɨ ɨtuʼ ta mɨ n-læ fvɨ̀sɨ ghelɨ̀ ghem sɨ a Ijìb, ma bû timi chòʼ ntèʼ ìlì a Isìlæ̀ na ghɨ baʼlɨ ndo nà Koʼsɨ̂ mà ateyn. Ma bû tìmi chòʼ wul na wù na tisɨ̂ ghelɨ̀ ghem. ⁶Mɨtì ma choʼ meyn Jèlusalèm na ghɨ na koʼsɨ̂ mà àteyn, ɨ̀ choʼ Devìt na wù na tisɨ̂ ghelɨ̀ ghem, ɨ ghelɨ Isìlæ̀.’

⁷“Bò wom Devìt nà kɨŋ sɨ bàʼlɨ ndô Fɨyini ta ka ghɨ na koʼsɨ̂ Bôbo Fɨyini ɨ Fɨyini fɨ Isìlæ̀ ateyn. ⁸Mɨtì Bôbo Fɨyini ɨ bè sɨ̂ ŋweyn na, “Wà ti nà kɨŋ sɨ bàʼlɨ ndô ta ka ghɨ na koʼsɨ̂ mà ateyn a ghɨ ìwo ijuŋì. ⁹Mɨtì a n-bàʼlɨ̀ wì vâ ndô àteyn, a n-bâʼlɨ̀ wayn ma wù fvɨ̀ kɨ nô a wa ɨlvà bàʼlɨ̀ ndô a ghɨ na koʼsɨ̂ mà ateyn.’

¹⁰“ Bôbo Fɨyini luynsɨ meyn ìchfɨ̂nɨ̀ i ŋweyn. Ma yɨ meyn ndô bò wom, mà sɨ ghɨ fòyn a Isìlæ̀ kɨ̀ ighel ta Bôbo Fɨyini nɨn læ chfɨ̀nɨ. Ma baʼlɨ meyn ndô na ghɨ na koʼsɨ̂ Bôbo Fɨyini ɨ Fɨyini fɨ Isìlæ̀ ateyn. ¹¹Ma lêm meyn àntayntayn a mɨ̂kàyn nɨ̀ Bôbo Fɨyini a ndô Fɨyini nâ ghè. Mɨ̀kâyn mzɨ̀ a Bôbo Fɨyini nɨn læ yɨ ŋêyn ghelɨ Isìlæ̀ ɨ ghɨ ateyn.

Sòlomòn ɨ jèm sɨ̂ Bôbo Fɨyini

¹²Fòyn Sòlomòn nɨn timi meyn asɨ abaŋ ifu nɨ̀ Bôbo Fɨyini ɨ làysɨ̀ ɨ̀wu ŋweyn iyvɨ, asɨ nɨ̀ ghelɨ Isìlæ̀ nô ghɨ̀ jɨ̀m ɨ jèm. ¹³À nà n-ghɨ tì ma fòyn Sòlomòn faytɨ meyn àbaŋ nɨ̀ ìdyayni kɨ dyefɨ̀ chem ndû ntàmsɨ̀ bò nɨ̀ abeʼa, ighaʼ ateyni ɨ ghɨ kɨmɨ tì, njetɨ̂ chem ndû ntàm ìmòʼ nɨ̀ àbeʼa, ɨ tom a antêynɨ̀ àntêynɨ̀ ɨwe ɨ ghaʼnɨ. Wu timi atû àteyn, ɨ nguʼ alvɨ asɨ nɨ̀ ghelɨ Isìlæ̀ nò ghɨ̀ jɨ̀m ɨ làysɨ̀ ɨ̀wu ŋweyn iyvɨ, ¹⁴ɨ bè na,

“Bôbo Fɨyini Fɨyini fɨ Isìlæ̀, fɨyini fɨ lifɨ nɨn ghɨ wi iyvɨ, ghɨ wi a nse ta vâ . Wà n-luynsɨ̂ ìchfɨ̂nɨ̀ ìzæ, dyêyn ìkôŋ i mɨ̂kàyn nɨ̀ và sɨ̂ ghelɨ ghì a ghɨ n-yvɨnɨ vâ nɨ̀ mɨ̀tem mɨ̀ àŋena ɨ̀njɨ̀m. ¹⁵Wà luynsɨ meyn ìchfɨ̂nɨ̀ zɨ̀ a wà n-læ chfɨ̀nɨ sɨ bò wom Devìt ɨ wùl ɨ̀ fèlɨnɨ nɨ̀ và. Samoʼ awo kì a wà nì luynsɨ meyn ìchfɨ̂nɨ̀ ateyn layn.

¹⁶“Bôbo Fɨyini Fɨyini fɨ Isìlæ̀, mɨ nchwotɨ̂ na wà luynsɨ ìchfɨ̂nɨ̀ ili zɨ̀ a wà n-læ chfɨ̀nɨ sɨ̂ bò wom Devìt ɨ wul ɨ̀ felɨnɨ nɨ̀ và ɨ bè na, ‘À læ̀ nà lum saʼ kɨ wôyn ghya saʼ ɨ̀fôyn a Isìlæ̀ ɨlvɨ ta àŋena yvɨnɨ ma lêm tɨ̀saʼ temtɨ kɨ ta vâ.’ ¹⁷Mɨ n-chwotɨ̂ lvɨ̂yn a Bôbo Fɨyini ɨ Fɨyini fɨ Isìlæ̀ na wà ni iwo zɨ̀ a wà n-chfɨnɨ sɨ̂ wùl ɨ̀ felɨnɨ nɨ̀ và ɨ Devìt yi kfeyn.

¹⁸“A Bôbo Fɨyini ti kàʼ a wù na chî antêynɨ̀ nɨ̀ ghelɨ a mbzɨ a. A aleʼ-à ti ghɨ a iyvɨ kèsa alèʼ ghè a kɨ ngaŋtɨ gòʼsɨ̀ a kɨ n-kfeynɨ sɨ vâ? kɨ ti ghɨ wi ndo yèyn a mà bàʼlɨ̀ têyn ɨ nà ghɨ nô ghà! ¹⁹Yvɨ ijêm ìyemi nɨ̀ ìdzɨ̂ ìyemi a Bôbo Fɨyini ɨ Fɨyini femfɨ. Yvɨ idzɨ̂ yèynì a wùl ɨ̀ felɨnɨ nɨ̀ và nɨ̀n dzɨ̂ têyn a Bôbo Fɨyini. ²⁰Mɨ n-jêm na wà na chî ndo nâ yèyn nɨ̀ntuʼ, chî nɨ̀nchuè. Wà n-læ meyn chfɨ̀nɨ̀ na ndo nâ yèyn na ghɨ àlêʼ kì a ka ghɨ na koʼsɨ̂ và ateyn. Mɨ n-jêm na wà na yvɨ ìjêm ì yemi nô mɨ ɨlvɨ gha ta mɨ n-jêm ki ndùsɨ̀ nɨ̀ ndô nâ yèyn. ²¹Yvɨ ijêm ìyemi ɨ yvɨ ijêm i ghelɨ gha ɨlvɨ ta ghɨ n-jêm ki ndùsɨ̀ nɨ̀ ndo nâ yèyn. Yvɨ ijêm ì yesi alèʼ a ngaŋtɨnɨ-a nɨ̀ và iyvɨ ɨ lèsɨ fu ghes.

²²Ghɨ kæ ghalɨ wul na wù bèbsɨ meyn ìwo sɨ̂ wùl ɨlvɨ̀, ɨ̀ gvì nɨ̀ ŋweyn na wù taŋ ɨchfɨ̂ asɨ abaŋ ifu nɨ̀ Bòbo Fɨyini na wù bû bèbsɨ ìwo, ²³wa yvɨ alèʼ a ngaŋtɨnɨ-a nɨ̀ và ɨ saʼ nsaʼ àteyn sɨ̂ ghelɨ ghɨ fɨlɨnɨ nɨ̀ và. Saʼ fu nsaʼ àteyn sɨ̂ wulɨ̀ vzɨ̀ a wù bû bèbsɨ ìwo, ɨ fu ngeʼ sɨ̂ wùl ɨ̀ vzɨ̀ a wù bèbsɨ iwo, kɨ̀ ta isaʼi nɨn dyêyn.

²⁴Ghelɨ ghya kæ ni mbɨ mbàynɨ̀ sɨ tɨm yɨ àŋena, àŋena kasî gvì dzɨ̀ ìkumi iwùyn a ndo nɨ̀ và, ²⁵wa yvɨ idzɨ-i àŋena ɨ alèʼ a ngaŋtɨnɨ-a nɨ̀ và ɨ lèsɨ fu mbɨ̂ àŋena ɨ kasi gvì nɨ̀ àŋena ilaʼ ghè a wà n-læ fu sɨ̂ àŋena ŋêyn ghɨ̀bo àŋena.

²⁶“Wà kæ ghal ivɨ na ka yi suʼi bòm ta ghelɨ̀ ghya nì mbɨ, àŋena bêynlɨ̀ sɨ a mbɨsɨ nɨ̀ àŋena ɨ̀ nà jèmà ki ndùsɨ̀ nɨ̀ alêʼ nâ kèynà ɨ̀ kàsi nà koʼsɨ̂ và, ²⁷wa yvɨ ijêm i àŋena iyvɨ ɨ lèsɨ̀ ɨ fu mbɨsɨ ghelɨ̀ ghya ɨ ghelɨ Isilæ̀. Wà lêsɨ̀ fu, wa yeʼi àŋena ghɨ na jelɨ̀ a dzɨsɨ àtì-ati ɨ suʼsɨ ìvɨ ilaʼ ghè a wà n-læ fu sɨ̂ ghelɨ̀ ghya na à na kelɨ kɨ nô àŋena.

²⁸“Jèŋ kæ ku ilaʼ i Isìlæ̀ kèsa à kù tɨ̀koʼi kù ghelɨ kèsa tɨkoʼi tɨ bèbsɨ ɨfwo ɨ yɨnɨ a gvêynsɨ̀-a kèsa fɨ̀mtɨ̀ a yì bèbsɨ ɨfwo kèsa ngumisɨ kèsa tɨ̀ndɨ̀landɨl kèsa à n-ghɨ mbàynɨ̀sɨ̀ ta sɨ jɨ̀ŋ kal àŋena baʼsɨ̂ nɨ̀ tɨ̀koʼi tɨ litɨ-a, ²⁹àŋena kæ nàysɨ̀ ɨ̀wu ki ndùsɨ̀ nɨ̀ ndô zyâ ɨ jèm/nàysɨ̀ ndù nɨ̀ ɨ̀wu àŋena abàs ghè a ndô Fɨyini nɨ̀n ghɨ ateyn ɨ̀ jèm /kûm ngeʼ sìsɨ̀ a àŋena nɨn ghɨ ateyn nɨ̀ ikoynsɨ isuyn nɨ̀ àŋena, ³⁰wa yvɨ ijêm i àŋena alèʼ a ngaŋtɨnɨ-a nɨ̀ và iyvɨ ɨ lèsɨ̀ ɨ fu mbɨsɨ àŋena. À n-kya kɨ và mɨtem mɨ̀ ghèl, mâʼtɨ̂ nô mɨ ndà kɨ̀ ta wù fèl, ³¹ta ka ghelɨ̀ ghya na lum ngɨmlɨ̂ kɨ ngvɨmlɨ vâ, jelɨ̀ kɨ a dzɨ ghê a wà n-kɨŋ, ilaʼ ghè a wà n-læ fu sɨ̂ ghɨ̀bo ghesɨ.

³²Ghelɨ ɨtum læ̂ yvɨ ɨlwèʼ ndyèynsɨ̀ na wà n-ghɨ Fɨyini fɨ ngaŋtɨnɨfɨ, nî àwo a kaynɨ-a, ɨ̀ gvì nà jemà ki ndùsɨ̀ nɨ̀ ndô Fɨyini nâ yèyn, ³³wa yvɨ alèʼ a ngaŋtɨnɨ-a nɨ̀ và iyvɨ, ɨ bèynsɨ̀ ìjêm i àŋena. Wa nì tèyn a nô ghelɨ ghɨ̀ jɨ̀m a mbzɨ keli wul ɨ vzɨ̀ a wà n-ghɨ ɨ̀ŋweyn, ɨ̀ nà yvɨnɨ̂ và kɨ̀mɨ ta ghelɨ Isìlæ̀ nɨn nî, kya na ndô Fɨyini nâ yèyn a mà bàʼlɨ̀ têyn nɨn ghɨ àlêʼ kì a ka ghɨ na koʼsɨ̂ và ateyn.

³⁴Ghelɨ̀ ghya Kæ seʼ sɨ nù mbàynɨ̀sɨ àŋena nô mɨ wo ta wà be, ɨ̀ jèm ki ndùsɨ̀ nɨ̀ ntèʼ yèyn a wà chòʼ têyn, nɨ̀ ndô Fɨyini yèyn a mà bàʼlɨ̀ na ghɨ na koʼsɨ̂ và ateyn tèyn, ³⁵wa yvɨ ijèm i àŋena alèʼ a ngaŋtɨnɨ-a, ɨ gàmtɨ̀, àŋena tɨm yɨ.

³⁶“Wùl nɨ̀n ghɨ wi a wù bû tìmi nì mbɨ, ghelɨ̀ ghya kæ nì mbɨ, wà dyêyn ɨ̀toŋ ɨ yafɨnɨ nɨ̀ và ɨ̀ vìsi mbàynɨ̀sɨ àŋenasɨ tɨm yɨ àŋena ɨ̀ lì ndù nɨ̀ àŋena ta ghelɨ a ghɨ ghàytɨ iwòŋ ilaʼ yi baʼsɨ̂ sɨ̂ àŋena kèsa yi ghɨ a ndèyn-a. ³⁷Àŋena kæ ndù ɨ̀ bèynsɨ̀ mɨ̀tem mɨ̀ àŋena ilaʼ nâ ghè ɨ̀ bèynlɨ̀ sɨ a mbɨsɨ nɨ̀ àŋena ɨ̀ chwòtɨ và ɨ̀ bè na, ‘Ghèsɨ ni meyn mbɨ a Bòbo, ɨ̀ nì àwo a bɨ-a fì to nɨ̀ àtu-a sɨ̂ và,’ ³⁸àŋena kæ bèynsɨ̀ mɨ̀tem mɨ̀ àŋena nà koʼsɨ̂ và ilaʼ nâ ghè ɨ̀ jèm ki ndùsɨ̀ nɨ̀ ìlaʼ zɨ̀ a wà n-læ fu sɨ̂ ghɨ̀ bo àŋena nɨ̀ ntèʼ zɨ̀ a wà choʼ kɨmɨ nɨ̀ ndô zɨ̀ a mà bàʼlɨ̀ na ghɨ na koʼsɨ̂ và ateyn, ³⁹wa yvɨ ijêm i àŋena alèʼ a ngaŋtɨnɨ-a nɨ̀ và ɨ ngàmtɨ àŋena ɨ lèysɨ fu mbɨsɨ àŋena.

⁴⁰“Mɨ n-jêm lvɨ̂yn a Fɨyini femfɨ na wa ki ghes ɨ̀ yvɨ ijêm yèynì a ghes nɨn jêm alèʼ ghàyn.

⁴¹Gvì lvɨ̂yn a Bôbo Fɨyini ɨ nà ghɨ alèʼ nâ ghàyn kɨ̀ mɨlvɨ ɨ̀n jɨ̀m,

Gvì wa ghɨ zɨ̂ àntayntayn a mɨ̂kàyn nɨ̀ và kì a à n-ghɨ nchwæ àdyaʼ nɨ̀ và.

Mɨ n-jêm na wà boysɨ ngàŋsɨ ndô Fɨyini nɨ̀ và nô mɨ a gha ta àŋena nɨn nì a Bôbo Fɨyini,

jêm na wà ni ghelɨ̀ ghya na saŋlɨ-à bòm àwo a jûŋ kì a wà nì sɨ̀ àŋena.

⁴²Ka wa n-bèyn jɨm sɨ̂ fòyn vzɨ̀ a wà choʼ lèm a Bôbo Fɨyini. Ka wa n-lèsɨ̀ ìkôŋ i mɨ̂kàyn nɨ̀ và zɨ̂ a wà n-kelɨ sɨ̂ Devìt ɨ wul ɨ̀ felɨnɨ nɨ̀ và.”