2 Chronicles 34
Jòsayà ɨ saʼ Judà
1Jòsayà nɨn læ koʼ ɨfôyn ghɨ bèŋsɨ̀ nfama ɨ saʼ a Jèlusalèm sɨ a bèŋsɨ̀ mɨ̀vɨm ɨ̀n tal njvà ìmòʼ. 2Wù n-læ nà jelɨ̀ kɨ avɨ̀ nɨ̀ bò ŋweyn Devìt nî kɨ àwo kì a kɨ n-ghɨ a jûŋ asɨ nɨ̀ Bôbo Fɨyini fyeʼtɨ̂ wì.
3À nà n-ghɨ bèŋsɨ̀ nfama ta Jòsayà sɨ saʼ, wu bu ghɨ kɨ wayndà, wu zɨ̀tɨ̀ ɨ nà sɨ koʼsɨ̂ Fɨyini fɨ bò ŋweyn Devìt. A nà ghɨ a bèŋsɨ̀ ìvɨm njvàsɨ̀ bò, wu zɨ̀tɨ sɨ lìsi ɨlweʼ mɨyìnì nɨ̀ ɨ̀bwaŋ Ashelà nɨ̀ ɨ̀nfyèʼsɨ̀ a Judà nɨ̀ Jèlusalèm. 4Wu n-læ meyn bè ghɨ bɨ̀ytɨ̀ ɨ̀bwaŋ ifu nɨ̀ Bâl nɨ̀ ɨ̀bwaŋ vzɨ̀ a ghɨ n-nyôʼ ileŋ ateyn a wu nà n-baʼsɨ afu ɨ koʼsɨ ɨ̀toʼ Ashelà nɨ̀ ɨ̀nfyèʼsɨ̀ nò ɨ̀ jɨ̀m. Ghɨ n-læ bɨ̀ytɨ ɨfwo ateyn ɨ waŋtɨ atû ìsè nɨ̀ ghelɨ ghì a ghɨ nà n-koʼsɨ ɨ̀nfyèʼsɨ̀ ateyn. 5Jòsayà nɨn læ meyn nyòʼ ɨ̀vɨf ɨ ghelɨ ghì a ghɨ nà n-koʼsɨ mɨ̀yìnì ɨ̀n lì atû àbaŋ. Wu n-læ nì awo nâ kèynà têyn Judà nɨ̀ Jèlusalèm ɨ nà sɨ layn ta isaʼi nɨn dyêyn. 6Wu n-læ ni kɨmɨ tì a ntèʼsɨ Mànasè nɨ̀ Eflèm kɨ̀mɨ nɨ̀ Simìyòn sɨ ndù sɨ chem a Naftalì, ɨ ni kɨmɨ ɨlwèʼ ghè a wu nà n-ghɨ a mbæ̀sɨ ateyn. 7Wù n-læ meyn bɨ̀ytɨ̀ ɨ̀bwaŋ ifu nɨ̀ mɨ̀yìnì nɨ̀ ɨtôʼ ɨ Ashelà ɨ Fɨyini fɨ kifɨ ɨ gvà ɨ̀nfyèʼsɨ wu nà ghɨ kɨ ta ɨnkfɨŋ. Wù n-beytɨ meyn kɨmɨ ɨ̀bwaŋ vzɨ̀ a ghɨ nà n-nyoʼ ileŋ ateyn kɨ̀ Isìlæ̀ ì jɨ̀m, ɨ kasi ndù sɨ a Jèlusalèm.
8Jòsayà nɨn læ lèm ilaʼ nɨ̀ ndô Fɨyini nɨ̀ ìlayni ta isaʼi nɨn dyêyn a nà ghɨ a bêŋsɨ̀ njvàsɨ̀ nfama, wu choʼ Shafàn ɨ wâyn Azalìyà nɨ̀ Maseyà ɨ wul ɨ vzɨ̀ a wu nà n-nyaʼ lem awo na àŋena faytɨ ndô Bôbo Fɨyini ɨ Fɨyini fɨ ŋweyn fɨ.
9Wu n-chòʼtɨ ghelɨ nâ ghèyn/ateyn ɨ ndu yeyn Hìlkayà ɨ ngàŋ ndô Fɨyini i ngaŋtɨnɨ ɨ fu ɨkwo vzɨ̀ a ghelɨ Levì nà n-fsɨtɨ ɨchfɨ ndo nɨ̀ Fɨyini fɨ. Ghɨ nà n-fsɨ sɨ̂ ghelɨ Mànasè nɨ̀ Eflèm nɨ̀ ghelɨ Isìlæ̀ nô ghɨ̀ jɨ̀m ta ghɨ n-faŋ./nà n-bu chi kɨmɨ ŋêyn ghelɨ Judà nɨ̀ ɨ ghɨ Benjamìn kɨ̀mɨ nɨ̀ ghelɨ Jèlusalèm. 10Wu kæ fu ɨkwo ateyn sɨ̂ ghelɨ ghì ghɨ̀ tal a ghɨ choʼ na àŋena ni ifêl ateyn a ndo nɨ̀ Bôbo Fɨyini. Ghelɨ nâ ghèyn ɨ nà sɨ làʼ ghelɨ ghɨ felɨnɨ ghì a ghɨ n-kasi baʼlɨ ɨlwêʼ a ndo nɨ̀ Bôbo Fɨyini ɨ lèm ɨghêyn ghɨ nà kasî ghɨ kɨ sɨ ighɨ. 11Àŋena nɨn fu meyn kɨmɨ ɨ̀kwo sɨ̂ ghelɨ ghì a ghɨ n-bâʼlɨ̀ nɨ̀ ɨghî a ghɨ mbayn ɨfwo na àŋena yuyn ngòʼsɨ̀ ma ghɨ chuyn meyn nɨ̀ ɨ̀nkàʼ mzɨ̀ a ka ghɨ bayn ɨtu nɨ̀ àchfɨ̂ a ndo nɨ̀ Bôbo Fɨyini kì a tɨfôyn tɨ̀ nɨn læ visi yi kòlì.
12Ghelɨ ateyn nɨn ni meyn ìfêl ateyn kɨ̀ ighel ta ghɨ n-bè. À nà n-tisɨ̂ Johàt ŋêyn Obàdayà ɨ ghelɨ Levì isas i ndo nɨ̀ Mèlalì nɨ̀ Zèkàliyà kɨ̀mɨ nɨ̀ Meshulàm ɨ wul ɨ̀ ndo nɨ̀ Kohàt. Ghelɨ Levì ghɨ li nà n-ghɨ kɨmɨ ghɨ a ghɨ ghelɨ buʼ ɨ̀fwo nô ghɨ̀ jɨ̀m. 13Ghelɨ Levì ghɨ li nà n-kinî ghelɨ ghɨ felɨnɨ ghì a ghɨ nà n-felɨ̀ tɨ̀nkì tɨ ifèl nô tɨ̀ jɨ̀m. Ghɨli nyâʼ àwo lemà, ghɨli tisɨ̂ ghelɨ, ghɨli ɨ chî àchfɨ̂ a ndosɨ.
Hìlkayà ɨ yeyn ŋwàʼlɨ̀ ìsaʼ i Fɨyini/nɨ̀ Fɨyini fɨ
14À nà n-ghɨ ta ghɨ fvɨ̀sɨ̀ ɨkwo vzɨ̀ a ghɨ nà n-fu a ndo nɨ̀ Bôbo Fɨyini, Hìlkayà ɨ yeyn ŋwàʼlɨ̀ ìsaʼ nɨ̀ Bôbo Fɨyini zɨ̀ a Bôbo nɨn fu sɨ̂ Mosìs. 15Hìlkayà nɨn yeyn tî ɨ bè sɨ̂ Shafàn ɨ wul ɨ vzɨ̀ a wu nà n-nyaʼ lem awo na wù yeyn meyn ŋwàʼlɨ̀ ìsaʼ nɨ̀ Bôbo Fɨyini. Wu n-bè tî ɨ fu ŋwàʼlɨ̀ àteyn sɨ̂ Shafàn.
16Shafàn ɨ kæ lì sɨ ndu nɨ̀ ŋwàʼlɨ àteyn sɨ̂ fòyn sɨ be sɨ̂ fòyn na ghelɨ ghì a ghɨ n-tisɨ ifêl nɨn nî nô mɨ ghà ta wà tî fù/bè sɨ̂ àŋena. 17Àŋena nɨn fu meyn fvɨ̀sɨ̀ ɨ̀kwo vzɨ̀ a wu nà n-ghɨ a ndo nɨ̀ Bôbo Fɨyini sɨ̂ ghelɨ ghì a ghɨ nà n-tisɨ ifêl nɨ̀ ɨghî a ghɨ n-felɨ̀ felɨ. 18Shafàn nɨn be meyn kɨmɨ na Hìlkayà ɨ ngàŋ ndô Fɨyini fu meyn ŋwàʼlɨ̀ sɨ̂ mà. Wu n-bè tî ɨ kæ jaŋ alêʼ ateyn sɨ̂ fòyn.
19A nà ghɨ ta fòyn yvɨ iwo zɨ̀ a ghɨ nyàʼ isaʼ wu bàytɨ̀ ndzɨsɨ ŋweyn, 20ɨ kæ be sɨ̂ Hìlkayà ɨ wâyn Shafàn nɨ̀ Abdòn ɨ wâyn Mikà nɨ̀ Shafàn ɨ wul ɨ vzɨ̀ a wu nà nyaʼ kɨ̀mɨ nɨ̀ Asayà vzɨ̀ a wu nà n-baʼsɨ sɨ̂ fòyn na, 21“Yì ndu bɨ̀f sɨ̂ Bôbo Fɨyini a ma aleʼ ghesɨ̀ ghelɨ ghì a ghɨ faŋ a Judà nɨ̀ Isìlæ̀ kûm ìwo zɨ̀ a ghɨ nyàʼ a ŋwàʼlɨ̀ afêyn a ghɨ yèyn têyn.
22Hìlkayà ŋêyn ghelɨ ghì a fòyn nɨn tum ɨ ndù sɨ yeyn nfèʼtɨ̀ ìki ɨ Huldà ɨ wî Shalùm ɨ wâyn Tokhàt. Tokhàt nà n-ghɨ wâyn Haslà vzɨ̀ a wu nà n-lem ndzɨ sìsɨ̀ a ghɨ nà n-mâʼ a ndo nɨ̀ Bôbo Fɨyini. Nfèʼtɨ̀ nâ yèyn nà n-chî a ntèʼ ì lì a Jèlusalèm ghɨ toŋtɨ̂ na ànkùmtɨ̀ a ntèʼ.
23Wu n-læ bè sɨ̂ àŋena na yì ndu bè sɨ̂ wùl ɨ̀ vzɨ̀ a wù tùm zɨ na, 24‘À ti iwo zɨ̀ a Bôbo Fɨyini bè, wu n-bè na mɨ nì ngeʼ ì ghaʼnɨ ilaʼ afêyn ɨ̀ nì sɨ̂ ghelɨ ateyn, awo kì nô à jɨ̀m ta ghɨ nyàʼ a ŋwàʼlɨ̀ afî a ghɨ jàŋ sɨ̂ fòyn Judà. 25Ɨtoŋ wom nɨn yafɨ nô sɨ a ŋaŋ kûm àwo kì nô à jɨ̀m a àŋena nì, àŋena beyn men jɨm sɨ̂ mà nà fu tɨ̀fu, koʼsɨ̂ mɨ̀yìnì. Mɨ n-màʼ ngeʼ nɨ̀ ɨ̀toŋ ɨ yafɨnɨ ma wùl kàʼ wu bû kfɨ̀nɨ. 26Bè sɨ̂ fòyn Judà vzɨ̀ a wù tùm zɨ na à ti iwo zɨ̀ a Bôbo Fɨyini, ɨ Fɨyini fɨ Isìlæ̀ bè kûm ìsaʼ zɨ̀ a ghɨ n-jàŋ wu yvɨ. 27Wu nà kumî ɨ̀wuyn ɨ fi ngvɨmlɨ ngêŋ ŋweyn asɨ nɨ̀ Fɨyini fɨ ta wù yvɨ iwo zɨ̀ a Fɨyini fɨ nɨn bè kûm ilaʼ nâ yèynì nɨ̀ ghelɨ ateyn. Wù n-gvɨmlɨ meyn ngêŋ ŋweyn ɨ bàytɨ̀ ndzɨsɨ ŋweyn ɨ̀ dzɨ̀ a ma asɨ, ma yvɨ meyn ìdzɨ̂ ìzæ. À bè Bôbo Fɨyini. 28Mɨ n-nî wì ngeʼ nâ yèyn sɨ̂ ìlaʼ nâ yèynì ɨ̀ faŋ tɨ̀ ni sɨ̂ ghelɨ ghèyn a ghɨ n-chi ateyn lvɨ̂yn a bu kɨ ɨlvɨ ta wà kàsi kfa ndù yeyn ghɨ̀bo gha ghɨ gvɨ̀mì và nɨ̀ mbôynɨ̀. Wa n-yeyn wi ngeʼ zɨ̀ a mɨ n-nì ilaʼ afêyn ɨ̀ nì sɨ̂ ghelɨ ghèyn a ghɨ n-chi afêyn. ”
Àŋena ɨ kæ kasi sɨ ndu sɨ̂ fòyn. 29A nà ghɨ ta ghelɨ ateyn kàsi ndù, fòyn ɨ kæ yvɨ̀ŋtɨ chyeʼsɨ Judà nɨ̀ ɨsɨ Jèlusalèm nô sɨ̀ jɨ̀m. 30Fòyn ŋêyn chyeʼ nâ sèynsɨ̀ nɨ̀ ghelɨ Judà nɨ̀ ghelɨ Jèlusalèm baʼsɨ̂ nɨ̀ ngàŋsɨ ndô Fɨyinisɨ nɨ̀ ghelɨ Levì nô ghɨ̀ jɨ̀m ɨ koʼ a ndo nɨ̀ Bôbo Fɨyini kɨ̀ sɨ zɨ̀tɨ̀ a ghelɨ ghɨ bolɨ sɨ koʼ sɨ chem ateyn nɨ ghɨ to. Wu jàŋ àwo kì a ghɨ nyàʼ a ŋwàʼlɨ̀ mɨ̀kàyn nɨ̀ Bôbo Fɨyini afî a ghɨ n-yeyn a ndo nɨ̀ Bôbo Fɨyini. 31Fòyn ɨ timi alèʼ ghè a wù n-nî wu nà ti ateyn a ngùŋ ntoʼ, ɨ kasi yɨ mɨkâyn sɨ a nfɨ asɨ nɨ̀ Bôbo Fɨyini na wù na jùmtɨ̀ Bôbo Fɨyini, lêm tɨ̀saʼ tɨ ŋweyn, nî àwo kì a wù bè nɨ̀ àtem a ŋweyn à jɨ̀mà, kɨ̀mɨ nɨ̀ àyvɨs a ŋweyn à jɨ̀mà. Wu n-be meyn kɨmɨ na wù na yvɨnɨ̂ tɨ̀saʼ tɨ mɨkàyn tìtɨ̀ a ghɨ n-nyàʼ a ŋwàʼlɨ̀ afêyn.
32Wu n-ni meyn ghelɨ Jèlusalèm nɨ̀ ghelɨ Benjamìn nô ghɨ̀ jɨ̀m ɨ chfɨ̀nɨ̀ sɨ nà lem isaʼ i mɨ̂kàyn nâ yèynì. Ghelɨ Jèlusalèm nɨn nì têyn ɨ kasi yɨ mɨkâyn mzɨ̀ a àŋena nɨn læ yɨ ŋêyn Fɨyini fɨ ɨ Fɨyini fɨ ghɨ̀bo àŋena. 33Jòsayà nɨn læ meyn fvɨ̀sɨ̀ ɨ̀nfyèʼsɨ̀ ilaʼ ghè a ghelɨ Isìlæ̀ nà n-chi ateyn ɨ nì nô mɨ ndà ta wu nà n-chi a Isìlæ̀ ɨ nà koʼsɨ̂ Bôbo Fɨyini ɨ Fɨyini fɨ àŋena. A nà ghɨ ta Josayà nɨn chi wùl nɨn bu læ faŋ tɨ̀ nà koʼsɨ Bôbo Fɨyini ɨ Fɨyini fɨ ghɨ̀bo àŋena.