2 Chronicles 35

Josayà ɨ yɨ a yɨ iyaʼsɨ

¹Fòyn Jòsayà nɨn læ meyn yɨ ayɨ iyaʼsɨ a Jèlusalèm sɨ ngvɨmlɨ Bôbo Fɨyini. Ghɨ n-læ sɨ nyam àyɨ nâ yèyn a mɨchi ìvɨm njvàsɨ̀ kæ̀ a njoŋ ɨyî àsɨ. ²Jòsayà nɨn lem meyn nô mɨ ngàŋ ndô Fɨyini ì kà atû ifèl nɨ̀ ŋweyn ɨ choʼtɨ àŋena na àŋena na faytɨ̂ felɨ̀ ìfêl i àŋena a ndô Fɨyini. ³Wù n-læ meyn bè sɨ̂ ghelɨ ndo nɨ̀ Levì ghì a ghɨ nà n-ghɨ ndyèynsɨ̀ sɨ a Isìlæ fî ghɨ ma àŋena lem meyn ngeŋsɨ àŋena sɨ a nyɨŋ sɨ̂ Bôbo Fɨyini na, “Yì lem antayntayn a mɨ̂kàyn nɨ̀ Bôbo Fɨyini a ndo nɨ̀ Bôbo Fɨyini afî a Sòlomòn ɨ wâyn Devìt ɨ fòyn Isìlæ̀ nɨn læ bàʼlɨ. Yi n-kelɨ wi sɨ nà beʼì chwô nɨ̀ ànkeyna a yi a mbèʼsɨ̀, yì na koʼsɨ̂ Bôbo Fɨyini, felɨ̀ sɨ̂ ghelɨ ɨ̀nfeynfɨ. ⁴Yì baʼtɨ ngêŋ sisɨ nà gvɨ̂tɨ̀ sɨ nà felɨ̀ a ndô Fɨyini kɨ̀ ndo nɨ̀ ndo ta asas a ndosɨ nɨn ghɨ kɨ̀ ighel ta fòyn Devìt ŋêyn wâyn ŋweyn fòyn Sòlomòn nɨn læ lèm/gwòtɨ.

⁵Yi n-kelɨ sɨ timi nɨ̀ ìnôyn i ghelɨ Levì ghɨ li ɨlwèʼ ɨ laynɨ sɨ nà gamtɨ ghelɨ isas i ndo isas i ndo. ⁶Yi na sɨ nyam àyɨ iyaʼsɨ, yi lèm ngeŋ sisɨ nɨ̀ ìlayni ta isaʼi nɨn dyêyn ɨ baʼtɨ ìfu ateyn sɨ gàmtɨ woynà ghi ɨ ghelɨ Isìlæ̀ ta ka àŋena ni nô mɨ ghà kɨ̀ ighel ta Bôbo Fɨyini nɨn bè sɨ /toynɨ a Mosìs.

⁷Jòsayà nɨn læ fu njɨ̀sɨ̀ baʼsɨ̂ nɨ̀ bzɨsɨ ndoŋsɨ nkam mɨ̀vɨm ɨ̀n tal nɨ̀ nyamsɨ mbòloʼ nkamsɨ̀ tal sɨ̂ ghelɨ Isìlæ̀ ghì nô ghɨ̀ jɨ̀m a ghɨ na n-ghɨ afu na àŋena fu ifu iyaʼsɨ. Ɨfwo nâ wèyn nɨn lu kɨ nô ɨfwo ghè a fòyn nà n-kelɨ.

⁸Ghelɨ ghɨ tisɨnɨ nɨ̀ fòyn nɨn fu meyn bula ghɨ chɨyn chɨyn àŋena sɨ̂ ghelɨ Isìlæ̀ nɨ̀ ngàŋsɨ ndô Fɨyinisɨ̀ kɨ̀mɨ nɨ̀ ghelɨ ndo nɨ̀ Levì. Hìlkayà nɨ̀ Zèkàliyà nɨ̀ Jehìyèl kɨ̀mɨ nɨ̀ ɨ̀tu ndo Fɨyini nɨn fu meyn woyn njɨ̀ nɨ̀ woyn bzɨsɨ nkamsɨ̀ bò nɨ̀ ighɨ ì bò-i a ghɨ ìfu i ayɨ iyaʼsɨ nɨ̀ nyamsɨ mbòloʼsɨ ighɨ ì tal sɨ̂ ngàŋsɨ ndô Fɨyini. ⁹Ghelɨ ghì a ghɨ nà n-tisɨ ghelɨ Levì ɨ Kònànayà nɨ̀ Shèmayà nɨ̀ Hàshabayà ɨ wâynà ŋweyn nɨ̀ Jeyèl kɨ̀mɨ nɨ̀ Jozabàd nɨn fu meyn woyn njɨ̀sɨ̀ nɨ̀ woyn bzɨsɨ nkamsɨ̀ tâyn sɨ ifu i ayɨ iyaʼsɨ nɨ̀ nyamsɨ mbòloʼsɨ ighɨ ì tâyn sɨ̂ ghelɨ Levì. ¹⁰À nà n-ghɨ ta ghɨ bàʼtɨ nô mɨ ghà ta ghɨ nà n-kelɨ sɨ baʼtɨ sɨ ayɨ iyaʼsɨ nâ ghàyn, ngàŋsɨ ndô Fɨyinisɨ ɨ timi ɨlwèʼ ifèl nɨ̀ àŋena kɨ̀mɨ nɨ̀ ghelɨ Levì inòyn inòyn kɨ̀ ighel ta fòyn nɨ̂n lèm. ¹¹Ghelɨ Levì nɨn læ meyn sɨ woyn njɨ̀sɨ̀ ghì a ghɨ n-fu ifu ayɨ iyaʼsɨ ateyn ɨ fu mɨluŋ mɨ̀ àteyn sɨ̂ ngàŋsɨ ndô Fɨyini àŋena mɨ̀sì ɨwùyn abaŋ ifu. À nà n-ghɨ tì ghelɨ Levì ɨ baʼtɨ̂ nyamsɨ ateynsɨ. ¹²Ghelɨ ndo nɨ̀ Levì nɨn baʼtɨ nyamsɨ ateyn tì, ɨ gwòtɨ̀ sɨ̂ ghelɨ Isìlæ̀ isas i ndo isas i ndo ta ka àŋena fu sɨ̂ Bôbo Fɨyini kɨ̀ ighel ta ghɨ nyàʼ a ŋwàʼlɨ nɨ̀ Mosìs. Àŋena nɨn ni kɨmɨ tì nɨ̀ nyamsɨ mbòloʼsɨ. ¹³Ghelɨ ndo nɨ̀ Levì ɨ nyòʼ ìfu ayɨ iyaʼsɨ ɨvɨ̀s kɨ̀ ta ghɨ n-bè ɨ kfè ìfu i laynɨ-i a ntòynsɨ̀ nɨ̀ ketɨ̀lsɨ̀ nɨ̀ ɨ̀kfaŋ ɨ nyàŋsɨ fvɨ̀ nɨ̀ ɨ̀nyeyn na ghelɨ kfɨl. ¹⁴A nà ghɨ ta àŋena nì mèsì, àŋena ɨ baʼtɨ sɨ̂ ngeŋsɨ àŋenasɨ ɨ baʼtɨ kɨmɨ sɨ̂ ngàŋsɨ ndô Fɨyinisɨ ɨ woyn Alòyn. Ngàŋsɨ ndô Fɨyinisɨ nà n-fu ìfu i nyoʼnɨ-i fî nyôʼ ɨ̀lwêʼ iso sɨ chem ta ka ɨtuʼ jɨ. À ti iwo zɨ̀ a ghelɨ ndo nɨ̀ Levì nɨn læ baʼtɨ sɨ̂ ngeŋsɨ àŋenasɨ ɨ baʼtɨ kɨmɨ sɨ̂ ngàŋsɨ ndô Fɨyinisɨ.

¹⁵Ghelɨ ghì a ghɨ nà n-buʼ ɨfwo ma à ti woyn Asàf nà n-ghɨ ɨlwèʼ ghè a Devìt nɨ̀ Asàf nɨ̀ Hemàn kɨ̀mɨ nɨ̀ Jedutun isɨ i baynɨ-i nɨ̀ fòyn Devìt nɨn lem àŋena ateyn. Ghelɨ ghì a ghɨ nà n-chi achfɨ̂ a mbàyn nɨn bu læ lù sɨ afu bòm ta woynà àŋena ghelɨ Levì nɨn baʼtɨ meyn nô mɨ ghà sɨ̂ àŋena.

¹⁶À ti ta ghɨ n-læ koʼsɨ Bôbo Fɨyini ayɨ iyaʼsɨ ɨ nì nô mɨ ghà achi nâ ghè, fu tɨ̀fu tɨ nyoʼnɨtɨ atû àbaŋ ifu nɨ̀ Bôbo Fɨyini kɨ ighel ta fòyn Jòsayà nɨ̀n bè. ¹⁷Ghelɨ Isìlæ̀ ghì a ghɨ nà n-chi a Jèlusalèm ɨlvɨ nâ ghè nɨ̀n yɨ meyn àyɨ iyaʼsɨ nɨ̀ àyɨ abayn bula fɨ̀shɨ̀k sɨ a mɨchi nsòmbo. ¹⁸Ghɨ n-bu læ yɨ ayɨ iyaʼsɨ a Isìlæ̀ a dzɨ nâ ghàyn kɨ̀ sɨ zɨ̀tɨ ɨtuʼ nɨ̀ Samwèl ɨ nfèʼtɨ̀ ì ghaʼnɨ sɨ koʼ sɨ chem layn. Fòyn ɨ̀lvɨ̀ nɨn ghɨ wi a Isìlæ̀ a wù tìmi yɨ ìnkì ayɨ nâ kèynà a Jòsayà nɨ̀ ngàŋsɨ ndô Fɨyinisɨ̀ nɨ̀ ghelɨ ndo nɨ̀ Levì baʼsɨ̂ nɨ̀ ghelɨ Judà nɨ̀ ɨghɨ Isìlæ̀ nô ghɨ̀ jɨ̀m a ghɨ nà n-ghɨ afu nɨ̀ ghelɨ Jèlusalèm. ¹⁹Ghɨ n-læ yɨ ayɨ nâ kèynà a bêŋsɨ̀ njvàsɨ̀ nfama ɨtuʼ ta Jòsayà nà n-saʼ/ta fòyn a Judà.

Jòsayà ɨ kfɨ.

²⁰À nà n-ghɨ ta Jòsayà kàsi bàʼlɨ̀ ndô Fɨyini, Nekò ɨ fòyn Ijìb ɨ koʼ sɨ nù a Kàchemìsh a mbæ̀ jvà Yuflèt, Jòsayà ɨ fvɨ ndù sɨ kòynɨ nɨ̀ ŋweyn iwòŋ./nu ŋweyn. ²¹Wu n-ndù tî, Nekò ɨ tum ntum sɨ̂ ŋweyn ɨ bè na, “Ghesɨ̀và nɨn kelɨ wi ngeʼ a fòyn Judà mɨ n-nù wì vâ lvɨ̂yn mɨtì nù mbàynɨ̀ semsɨ. Fɨyini fɨ be meyn na mà nyaŋsɨ nì. Ka wa n-tàysɨ Fɨyini bòm ta ghesɨ̀ ɨ̀nfeynfɨ nɨn ghɨ amoʼ ka wù bebsɨ vâ.

²²Mɨtì Jòsayà ɨ faŋ tɨ̀ yvɨ̀tɨ iwo zɨ̀ a Nekò bè, a ghɨ tì ma Fɨyini fɨ taŋi meyn sɨ̂ ŋweyn. Jòsayà ɨ kwo bɨ̀l asɨ a ghêl ɨ ndu kèʼ ŋweyn ibal a Megidò.

²³Mbàynɨ̀sɨ̀ ɨ tum fòyn Jòsayà wu bè sɨ̂ wùl ɨ̀ felɨnɨ nɨ̀ ŋweyn na wù li lù nɨ̀ ŋweyn bòm ta ghɨ lemsɨ meyn ŋweyn nô sɨ a ŋaŋ. ²⁴Ghɨ kæ suʼsɨ ŋweyn atû fɨ̀nchaʼ fɨ iwòŋ nɨ̀ ŋweyn ɨ̀ tom atu nɨ̀ fɨlifɨ ɨ kfa nɨ̀ ŋweyn a Jèlusalèm wù kfɨ, ghɨ gvɨ̀mì ŋweyn a ngvɨ̀misɨ nɨ̀ ghɨ̀bo ŋweyn. Ghelɨ Judà nɨ̀ ɨghɨ Jèlusalèm nɨn dzɨ meyn ŋweyn.

²⁵Nfèʼtɨ̀ ì ghaʼnɨ ɨ Jèlìmayà nɨn læ meyn bètɨ̀ ngeŋ, ɨ dzɨ̀ kûm Jòsayà. Ghelɨ ghì a ghɨ n-yem njàŋsɨ̀ ɨ yem njàŋsɨ ateyn ɨ bètɨ̀ Jòsayà sɨ koʼ sɨ chem layn. Iwo nâ yèynì ɨ nà sɨ ghɨ ìwo a nchînɨ̀ nɨ̀ ghelɨ Isìlæ̀ ghɨ fi nyaʼ lèm a ŋwàʼlɨ̀sɨ̀ ghê a ghɨ nyaʼ njàŋsɨ idzɨ̀ ateyn. ²⁶Awo a li-a kûm Jòsayà ta wu nà n-saʼ têyn ta wu nà n-yvɨnɨ Bôbo kɨ̀ ta ghɨ nyàʼ isaʼ nɨ̀ Bôbo Fɨyini, ²⁷nɨ̀ fɨ̀tɨtɨ̂ fɨ ŋweyn a nzɨ̀tɨ sɨ ndù sɨ gyòʼsɨ̀ nɨn ghɨ ma ghɨ nyaʼ meyn a ŋwàʼlɨ̀ nɨ̀ tɨ̀fôyn tɨ Isìlæ̀tɨ̀ nɨ̀ ɨtɨ Judàtɨ̀.