2 Chronicles 33

Mànasè ɨ saʼ a Judà

¹Mànasè nɨn koʼ ɨfôyn a judà ghɨ bèŋsɨ̀ njvàsɨ̀ bò ɨ̀ saʼ sɨ a bèŋsɨ̀ mɨ̀vɨm ɨ̀n tâyn. ²Wu n-læ meyn nì mbɨ asɨ nɨ̀ Bôbo Fɨyini sɨ nà jumtɨ awo a chaʼnɨnɨ-a kì a ghelɨ tɨlaʼ ghì a Bôbo Fɨyini nɨn læ saŋ fvɨ̀sɨ asɨ nɨ̀ ghelɨ Isìlæ̀. ³Wu n-læ meyn kasi bàʼlɨ̀ ɨ̀lwêʼ ɨ mɨyini mzɨ̀ a bò ŋweyn Hèzèkayà nɨn læ bèytɨ. Wu n-læ meyn bàʼlɨ kɨmɨ ɨ̀bwaŋ ifu sɨ̂ mɨ̀yìnì mɨ̀ Bâl nɨ̀ ɨvzɨ̂ a fɨyini fɨ kifɨ ɨ Ashelà nà n-ti atu àteyn. Wu nà n-gvɨmtɨ̂ sɨ̂ ɨ̀fwo nâ wèyn koʼsɨ̂ ɨ̀mêyn. ⁴Mànasè nɨn baʼlɨ meyn ɨ̀bwaŋ ifu sɨ̂ mɨ̀yìnì a ndo nɨ̀ Bôbo Fɨyini ma Bôbo Fɨyini nɨn be meyn na ghɨ na koʼsɨ̂ kɨ ŋweyn a ndo nâ ghàyn. ⁵Wu n-baʼlɨ meyn ɨ̀bwaŋ ifu sɨ nà koʼsɨ mɨ̀yìnì atu àteyn kɨ tɨwe tɨ ndo nɨ̀ Bôbo Fɨyini tɨ̀ jɨ̀m. ⁶Wu n-læ meyn nì na woyn ŋweyn ghɨlûmnɨ̀ na toynɨ̂ ɨvɨ̀s a ghɨ ìkoʼsɨ sɨ̂ mɨ̀yìnì a ibal i Ben Hinòm. Wu n-læ meyn nà fyeŋ fɨnyaʼ fêʼtɨ̀ àwo kì a kɨ n-ghɨ sɨ jæ sɨ gàyn, kfɨlɨ àvɨ̂ŋ. Wù n-ni meyn chwòsɨ̀ mbɨ asɨ nɨ̀ Bôbo Fɨyini ɨtoŋ Bôbo ɨ yaf.

⁷Mànasè nɨn faytɨ meyn ànfèʼsɨ̀ ɨ tum a ndo nɨ̀ Bôbo Fɨyini a ghɨ tì ma Bôbo Fɨyini nɨn læ meyn bè sɨ̂ Devìt ŋêyn Sòlomòn na ghɨ lum koʼsɨ̂ kɨ ŋweyn a ndo afêyn a Jèlusalèm afêyn a wu n-choʼ antêynɨ̀ àsas a ndo a Isìlæ̀. ⁸Ghelɨ Isìlæ̀ kæ nà lêm tɨ̀saʼ temtɨ nɨ̀ àwo kì nô à jɨ̀m a mɨ n-læ fu toynɨ̂ a Mosìs, a mà læ faŋ tɨ̀ fì tɨ̀ fvɨ̀sɨ àŋena ilaʼ afêyn a mɨ n-fu sɨ̂ ghɨ̀bo àŋena têyn. ⁹Mànasè nɨn læ meyn tisɨ ghelɨ Judà nɨ̀ ghelɨ Jèlusalèm, àŋena nì mbɨ chwô ghelɨ tɨlaʼ ghì a Bôbo Fɨyini nɨn bebsɨ asɨ nɨ̀ ghelɨ Isìlæ̀.

¹⁰Bôbo Fɨyini nɨn taŋi meyn sɨ̂ Mànasè ŋêyn ghelɨ ŋweyn mɨtì àŋena faŋ tɨ̀ yvɨ̀nɨ. ¹¹Bôbo ɨ kæ tum ɨtu sugèyʼsɨ Asilìyà àŋena ɨ gvi ghalɨ Mànasè, ɨ̀ we fɨ̀nchaʼ a ŋweyn azue, ɨ kulɨ ŋweyn nɨ̀ nchaʼsɨ ma ghɨ faytɨ nɨ̀ ìdyayni ɨ ndù nɨ̀ ŋweyn a Babilòn. ¹²A nà ghɨ ta Mànasè nɨn ghɨ a ngeʼ, wu ngvɨmlɨ ngêŋ ŋweyn ɨ dzɨ̀ sɨ̂ Bôbo Fɨyini ɨ Fɨyini fɨ ŋweyn nɨ̀ àtem à jɨ̀mà. ¹³Wu n-jèm/dzɨ̀ tî, Bôbo Fɨyini ɨ yvɨtɨ ìwo zɨ̀ a wù n-bê ɨ keli ìkoynsɨ isuyn sɨ̂ ŋweyn ɨ kæ kasi sɨ gvi nɨ̀ ŋweyn a Jèlusalèm a ŋweyn ilaʼ. Mànasè ɨ kæ sɨ nà kya na Bôbo Fɨyini nɨn ghɨ Fɨyini.

¹⁴Mànasè nɨn kasi gvì tî, ɨ kasi bàʼlɨ̀ àzɨ a mbàyn zɨ̀ a yì jɨ̀ŋ kal ntèʼ Devìt dzɨ abàs ghè a ɨchfɨ̂ iyvɨ nɨn sœ ateyn afoŋlɨ a jvâ Gihòn sɨ ndù sɨ chem ɨchfɨ̀ ghè a mbàyn zɨ̀ a ghɨ n-beyʼlɨ sfɨsɨ afu jɨŋ kal kfɨyn Ofèl. Wu n-læ meyn bàʼlɨ koʼsɨ nɨ̀ mbàyn àteyn nò iyvɨ. Wù n-læ meyn lèm ɨ̀tu sugèyʼsɨ̀ a ntèʼsɨ ghê a ghɨ nà n-ghɨ ma ghɨ baʼlɨ meyn mbàyn jɨ̀ŋ kal a Judà.

¹⁵Wù n-læ meyn lìsì mɨ̀yìnì mzɨ̀ nɨ̀ ɨ̀nfyèʼsɨ̀ vzɨ̀ a wu nà n-ghɨ a ndo nɨ̀ Bôbo Fɨyini nɨ̀ ɨ̀bwaŋ ifu vzɨ̀ a wu n-læ bàʼlɨ a kfɨyn ghè a ndô Fɨyini na ghɨ ateyn ɨ lìsi kɨmɨ a Jèlusalèm ɨ laŋ fvɨ̀sɨ̀ sɨ a ntèʼ Jèlusalèm. ¹⁶Wù n-læ meyn kasi lèm àbaŋ ifu nɨ̀ Bôbo Fɨyini nɨì ìlayni ɨ fu tɨfu sɨ nà chi nɨ̀ mbôynɨ̀ nɨ̀ tɨ̀futɨ ayòŋnɨ̀ sɨ atu àteyn. Wù n-læ meyn bè sɨ̂ ghelɨ Judà na àŋena na koʼsɨ̂ Bôbo Fɨyini ɨ Fɨyini fɨ Isìlæ̀. ¹⁷Mànasè nɨn lem abaŋ a Bôbo Fɨyini mɨtì ghelɨ Jèlusalèm ɨ nà fu kɨ fu tɨfu ɨlwèʼ ɨ mɨyìnì nâ mzɨ̀ mɨtì fu sɨ̂ Bôbo Fɨyini ɨ Fɨyini fɨ àŋena fɨ.

¹⁸Awo a li-a kì a Mànasè nɨn læ ni baʼsɨ nɨ̀ ìjêm zɨ̀ a wù n-læ jèm sɨ̂ Fɨyini fɨ ŋweyn fɨ nɨ̀ àwo kì a asɨ a baynɨ-a nɨn læ bè sɨ̂ ŋweyn izɨyn nɨ̀ Bôbo Fɨyini ɨ Fɨyini fɨ ghelɨ Isìlæ̀ nɨn ghɨ ma ghɨ nyàʼ a ŋwàʼlɨ̀ nɨ̀ tɨ̀fôyn tɨ Isìlæ̀. ¹⁹Awo kì a Mànasè nɨ̀n læ nà jem sɨ̂ Bôbo nɨ̀ dzɨ sɨ̀sɨ̀ a Fɨyini fɨ nɨn læ bèynsɨ ŋweyn ateyn kɨ̀mɨ nɨ̀ àwo a bɨ-a kì a wu n-læ nì baʼsɨ̂ nɨ̀ ɨ̀lwêʼ vzɨ̀ a wù n-læ bàʼlɨ mɨ̀yìnì nɨ̀ ɨ̀bwaŋ vzɨ̀ a ghɨ nà n-tom Ashelà ɨ Fɨyini fɨ kifɨ ateyn nɨ̀ ɨ̀nfyèʼsɨ̀ nɨn ghɨ ma ghɨ nyaʼ meyn lèm a ŋwàʼlɨ̀sɨ ghê a ghɨ nyàʼ awo asɨ a baynɨ-a ateyn. Mànasè nà n-nî àwo nâ kèynà jæ ta ka wù ngvɨmlɨ ngêŋ ŋweyn. ²⁰Mànasè nɨn læ kfa yeyn ghɨ̀bo ŋweyn ghɨ gvɨ̀mì ŋweyn a ŋweyn a ntoʼ. Amòn ɨ wâyn ŋweyn ɨ koʼ ɨfôyn.

Amòn ɨ saʼ Judà

²¹Amòn nɨn læ se sɨ koʼ ɨfôyn a Judà ghɨ bèŋsɨ̀ mɨ̀vɨm ɨ̀n bò njvàsɨ̀ bò ɨ saʼ sɨ a bèŋsɨ̀ bò. ²²Wu n-læ meyn nì mbɨ asɨ nɨ̀ Bôbo Fɨyini kɨ ighel ta bò ŋweyn Mànasè nɨn læ nì. Wù n-læ meyn nà koʼsɨ̂ ɨ̀nfyèʼsɨ̀ vzɨ̀ a bò ŋweyn Mànasè nɨn læ faytɨ, fu tɨ̀fu sɨ̂ ɨ̀mêyn. ²³Amòn nɨn bu læ ngvɨmlɨ ngêŋ ŋweyn asɨ nɨ̀ Bôbo Fɨyini a dzɨ ghê a bòbò ŋweyn Mànasè nɨn læ ngvɨmlɨ, mɨtì wu nì mbɨ ɨ ndu kɨ nɨ̀ àsɨ-a.

²⁴Ghelɨ ghɨ tisɨnɨ nɨ̀ Amòn ɨ læ baʼtɨ ɨ ghal ɨ zue ŋweyn a ŋweyn a ntoʼ. ²⁵Ghɨ n-zue tî, ghelɨ ilaʼ nâ ghàyn ɨ zuetɨ ghelɨ ghɨ tisɨnɨ nâ ghì ɨ koʼsɨ Jòsayà ɨ wâyn ŋweyn sɨ a fòyn.