2 Chronicles 14

Asà ɨ koʼ fòyn a Judà

¹Abijà nɨn kfɨ meyn ghɨ gvɨ̀mì ŋweyn a ntèʼ nɨ̀ Devìt. Wu n-kfɨ tî, Asà ɨ wâyn ŋweyn ɨ yɨ ŋweyn sɨ a fòyn, mbôynɨ̀ ɨ nà ghɨ ilaʼ nâ ghè sɨ a bèŋsɨ̀ ìvɨm.

²Asà nɨ̀n nî meyn àwo kì a kɨ nà n-jofɨ̀ fî ghɨ àtì-ati asɨ nɨ̀ Bôbo Fɨyini ɨ Fɨyini fi ŋweynfɨ. ³Wù n-lisi meyn ɨ̀bwaŋ ɨ tɨfu vzɨ̀ a ghɨ nà n-koʼsɨ mɨ̀yìnì mɨ̀ ɨ̀tum ateyn, ɨ kòytɨ̀ ɨ̀tôʼ ɨ dyeblɨnɨ baʼsɨ̂ nɨ̀ ngòʼsɨ̀, ɨ gvèytɨ̀ ɨ̀tôʼ vzɨ̀ a ghɨ nà n-tom, koʼsɨ̀ Ashèlà. ⁴Asà nɨ̀n be meyn sɨ̂ ghelɨ Judà na àŋena na nî àwo kì a Bôbo Fɨyini ɨ Fɨyini fɨ ghɨ̀bo àŋena nɨn kɨŋ, yvɨnɨ̂ ŋweyn, lêm tɨ̀saʼ tɨ ŋweyn tɨ nî àwo kì a wù bè na àŋena ni. ⁵Asà nɨ̀n bebsɨ meyn kɨmɨ ɨ̀lwêʼ vzɨ̀ a ghɨ n-koʼsɨ mɨ̀yìnì ateyn, ɨ kòytɨ̀ ɨ̀bwaŋ ifu vzɨ̀ a ghɨ n-nyôʼ ileŋ ateyn nô mɨ a ntèʼ ì kà a Judà, Judà ɨ nà kelɨ mbôynɨ̀ isas isaʼ nɨ̀ ŋweyn. ⁶Wù n-baʼlɨ meyn ntèʼsɨ a Judà ɨ tɨm mbàyn bòm ta ilaʼ ateyni nà n-sɨ kelɨ mbôynɨ̀. Nô wùl nɨn bu læ fi nù ŋweyn bòm ta Bôbo Fɨyini nà n-sɨ ghɨ ma wù fu meyn mbôynɨ̀ sɨ̂ ŋweyn.

⁷Asà nɨ̀n be meyn sɨ̂ ghelɨ Judà na, “Ghesɨ̀nà baʼlɨ ntèʼ sêynsɨ̀ ɨ̀ bàʼlɨ̀ mɨ̀zɨ ateyn ɨ̀ bàʼlɨ àlêʼ a nchì baʼsɨ̂ nɨ̀ mbàyn ɨ̀ we mbàŋsɨ dyaŋsɨnɨsɨ ateyn. A bu kelɨ kɨ ghesɨ̀nà ilaʼ nâ yèynì bòm ta ghesɨ̀na nî meyn ìwo zɨ̀ a Bôbo Fɨyini nɨn kɨŋ, wù fu mbôynɨ̀ sɨ̂ ghesɨ̀nà kɨ ɨbyâs ɨ̀ jɨ̀m. Àŋena kæ zɨ̀tɨ̀ sɨ bàʼlɨ̀, ɨ bàʼlɨ mèsì nô mɨ ghà kɨ̀ a jûŋ.

⁸Fòyn Asà nà n-kelɨ sugèyʼsɨ̀ nkam ighɨ ì tal ma sɨ lù a Judà, kelɨ nkyàsɨ iwòŋ sɨ ghaʼlɨnɨsɨ nɨ̀ àwoŋa. Wu nà n-kelɨ kɨmɨ sugèyʼ sɨ lisɨ nkam ighɨ ì bò nɨ̀ sugèyʼsɨ̀ ighɨ nfama ma sɨ lù a Benjamìn, kelɨ nkyàsɨ iwòŋ sɨ telâsɨ̀ baʼsɨ̂ nɨ̀ mɨ̀nchya. Àŋena nô ghɨ̀ jɨ̀m nà n-ghɨ sugèyʼsɨ̀ faytɨ̂ kya sɨ tɨm iwoŋ, fî kelɨ àdyaʼ.

⁹Zelà ɨ wul ɨ̀ Kûsh nɨ̀n gvî meyn sɨ nu àŋena nɨ̀ sugèyʼsɨ̀ sɨ chem molàyn nɨ̀ mɨ̀chaʼ mɨ̀ ìwòŋ ighɨ ì tal. Àŋena nɨn zɨ meyn ɨ chem nò a Màleshà. ¹⁰Asà ɨ fvɨ ndù sɨ nu àŋena, àŋena ɨ timi ɨlwèʼ ɨ nunɨ nɨ̀ àŋena afoŋlɨ a Zefatà a ngùŋ Màleshà.

¹¹Wu dzɨ̀ sɨ̂ Bôbo Fɨyini ɨ Fɨyini fɨ ŋweynfɨ ɨ bè na, “Wùl ɨ̀lvɨ̀ nɨn ghɨ wi ta vâ a Bôbo Fɨyini sɨ gàmtɨ ghelɨ ghì a ghɨ n-kelɨ wi adyaʼ sɨ nu mɨ̀nto àdyàʼ. Gàmtɨ ghes a Bôbo Fɨyini ɨ Fɨyini feyfɨ, ghès nɨn yeʼtɨ̂ kɨ a vâ ma ghès;ì gvì sɨ nu sugèyʼ sèynsɨ̀ sɨ dvɨ̂ tèyn kɨ̀ ta ka izɨyn ìzæ ngaŋtɨ/izɨyn nɨ̀ và. Wa n-ghɨ Fɨyini feyfɨ a Bôbo Fɨyini, ka wa n-vìsi wùl ɨ̀ tɨm yɨ̀ vâ/wùl ɨ̀ to chwò và.”

¹²Bôbo Fɨyini ɨ tɨm yɨ ghelɨ Kûsh, Asà ŋêyn ghelɨ Judà ɨ ki yeyna/asɨ nɨ̀ Asà ŋêyn ghelɨ Judà, ghelɨ Kûsh ɨ leʼ ɨ nyɨŋnɨ. ¹³Asà ŋêyn sugèyʼsɨ ŋweynsɨ ɨ nyɨŋ ibàm nɨ̀ àŋena ɨ ndu chem a Gelà ɨ zuetɨ sugèyʼsɨ Kûsh kɨ̀ sɨ idvɨ̀, ɨsîsɨ̀ a sɨ faŋ ɨ nà bu kelɨ wi adyaʼ sɨ nù, ma Bôbo Fɨyini ŋêyn sugèyʼsɨ ŋweynsɨ zuetɨ meyn àŋena. Ghelɨ Judà ɨ kumtɨ ɨ lù nɨ̀ ɨ̀fwo ɨ jûŋ nɨ̀ àŋena kɨ̀ sɨ idvɨ̀. ¹⁴Àŋena nɨn læ meyn bebsɨ nô mɨ ntèʼ ì kà ta yì n-baʼsɨ a ngùŋ ntèʼ Gelà bòm ta Bôbo Fɨyini nɨn nî meyn, ifâyn i bemnɨ-i ɨ ku àŋena sùgèyʼsɨ Asà ɨ kumtɨ ɨ lù nɨ̀ ɨ̀fwo ɨ jûŋ a ntèʼsɨ nâ ghàyn sɨ ɨfwo a ghɨ yɨ̀ iwòŋ. ¹⁵Àŋena nɨn nu meyn ghelɨ ghì a ghɨ nà n-mâʼ bzɨsɨ ɨlwèʼ ghè a àŋena bɨ̀/nɨn chi ateyn, ɨ kumtɨ ɨ lù nɨ̀ bzɨsɨ ndoŋ nɨ̀ njɨ̀sɨ̀ baʼsɨ̂ nɨ̀ kàmêlsɨ̀, ɨ kasi ndù a Jèlusalèm.