2 Chronicles 13

Abijà ɨ koʼ fòyn a Judà

¹À nà n-ghɨ ta Jèlobòwàm saʼ sɨ a bèŋsɨ̀ njvàsɨ̀ nfam, Abijà ɨ koʼ fòyn a Judà. ²Wù n-læ saʼ a Jèlusalèm sɨ a bèŋsɨ̀ tal. Nà ŋweyn nà n-ghɨ Makà ɨ wâyn Ulìyèl ɨ wul ɨ̀ Gibìyà.

Iwoŋi ɨ læ fvɨ̀ antêynɨ̀ nɨ̀ Abijà ŋêyn Jèlobòwàm. ³Abijà nɨn læ choʼtɨ sugèyʼsɨ ŋweyn sìsɨ̀ a sɨ n-faytɨ kya sɨ tɨm iwoŋ nkam ighɨ ì kæ̀ ɨ seʼ iwoŋ nɨ̀ ɨ̀nseynsɨ, Jèlobòwàm ɨ boŋ baʼtɨ sɨ nu ŋweyn nɨ̀ sugèyʼsɨ̀ ighɨ nfama a ghɨ sugèyʼsɨ̀ faytɨ̂ kya sɨ nu/tɨm iwoŋ.

⁴Abijà nɨn læ timi a kfɨyn Zemalèm ilaʼ i kfɨynsɨ a Eflèm ɨ byal ɨ bè sɨ̂ Jèlobòwàm na, “Zɨ̂ ghelɨ Isìlæ̀ nô ghɨ̀ jɨ̀m yì yvɨtɨ iwo zɨ̀ a ka mà be/yì yvɨtɨ sɨ̂ mà. ⁵Bôbo Fɨyini ɨ Fɨyini fɨ Isìlæ̀ fu meyn ɨ̀fôyn ɨ Isìlæ̀ awu nɨ̀ Devìt ŋêyn woyn ŋweyn ɨ yɨ mɨkâyn ma wùl ɨ̀ kàʼ wu bû chyèʼsɨ. ⁶Mɨtì Jèlobòwàm ɨ wâyn Nebàt ɨ wul ɨ̀ felɨnɨ nɨ̀ Sòlomòn ɨ wâyn Devìt na nû bò ìfèl nɨ̀ ŋweyn/na to nɨ̀ àtu-a sɨ̂ bò ìfèl nɨ̀ ŋweyn. ⁷Anôyn a ghelɨ àyùŋ ayuŋ a li-a nɨn læ meyn chɨ̀yntɨ̀ ŋêyn Jèlobòwàm ɨ nà to nɨ̀ àtu-a sɨ̂ Lehobòwàm ɨ wâyn Sòlomòn. A nà n-ghɨ tì wu bu ghɨ wayndà faynà/kelɨ wi adyaʼ yi nà boynɨ̂ wì ta ka wù nu àŋena.

⁸“Yì na baʼtɨ̂ lvɨ̂yn sɨ nu ɨfôyn ɨ Bôbo Fɨyini a saʼ/tisɨ̂ Devìt ŋêyn woyn ŋweyn. Yi n-kelɨ ànôyn a sugèyʼsɨ̀ kɨ dvɨ̂ kɨ tèyn, fî kelɨ ɨ̀nfyèʼsɨ̀ ɨ woyn nyâm mbòloʼ ma Jèlobòwàm nɨ̂n fàytɨ nɨ̀ àso ɨkwo na yì na koʼsɨ-a/na à na ghɨ mɨ̀yìni mzɨ̂. ⁹Mɨtì ma yi saŋ meyn fvɨ̀sɨ̀ ngàŋsɨ ndô Fɨyini nɨ̀ Bôbo Fɨyini ɨ woyn Alòyn baʼsɨ̂ nɨ̀ gheli ndo nɨ̀ Levì, ɨ̀ chòʼtɨ ngàŋsɨ ndô Fɨyini nɨ̀ zɨ̀ kɨ̀ ta tɨlaʼ tɨ litɨ nɨn nî. À n-gvî nô mɨ ndà nɨ̀ wâyn nyam mbòloʼ ɨ lûmnɨ̀ kèsa wù gvì nɨ̀ njɨ̀sɨ̀ nsòmbo a, à nà ghɨ ma wù kàʼ a wù lem ngêŋ ŋweyn sɨ a nyɨŋ sɨ a ngàŋ ndô Fɨyini sɨ̂ ɨ̀fwo vzɨ nâ wèyn a yi n-bê na à n-ghɨ mɨ̀yìnì tèyn.

¹⁰Ghèsɨ̀ bu koʼsɨ̂ kɨ Bôbo Fɨyni ɨ Fɨyini feynfɨ ghèsɨ bû vìsi ŋweyn. Ngàŋsɨ ndô Fɨyini sìsɨ̀ a sɨ n-felɨ sɨ̂ Bôbo Fɨyini nɨn ghɨ woyn Alòyn, ghelɨ ndo nɨ̀ Levì ɨ gâmtɨ̀ àŋena. ¹¹Àŋena nɨn fu ttɨ̀fu tɨ nyoʼnɨtɨ nɨ̀ ìleŋ i lɨmtɨnɨ-i sɨ̂ Bôbo Fɨyini nɨ̀ bɨsì bɨsì, fu aleŋ ɨlvɨ ikfa. Àŋena nɨn tom àbàyn atû àbaŋ afî a kɨ n-layn ta isaʼi nɨn dyêyn, dyâyn lâm sìsɨ̀ a sɨ n-ti atû àfo ghè a ghɨ n-tomtɨ lâmsɨ̀ ateyn ma ghɨ faytɨ nɨ̀ àso ɨkwo a baŋnɨ-a nô mɨ achi a kà a leŋ ɨlvɨ ikfa. Ghès nɨn nî àwo kì a Bôbo Fɨyini nɨn kɨŋ na ghèsɨ̀ na ni-à, mɨtì ma yi visi meyn Bôbo Fɨyini/ŋweyn. ¹²Bôbo Fɨyini nɨn ghesɨ̀na nɨ̀ àŋena tisɨ̂ ghès. Ngàŋsɨ ndô Fɨyini nɨ̀ ŋweynsɨ ɨ nì nà toŋ tɨ̀soŋ tɨ àŋena tisɨ̂ ghès, ghèsɨ seʼ ìwoŋ sɨ nu zɨ. Zɨ̀ ghelɨ Isìlæ̀, kay yi n-nù Bôbo Fɨyini ɨ Fɨyini fɨ ghɨ̀bo ghi bòm ta yì nù nô mɨ nu, yi kâʼ yi bû tɨm yɨ.”

¹³Jèlobòwàm nà n-ghɨ ma wù lem meyn sugèyʼsɨ ŋweyn sɨ lisɨ sɨ lêytɨ̀ ɨtwaʼ nà gvɨ̂ sugèyʼsɨ Judà ibàm wu ndû a àŋena asɨ nɨ̀ sugèyʼsɨ ŋweyn sɨ lisɨ. ¹⁴A nà ghɨ ta sugèyʼsɨ Judàsɨ̀ fyèʼtɨ ɨ̀ yeyn na ghɨ n-gvɨ̂ àŋena asɨ gvɨ̂ ibàm/ghɨ keʼ meyn àŋena asɨ ɨ̀ kèʼ ibàm, àŋena ɨ dzɨ̀ sɨ̂ Bôbo Fɨyini, ngàŋsɨ ndô Fɨyini ɨ toŋ tɨsoŋ tɨ àŋena, ¹⁵sugèyʼsɨ Judàsɨ̀ ɨ byal nô sɨ a ŋaŋ. Ta àŋena byàl tî, Bôbo Fɨyini ɨ gàmtɨ/nì Abijà ŋêyn Sugèyʼsɨ Judàsɨ̀ ɨ tɨmlɨ Jèlobòwàm ŋêyn sugèyʼsɨ Isìlæ̀sɨ̀ nò sɨ̀ jɨ̀m. ¹⁶Sugèysɨ Isìlæ̀sɨ̀ ɨ nà sɨ leʼ nyɨŋa, Bôbo Fɨyini ɨ nì sugèyʼsɨ Judàsɨ̀ ɨ tɨm yɨ àŋena. ¹⁷Abijà ŋêyn sugèyʼsɨ ŋweynsɨ nɨn læ meyn dyèyn ìwo sɨ̂ sugèyʼsɨ Isìlæ̀sɨ̀ ɨ zuetɨ sugèyʼsɨ̀ ighɨ ì tâyn, a ghɨ sugèyʼsɨ àŋena sìsɨ̀ a sɨ n-faytɨ kya sɨ tɨm iwoŋ. ¹⁸Ghelɨ Judà nɨn læ meyn tɨm yɨ ghelɨ Isìlæ̀ achi nâ ghè bòm ta ghelɨ Judà nà n-yeʼtɨ̂ kɨ ɨwùyn nɨ̀ Bôbo Fɨyini, ɨ Fɨyini fɨ ghɨ̀bo àŋena.

¹⁹Sugèyʼsɨ Abijàsɨ̀ nɨn læ meyn nyɨŋ ibam nɨ̀ Jèlobòwàm ɨ fsɨ ntèʼsɨ sɨ̂ ŋweyn, a ghɨ ntèʼ Betèl nɨ̀ ntèʼ Jèshanà kɨ̀mɨ nɨ̀ ntèʼ Eflòn baʼsɨ̂ nɨ̀ mɨ̀ntèʼtɨ̂ mzɨ̀ amɨ̀ n-ghɨ a ngùŋ àteyn. ²⁰Jèlobòwàm nɨn bu læ nà fî kelɨ àdyaʼ ɨtuʼ ghê a Abijà nà n-saʼ sɨ a fòyn. Bôbo Fɨyini ɨ nì ikoʼi ɨ ku ŋweyn wu kfɨ.

²¹Mɨtì Abijà ɨ nà to àdyaʼ nô a jûŋ. Wu n-læ mala ghɨ̀kì njvàsɨ̀ kæ̀ ɨ nà kelɨ woyn ghɨlûmnɨ̀ mɨ̀vɨm ɨ̀n bò njvàsɨ̀ bò, kelɨ woyn woyn ghɨki njvàsɨ̀ ntufa.

²²Awo kì nô à jɨ̀m a Abijà nì nɨ̀ akî a wù bè be nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ Idò ɨ nfèʼtɨ̀ ì ghaʼnɨ.