2 Chronicles 12

Shishàk ɨ nù Jèlusalèm

¹À nà n-ghɨ ta ɨfôyn Lèhobòwàm tìmi, wù na sɨ kelɨ àdyaʼ, ŋêyn ghelɨ Isìlæ̀ nô ghɨ̀ jɨ̀m ɨ nà bu yvɨnɨ̂ wì Bôbo Fɨyini, ²Shishàk ɨ fòyn Ijìb ɨ gvi nù Jèlusalèm ma à sɨ ghɨ bèŋsɨ̀ tâyn ta Lèhobòwàm n-saʼ Isìlæ̀. Yi n-gàyn têyn bòm ta àŋena nà n-bu yvɨnɨ̂ wi Bôbo Fɨyini. ³Wù n-læ gvì ŋêyn sugèyʼsɨ̀ nkam nɨ̀ sugèyʼsɨ̀ ighɨ ì bò nɨ̀ sugèyʼ sìsɨ̀ a sɨ nyɨŋ atû nyamsɨ kfaŋ mɨ̀vɨm ntufa baʼsɨ̂ nɨ̀ sugèyʼ sìsɨ̀ a sɨ nà n-jelɨ̀ nɨ̀ ɨ̀vɨ kɨ̀ sɨ idvɨ̀ baʼsɨ̂ nɨ̀ ghelɨ Libìyà nɨ̀ ɨghɨ Sûk baʼsɨ̂ nɨ̀ ɨghɨ Kûsh ghì a ŋêyn Shishàk nɨ̂n gvì a Ijìb àmòʼ. ⁴Shishàk nɨn tɨm meyn yɨ ntèʼsɨ Judà sìsɨ̀ a sɨ nà n-ghɨ antêynɨ̀ mbàyn, ɨ ndu chem a Jèlusalèm.

⁵Nfèʼtɨ Shèmayà ɨ ndu yeyn Lehobòwàm ŋêyn ghelɨ ghì a ghɨ n-tisɨ Judà àŋena leʼ Shishàk ɨ ndù ɨ yvɨ̀ŋtɨ̀ a Jèlusalèm ɨ bè sɨ̂ àŋena na, “Bôbo Fɨyini bè na, ‘Ta yì mò ma/ta yi bû yvɨnɨ̂ wì ma, mɨ n-fu zɨ̀ ɨwu nɨ̀ Shishàk lvɨ̂yn.’”

⁶Fòyn ŋêyn ghelɨ ghɨ tisɨnɨ nâ ghì ɨ yeyn keli na àŋena ni meyn mbɨ ɨ bè na, “Bôbo Fɨyini bu jas iwo ghàyn a wù nì sɨ̂ ghesɨ̀nà têyn.”

⁷A nà ghɨ ta Bôbo Fɨyini yeyn na àŋena ngvɨmlɨ meyn ngeŋsɨ àŋena, wu bè sɨ̂ Shèmayà na, “Mɨ n-bu bebsɨ̂ wi àŋena mɨ nkwo gàmtɨ̀ àŋena bòm ta àŋena ngvɨmlɨ meyn ngeŋsɨ àŋena. Mɨ n-bu fì dyêyn wì ɨtoŋ ɨ yafɨnɨ nɨ̀ mà sɨ fu ngeʼ sɨ̀ àŋena toynɨ̂ a Shishàk. ⁸Àŋena nà felɨ̀ sɨ̂ ŋweyn ta ka àŋena yeyn na yi n-jofɨ̀ sɨ nà felɨ sɨ̂ Bôbo Fɨyini chwô sɨ nà felɨ̀ sɨ̂ tɨ̀fôyn tɨ mbzɨtɨ.”

⁹Shishàk ɨ fòyn Ijìb nɨn læ nu Jèlusalèm ɨ bèʼì ɨ lù nɨ̀ ɨ̀fwo ɨkwo ɨtwo vzɨ̀ a wu nà n-ghɨ a ndô Fɨyini nɨ̀ ɨvzɨ̂ a wu nà n-ghɨ a ntoʼ. Wu n-læ li kɨ ɨfwo ɨ̀ jɨ̀m baʼsɨ̂ nɨ̀ nkyàsɨ iwòŋ sîsɨ̀ a Sòlomòn nɨn læ faytɨ nɨ̀ àso ɨkwo a baŋnɨ-a. ¹⁰Fòyn Lehobòwàm ɨ kæ faytɨ nkyàsɨ iwòŋ nɨ̀ ìdyayni sɨ fu sɨ̂ ɨ̀tu vzɨ̀ a wu n-tisɨ nchì zɨ̀ a yì n-chi ɨchfɨ mbàyn ta wu n-zɨ ndû a ntoʼ. ¹¹Fòyn nà n-se sɨ ndù a ndô Fɨyini nɨ̀ Bôbo nô mɨ ɨlvɨ gha, nchìsɨ nà ndû ŋêyn ŋweyn ma sɨ beʼi meyn nkyàsɨ iwòŋ, wù fvɨ̂, àŋena kasi ndu lèm alèʼ ghè a nchì nɨ̀n ghɨ ateyn.

¹²Lehobòwàm nɨn læ meyn ngvɨmlɨ ngêŋ ŋweyn, Bôbo Fɨyini ɨ nà bu nyòʼsɨ̀ wì ɨtoŋ sɨ̂ ŋweyn, ɨ faŋ tɨ̀ zue ŋweyn. Awo-a ɨ nà ndû kɨ nô a jûŋ a Judà.

¹³Fòyn Lehobòwàm nɨn læ meyn faytɨ ghal ɨfôyn ɨ ŋweyn a Jèlusalèm wu to, wu nà saʼa ta fòyn. Wu n-læ koʼ sɨ a fòyn ghɨ bèŋ mɨ̀vɨm ɨ̀n kæ̀ nɨ̀ bèŋ ìmòʼ, ɨ saʼ sɨ a bèŋsɨ̀ njvàsɨ̀ nsòmbo a Jèlusalèm, a ghɨ ntèʼ zɨ̀ a Bôbo Fɨyini choʼ antêynɨ̀ àsas a ndosɨ/ntèʼsɨ a Isìlæ̀ na ghɨ na koʼsɨ̂ ŋweyn ateyn. Nà ŋweyn nà n-ghɨ Namà ɨ wul ɨ̀ Amòn. ¹⁴Jèhobòwàm nɨn læ meyn nì mbɨ bòm ta wu n-bu læ fsɨsɨ Bôbo Fɨyini nɨ̀ àtem a ŋweyn à jɨ̀mà.

¹⁵Awo kì a Jèlobòwàm nì kɨ̀ sɨ ɨtuʼ ta wù zɨ̀tɨ̀ sɨ saʼ sɨ chem a ngòʼsɨ nɨn ghɨ ma ghɨ nyaʼ meyn a ŋwàʼlɨ̀ nɨ̀ Shèmayà ɨ nfèʼtɨ̀ ì ghaʼnɨ, ɨ̀ nyàʼ kɨ̀mɨ a ŋwàʼlɨ̀ nɨ̀ Idò, a ghɨ wul ɨ̀ Fɨyini fɨ ɨ dyêyn àwo sɨ̂ ŋweyn. Ghɨ n-fi meyn nyaʼ kɨmɨ àwo kì a kɨ nà n-gâyn sɨ̂ ghelɨ kɨ̀ asas a ndosɨ asas a ndosɨ. Lehobòwàm nà n-lum tɨm kɨ ìwoŋ ŋêyn Jèlobòwàm. ¹⁶Lehobòwàm nɨn læ kfɨ ghɨ gvìmi a ntèʼ nɨ̀ Devìt, wâyn ŋweyn Abijà ɨ yɨ ŋweyn sɨ a fòyn.