2 Chronicles 15

Asà ɨ lùmsɨ̀ mɨ̀kâyn ŋêyn Bôbo Fɨyini

¹Ayvɨs a Bôbo Fɨyini nɨn læ meyn suʼi atu nɨ̀ Azalìyà ɨ wâyn Odèd, ²wu fvɨ̀ ɨ ndu yeyn Asà ɨ bè sɨ̂ ŋweyn na, “Zɨ̂ ghelɨ Isìlæ̀ nɨ̀ ghelɨ Benjamìn, yì yvɨtɨ. Yì kæ nà ghɨ zɨ̂ Bôbo Fɨyini koʼsɨ̂ ŋweyn, a wù na gâmtɨ̀ zɨ̀. Mɨtì ma yì kæ mo ŋweyn, a wù mo zɨ. ³Ghelɨ Isìlæ̀ nà n-ghɨ ma ghɨ chi meyn sɨ a ndyèyn ìdyà yvɨnɨ̂ wì Bôbo Fɨyini kelɨ wi akaʼ àmòʼ ngàŋsɨ ndô Fɨyini na sɨ na sɨ na yeʼî àŋena, kelɨ wi tɨsaʼ ta ka tɨ na tisɨ̂ àŋena. ⁴Mɨtì, ngeʼ nà n-kolî àŋena nô mɨ ɨlvɨ gha, àŋena dzɨ̂ sɨ̂ Bôbo Fɨyini ɨ Fɨyini fɨ Isìlæ̀ ɨ̀ kàsi nà yvɨnɨ̂ ŋweyn, wu gàmtɨ̀ àŋena. ⁵À nà n-ghɨ ɨtuʼ nâ ghè, yi boynɨ̂ wì ta ka wùl ɨ̀ na fvɨ̀-à wu ni kasi jèl ɨ zɨ nɨ̀ mbôynɨ̀ bòm ta ngeʼsɨ nà n-ghɨ chwôsɨ̀-à ghɨ bɨm nî kɨ ni awo ilaʼ afu. ⁶Tɨlaʼtɨ nà n-nû tɨ litɨ, ntèʼsɨ ghaʼnɨsɨ ɨ nû sɨ lisɨ bòm ta Fɨyini fɨ nà n-ghɨ ma wù visi meyn ngeʼsɨ koli àŋena kɨ̀ a tɨ̂nkì a tɨ̂nkì. ⁷Mɨtì, zɨ̀ ghelɨ Judà nɨ̀ ghelɨ Benjamìn yì na to-a, ka yi n-bòli bòm ta Bôbo Fɨyini ɨ nì mâʼtɨ̀ zɨ̀/boysɨ̂ zɨ̀.”

⁸A nà ghɨ ta Asà yvɨ awo nâ kèynà nɨ̀ àwo kì a Azalìyà ɨ wâyn Odèd ɨ nfèʼtɨ̀ ì ghaʼnɨ fèʼtɨ̀ na kɨ læ̀ jæ kàyn, wu keli àtem ato-a ɨ bebsɨ mɨ̀yìnì/ɨ̀nfyèʼsɨ̀ ɨ̀nchaʼnɨnɨ̂ mzɨ̀ a mɨ̀ nà n-ghɨ ilaʼ i Judà nô ì jɨ̀m nɨ̀ bènjamìn baʼsɨ̂ nɨ̀ ntèʼ sîsɨ̀ a wu n-læ tɨm yɨ ilaʼ i kfɨynsɨ a Eflèm. Wù n-læ meyn kasi faytɨ àbaŋ ifu nɨ̀ Bôbo kì a kɨ nà n-ti ɨchfɨ alèʼ ghè a kɨ n-zɨ ndû a lûm/abùʼ a ndô Fɨyini nɨ̀ Bôbo.

⁹Asà nɨn faytɨ tî ɨ yvɨ̀ŋtɨ̀ ghelɨ Judà nô ghɨ̀ jɨ̀m nɨ̀ ghelɨ ghì a ghɨ n-lù a Eflèm nɨ̀ ɨghɨ Mànasè nɨ̀ ɨghɨ Sìmìyòn ta ghɨ nà n-chi ŋêyn àŋena. À nà n-ghɨ tì ma inôyn i ghelɨ lu meyn a Isìlæ̀ kɨ̀ sɨ a idvɨ̀ ɨ̀ gvì sɨ nà ghɨ ŋêyn ŋweyn bòm ta Bôbo Fɨyini nà n-ghɨ ŋêyn ŋweyn.

¹⁰A nà ghɨ a njoŋsɨ̀ tal, àŋena yvɨ̀ŋtɨ̀ a Jèlusalèm ma à sɨ ghɨ bèŋsɨ̀ njvàsɨ̀ tâyn ta Asà saʼ sɨ a fòyn. ¹¹Àŋena nɨn sɨ meyn nyamsɨ mbòloʼ ighɨ nsòmbo nɨ̀ bzɨsɨ nkam ighɨ nsòmto antêynɨ̀ ɨ̀fwo ghè a àŋena nɨn yɨ iwòŋ ɨ kfa nɨ̀ ɨ̀ŋweyn. ¹²Àŋena nɨn yɨ meyn mɨ̀kâyn sɨ nà koʼsɨ Bôbo Fɨyini ɨ Fɨyini fɨ ghɨ̀bo àŋena nɨ̀ mɨ̀tem mɨ̀ àŋena ɨ̀n jɨ̀m nɨ̀ ìkfâʼtɨ̀ i àŋena, ¹³ɨ lèm na à fàŋ mɨ ndà tɨ̀ yvɨ̀nɨ Bôbo Fɨyini ɨ Fɨyini fɨ ghelɨ Isìlæ̀ a ghɨ na kelɨ sɨ zue ŋweyn kèsa à n-ghɨ wul ɨ lwema ma wayndà a kèsa à n-ghɨ wul ɨlûmnɨ̀ ma wul ɨ wi a. ¹⁴Àŋena nɨn læ meyn lèm ìchfɨ̂nɨ̀ sɨ̂ Bôbo Fɨyini nɨ̀ gyasɨ tosɨ fî luʼa, toŋ tɨ̀soŋ/ndoŋsɨ nyâm. ¹⁵Ghelɨ Judà nô ghɨ̀ jɨ̀m ɨ nà saŋlɨ-à bòm ta àŋena lèm ichfɨ̂nɨ̀ ateyn kɨ̀ nò nɨ̀ mɨ̀tem mɨ̀ àŋena ɨ̀n jɨ̀m. Àŋena nà n-kôŋ sɨ nà koʼsɨ Bôbo Fɨyini, Fɨyini fɨ̀ ɨ dyèyn ngêŋ ŋweyn sɨ̂ àŋena ɨ fu mbôynɨ̀ sɨ̂ àŋena kɨ̀ awo à jɨ̀m.

¹⁶Fòyn Asà nɨ̀n suʼsɨ meyn Makà ɨ nà nà ŋweyn sɨ a wî ntoʼ bòm ta wu nà n-kelɨ ànfèʼsɨ̀ a Ashelà ta wù tom nà koʼsɨ-à, a ghɨ ìwo wu kelɨ wi sɨ nì. Asà ɨ gvèl àtôʼ ateyn ɨ kòytɨ̀ ɨ nyòʼ afoŋlɨ a Kidlòn. ¹⁷Asà nɨn bu læ bebsɨ Ɨlwêʼ vzɨ̀ a ghɨ n-koʼsɨ mɨ̀yìnì ateyn a Isìlæ̀ mɨtì ɨ faŋ nà koʼsɨ̂ kɨ Bôbo Fɨyini nô ta ka wù læ̂ kfɨ. ¹⁸Wù n-zɨsɨ meyn àso ɨkwo a fɨfâ nɨ̀ a baŋnɨ-a baʼsɨ̂ nɨ̀ ɨ̀fwo ɨlvɨ vzɨ̀ a ŋêyn bò ŋweyn nɨn læ lèm sɨ a nyɨŋ tì a ndô Fɨyini.

¹⁹Iwoŋi nà bu fì ghɨ wi a Isìlæ̀ nô ta ka wù saʼ chem bèŋsɨ̀ mɨ̀vɨm ɨ̀n tal nɨ̀ bèŋsɨ̀ mɨ̀vɨm ɨ̀n kæ̀.