1 Samuel 20

Jònatàn ɨ gàmtɨ̀ Devìt

¹Devìt nɨ̀n læ meyn fi leʼ ɨ lù sɨ a Nayòt a ntèʼ Lamà ɨ kɨŋ ndù nɨ̀ Jònatàn ɨ bɨf sɨ̂ ŋweyn nâ, “Mà bèbsɨ ghà? Mà nì nô ghà sɨ̂ bò vâ wù lem sɨ a ikàytɨ̀ na yi n-zue mà-a?”

²Jònatàn ɨ bèysɨ̀ ɨ bè sɨ̂ Devìt na, “Yi kàʼ yi bû gàyn. Wu n-zue wi vâ. Wa kya na bò wom lum ni wì iwo bula wù fêʼtɨ̀ sɨ̂ mà kèsa à n-ghɨ ìwo ighaʼnɨ-i ma à n-ghɨ itelâ ì a. Wu nà n-kɨŋ sɨ zue vâ ma wù feʼtɨ meyn sɨ̂ mà. Yi kàʼ yi bu nà ghɨ na wù n-kɨŋ sɨ zue vâ.”

³Mɨtì Devìt ɨ bè sɨ̂ Jònatàn na, “Yi n-ghɨ kɨ nô samoʼ. Bò vâ nɨ̀n faytɨ̂ kya kɨ nô na mɨ n-ghɨ sûyn mɨ̀kàyn nɨ̀ và. À ti iwo zɨ̀-ì a wù lèm na wu n-fèʼtɨ̀ wì sɨ̂ và. Wù n-kya na wà kæ sɨ keli a wà na saŋlɨ̂ wì. Mɨ n-bê sɨ̂ và samoʼ sɨ izɨyn nɨ̀ Bôbo Fɨyini vzɨ̀ a wù n-chi na mɨ n-ti kɨ ɨchfɨ̀ nɨ̀ ìkfɨ-i.”

⁴Jònatàn ɨ bè sɨ̂ Devìt na, “Wà n-kɨŋ na mà ni mɨ ghà sɨ̂ và a mà ni.”

⁵Devìt ɨ bè sɨ̂ Jònatàn na, “Yvɨtɨ! Ayɨ a njoŋ ìfɨ-a nɨn ghɨ a libɨs, nchînɨ̀ ìlaʼ ɨ dyeyn na mɨ n-kelɨ sɨ yɨ ghesɨ̀ fòyn. Mɨtì visi mà ndu lèytɨ̀ ɨtwaʼ sɨ chem aleŋ ɨlvɨ ikfa ɨlvɨ a chwò libɨs.” ⁶Bò vâ kæ sɨ bɨf ma, wa bè sɨ̂ ŋweyn na ma loyn meyn ɨ̀lvɨ sɨ̂ và sɨ nyɨŋ sɨ ndù a ma ntèʼ a Betɨ̀làhêm bòm ta isas i ndo nɨ̀ ghès i nɨn fu ìfu i ɨchfɨ bêŋ sɨ̂ Fɨyini fɨ afu. ⁷Wà kæ sɨ bè têyn, wu bê na mà nì kɨ̀ nô a jûŋ a yi na dyêyn na ma bœ meyn. Mɨtì ɨtoŋ ŋweyn kæ sɨ yaf a wà na kya samoʼ na wù n-kɨŋ sɨ zue ma. ⁸Mɨ n-chwotɨ̂ và na wà dyeyn atem a juŋà sɨ̂ mà bòm ta ghesɨ̀và yɨ meyn mɨ̀kâyn asɨ nɨ̀ Bôbo. Mɨtì wà kæ sɨ nà kfâʼ na ma bebsɨ meyn ìwo wa zue ma kɨ̀ nô sɨ a wa ngeŋ. Ka wa n-lì ndù nɨ̀ mà sɨ̂ bò vâ.

⁹Jònatàn ɨ bèynsɨ̀ ɨ bè sɨ̂ Devìt na, “ Mà kàʼ ma bû mòm. Mɨ nà n-kya samoʼ na bò wom baʼtɨ meyn sɨ zue vâ ma ma feʼtɨ meyn sɨ̂ và.”

¹⁰Devìt ɨ bɨf sɨ̂ Jònatàn nâ, “Bò vâ ti kæ sɨ bèynsɨ vâ nɨ̀ ɨ̀toŋ ɨ yafɨnɨ wa fèʼtɨ̀ ti sɨ̂ mà-a?”

¹¹Jònatàn ɨ bè sɨ̂ ŋweyn na wù gvi ŋêyn ŋweyn fvɨ ndù ɨtwaʼ. Ta wù bè tî àŋena ɨ fvɨ ndù afu.

¹²Jònatàn ɨ bè sɨ̂ Devìt na, “Mɨ n-chfɨ̂nɨ̀ sɨ̂ và sɨ izɨyn nɨ̀ Bôbo ɨ Fɨyini fɨ ghelɨ Isìlæ̀ na à læ̀ nà ghɨ ɨlvɨ a chwò libɨs a mà keli iwo zɨ̀-ì a bò wom nɨn baʼtɨ. Wù kæ sɨ nà kelɨ ìkfâʼtɨ̀ i juŋì kûm và, a mà tum ɨ̀ fèʼtɨ̀ sɨ̂ và. ¹³Mɨtì mà kæ sɨ yeyn na wù n-kɨŋ sɨ zue vâ, faŋ tɨ̀ fèʼtɨ sɨ̂ và sɨ gàmtɨ na wà leʼ kɨ̀ nô nɨ̀ mbôynɨ̀, Bôbo Fɨyini ɨ fu ngeʼ sɨ̂ mà nô sɨ a ŋaŋ. Mɨ n-jêm na Bôbo na ghɨ zɨ̂ ŋweyn kɨ̀ ighel ta wu na n-ghɨ ŋêyn bò wom. ¹⁴Mɨ n-chwotɨ̂ na wà na dyèyn kɨ àtem a juŋà sɨ̂ mà nô ta ka mà læ̂ kfɨ kɨ ighel ta Bôbo nɨn dyêyn sɨ̂ ghesɨ̀và, ka ghɨ n-zuè ghesɨ̀và. Mɨtì ma kæ kfɨ, ¹⁵wa nà tôʼnɨ̀ kɨ toʼnɨ nɨ̀ ìsas i ndo nɨ̀ mà-i nô mɨ ɨlvɨ ta Bôbo zuetɨ mèsi mbàynɨ̀ syasɨ.”

¹⁶Jònatàn ɨ yɨ mɨkâyn ŋêyn Devìt nɨ̀ isas i ndo nɨ̀ ŋweyn ɨ bè na, “Mɨ n-jêm na Bôbo zuetɨ mbàynɨ̀ syasɨ nô sɨ̀ jɨ̀m.” ¹⁷Wù n-bê meyn kɨmɨ na Devìt jemtɨ ìchfɨ̂nɨ̀ i ŋweyn na wù n-kôŋ zɨ̀ bòm ta Jònatàn nà n-kôŋ Devìt kɨ̀ ighel ta wù n-koŋ ngêŋ ŋweyn. ¹⁸Jònatàn ɨ fi bè na, “À læ̀ nà ghɨ a libɨs a ghɨ na kelɨ àyɨ a njoŋ ìfɨ. Alêʼ à kya læ̀ nà ghɨ kɨ ayum, a nô mɨ ndà yeyn kèli na wà n-ghɨ wi. ¹⁹À læ̂ nà ghɨ aleŋ ɨlvɨ ikfa ɨlvɨ a chwò libɨs wa lù ɨ ndù alèʼ ghè a wà tî lèytɨ̀ ateyn tì ɨ dùʼì a ngùŋ ìkuʼ i ngòʼsɨ̀ ɨ nà chîtɨ̀ mà afu mà gvi. ²⁰Mɨ n-læ̀ gvi-à ɨ̀ tɨm awoŋ à tal ikuʼ i ngòʼsɨ̀ nâ ghè, tɨm tèyn ta mɨ n-tɨm àfo. ²¹Mà læ̀ tɨm mɨ ɨlvɨ gha ɨ̀ tum wayn ɨ lûmnɨ̀ na wù ndu bòŋtɨ gvì nɨ̀ àwoŋ ateyn a. Wà kæ sɨ yvɨ ma bê sɨ̂ ŋweyn na, ‘Awoŋ ateyn a nɨn ghɨ abàs ghàyn,’ wa nà kya sɨ izɨyn nɨ̀ Bôbo na wà bœ meyn ɨ fvɨ gvì. ²²Mɨtì wà kæ sɨ yvɨ ma bê sɨ̂ wayn àteyn na, ‘Awoŋ ateyn a nɨn ghɨ ma kɨ ndû meyn ndèyn,’ wa nà kya na wà n-kelɨ sɨ leʼ sɨ lù kɨ ɨlvɨ nâ ghè, bòm ta Bôbo nɨn kɨŋ na wà lu. ²³Mɨ n-jêm na Bôbo gamtɨ ghesɨ̀và lem ichfɨ̂nɨ̀ i ghesɨ̀và bòm ta ghesɨ̀và lèm ichfɨ̂nɨ̀ nâ yèynì a ŋweyn asɨ.”

²⁴Devìt ɨ lu ndu lèytɨ̀ ɨtwaʼ, achi ayɨ a njoŋ ìfɨ ki gvì, fòyn Sôl ɨ dùʼì sɨ yɨ. ²⁵Wu n-dùʼi kɨ alèʼ ghè a wu nà n-lum duʼì ateyn ɨ yeʼtɨ ɨwuyn ndo, Jònatàn ɨ dùʼì ɨ kèʼnɨ̀ ŋweyn, Abnà ɨ dùʼì a ngùŋ nɨ̀ Sôl. Mɨtì achɨ a Devìt a nà ghɨ kɨ ayum. ²⁶A nà ghɨ achi nâ ghè, Sôl ɨ faŋ tɨ̀ bè iwo kûm Devìt. Wu nà n-kfâʼ kɨ sɨ a ŋweyn a ngeŋ na, “Devìt na ghɨ tèyn ma wù ni meyn ìwo ɨ̀ nà layn kfeynɨ̂ wì sɨ gvì alèʼ ayɨ.” ²⁷A nà ghɨ a ànkùmtɨ̀ achi ayɨ, aleʼ a Devìt a bu ghɨ kɨ ayum. Sôl ɨ bɨf sɨ̂ wâyn ŋweyn Jònatàn nâ, “À gàyn ghà wayn Jesì wèyn faŋ tɨ̀ gvì alèʼ ayɨ sɨ zɨ̀tɨ̀ iyoni sɨ chem layn a?”

²⁸Jònatàn ɨ bèynsɨ̀ ɨ bè na, “Wù ti meyn chwòtɨ mà na mà visi yì kwo ndù a Betɨ̀làhêm. ²⁹Wù tî chwòtɨ bè na mà visi yì ndu a Betɨ̀làhêm bòm ta isas i ndo nɨ̀ àŋena nɨn keli ìfu, woyn nà ŋweyn ɨ kɨŋ nà wu na ghɨ afu. Wù chwotɨ na mà visi yì kwo ndù afu ɨ̀ yèyn woyn nà ŋweyn. À ti iwo zɨ̀-ì a wù faŋ tɨ̀ gvì aleʼ ayɨ afêyn.”

³⁰Sôl ɨ yvɨ tî ɨtoŋ ŋweyn ɨ yaf sɨ̂ Jònatàn nô sɨ a ŋaŋ wu bè sɨ̂ ŋweyn na, “Wà n-ghɨ kɨ nô àfo a maʼi nɨ-a, to nɨ̀ àtu a kɨ̀ ta nà vâ. Mɨ n-kya na wà timi meyn abàs nɨ̀ Devìt zɨ ŋweyn kêʼ mà. Iwo nâ yèynì a wà mòm têyn gvi meyn nɨ̀ ìwumi sɨ̂ và nô nɨ̀ nì vzɨ̂ a wù bzɨ vâ. ³¹Wâyn Jesì nâ wèyn kæ sɨ nà bu chi atu nse afêyn wà bû læ̀ saʼ ɨfôyn. Tum wul wù li gvì nɨ̀ ŋweyn sɨ̂ ma lvɨ̂yn, wù n-kelɨ sɨ kfɨ.”

³²Mɨtì Jònatàn ɨ bɨf sɨ̂ ŋweyn nâ, “Bòm ghà ta wà n-kɨŋ sɨ zue ŋweyn a? Wù bɨ̀ bebsɨ nô ghà?”

³³Ɨtoŋ Sôl ɨ yaf bòm dzɨ zɨ̀ a Jònatàn bèynsɨ̀ ateyn, wu tɨm ŋweyn nɨ̀ ìwoŋi kɨŋ kɨ nô sɨ zue ŋweyn. Jònatàn ɨ yeyn kɨ nô samoʼ na wù n-kɨŋ sɨ zue Devìt.

³⁴Ɨtoŋ Jònatàn ɨ yaf wu làlì ɨ lù sɨ a alèʼ ayɨnɨ-a. A nà ghɨ a ànkùmtɨ̀ achi ayɨ nâ ghè wu faŋ tɨ̀ yɨ bòm ta wu nà n-saŋlɨ wi kûm dzɨ zɨ̀ a bò ŋweyn nà n-wumsɨ nyâblɨ̀ nɨ̀ Devìt ateyn.

³⁵Ɨtuʼ ɨ layn Jònatàn ɨ ndù ɨtwaʼ sɨ yeyn Devìt afu, kɨ̀ ta àŋena nà n-sɨ ghɨ ma ghɨ tisɨ meyn. Wu n-se sɨ ndu tî ɨ lì fɨ̀foyn fɨlûmnɨ̀ fɨ lifɨ ŋêyn ɨ̀nfeynfɨ ɨ ndù amoʼ. ³⁶Wu ndù tì ɨ bè sɨ̂ wâyn lûmnɨ̀ àteyn na, “Ma na tɨm ìwoŋ wa nyɨŋ ndu boŋ gvì nɨ̀ ìnyeyni.” Wayn àteyn ɨ se sɨ nyɨŋ sɨ ndù Jònatàn ɨ tɨm iwoŋ yi chwò ŋweyn. ³⁷Wâyn àteyn ɨ ndu baʼsɨ alèʼ ghè a iwoŋ ateyn i chèm ateyn Jònatàn ɨ jaŋ bè sɨ̂ ŋweyn na iwoŋ ateyn i bu ghɨ asɨ, ³⁸ɨ fi byal bè na, “Yàŋsɨ ndu, ka fì tɨ̀mtɨ.” Wâyn àteyn ɨ nyɨŋ ndu boŋ iwoŋ ateyn ɨ gvì nɨ̀ ìnyeyni sɨ̂ Jònatàn. ³⁹A nà n-kya kɨ Jònatàn ŋêyn Devìt iwo zɨ̀-ì a yi n-chwô, wâyn nâ vzɨ kya wi. ⁴⁰Jònatàn ɨ fu ɨfwo iwoŋ nɨ̀ ŋweyn sɨ̂ wàyn nâ vzɨ̀ ɨ bè na wù li nà kfâ nɨ̀ ɨ̀ŋweyn.

⁴¹Wâyn lûmnɨ̀ nâ vzɨ̀ ɨ lù, Devìt ɨ fvɨ gvì sɨ ibàm ikuʼ i ngòʼsɨ̀ afî a wù nì leytɨ̀ ateyn ɨ ngvɨmtɨ asɨ nɨ Jònatàn ìngal ìtal. Àŋena baʼnɨ ngeŋsɨ àŋena ɨ dzɨ̀ nô sɨ a ŋaŋ mɨtì Devìt ɨ dzɨ chwò Jònatàn.

⁴²Jònatàn ɨ bè sɨ̂ Devìt na, “Ndu kɨ nɨ̀ mbôynɨ̀, bòm ta ghesɨ̀và chfɨnɨ meyn asɨ nɨ̀ Bôbo na ghesɨ̀và na ghɨ suynsɨ nô ta ka ghɨ̀ læ̂ ghɨ̀. Bôbo nɨn ghɨ nchwò nsaʼ ichfɨ̀nɨ̀ nɨ̀ ghesɨ̀và, ghesɨ̀và nɨ̀ àsas a ndosɨ nɨ̀ ghesɨ̀và a ɨ kelɨ sɨ lèm ichfɨ̂nɨ̀ ateyn.” Devìt ɨ lù, Jònatàn ɨ kasi kfa sɨ a ntèʼ.