1 Samuel 19

Sôl ɨ mòmsɨ̀ sɨ zue Devìt

¹À nà n-ghɨ achi a li-a, Sôl ɨ bè sɨ̂ wâyn ŋweyn Jònatàn nɨ̀ ghelɨ ghɨ felɨnɨ nɨ̀ ŋweyn na àŋena zue Devìt, mɨtì Jònatàn ɨ kôŋ Devìt nô sɨ a ŋaŋ. ²Jònatàn ɨ nyaʼ nyùʼ Devìt ɨ bè na, “Bò wom nɨn kɨŋ sɨ zue vâ, wa tôʼnɨ̀-à. Wà bɨs làlì a libɨs wa leʼ ɨ ndu lèytɨ̀ ɨtwaʼ. ³Mà læ̀ lû ghesɨ̀ bò wom ɨ̀ gvì tìmi alèʼ ɨtwaʼ ghè a wà n-ghɨ ateyn ɨ̀ tàŋi sɨ̂ ŋweyn kûm và. A à na ghɨ ta mà tàŋi, a mà feʼtɨ nô mɨ ghà ta wù bè sɨ̂ và.”

⁴Ɨtuʼ ɨ layn Jònatàn ɨ ni kɨ ta wù ti bè sɨ̂ Devìt. Wu n-bè kɨ awo a juŋà sɨ̂ bò ŋweyn Sôl kûm Devìt. Wu n-bè na, “Mɨ n-chwotɨ̂ và a mbæ̀ na ka wa nì ìwo i bzɨ-i sɨ̂ wùl ɨ̀ felɨnɨ nɨ̀ và Devìt, bòm ta wù bû nì ìwo i bzɨ-i ili sɨ̂ và. Wù kwo nì kɨ ifêl i juŋì sɨ̂ và.” ⁵Wù ti kwo màʼì ngêŋ ŋweyn bòm và ta wù ti ndù sɨ zue wul ɨ̀ Fìlisìyà vzɨ̀ a ghɨ ti nà toŋtɨ̂ na Gòliyàt tì. À ti nà ghɨ kɨ bòm ŋweyn a Bôbo ti nì ghesɨ̀nà ghelɨ Isìlæ ghɨ̀ jɨ̀m tɨm yɨ mbàynɨ̀ ghesɨ̀nà. Yi n-gàyn têyn wa yeyn ɨ nà saŋlɨ-à, ɨ̀ nà sɨ kɨŋ sɨ zue Devìt bòm ghà bula wù bebsɨ ìwo a? ⁶Sôl ɨ yvɨtɨ ìwo zɨ̀-ì a Jònatàn bè ɨ kæ bè na, “Mɨ n-bê sɨ̂ và samoʼ sɨ izɨyn nɨ̀ Bôbo vzɨ̀ a wù n-chi na mɨ n-zue wi Devìt.”

⁷Jònatàn ɨ kæ jaŋ Devìt sɨ fèʼtɨ nô mɨ ghà vzɨ̂ a ŋêyn bò ŋweyn tàŋi. Wu taŋi tì ɨ li gvì nɨ̀ Devìt sɨ̂ Sôl wu nà felɨ̀ kɨ ta wù tî nà felɨ̀ sɨ asɨ.

⁸Ghɨ chitɨ kɨ têyn iwoŋi fi làlì antêynɨ̀ nɨ̀ ghelɨ Isìlæ̀ ŋêyn ghelɨ Fìlisìyà, Devìt ɨ fi fvɨ̀ ŋêyn ghelɨ iwoŋ nɨ̀ ŋweyn ɨ seʼ nù ghelɨ Fìlisìyà. Àŋena nù ghelɨ Fìlisìyà nô nɨ̀ ŋàŋ àŋena leʼnɨ.

⁹A nà ghɨ achi a li-a Sôl ɨ duʼ a ŋweyn a ndo nɨ̀ ìwoŋ i ŋweyni sɨ a awu, Bôbo tsɨynsɨ àyvɨs a bɨ-a kɨ zɨ̀tɨ̀ sɨ fu ngeʼ sɨ̂ ŋweyn. Devìt ɨ nà sɨ buʼ ìluŋ, ¹⁰Sôl ɨ mòmsɨ̀ sɨ tɨm sɨ ghàŋtɨ ŋweyn nɨ̀ ìwoŋi ŋweyn zɨ̀ ɨwuyn ndo. Mɨtì Devìt ɨ bàs wu tɨm buʼ kɨ ɨwuyn ndo. A ni nà ghɨ nɨ̀ntuʼ achi nâ ghè Devìt ɨ leʼ lù.

¹¹Ta Devìt lèʼ tî Sôl ɨ tum ghelɨ nɨ̀ntuʼ achi nâ ghè na ghɨ ndu nà chî ndô Devìt ta ka ɨtuʼ se sɨ layn a àŋena zue ŋweyn. Mɨtì wî Devìt ɨ Mikàl ɨ nyaʼ nyùʼ ŋweyn ɨ bè na, “Wà kæ sɨ faŋ tɨ̀ leʼ sɨ lu lvɨ̂yn nɨ̀ntuʼ a ghɨ bɨs ɨ̀ zuè vâ a libɨs.” ¹²Mikàl ɨ taŋi tì ɨ gàmtɨ̀ ɨ suʼsɨ nɨ̀ Devìt a wundù wu suʼi ɨ leʼ lù sɨ afu. ¹³Mikàl ɨ lì ànfèʼsɨ̀ ɨ nyɨ̀ŋsɨ̀ ɨkuyn nɨ̀ Devìt, ɨ lɨmtɨ àtu a ànfèʼsɨ̀ nâ kì nɨ̀ ìwî i bzɨ ɨ fi chɨytɨ ànfèʼsɨ̀ ateyn nɨ̀ ndzɨsɨ.

¹⁴A nà sɨ ghɨ ta ghelɨ ghì a Sôl tùm na ghɨ ndu zuè Devìt ndù chem, Mikàl ɨ bè sɨ̂ àŋena na Devìt nɨ̀n koʼi kòʼi.

¹⁵Àŋena ndù ɨ fèʼtɨ̀ sɨ̂ Sôl, wu bè na àŋena kasi ndù yèyn Devìt kɨ̀ nô sɨ àŋena ngeŋsɨ. Wu n-bè sɨ̂ àŋena na, “Yì ndu bèʼi ŋweyn (kɨ̀ a ŋweyn ɨ kuyn) bàʼsɨ kɨ nì ɨkuyn ɨ̀ gvì nɨ̀ ŋweyn mà zue kɨ̀ nô sɨ a ma ngeŋ.” ¹⁶Mɨtì àŋena ndu zɨ a ndo nɨ̀ Devìt ɨ yeyn kɨ ànfèʼsɨ̀ ta kɨ n-nyɨŋ ɨ kuyn nɨ̀ ìwî i bzɨ atu nɨ̀ ànkeyna. Àŋena kasi ndu fèʼtɨ̀ sɨ̂ Sôl. ¹⁷Sôl ɨ tum jàŋ Mikàl ɨ bɨf sɨ̂ ŋweyn nâ, “Bòm ghà ta wà lɨ̀sɨ ma ɨ̀ nì mbàynɨ̀ yem leʼ a?” Mikàl ɨ bè sɨ̂ ŋweyn na, “Devìt tî bè sɨ̂ mà na mà kæ sɨ faŋ tɨ̀ vìsi na yì leʼ a wu zue ma.”

¹⁸A nà ghɨ ta Devìt leʼ fvɨ̀ ɨwu nɨ̀ Sôl, wu ndù ɨ yeyn Samwèl a ntèʼ Lamà ɨ fèʼtɨ̀ nô mɨ ghà vzɨ̂ a Sôl nì sɨ̂ ŋweyn, ŋêyn Sôl ɨ ndù a Nayòt ɨ nà chi afu. ¹⁹Wùl ɨ ndu fèʼtɨ̀ sɨ̂ Sôl na Devìt nɨ̀n ghɨ a Nayòt a ntèʼ Lamà. ²⁰Sôl ɨ fi tum ghelɨ na ghɨ ndu ghal gvì nɨ̀ Devìt. Àŋena ndù chèm afu ɨ yeyn anôyn a nfèʼtɨ̀ sɨ ghaʼnɨsɨ a li-a àŋena jâŋ fêʼtɨ̀ àwo, Samwèl ɨ ghɨ afu ta wul ɨ̀ tisɨnɨ nɨ̀ àŋena. Nô mɨ ɨlvɨ gha Ayvɨs a Bôbo gvì atu nɨ̀ ghelɨ Sôl nâ ghì àŋena nà sɨ boŋ jâŋ fêʼtɨ̀ àwo. ²¹Sôl ɨ yvɨ iwo zɨ-ì a yi gàyn ɨ fi tum kfeynsɨ ghelɨ na ghɨ ndu ghàl Devìt. Àŋena ndù ɨ nà sɨ fî boŋ jâŋ fêʼtɨ̀ kɨmɨ àwo. Sôl ɨ fi tum kfeynsɨ ghelɨ na à na sɨ ghɨ ìngal ìtal, yi fi gayn kɨ tî. ²²Nô Sôl nɨ̀ ngêŋ ŋweyn ɨ lu ndù a ntèʼ Lamà. A nà sɨ ghɨ ta wù ndù chèm a ngùŋ ìbɨ i mu ghê a yi nà n-ghɨ a Seku, wu bɨf sɨ̂ ghelɨ afu na Samwèl ŋêyn Devìt nɨ̀n ghɨ awo a? Ghelɨ ateyn ɨ bè sɨ̂ ŋweyn na àŋena nɨn ghɨ a Nayòt a ntèʼ Lamà.

²³Sôl ɨ lù sɨ ndù a Nayòt a ntèʼ Lamà, Ayvɨs a Fɨyini-a ɨ gvì a ŋweyn atu ɨ nà sɨ tisɨ̂ ŋweyn. Wu nà sɨ boŋ jelɨ̀ jâŋ fêʼtɨ̀ kɨ àwo tèyn nô ta ka wù nî ndù chèm a Nayòt. ²⁴Wu ndu chem afu, ɨ choʼtɨ ndzɨsɨ ŋweyn ɨ nà sɨ jâŋ fêʼtɨ̀ àwo asɨ nɨ̀ Samwèl. Wu n-nyìŋi afu kɨ nɨ̀ ìsas i yumi ɨ yisi kɨ têyn ɨ ni kfa chi. À ti iwo zɨ̀ a ghelɨ nà n-nî ghɨ nà mô ngàyn na, “Sôl sɨ ghɨ kɨmɨ nfèʼtɨ̀ ìghaʼnɨ.”