1 Samuel 18

Sôl ɨ nà sɨ ghêʼ Devìt

¹À nà n-ghɨ ta Sôl tàŋi mèsì ŋêyn Devìt Jonatàn ɨ ku ɨsuyn ŋêyn Devìt ɨ nà sɨ kôŋ Devìt kɨ̀ nô ta wù kòŋ ngêŋ ŋweyn. ²Kɨ̀ sɨ zɨ̀tɨ̀ achi nâ ghè Sôl ɨ lèm na ŋêyn Devìt na chî kɨ amoʼ a ŋweyn ɨ twò. Wù n-bu læ fi bɨmi na Devìt kasi kfa abe nɨ̀ bò ŋweyn. ³Jònatàn ɨ yɨ mɨkâyn ŋêyn Devìt na ŋêyn ŋweyn na lum ghɨ kɨ nɨ̀ ɨ̀suyn bòm ta wu nà n-koŋ Devìt nô a jûŋ. ⁴Jònatàn nɨn choʼ meyn àwaf a ŋweyn ɨ fu sɨ̂ Devìt sɨ dyèyn na wù n-kôŋ Devìt. Wù n-fu meyn kɨmɨ ndɨsɨ iwoŋ nɨ̀ ŋweyn, nɨ̀ fɨ̀nyuè fɨ ŋweynfɨ, nɨ̀ fɨ̀nchya fɨ ŋweynfɨ, nɨ̀ àkue a ŋweyn a.

⁵Sôl ɨ nà tum Devìt na wù nî mɨ ghà wu faytɨ nì nô a jûŋ. Bòm tèyn Sôl ɨ choʼ Devìt sɨ a atu a ghelɨ ndo ìwòŋ nɨ̀ ŋweyn. Nô ghelɨ iwoŋ ghɨ̀ jɨ̀m nɨ̀ ghelɨ ghɨ to nɨ̀ àŋena ɨ nà saŋlɨ̂ nô a jûŋ bòm ìwo nâ yèynì a Sôl nì têyn.

⁶A nà n-ghɨ ta Devìt zue Gòliyàt ŋêyn ghelɨ iwoŋ nɨ̀ Isìlæ̀ na kasi kfa, ghɨ̀ki fvɨ kɨ ntèʼsɨ Isìlæ̀ sɨ̀ jɨ̀m sɨ toŋtɨ Fòyn Sôl. Àŋena nà yem njàŋsɨ̀ cheŋà, buʼ ɨ̀fwo fî toŋ ndoŋsɨ. ⁷Àŋena nà n-chêŋ tì yem njàŋ bê na,

“Sôl zuètɨ mbàynɨ̀sɨ nkam

mɨtì Devìt zuetɨ nkamsɨ ìvɨ̀m.”

⁸Sôl ɨ yvɨ iwo zɨ-ì a ghɨ n-yem a njàŋ nâ ghè ɨtoŋ ŋweyn yaf nô sɨ a ŋaŋ bòm ta wu nà n-kôŋ wì iwo nâ zɨ̀-ì a njàŋ àteyn nà n-bê. Wu kfàʼtɨ̀ sɨ a ŋweyn a ngeŋ na, “Ghɨ̀kì ghêyn nɨn bê na Devìt zue meyn ghelɨ nkamsɨ ìvɨm mɨtì ma zue kɨ̀ nkam. Ghɨ mûtɨ̀ kɨ tèyn ɨ̀ nà kɨŋ na wù li alêʼ à kema sɨ a Fòyn.” ⁹Sɨ zɨtɨ kɨ ɨlvɨ nâ ghè Sôl ɨ nà sɨ ki kɨ Devìt nɨ̀ ìsɨ i bzɨ-i.

¹⁰Ɨtuʼ ɨ layn, Fɨyini fɨ tsɨynsɨ àyvɨs a bɨ-a kɨ gvi zɨ antêynɨ̀ nì Sôl nô nɨ̀ àdyaʼa kɨ̀ nô a ŋweyn a ndo. Kɨ gvi zɨ tì, Sôl ɨ nà sɨ byaytɨ̂ bê àwo nɨ̀ ìwoŋi sɨ a ŋweyn awu. Wu nà n-byaytɨ̂ tì Devìt ɨ buʼ ìluŋ sɨ̂ ŋweyn kɨ̀ ta wu nà n-lum buʼ. ¹¹Kɨ̀ têyn Sôl ɨ tɨm Devìt nɨ̀ ìwoŋ nâ zɨ-ì. Wu nà n-tɨm tì kfâʼtɨ̀ kɨ sɨ a ŋweyn a ngeŋ na, “Mɨ n-tɨm ghâŋtɨ̀ Devìt ɨwùyn ɨ ndo.” Wu n-tɨm ìngal ìbò, tɨm mɨ ɨlvɨ gha Devìt ɨ bâs kɨ bas iwoŋ ateyn.

¹²Yi n-gàyn tî Sôl ɨ nà sɨ fâyn Devìt bòm ta Bôbo nà n-sɨ ghɨ ma wù visi meyn ŋweyn ɨ̀ nà sɨ ghɨ kɨ ŋêyn Devìt, gâmtɨ̀ ŋweyn. ¹³Sôl ɨ kæ lìsi Devìt sɨ a ŋweyn a ngùŋ sɨ tum alèʼ a kɨ lu-à na wù ndu ɨ̀ nà tisɨ̂ ànôyn a ghelɨ iwòŋ a li-a nkam. Wu ndù ɨ nà sɨ lî seʼ nɨ̀ àŋena ɨtwaʼ iwòŋ. ¹⁴Devìt ɨ nà n-ghal nô mɨ ghà sɨ nì, nî kɨ a jûŋ bòm ta Bôbo nà n-ghɨ ŋêyn ŋweyn. ¹⁵A nà sɨ ghɨ ta Sôl yèyn ta Devìt nɨ̀n tɨm mɨ ìwoŋ ì kà yɨ kɨ yɨ wu fi toʼ fàyn ŋweyn nô sɨ a ŋaŋ. ¹⁶Sôl nà ni mɨ tì ghelɨ Isìlæ̀ nɨ̀ ghelɨ Judà nô ghɨ̀ jɨ̀m ɨ kôŋ Devìt bòm ta wu nà n-li seʼ nɨ̀ àŋena iwòŋ ghɨ tɨm mbàynɨ̀sɨ àŋena.

¹⁷A læ nà ghɨ achi a li-a Sôl ɨ bè sɨ̂ Devìt na, “Wâyn ɨ̀ wi ɨlwema nɨ̀ mà nɨn ghɨ afêyn, izɨyn i ŋweyni ɨ ghi Melàb. Mɨ n-fu ŋweyn sɨ̂ và sɨ a wi ɨlvɨ ta wà faŋ nà felɨ̀ kɨ felɨ sɨ̂ mà ta wul ìwòŋ vzɨ̂ a wù n-kelɨ atem ato a, nû tɨ̀woŋ tɨ Bôbo.” Wù nà n-bê tì kfâʼtɨ̀ kɨ sɨ a ŋweyn a ngeŋ na, “Mà kàʼ ma bû zuè Devìt sɨ a ma ngeŋ. Yi n-jofɨ̀ na à kwo zue kɨ̀ ghelɨ Fìlisìyà, zuè ŋweyn.”

¹⁸Devìt ɨ bè sɨ̂ Sôl na, “Mà ti n-ghɨ nô ndà? Mɨ n-ghɨ tèyn ma mà fvɨ̀ kɨ̀ nô isas i ndo i boli a Isìlæ̀. À ti kàʼ a gàyn nô ghà na mà na ghɨ lûm wayn ntoʼ a?” ¹⁹Mɨtì ɨlvɨ kfeyn na Sôl fu wâyn ŋweyn sɨ̂ Devìt ta wu n-chfɨ̀nɨ, wu kwo li fu sɨ̂ Adèl ɨ wul ɨ̀ Mèholà.

²⁰À nà ghɨ tì wâyn Sôl ɨ wi ɨ̀lvì ghɨ toŋtɨ̂ na Mikàl ɨ kôŋ Devìt. Sôl ɨ yvɨ iwo ateyn ɨ nà saŋlɨ̂-a, ²¹ɨ kfàʼtɨ̀ na yi n-fu Mikàl sɨ̂ Devìt sɨ a wi ta ka wù ni a Devìt fe ɨwu nɨ̀ ghelɨ Fìlisìyà a ghɨ zue ŋweyn. Sôl ɨ kæ fì sɨ be sɨ̂ Devìt na, “Mɨ n-fu wayn wom ɨ̀lvì a wà mala ta ka wà na ghɨ lûm wayn wom.”

²²Sôl ɨ bè sɨ̂ ghelɨ ghɨ felɨnɨ nɨ̀ ŋweyn na ghɨ taŋi sɨ̂ Devìt ibàm ɨ̀ bè sɨ̂ ŋweyn na, “Fòyn nɨ̀n kôŋ và, nô ghès ghelɨ ghɨ felɨnɨ nɨ̀ ŋweyn ɨ boŋ kôŋ và nô a jûŋ. Bɨmi iwo zɨ-ì a wu n-bê ɨ mala wâyn ŋweyn ɨ nà ghɨ lûm wâyn ntoʼ.”

²³Àŋena ndu bè sɨ̂ Devìt mɨtì wu bè na, “Yì n-kfâʼ na yi n-boynɨ̂ sɨ nà ghɨ lum wâyn ntoʼ a?” Wùl ànfɨf tèyn ta ma ghɨ kya wi nɨ̀ ŋweyn ti kàʼ wu lì wo ɨkwo sɨ fu atu nɨ̀ wâyn ntoʼ a?

²⁴Ghelɨ ghɨ felɨnɨ ateyn ɨ ndu fèʼtɨ̀ ìwo zɨ̀-ì a Devìt bè sɨ̂ fòyn. ²⁵Sôl ɨ bè na àŋena kasi ndù bè sɨ̂ Devìt na yi n-kɨŋ wi na wù fu ɨkwo atu nɨ̀ wâyn vzɨ, na yi n-kɨŋ kɨ na Devìt sɨ ɨnwam ghelɨ Fìlisìyà ɨvɨ, ɨ̀ gvì nɨ̀ ɨ̀ŋweyn sɨ̂ zɨ̀. Wù kæ sɨ ni têyn a à na ghɨ ma wù kasi meyn làʼ ghelɨ Fìlisìyà sɨ iwo afî a àŋena nì meyn sɨ̂ Sôl. À nà n-ghɨ tì Sôl ɨ kɨŋ dzɨ na ghelɨ Fìlisìyà zue Devìt.

²⁶Ghelɨ ghɨ felɨnɨ ateyn ɨ ndu làʼì ntum fòyn sɨ̂ Devìt, wu bɨmi na yi malâ wâyn ŋweyn. Ɨlvɨ vzɨ̀ a Sôl nɨn lem ɨ nà bu duʼ tɨ̀ kfeyn, ²⁷Devìt ɨ lì ghelɨ ŋweyn ŋêyn àŋena ndu tɨm zuetɨ ghelɨ Fìlisìyà ighɨ ì bò ɨ sɨ ɨnwam àŋena, ɨ kfa nɨ̀ ŋweyn sɨ̂ Sôl sɨ dyèyn na wù fu meyn àfo atu nɨ̀ wâyn ŋweyn. Nô mɨ ɨlvɨ gha Sôl ɨ fu wâyn ŋweyn Mikàl, Devìt ɨ mala.

²⁸A nà sɨ ghɨ ta Sôl yèyn na Bôbo nɨn ghɨ ŋêyn Devìt, wâyn ŋweyn fî kôŋ Devìt, ²⁹wu nà sɨ fì tôʼ fayn ndû kɨ nɨ̀ Devìt asɨ, ɨ faŋ ndu kɨ sɨ a mbàynɨ̀ nɨ̀ Devìt nô ta ka wù læ̂ kfɨ.

³⁰Ɨtu ghelɨ iwoŋ nɨ̀ ghelɨ Fìlisìyà nɨn faŋ meyn ɨ nà seʼ kɨ ɨtwaʼ iwòŋ. Àŋena nà n-seʼ nô mɨ ɨlvɨ gha Devìt ŋêyn ghelɨ ŋweyn ɨ tɨm yɨ kɨ yɨ. Wu nà n-yɨ chwô ta ghelɨ Sôl ghɨli nà n-yɨ. Iwo nâ yèyni nì nô mɨ ndà ɨ nà sɨ kya Devìt.