1 Samuel 21

Devìt ɨ leʼ Sôl

¹Devìt nɨ̀n lu meyn ɨ ndu yeyn nfèʼtɨ̀ ìghaʼnɨ zɨ̀ a ghɨ nà n-toŋtɨ na Ahimelèk a ntèʼ Nôb. A nà sɨ ghɨ ta wù yèyn Devìt ɨ nà sɨ faynà, ɨ bɨf sɨ̂ Devìt nâ, “Bòm ghà ta wà n-jelɨ kɨ vâ nì nyɨŋ a? Ghelɨ iwoŋ nɨ̀ và ba?”

²Devìt ɨ bè sɨ̂ ŋweyn na, “Mɨ n-jelɨ̀ kɨ nìnyɨŋ bòmta fòyn ghesɨ̀nà tùm ma na mà ni iwo sɨ̂ ŋweyn. Wù bè na mɨ n-kelɨ wi sɨ fèʼtɨ alêʼ kì a mɨ ndû ateyn sɨ̂ wùl, kelɨ wi mɨ sɨ fèʼtɨ̀ iwo zɨ̀ a mɨ n-dû sɨ nì. Ma feʼtɨ meyn àlêʼ kì a ka ghelɨ iwoŋ nɨ̀ mà koli ma ateyn. ³Devìt ɨ taŋi tì ɨ bɨf sɨ̂ Ahimelèk na wà n-kelɨ àfo a yɨnɨ-a sɨ fu ma a? Wà na kelɨ tɨ̀ghef tɨ abayn tɨ̀ tâyn kèsa nô mɨ ghà ta ghɨ kàʼ a ghɨ yɨ wa fu.”

⁴Mɨtì nfèʼtɨ̀ àteyn ɨ bè sɨ̂ Devìt na, “Mɨ n-kelɨ wi àmbɨ̂mlɨ̀ abayn ta nô mɨ ndà kàʼ a wù yɨ. Mɨ n-kelɨ kɨ ɨ̀fwo ɨ yɨnɨ ma ghɨ fu meyn sɨ̂ Bôbo. Mɨtì yì kàʼ a yì yɨ ɨlvɨ ta zɨ̂ ghelɨ̀ ghya bû chi nɨ̀ ghɨ̀ki ghi a mɨ̂chi ghàyn.”

⁵Devìt ɨ bè sɨ̂ ŋweyn na, “Ghesɨ bû chi nɨ̀ ghɨ̀ki ghes a mɨ̂chi ghàyn. Ghès nɨn se sɨ seʼ nô mɨ ifêl ìkà ghesɨ baʼtɨ ngêŋ seysɨ ɨ nà layna, ghèsɨ nà n-kaʼ ghɨ bû faŋ tɨ̀ bàʼtɨ ateyn nɨ iyeynì layn.” ⁶Wu taŋi tì nô mɨ ɨlvɨ gha Ahimelèk ɨ fu abayn nâ kì sɨ̂ ŋweyn. Wù n-fu tî bòm ta abayn a li-a nà n-ghɨ wi a bu kɨ akî a ghɨ fù meyn sɨ̂ Bôbo. Abayn ateyn a nà n-ghɨ ma ghɨ kùʼtɨ̀ lìsì kɨ lisi asɨ nɨ̀ Bôbo ɨ̀ tòm alumnɨ-a.

⁷À nà n-ghɨ tì wùl ɨ̀ fèlɨnɨ nɨ̀ Sôl ɨ̀lvɨ ghɨ toŋtɨ̂ na Duwèk a ghɨ wul ɨ̀ Edòm ɨ ghɨ afu achi nâ ghè bòmta wu nà n-kelɨ ìwo sɨ ni sɨ̂ Bôbo. À nà n-tôʼnɨ̀ ŋweyn nɨ̀ njɨ̀sɨ Sôl sɨ̀ baʼsɨ̂ nɨ̀ ghelɨ ghì a ghɨ nà n-kini njɨ̀sɨ ateyn.

⁸Devìt ɨ bɨf sɨ̂ Ahimelèk nâ, “Wà n-kelɨ ìwoŋ kèsa fɨ̀nyuè afêyn a? Ma bû gvì nɨ̀ ɨ̀fwo iwoŋ nɨ̀ mà, nô mɨ fɨ̀nyuè bòm ta mà nì nà jelɨ̀ a ntum nɨ̀ fòyn luŋ luŋ.”

⁹Ahimelèk ɨ bè na, “Fɨ̀nyuè fɨ Gòliyàt, ɨ wul ɨ̀ Fìlisìyà vzɨ̀ a wà tî zuè ibal i Elà nɨn ghɨ afêyn. Fɨ n-ghɨ ma ghɨ lɨm meyn nɨ̀ ɨ̀byâs ɨ ndzɨsɨ ɨ̀ lèm ibàm awaf nɨ̀ nfèʼtɨ̀ ì ngaŋtɨnɨ. Wà nà koŋà a wà lì. Ghèsɨ̀ nɨn kelɨ wi fɨ̀nyue afêyn a bu kɨ ɨfi nâ fìfɨ̀.” Devìt ɨ bè sɨ̂ ŋweyn na, “Gvi nɨ̀ ɨ̀nfeynfɨ sɨ̂ mà. Nô fɨ̀nyuè fɨlifɨ nɨn jofɨ̀ chem wi ta ɨ̀nfeynfɨ.” ¹⁰A nà ghɨ kɨ achi nâ ghè Devìt ɨ lù sɨ afu bu leʼ kɨ Sôl ɨ ndu yeyn Akìsh ɨ fòyn Gât, ¹¹mɨtì nchìsɨ ŋweynsɨ ɨ yeyn Devìt ɨ nà sɨ bɨf sɨ̂ ŋweyn nâ, “Ɨwêyn nɨ̀n ghɨ wi Devìt ɨ fòyn ghelɨ Isìlæ̀ tèyn a? Ba a n-ghɨ ŋweyn a ghelɨ Isìlæ̀ nà n-yem njàŋsɨ̀ kûm ŋweyn, saŋlɨ̂ kûm tɨ̀woŋ tìtɨ̀ a wù tɨm yɨ bê na,

“Sôl zuetɨ meyn mbàynɨ̀sɨ̀ ŋweyn nkam, mɨtì Devìt zuetɨ nkamsɨ ìvɨm ìvɨm.”

¹²Devìt ɨ yvɨ ta ghɨ n-taŋi kûm ŋweyn tì iwo ateyn i nà fu ngeʼ sɨ̂ ŋweyn, wu nà sɨ fayn na fòyn Gât nâ vzɨ̀ nɨn zue zɨ̀. ¹³A nà sɨ ghɨ mɨ ɨlvɨ gha ta Devìt nɨ̀n ghɨ ŋêyn fòyn Akìsh nɨ̀ nchìsɨ ŋweynsɨ wu nà sɨ kem ni kɨ na yi n-jaʼ jaʼ, àŋena nà sɨ mômsɨ̀ sɨ tisɨ ŋweyn wu to nî kɨ ta wul ɨ̀ jaʼnɨ̀ dyôyntɨ̀ ɨ̀fwo ɨchfɨ mbàyn, mɨ̀nchya fvɨ kali a ŋweyn a nyuŋsɨ idyèl.

¹⁴Akìsh ɨ bè sɨ̂ nchìsɨ ŋweynsɨ na, “Wùl ɨ̀ wèyn sɨ jaʼ jaʼ. Yi n-gvî nɨ̀ ŋweyn na mà ni gha nɨ̀ ŋweyn a? ¹⁵Ghelɨ ghɨ jaʼnɨ sɨ ghɨ ma ghɨ dvɨ̂ meyn chwòsɨ̀ ilaʼ afêyn. Yi fî lì gvî nɨ̀ ɨ̀lvì na wù na jaʼ a ma asɨ bòm gha? Mɨ n-kôŋ wì na wù zɨ a ma ndo.”