1 Kings 9

Bôbo ɨ fvɨ̀ ikèʼ nɨ̀ Sòlomòn

¹Kɨ̀ têyn ta fòyn Sòlomòn bàʼlɨ̀ meyn mèsì ndô Bôbo, nɨ̀ ntoʼ ŋweyn nɨ̀ ndo sɨ lisɨ sìsɨ̀ a wu n-kfàʼtɨ sɨ bàʼlɨ̀. ²Bôbo ɨ fi fvɨ̀ sɨ a ànkùmtɨ̀ ɨlvɨ ikèʼ nɨ̀ Sòlomòn kɨ̀ ta wu n-fvɨ̀ a Gibìyòn, ³ɨ bè sɨ̂ ŋweyn na, “Ma beynsɨ meyn ìjêm ìzæ fì nì àwo kì a wà gvì asɨ nɨ̀ mà layn na mà ni. Ma ni meyn na ndo yèyn a wà bàʼlɨ̀ sɨ̂ mà na ghɨ ndo sɨ a nyɨŋ. Ndo nâ yèyn na ghɨ àlêʼ ma kɨ faŋ meyn sɨ̂ mà kɨ̀ samoʼ alè ta ka ghelɨ na koʼsɨ̂ mà ateyn kɨ̀ mɨlvɨ ɨ̀n jɨ̀m. Ma na kfàʼtɨ̀ ndo nâ yèyn fî chî ndo àteyn kɨ̀ mɨlvɨ ɨ̀n jɨ̀m.

⁴Sɨ̂ và, wà kæ nà ni awo à jɨ̀m kì a mà bè na wà ni kɨ̀ ighel ta bò vâ Devìt tî nà ni-à, bê saʼmoʼ, chî nchînɨ̀ àtì-ati, lêm tɨ̀saʼ temtɨ chî ta mɨ n-kɨŋ, ⁵a mà lem a isas i ndo nɨ̀ và faŋ samoʼ sɨ isas i ndo i tɨ̂fòyn kɨ̀ ighel ta mɨ n-læ chfɨ̀nɨ sɨ̂ bò vâ Devìt na à læ̀ koʼ mɨ fòyn ɨ̀ kfà ibàm nɨ̀ và sɨ saʼ ghelɨ Isìlæ̀, a nà ghɨ kɨ wul ma wù fvɨ̀ isas i ndo nɨ̀ và. ⁶Mɨtì ma wà kæ bèyn jɨm zyâ sɨ̂ mà zɨ̂ woyn ghya nà yvɨnɨ̂ wì sɨ̂ mà, lêm wì tɨsaʼ tìtɨ̀ a mà fù sɨ̂ zɨ̀, kwo ndù nà koʼsɨ̂ mɨ̀yìnì mzɨ̀ a ghelɨ ghɨ li nɨn koʼsɨ, ⁷a mà fvɨsɨ ghelɨ Isìlæ̀ sɨ ilaʼ ghè a mà tî fu sɨ̂ àŋena fì màʼì ndo zɨ̀ a mà tî làynsɨ ɨ̀ lèm na ghɨ na koʼsɨ̂ mà ateyn, nà bu fì ki wi ndo àteyn. A mà fî nì a nô ghelɨ ghɨ̀ jɨ̀m na chyeʼ ghelɨ Isìlæ̀, wêsɨ̀ àŋena, ki àŋena yeyn wi. ⁸Ghelɨ ghì a ghɨ n-chwo àŋena nɨn yeyn ndô Fɨyini ma yì sɨ nyɨŋ kɨ a nse ta ghɨ bɨ̀ytɨ̀, achfɨ̂ a àŋena yum a àŋena na bɨf na, ‘Bôbo vìsi na ghɨ ni iwo yèynì sɨ̂ ìlaʼ yèynì fì nì sɨ̂ ndô Fɨyini tèyn bòm ghà?’ ⁹a ghelɨ feʼtɨ sɨ̂ àŋena na, ‘À n-ghɨ bòm ta àŋena tî bèyn jɨm sɨ̂ Bôbo Fɨyini fɨ àŋena fìfɨ̀ a fɨ tî lì fvɨ̀ nɨ̀ ghɨ̀bo àŋena sɨ a Ijìb ɨ̀ ndù nà koʼsɨ̂ mɨ̀yìnì mzɨ̀ a ghelɨ ghɨ̀ li nɨn koʼsɨ. À ti iwo zɨ̀ a Bôbo vìsi ngeʼ nâ yèyn yì gvî sɨ̂ àŋena.

Awo kì a Sòlomòn nɨn nì

¹⁰Sòlomòn nɨn læ li bèŋ mɨ̀vɨm ɨ̀n bò sɨ bàʼlɨ ndô Fɨyini nɨ̀ ntoʼ ŋweyn. ¹¹À nà n-ghɨ antêynɨ̀ bèŋsɨ̀ nâ ghàyn mɨ̀vɨm ɨ̀n bò, fòyn Hilàm vzɨ̀ a wu n-saʼ ilaʼ i Tayà ɨ fu ɨnkâʼ mɨ̀ sedà nɨ̀ ɨ̀nkàʼ mɨ̀ sayblès nɨ̀ àso ɨkwo sɨ̂ fòyn Sòlomòn. Bòm tèyn, Sòlomòn ɨ fu ntèʼsɨ Galìlî sɨ̂ ŋweyn mɨ̀vɨm ɨ̀n bò ta wù tî gàmtɨ̀ fu ɨfwo abàʼlɨ̀ vzɨ̀ a wù tî nà kɨŋ kûm ndô Fɨyini nɨ̀ ntoʼ ŋweyn. ¹²Mɨtì Hilàm ɨ lù a Tayà ɨ gvì ɨ yeyn ntèʼ sìsɨ̀ a Sòlomòn fù sɨ̂ ŋweyn ɨ nà saŋlɨ̂ wì kûm ntèʼsɨ ateyn, ¹³ɨ bɨf na, “À n-ghɨ ìnkì i ntèʼsɨ ì kà têyn a wâynà wom? Ɨsêynsɨ̀ nɨn ghɨ ntèʼsɨ kfeynɨ̂ wì sɨ nì iwo i li ateyn. Hilàm ɨ toŋtɨ ntèʼ nâ sèynsɨ̀ na, “Kabùl,” yi dyêyn na ɨ ntèʼsɨ kelɨ wi ifêl, a ghɨ ìzɨyn zɨ̀ a ghɨ n-jâŋ sɨ koʼ sɨ chem layn. ¹⁴A ghɨ tì ma Hilàm ti meyn tsɨ̀ynsɨ ɨ̀kfaŋ asɨ ɨkwo sɨ̂ Sòlomòn ighɨ ì bo nɨ̀ ɨ̀kfaŋ ɨ̀ kfæ̀.

¹⁵A nì ìwo yèynì, fòyn Sòlomòn ɨ lì ghelɨ ɨ nà kaynà ghɨ felà sɨ bàʼlɨ ndô Bôbo nɨ̀ ntoʼ ŋweyn, nɨ̀ Milò nɨ̀ àzɨ a mbàyn Jèlusalèm à nɨ̀ ntèʼ Hazò nɨ̀ Megidò nɨ̀ Gezà. ¹⁶Felò ɨ fòyn Ijìb nà n-ghɨ ma wù n-koʼ meyn ɨ tɨm yɨ ntèʼ Gezà ɨ nyòʼ nɨ̀ ɨ̀vɨsɨ, ɨ zuetɨ ghelɨ Kenàn ghì a ghɨ n-chi ateyn ɨ lì ntèʼ àteyn ɨ fu sɨ̂ wâyn ŋweyn ɨ wi Sòlomòn na à n-ghɨ ìfu zɨ̀ wàyn nɨ̀ mala, bæ ɨ fu sɨ̂ ŋweyn. ¹⁷Sòlomòn ɨ nà sɨ kàynà ghɨ kasî bâʼlɨ̀-à ta ka ɨlwêʼ ateyn na to-a, ɨ kasi bàʼlɨ kɨmɨ ntèʼ Gezà nɨ̀ ntèʼ Bet-Holòn zɨ̀ a yì n-ghɨ ibal, ¹⁸ɨ kasi bàʼlɨ Tamà ɨ ntèʼ zɨ̀ a yì n-ghɨ a nse ìyum nɨ̀ Judà, ɨ bàʼlɨ̀ Balàt, ¹⁹baʼsɨ̂ nɨ̀ ntèʼ sìsɨ̀ a ghɨ nà n-lem ɨfwo ɨ yɨnɨ nɨ̀ ɨ̀fwo ɨlvɨ ateyn, ɨ kasi bàʼlɨ̀ ntèʼ sìsɨ̀ a ghɨ n-lêm mɨtùsɨ iwòŋ ateyn nɨ̀ ɨ sîsɨ̀ a ghelɨ ghì a ghɨ n-nû iwòŋ atû nyamsɨ kfaŋ nɨn chi ateyn.

²⁰Ghelɨ ghɨ li nà n-bu chî ilaʼ a ghɨ wi ghelɨ Isilæ̀. Ghelɨ ateyn nà n-ghɨ ghelɨ Amòn nɨ̀ ghelɨ Hît nɨ̀ ghelɨ Belìz nɨ̀ ghelɨ Hîv nɨ̀ ghelɨ Jubùs. ²¹À ti n-ghɨ woyn ghelɨ nâ ghèyn a ghelɨ Isìlæ̀ nɨn læ visi ɨ faŋ tɨ̀ zuètɨ. Sòlomòn ɨ lèm ɨghêyn nâ ghèyn ta ka ghɨ na kàynà àŋena nî ìfêl sɨ koʼ sɨ chem layn. ²²Mɨtì Sòlomòn ɨ faŋ tɨ lem wul ɨ̀ Isìlæ̀ nô ɨ̀ mòʼ na ghɨ na kàynà wu felɨ̀-à. Ghelɨ Isìlæ̀ nà n-ghɨ sugèyʼsɨ ŋweyn, ghɨ ghelɨ ghɨ tisɨnɨ, ghɨ ghɨ̀bo ndo ìwòŋ, ghɨ ghelɨ ghì a ghɨ n-nû a mɨtù mɨ̀ ìwòŋ, ghɨ ɨghî a ghɨ n-gufɨ̀ mɨtù mɨ̀ ìwòŋ. ²³Ghelɨ ghì a àŋena nà n-ghɨ ɨtu sɨ̂ ɨ̀tu tɨ̂fèl nà n-ghɨ ighɨ ì tâyn nɨ̀ ghelɨ mɨ̀vɨ̂m tâyn. Àŋena nà n-kinî ghelɨ ghì a ghɨ n-kini ifêl.

²⁴Wî Sòlomòn ɨ wâyn Felò ɨ lù sɨ a ntèʼ ntoʼ nɨ̀ Devìt ɨ koʼ sɨ a ndo ghè a Sòlomòn tî bàʼlɨ̀ sɨ̂ ŋweyn, Sòlomòn ɨ kæ bàʼlɨ alêʼ kì a ghɨ n-toŋtɨ na Milò.

²⁵Sòlomòn nà n-fu tɨ̀fu tɨ nyoʼnɨtɨ nɨ̀ ɨtɨ nyvɨnɨtɨ a bêŋ ìngal ì tal. Wu nà n-fu tɨ̀fu nâ tèyntɨ̀ abaŋ ifu afî a wù tî bàʼlɨ sɨ̂ Bôbo. Wu nà n-nyôʼ ɨ̀fwo ɨ lɨmtɨnɨ abaŋ nâ ghàyn a kɨ nà n-ghɨ asɨ nɨ̀ Bôbo. À tì ta wù n-læ ni ɨ mèsì ìfêl i ndô Fɨyini nâ yèynì.

²⁶Fòyn Sòlomòn ɨ nì ghɨ faytɨ ngùʼsɨ alèʼ ghè a ghɨ n-toŋtɨ na Eziyon Gebà. Alêʼ nâ kèynà ɨ ghɨ a mbæ̀ ntèʼ Elòt baʼsɨ̂ ndû a mbæ̀ jvà i ghaʼnɨ zɨ̀ a ghɨ n-toŋtɨ na Jvâ Lidsɨ̀ ilaʼ i Edòm. ²⁷Fòyn Hilàm nà n-kelɨ ghelɨ ghɨ felɨnɨ nɨ̀ ŋweyn ghì a ghɨ n-felɨ̀ a ngùʼ, àŋena kya ìwo nô sɨ a ŋaŋ kûm jva. Wu bè àŋena ndu nà felɨ̀ ŋêyn ghelɨ ghɨ felɨnɨ nɨ̀ Sòlomòn a ngùʼsɨ nɨ̀ Sòlomòn. ²⁸Ghelɨ jvâ nâ ghèyn ɨ ndù ilaʼ i Ofì ɨ kfa nɨ̀ ɨ̀kfaŋ aso ɨkwo ighɨ nsòmbo nɨ̀ ɨ̀kfaŋ njvàsɨ̀ kæ̀ ɨ fu sɨ̂ fòyn Sòlomòn.