1 Kings 10

¹Nà fòyn ìlaʼ i Shebà ɨ yvɨ awo kì a ghɨ bè kûm ìtof i bemnɨ-i nɨ̀ Sòlomòn nɨ̀ ìkoʼsɨ zɨ̀ a ghɨ n-fu sɨ̂ ŋweyn bòm ìtof nâ yèyn a Bôbo fu, wu gvì a Jèlusalèm sɨ mom ŋweyn nɨ̀ àwo kì a wu nà n-bɨftɨ sɨ̂ ŋweyn kɨ to nô sɨ a ŋaŋ. ²Wu n-gvì ŋêyn ghelɨ nô sɨ a idvɨ̀ a ghɨ ghelɨ ghì a ghɨ nì nà duʼ a ngùŋ nɨ̀ ŋweyn. Nyamsɨ mɨ̂nkoʼsɨ nà n-ghɨ kɨ sɨ idvɨ̀ ma sɨ beʼi meyn ɨ̀fwo ɨ lɨmtɨnɨ ɨ fomnɨ kɨ̀ a tɨ̂nkì a tɨ̂nkì, nɨ̀ àsɨ ɨkwo nô sɨ a idvɨ̀ nɨ̀ tɨ̀nkìtɨ ngòʼ sɨ lisɨ yi boynɨ̂ wì sɨ yeyn. Wu gvì tì ɨ bɨf awo kì nô à jɨ̀m a kɨ nà n-ghɨ a ŋweyn ikfàʼtɨ̀ sɨ̂ Sòlomòn. ³Sòlomòn ɨ bèynsɨ̀ tɨ̀bɨf tɨ ŋweyn nô tɨ̀ jɨ̀m kɨ àtì-ati. Nô ìwo ì mòʼi nɨn bu læ to ghaʼ ŋweyn sɨ bèynsɨ̀. ⁴A nà ghɨ ta nà fòyn ìlaʼ i Shebà yeyn itof zɨ̀ a fòyn Sòlomòn nɨn kelɨ, ɨ fi yeyn ntoʼ zɨ̀ a wù bàʼlɨ̀, ⁵ɨ yeyn ɨfwo ɨ yɨnɨ vzɨ̀ a ghɨ tòmtɨ abaŋ ɨfwo ɨ yɨnɨ, ɨ yeyn dzɨ zɨ̀ a ghelɨ ghɨ felɨnɨ nɨ̀ ŋweyn nɨn duʼ ateyn, ɨ yeyn ghelɨ ghì a ghɨ n-chwôsɨ̀ ɨfwo ɨ yɨnɨ nɨ̀ mɨ̀lùʼ nô nɨ̀ dzɨ z̀ a àŋena làf ateyn, nɨ̀ tɨ̀fu tìtɨ̀ a wu n-fu a ndo nɨ Bôbo, ɨchfɨ̂ ŋweyn ɨ yum. ⁶Nà fòyn ìlaʼ i Shebà ɨ bè na, “Iwo zɨ̀ a mà tî yvɨ ilaʼ nɨ̀ mà kûm và nɨn ghɨ kɨ samoʼ. Awo kì a wà nì nɨ̀ ìtof zɨ̀ a wà n-kelɨ nɨn ghɨ samoʼ. ⁷Mɨtì ma ti meyn nà yvɨ àwo nâ kèynà bɨmî wì, gvì yeyn nɨ̀ àsɨ à kema kæ bɨmi. Mà tî yvɨ kɨ̀ abeʼ iwo. Ighaʼ ìzæ nɨ̀ ìtof i chwô meyn ìwo zɨ̀ a ghɨ tî fèʼtɨ̀ sɨ̂ mà. ⁸Ghelɨ ntum nɨ̀ và ghì a ghɨ n-ti asɨ nɨ̀ và nɨn ghɨ njòfsɨ ɨtu bòm ta àŋena nɨn kelî ìtof ìzæ. ⁹Mɨ n-koʼsɨ̂ Bôbo Fɨyini fyafɨ ta fɨ tî yeyn yi kfeynɨ sɨ̂ ŋweyn sɨ lem vâ na wà na ghɨ fòyn sɨ̂ ghelɨ Isìlæ̀. Fɨyini fɨ nɨn kelɨ ìkôŋ sɨ̂ ghelɨ Isìlæ̀ yi kelɨ wi ngòʼsɨ. À ti iwo zɨ̀ a yi nì wù lêm và sɨ a fòyn ta ka wà saʼ ɨ̀ nì a ghelɨ na chî a dzɨ samoʼ nɨ̀ dzɨ àtì-ati.”

¹⁰Nà fòyn ìlaʼ i Shebà ɨ taŋi tèyn ɨ fu ɨkfaŋ aso ɨkwo sɨ̂ fòyn ighɨ ì bò nɨ̀ ɨ̀kfaŋ ɨ̀ kfæ̀, ɨ fu ɨfwo ɨ lɨmtɨnɨ ɨ fomnɨ kɨ̀ sɨ idvɨ̀, nɨ̀ tɨ̀nkì tɨ ngòʼsɨ lisɨ yi boynɨ̂ wì sɨ yeyn. Ɨfwo ɨ lɨmtɨnɨ ɨ fomnɨ ɨlvɨ nɨn bu læ fi gvì dvɨ̂ ghɨ ta ɨvzɨ̂ a nà fòyn ìlaʼ i Shebà nɨn læ gvi nɨ̀ ŋweyn ɨ fu sɨ̂ fòyn Sòlomòn.

¹¹Ngùʼsɨ ghaʼlɨnɨsɨ nɨ̀ Hilàmsɨ̀ nɨn boŋ meyn gvì nɨ̀ àso ɨkwo ma kɨ lù a Ofì nɨn ɨ̀nkàʼ mɨ̀ almon nô sɨ idvɨ̀ nɨ̀ ngòʼsɨ lisɨ yi boynɨ̂ wì sɨ yeyn ma ɨfwo nâ wèyn lù kɨ̀ a Ofì. ¹²Sòlomòn ɨ lì ɨ̀nkâʼ mɨ̀ almòn nâ mèyn ɨ faytɨ ɨ̀lwêʼ ɨwu ɨ ghalɨnɨ ateyn a ndô Fɨyini nɨ̀ ɨvzɨ̂ a wu n-ghɨ a ntoʼ ɨ lì ɨ̀nlì ɨ faytɨ tɨ̀luŋ tɨ mɨchaʼ ateyn sɨ̂ ghelɨ ghɨ yemnɨ. Sɨ zɨ̀tɨ̀ achi nâ ghè, sɨ koʼ sɨ chem layn, ɨ̀nkàʼ mɨ̀ almòn ɨn lì bû timi fì gvì, wùl ɨ̀ bû tìmi fì yeyn. ¹³Fòyn Sòlomòn ɨ fu nô mɨ ghà ta Nà fòyn ìlaʼ i Shebà nà n-kɨŋ na wù fu sɨ̂ ŋweyn. Wu n-fu baʼsɨ atu ateyn nɨ̀ ivzɨ̂ a wù fu meyn sɨ̂ ŋweyn ta fòyn. Wu lù ŋêyn ghelɨ ŋweyn ɨ kasi ndù sɨ ilaʼ i Shebà.

Ighaʼ i fòyn Sòlomòn

¹⁴Ɨkfaŋ aso ɨkwo vzɨ̀ a Sòlomòn nɨn keli kɨ a bêŋ ìmòʼ nà n-ghɨ nkam nɨ̀ ɨ̀vɨ nɨ̀ ighɨ ì tal njvàsɨ̀ bo. ¹⁵Aso ɨkwo nâ kèynà nɨn gvi kfeynsɨ atû àteyn nɨ aki-a a ghelɨ mbèʼìkùm nà n-jelɨ̀ ghɨ kfa nɨ̀ ànkeyna, nɨ akî a tɨfôytɨ ghelɨ Alàb nɨ̀ ghelɨ ghì a ghɨ n-tisɨ ɨbyâs ilaʼ nà n-gvî fu sɨ̂ Sòlomòn baʼsɨ̂ nɨ̀ ɨ̀kwo aso ɨkwo a fɨfâ.

¹⁶Sòlomòn ɨ bè ghɨ buʼ asɨ ɨkwo nɨ̀ àmbuʼa ɨ faytɨ nkyasɨ iwòŋ sɨ ghaʼnɨsɨ ateyn ighɨ ì bò, nô mɨ ì kà ɨ ghɨ ma asɨ ɨkwo zɨ meyn ateyn ma ghɨ lì akaŋ asɨ ɨkwo a ghɨ gwonɨ ingal ì tal. ¹⁷Wu fi bè ghɨ buʼ asɨ ɨkwo nɨ̀ àmbuʼ a ɨ faytɨ ɨ̀nkyà iwo ɨtwelâ ateyn ighɨ ì tal, nô mɨ à kà ɨ ghɨ ma asɨ ɨkwo zɨ meyn ateyn ma ghɨ lì/akaŋ asɨ ɨkwo a ghɨ gwonɨ ingal ìvɨm. Fòyn ɨ lì ɨ ndu lèm a ndo/ ma ghɨ lì aso ɨkwo kì a kɨ n-zɨ ɨnkyà iwòŋ ɨ ghaʼnɨ a ghɨ gwonɨ ingal ì kæ̀/Fòyn ɨ lì ɨ̀nkyà mɨ̀ àteyn ɨ ndu lèm a ndo ɨ̀nkàʼ mɨ̀ àku mɨ Lebanòn.

¹⁸Fòyn ɨ bè ghɨ faytɨ tsɨsɨ àchɨ a tɨ̂fòyn nɨ̀ àsoŋ a àtàm à ɨ fi tsɨsɨ mèsì ɨlwèʼ ɨlvɨ nɨ̀ àso ɨkwo a juŋà. ¹⁹Ghɨ nà n-koʼ mbaŋisɨ ntufa sɨ chem achɨ ateyn. Atu ibàm achɨ nâ kèynà nà n-ghɨ a nkal a nkal. Mbæ̀sɨ ateynsɨ nà n-kelɨ ɨ̀lwêʼ vzɨ̀ a ghɨ n-lêm akœ ateyn, ma ghɨ lem meyn ɨ̀nfyèʼsɨ̀ ɨ bzɨ̀nkem sɨ̀ bò tòmtɨ kɨ̀ a mbæ̀sɨ ɨlwèʼ akœ nâ ghayn. ²⁰Mbaŋi sìsɨ̀ ntufa a sɨ nà n-koʼ chem achɨ a tɨ̂fòyn nà n-kelɨ ɨ̀nfyè;sɨ̀ ɨ bzɨ̀nkemsɨ njvàsɨ̀ bò. Mbaŋi ìmòʼ ɨ kelɨ bzɨ̀nkem sɨ̀ bò, ìmòʼ ɨ ti abàs àmòʼ, ìlì ɨ ti abàs a li-a. Ilaʼ i li nɨn bu læ faytɨ achɨ a tɨ̂fòyn kɨ nà ghɨ a dzɨ nâ ghàyn. ²¹Ɨfwo ɨ̀ jɨ̀ vzɨ̀ a fòyn Sòlomòn nà n-yvɨ ateyn nà n-ghɨ ma ghɨ faytɨ nɨ̀ àso ɨkwo. Ɨvzɨ̂ a wu nà n-ghɨ a ndo ɨ̀nkàʼ mɨ̀ àku mɨ̀ Lebanòn ɨ ghɨ ma ghɨ faytɨ nɨ̀ àso ɨkwo a juŋà. Afo nà n-ghɨ wi ateyn ma ghɨ faytɨ nɨ̀ Silvà. Ghɨ nà n-lî wì na aso ɨkwo a fɨfâ nɨn ghɨ àfo a mɨchi nɨ̀ Sòlomòn. ²²Fòyn Sòlomòn nà n-kelɨ ngùʼ sɨ ghaʼnɨsɨ nô sɨ idvɨ̀ ma sɨ lù a Tashìsh. Sɨ nà n-ghɨ a jvâ ŋêyn ɨsisɨ Hilàmsɨ̀, bèŋsɨ nà n-chwô sɨ̀ tal, ngùʼ nâ sèysɨ̀ ɨ kfa nɨ̀ àsɨ ɨkwo, nɨ̀ aso ɨkwo a fɨfâ nɨ̀ àsoŋ a àtàmà nɨ̀ kaynsɨ nɨ̀ mɨ̀nyûyn ɨ̀njofɨnɨ̂ ɨ̀nlì ghɨ toŋtɨ̂ na bikòʼsɨ̀. ²³Fòyn Sòlomòn nà n-kelɨ ìghaʼ nɨ̀ ìtof i chwô nô tɨ̀fôyn tɨ̀ jɨ̀m. ²⁴Ghelɨ nà n-lû kɨ ɨlwêʼ ɨ̀ jɨ̀m gvî kelî àwo itof i bemnɨ-i ghè a Fɨyini fɨ fu sɨ̂ Sòlomòn. ²⁵Nô mɨ nda nà n-gvi-à kelɨ àfo ɨ fu sɨ̂ fòyn ta ɨfwo ma ghɨ faytɨ nɨ̀ aso ɨkwo a fɨfâ, kèsa aso ɨkwo, kèsa dàlasɨ, kèsa ɨfwo vzɨ̀ a wu n-lɨ̂mtɨ̀ fom, kèsa nyamsɨ kfaŋsɨ, kèsa ɨ sîsɨ̀ a nyàm kfaŋ tî ku njàkâs yì bzɨ.

²⁶Sòlomòn ɨ bàʼlɨ koʼsɨ ndo ìwoŋ nɨ̀ ŋweyn ɨ nà kelɨ mɨtùsɨ iwòŋ nkàm nɨ̀ ighɨ ì kæ̀, kelɨ ghelɨ ghì a ghɨ n-tɨm iwoŋ atû nyamsɨ kfaŋ nkam njvàsɨ̀ bò ɨ gwònɨ̀ ɨ lèm ghɨli a ngùŋ nɨ̀ ŋweyn a Jèlusalèm, ɨ lèm ghelɨ a ntèʼsɨ afî a wù lèm mɨtùsɨ iwòŋ ateyn. ²⁷Fòyn Sòlomòn nɨn ni meyn ilaʼ i Isìlæ̀ ɨ ghaʼ ɨkwo nô sɨ a ŋaŋ. A nà n-ghɨ a ntèʼ Jèlusalèm, ɨkwo aso ɨkwo a fɨfâ ɨ dvɨ̂ ghɨ kɨmɨ ta ngòʼsɨ̀, ɨ̀nkàʼ mɨ̀ sedà mzɨ̀ a ghɨ tèyntɨ ɨ dvɨ̂ ghɨ kɨmɨ ta ɨnkâʼ mɨ̀ fîksɨ̀ mzɨ̀ a mɨ̀ n-lema a isas i kfɨynsɨ. ²⁸Nyamsɨ kfaŋ sìsɨ̀ a fòyn Sòlomòn nà n-kelɨ nà n-ghɨ ma sɨ lù a Ijìb, fì lù a ilaʼ ikuè. Sɨ nà n-ghɨ ghelɨ mbèʼìnkùm nɨ̀ fòyn ndû ghɨ yuyn ɨkwo ghè a ghɨ n-se sɨ yuyn afo anòyn ghɨ yuyn ateyn. ²⁹Mɨtù mɨ̀ ìwoŋ nà n-fvɨ̂ ilaʼ i Ijìb ghɨ beʼlɨ sɨ ɨkwo akas a aso ɨkwo a fɨfâ ighɨ ntufa, à na ghɨ nyâm kfaŋ ghɨ beʼlɨ sɨ ɨ̀vɨ̀ nɨ̀ mɨ̀vɨm ɨ̀n tâyn. À ti ta ghelɨ mbèʼìnkùm nɨ̀ fòyn na nî fî kasî beʼlɨ̂ sɨ̂ tɨ̀fôyn tɨ tɨlaʼ tɨ Hîtsɨ̀ nɨ̀ ɨtitɨ ilaʼ i Silìyà.