1 Kings 8

Sòlomòn ɨ zɨsɨ àntayntayn a mɨ̂kàyn nɨ̀ Bôbo a ndô Fɨyini

¹A nà sɨ ghɨ ta Sòlomòn mèsì meyn àbâʼlɨ̀ wu bè ghelɨ ɨghɨ asɨ ghì a à n-ghɨ ɨtu asas a ndosɨ a ilaʼ i Isìlæ̀ ɨ̀ yvɨ̀ŋtɨ̀ a Jèlusalèm ta ka ghɨ li àntayntayn a mɨ̂kàyn nɨ̀ Bôbo kì a kɨ tî nà ghɨ a ntèʼ ntoʼ nɨ̀ Devìt ɨ ntèʼ zɨ̀ a ghɨ n-toŋtɨ na Zayòn. ²Ghelɨ Isìlæ̀ nô ghɨ̀ jɨ̀m nɨn gvi meyn asɨ nɨ̀ fòyn Sòlomòn a njoŋ Etanìm a ghɨ njoŋ zɨ̀ a ghɨ n-yɨ iyɨ i mɨtwò ateyn.

³A nà sɨ ghɨ ta ghelɨ ɨghɨ asɨ ghì a ghɨ n-ghɨ ɨtu asa a ndosɨ a ilaʼ i Isìlæ̀ gvì meyn, ngàŋsɨ ndô Fɨyinisɨ chaʼsɨ àntayntayn a mɨ̂kàyn nɨ̀ Bôbo, ⁴ɨ ndù nɨ̀ ànkeyna a ndô Fɨyini. Ghelɨ isas i ndo nɨ̀ Levì baʼsɨ̂ nɨ̀ ngàŋsɨ ndô Fɨynisɨ ɨ choʼtɨ fɨ̀twotɨ̂ fɨ ighɨ nɨn Bôbo baʼsɨ̂ nɨ̀ ɨ̀fwo vzɨ̀ a wu nà n-ghɨ ateyn ɨ li ndù nɨ̀ ŋweyn a ndô Fɨyini. ⁵Fòyn Sòlomòn ŋêyn ghelɨ Isìlæ̀ nô ghɨ̀ jɨ̀m ɨ timi asɨ antayntayn a mɨ̂kàyn ɨ sɨ nyamsɨ sɨ ifu sɨ̂ Fɨyini fɨ sɨ dvɨ̂ chwô ta ka ghɨ taŋ.

⁶Ɨ sɨ mèsì, ngàŋsɨ ndô Fɨyinisɨ̀ ɨ chàʼsɨ̀ àntayntayn a mɨ̂kàyn ɨ zɨ nɨ̀ ànkeynà a ndô Fɨyini ɨ tom aleʼ a laynɨ-a a bemnɨ-a isas i tɨ̂wò tɨ chelùbsɨ̀. ⁷Tɨwôtɨ chelùbsɨ nà n-ghɨ ma tɨ yasi meyn njèŋtɨ atû àntayntayn a mɨ̂kàyn nà ghɨ ma tɨ chɨytɨ meyn ɨ̀ fì chɨ̀ytɨ mbàŋ sìsɨ̀ a ghɨ n-bèʼi ateyn. ⁸Mbàŋsɨ ateynsɨ nà n-dyêf nô sɨ a ŋaŋ ma wùl ɨ̀ tìmi a ndo ghè a yì n-ghɨ kɨ ɨchfɨ alèʼ a laynɨ-a a bemnɨ-a a wù yeyn achfɨ̂ a mbàŋsɨ̀ nâ kì, fvɨ̀ tìmi abe wu n-bû yeyn(mbàŋ nâ sìsɨ bu ghɨ kɨ afu layn). ⁹Afo-a nà n-ghɨ wi antayntayn a mɨ̂kàyn nâ ghè a bu kɨ ɨ̀bwaŋ ngòʼsɨ̀ vzɨ̀ a Mosìs nɨn læ we a kfɨyn Sinày alèʼ ghè a Bôbo nɨn læ yɨ mɨkâyn ŋêyn ghelɨ Isìlæ̀ ta àŋena fvɨ̀ a Ijìb.

¹⁰Ngàŋsɨ ndô Fɨyinisɨ̀ fvɨ̀ sɨ a ndô Fɨyini nô mɨ ɨlvɨ gha, mbàʼsɨ̀ ɨ luyn kɨ luyn ateyn. ¹¹Mbàʼ nâ sèynsɨ̀ nà n-ghɨ ibayn ighɨ nɨ̀ Bôbo ɨ fvɨ̂ ateyn njêyntɨ̀ bem nô sɨ a ŋaŋ yi nà sɨ to ghaʼ ta ka àŋena fî zɨ nà nî ìfêl i àŋena.

¹²Sòlomòn ɨ kæ jèm sɨ bè na, “Ɨ vâ a Bôbo, a nchoʼnɨ̂ và sɨ lèm ɨchfɨ̂ i yvɨ iyvɨ, mɨtì a fi choʼnɨ kɨ vâ sɨ nà chi antêynɨ̀ mbàʼsɨ̀ sɨ fɨ̂m nô sɨ a ŋaŋ. ¹³Bôbo, ma baʼlɨ meyn àlêʼ kì a kɨ n-faytɨ koʼnɨ kfeynɨ ta ka wà faŋ nà chî ateyn samoʼ.”

Sòlomòn ɨ bemsɨ Fɨyini

¹⁴Sòlomòn ɨ kasi bèynɨ̀ ɨ kèʼ ànôyn a ghelɨ Isìlæ̀ àŋena ti asɨ nɨ̀ ŋweyn ɨ loyn na Fɨyini fɨ boysɨ àŋena. ¹⁵Wu n-jèm ɨ bè na, mɨ n-bemsɨ̂ và a Bôbo, ɨ vâ ɨ Fɨyini fɨ ghelɨ Isìlæ̀. Wà ni meyn nɨ̀ àdyaʼ à kya iwo zɨ gâyn a wa n-læ bè nɨ̀ ɨ̀chfɨ̂ va sɨ̂ bò wom Devìt. ¹⁶Mɨ n-læ bè sɨ̂ ŋweyn na, “Kɨ̀ sɨ achi ta mà lì fvɨ̀ nɨ̀ ghelɨ Isìlæ̀ nɨ̀ mà ghèyn sɨ a Ijìb, ma bû chòʼnɨ sɨ bàʼlɨ ndo zɨ̀ a ka ghɨ na koʼsɨ̂ mà ateyn a ntèʼ nɨ̀ wùl ìsas i ndo nɨ̀ ghelɨ Isìlæ̀ nô ìmòʼ. Mɨtì ma choʼ meyn na wà na tisɨ̂ ghelɨ Isìlæ̀ nɨ̀ mà.”

¹⁷Bò wom Devìt ti nà sɨ baʼtɨ̂ nô sɨ a ŋaŋ sɨ bàʼlɨ ndo na ghɨ koʼsɨ Bôbo ɨ Fɨyini fɨ Isìlæ̀ ateyn. ¹⁸Mɨtì Bôbo bè sɨ̂ Devìt ɨ bò wom na, ‘À n-ghɨ kɨ nô ìwo i juŋì na wa n-baʼtɨ̂ nô sɨ a ŋaŋ sɨ bàʼlɨ ndo na ghɨ na koʼsɨ̂ mà ateyn. ¹⁹Mɨtì a n-bàʼlɨ̀ wì vâ ɨ ndo àteyn. A n-bàʼlɨ̀ wayn ma wù fvɨ̀ ɨlvà nɨ̀ và ndo zɨ̀ a ka ghɨ na koʼsɨ̂ mà ateyn.’

²⁰Iwo zɨ̀ a Bôbo nɨn n-chfɨ̀nɨ, wu luynsɨ meyn bòm ta ma li meyn àlêʼ a bò wom. À sɨ duʼ mà achɨ a tɨ̂fòyn, saʼ ghelɨ Isìlæ̀ kɨ ighel ta Bôbo nɨn læ chfɨ̀nɨ. Ma baʼlɨ meyn ndo zɨ̀ a ka ghelɨ na koʼsɨ̂ Bôbo ɨ Fɨyini fɨ Isìlæ̀.’ ²¹Ma lem meyn àlêʼ a ndo nâ ghàyn ta ka ghɨ tom àntayntayn a mɨ̂kàyn ateyn. Mɨ̀kàyn nâ mèyn ɨ ghɨ ma Bôbo nɨn læ yɨ ŋêyn ghɨ̀bo ghesɨ ɨtuʼ ghê a wu n-li fvɨ nɨ̀ àŋena sɨ a Ijìb.”

Ijêm i Sòlomòn

²²Wu n-taŋi tî ɨ bèynsɨ̀ ɨ̀wuyn ŋweyn ɨ timi kèʼ àbaŋ a Bôbo ɨ làysɨ̀ ɨ koʼsɨ nɨ̀ ɨ̀wu ŋweyn iyvɨ ɨ ki koʼsɨ ìyvɨ, ²³ɨ jèm ɨ bè na, “Bôbo Fɨyini fɨ ghelɨ Isìlæ̀, Fɨyini fɨ lifɨ nɨn ghɨ wi atu iyvɨ, ghɨ wi isas i nse a fɨ n-ghɨ têyn ta vâ. Wà n-luynsɨ̂ tɨ̀chfɨ̂nɨ̀ tyatɨ sɨ̂ ghelɨ ghɨ felɨnɨ nɨ̀ và ghì a àŋena nɨn chi ta wà n-kɨŋ fî yvɨnɨ̂ và. Wà ndyêyn ìkôŋ ìzæ zɨ̀ sɨ̂ àŋena a yi n-nêʼlɨ̀ wi. ²⁴Wà luynsɨ meyn ìchfɨ̂nɨ̀ zɨ̀ a wa n-læ fu sɨ̂ bò wom Devìt ɨ wul ɨ̀ felɨnɨ nɨ̀ và. Wà ni meyn nɨ̀ àdyaʼ à kya iwo zɨ̀ a wa n-læ bè nɨ̀ ɨ̀chfɨ̂, yi gâyn layn.

²⁵“Lvɨ̂yn a Bôbo Fɨyini fɨ Isìlæ̀ fɨ̀, luynsɨ abâs i chfɨ̀nɨ̀ nɨ̀ và a li-a kèynà. Wa n-læ chfɨ̀nɨ sɨ̂ bò wom Devìt ɨ wul ɨ̀ felɨnɨ nɨ̀ và na, ‘Ɨlvɨ ta woyn ghya nɨn faytɨ yvɨnɨ sɨ̂ mà kɨ̀ têyn ta vâ, chî àti-ati asɨ nɨ̀ mà, a læ nà lum fvɨ̀ kɨ wul ìsas i ndo nɨ̀ và wu nà ghɨ fòyn sɨ saʼ ghelɨ Isìlæ̀.’ ²⁶Lvɨ̂yn a Bôbo Fɨyini fɨ Isìlæ̀, ni nô mɨ ghà gayn kɨ̀ ighel ta wa n-læ chfɨ̀nɨ sɨ̂ bò wom Devìt, ɨ wul ɨ̀ felɨnɨ nɨ̀ và.

²⁷“Kɨ̀ nô samoʼ, ɨ vâ a Fɨyini, a wà ti kàʼ a wà na chî a nse a? Nô mɨ ìyvɨ ì jɨ̀m nɨ̀ ghaʼ kfeyn wi sɨ̂ và, a ndo yèyn a mà bàʼlɨ̀ têyn jelɨ ti sɨ nà kfeynɨ-a? ²⁸Yi na ghɨ nô mɨ ti a Bôbo Fɨyini femfɨ mɨ n-ghɨ wul ɨ̀ felɨnɨ nɨ̀ và. Fyeʼtɨ ɨ yvɨtɨ ìjêm ì yemi, yvɨtɨ awo kì a mɨ n-byalɨ nɨ̀ gyà ito loyn sɨ̂ và layn. ²⁹Akeynà nɨn ghɨ àlêʼkì a wà lèm na ghɨ na koʼsɨ̂ và ateyn. Mɨ n-chwotɨ̂ và, chi alêʼ nâ kèynà nɨ̀ntuʼ ɨ chì nɨ̀nchuè. Ma fyeʼtɨ ɨ̀wuyn wom ɨ kasi kèʼ àlêʼ nâ kèynà ɨ jèm, wa yvɨ ijêm i wul ɨ̀ felɨnɨ nɨ̀ và. ³⁰Yvɨ iwo zɨ̀ a wùl ɨ̀ felɨnɨ nɨ̀ và nɨ̀ n-byal taŋi sɨ̂ và ɨ yvɨ izɨ-ì a ghelɨ̀ ghya Isìlæ̀ nɨn taŋi. Ghelɨ̀ ghya kasi fyèʼtɨ ɨ̀wuyn ɨ̀ kèʼ alêʼ nâ kèynà ɨ jèm wa yvɨ iyvɨ alèʼ ghè a wà n-ghɨ ateyn ɨ lèsɨ fu àŋena.

³¹“Wùl ɨ̀ kæ jas iwo sɨ̂ wùl ɨ̀lvɨ̀ ghɨ lî gvì nɨ̀ ŋweyn ta ka wù timi asɨ abaŋ ifu a ndô Fɨyini ɨ̀ chfɨ̀nɨ̀ ìwo sɨ dyèyn na wù bû jas, ³²wa yvɨ iyvɨ alèʼ ghè a wà n-ghɨ ateyn a Bôbo ɨ fu ngeʼ sɨ̂ wùl ɨ̀ vzɨ̀ a wù jas, ɨ nì wùl ɨ̀ vzɨ̀ a wù bû jas wù layn nsaʼ.

³³Mbàynɨ̀sɨ̀ kæ tɨm sɨ yɨ ghelɨ̀ ghya iwòŋ bòm ta àŋena nì mbɨ asɨ nɨ̀ và, àŋena kæ kasi gvì kòʼsɨ và, ɨ̀ jèm ɨ̀ loyn na wà lesɨ fu àŋena, ³⁴wa yvɨ iyvɨ alèʼ ghè a wà n-ghɨ ateyn, ɨ lèsɨ ɨ fu mbɨ ghelɨ̀ ghya ɨ Isìlæ̀ ɨ li kfa nɨ̀ àŋena ilaʼ afî a wà n-læ fu sɨ̂ ghɨ̀bo àŋena.

³⁵“Wà ghal ìvɨ yi na bu suʼî wì bòm ta àŋena àŋena nì mbɨ asɨ nɨ̀ và, àŋena kæ bèynsɨ iwuyn ɨ̀ kàsi kèʼ àlêʼ nâ kèynà ɨ̀ kòʼsɨ và ɨ̀ jèm, ³⁶wa yvɨ iyvɨ alèʼ ghè a wà n-ghɨ ateyn ɨ lèsɨ fu mbɨsɨ wûl ɨ̀ fèlɨnɨ nɨ̀ và nɨ̀ ɨ sisɨ ghelɨ̀ ghya Isìlæ̀, ɨ yeʼi àŋena ta ka ghɨ na chî àtì-ati asɨ nɨ̀ và. Ni ivɨ-i suʼi a nse afî a wà tî fù sɨ̂ ghelɨ̀ ghya na àŋena na kela sɨ afo nɨ̀ àŋena.

³⁷“Jèŋ kàʼ a yì ku, ikoʼi i dyaŋnɨ-i kàʼ a yi gvi, ɨfwo vzɨ̀ a ghɨ n-tôʼ a gvêynsɨ̀ kàʼ a wu bef, ngumisɨ nɨ̀ ɨ̀ngèʼ kàʼ a mɨ̀ bebsɨ ɨfwo a gvêynsɨ̀, mbàynɨ̀sɨ̀ kàʼ a sɨ gvi jɨ̀ŋ kàli ntèʼsɨ, ghelɨ ghya kàʼ a ghɨ koʼi,/Ɨlwêʼ kàʼ a wu yum a ɨfwo ɨ yɨnɨ faŋ tɨ̀ kòʼ a gvêynsɨ̀, ivɨ-i kàʼ a yi suʼi chwòsɨ̀ a ɨfwo fœ kɨ̀ fœ, ikoʼi i bemnɨ-i kàʼ a yi gvi kù kɨ̀ ghelɨ ghɨ̀ jɨ̀m, ngumisɨ nɨ̀ ɨ̀ngèʼ kàʼ a mɨ̀ kfɨl ɨvzɨ̂ a ghɨ tòʼ a gvêynsɨ̀, mbàynɨ̀sɨ̀ kàʼ a sɨ gvi nù ghelɨ̀ ghya a ntèʼsɨ nɨ̀ àŋena. Ghelɨ̀ ghya kàʼ a ghɨ koʼi. ³⁸À na ghɨ nô mɨ ndà antêynɨ̀ nɨ̀ ghelɨ̀ ghya Isìlæ̀ ta wù yeyn kèli ngeʼ zɨ̀ a wù n-ghɨ ateyn ɨ̀ nà jêm loyn ìgâmtɨ̀ sɨ̂ và ma wù laysɨ meyn ɨ̀wu ŋweyn wu kêʼ gvì nɨ̀ ndo yèyn, ³⁹wa yvɨ iyvɨ alèʼ ghè a wà n-ghɨ ateyn ɨ lèsɨ̀ ɨ fu ɨ nì ìwo nô mɨ sɨ̂ ndà kɨ ighl ta wù n-chi. Wà n-kya mɨ̀tem mɨ̀ ghelɨ nô ghɨ̀ jɨ̀m. ⁴⁰Ni têyn ta ka àŋena faŋ nà ngvɨmlɨ̂ kɨ ngvɨmlɨ vâ nô mɨchɨ ɨ̀n jɨ̀m ilaʼ afî a wà n-læ fu sɨ̂ ghɨ̀ bo àŋena.

⁴¹Wùl àtum lû alèʼ ndyèyn ɨ dyefà ta wù yvɨ ibem ìzæ fì yvɨ awo a bemnɨ-a kì a wà nì, ɨ̀ gvì sɨ koʼsɨ vâ, ⁴²bòm ta ghelɨ na yvɨ àwo a bemnɨ-a kì a wà nì sɨ̂ ghelɨ̀ ghya gvi à. Wù kæ gvì sɨ koʼsɨ vâ, jèm a ndo nâ ghàyn, ⁴³wà yvɨ iyvɨ alèʼ ghè a wà n-ghɨ ateyn, wa nì ìwo zɨ̀ a wù n-bɨf na wà ni ta ka nô ghelɨ ghɨ̀ jɨ̀m a mbzɨ keli vâ nà ngvɨmlɨ̂ và kɨ̀mɨ ta ghelɨ ghya Isìlæ̀ nɨn ngvɨmlɨ fì kèli na ndo nâ yèyn a mà bàʼlɨ̀ têyn nɨn ghɨ àlêʼ kì a ghɨ n-koʼsɨ vâ ateyn.

⁴⁴“Wà kæ tum ghelɨ̀ ghya na àŋena fvɨ ndù nù mbàynɨ̀sɨ̀ nô mɨ alèʼ à kà, àŋena kæ fyeʼtɨ iwuyn ɨ̀ kèʼ gvìsɨ̀ nɨ̀ ntèʼ ichoʼnɨ nɨ̀ và yèyn a mà bàʼlɨ ndô zyâ na ghɨ na koʼsɨ̂ và ateyn, ⁴⁵wa yvɨ iyvɨ alèʼ ghè a wà n-ghɨ aten ɨ bèynsɨ̀ ì jêm i àŋena ɨ nì ìwo zɨ̀ a àŋena nɨn loyn sɨ̂ và a Bôbo.

⁴⁶“Wùl ɨ̀ nɨn ghɨ wi a mbzɨ a wù kàʼ a wù faŋ tɨ̀ ni mbɨ. Ghelɨ̀ ghya kæ ni mbɨ ɨtoŋ va yaf sɨ̂ àŋena, wà visi mbàynɨ̀sɨ tɨm yɨ àŋena ɨ̀ lì ndù lèm àŋena sɨ ɨkòs ilaʼ ili kèsa i n-baʼɨ à, kèsa à n-ghɨ a ndyèyn, ⁴⁷à na ghɨ ilaʼ afu mɨ̀tem mɨ̀ àŋena bêynlɨ̀ sɨ awo a bɨ-a, nɨ̀ àwo a sœnɨ-a, àŋena jêm bìmi na àŋena ni meyn mbɨ ɨ̀ loyn na wa lesɨ fu àŋena, wa yvɨ ijêm i ghelɨ̀ ghya a Bôbo. ⁴⁸Mɨ̀tem mɨ̀ àŋena kæ bèynlɨ samoʼ sɨ awo a bɨ-a nɨ̀ àŋena ilaʼ afu, àŋena bêynsɨ̀ ìwuyn ɨ̀ kèʼ gvì nɨ̀ ntèʼ yèyn a wà tî fù sɨ̂ ghɨ̀bo ghesɨ ɨ ntèʼ ìchoʼnɨ nɨ̀ và yèyn a mà bàʼlɨ ndô zyâ na ghɨ na koʼsɨ̂ và ateyn, ⁴⁹wa yvɨ ijêm i àŋena iyvɨ alèʼ ghè a wà n-ghɨ ateyn ɨ nì ìwo zɨ̀ a àŋena nɨn loyn na wà ni sɨ̂ àŋena. ⁵⁰Lèsɨ fu mbɨ sìsɨ̀ a ghelɨ̀ ghya nì ɨ̀ bèyn jɨmsɨ àŋena sɨ̂ và. Ni ghelɨ ghèyn a ghɨ tî gvì lì lù nɨ̀ ghelɨ̀ ghya têyn keli ikoynsɨ isuyn sɨ̂ àŋena. ⁵¹Àŋena nɨn ghɨ tèyn a ghɨ ghelɨ̀ ghya. Wà n-kelɨ àŋena kɨ̀ nô sɨ a ghêl nɨ̀ và ma wà tî fvɨ̀sɨ̀ àŋena a ngeʼ i bemnɨ afî a àŋena nà n-ghɨ ateyn a Ijìb.

⁵²“Bôbo wà n-saʼ ta fòyn, faytɨ yvɨtɨ iwo zɨ̀ a wùl ɨ̀ felɨnɨ nɨ̀ và baʼsɨ̂ nɨ̀ ghelɨ̀ ghya Isìlæ̀ nɨn loyn na wà ni. Àŋena loyn na wà gamtɨ, wa yɨ ɨ gàmtɨ̀. ⁵³À tî chòʼ vâ a Bô, ɨ vâ Bôbo Fɨyini, choʼ fvɨ̀sɨ̀ lèm àŋena sɨ a nyɨŋ antêynɨ̀ tɨ̀laʼ tɨ mbzɨ nô tɨ̀ jɨ̀m ta ka àŋena na ghɨ ghelɨ̀ ghya kɨ̀ ighel ta wà n-læ taŋi sɨ̂ Mosìs ɨ wul ìfèl nɨ̀ và achi ghè a wa n-læ lì ghɨ̀bo ghesɨ a Ijìb ɨ gvɨ̀ nɨ̀ àŋena.”

⁵⁴A nà ghɨ ta Sòlomòn jèm meyn ɨ̀ loyn awo kì a wù n-kɨŋ sɨ̂ Fɨyini fɨ, wu làli sɨ asɨ abaŋ ifu nɨ̀ Fɨyini fɨ alèʼ ghè a wì nì sùʼi ateyn ɨ tɨm alvɨ ɨ làysɨ̀ ɨ̀wu ŋweyn iyvɨ, ⁵⁵ɨ timi asɨ nɨ̀ anôyn a ghêl kì a kɨ nà n-ghɨ afu ɨ taŋi nɨ̀ gyà ito ɨ loyn na Fɨyini fɨ boysɨ àŋena. Wu n-bè na:

⁵⁶“Ghɨ na koʼsɨ̂ Bôbo. Wù ni meyn ghelɨ ŋweyn keli mbôynɨ̀ zɨ̀ a wu n-læ chfɨ̀nɨ. Iwo ì mòɨ bû fe antêynɨ̀ àwo ghè à jɨ̀m a wu n-læ fu sɨ̂ Mosìs ɨ wul ɨ̀ felɨnɨ nɨ̀ ŋweyn. ⁵⁷Mɨ n-jêm na Bôbo Fɨyini fɨ ghesɨ̀nà fɨ faŋ nà ghɨ kɨ ghesɨna ta fɨ n-læ visi kèsa kenɨ ghesɨ̀nà. ⁵⁸Mɨ n-chwotɨ̂ na fɨ ni ghès na yvɨnɨ-à, chî kɨ ta fɨ n-kɨn na ghèsɨ̀ na chi-à, nî nô àwo à jɨ̀m kì a fɨ n-læ fu sɨ̂ ghɨ̀bo ghesɨ. ⁵⁹Mɨ n-bê na ka Bôbo Fɨyini feyfɨ nɨn læ̀ lèsɨ̀ àwo kèynà a mà bɨf sɨ̂ ŋweyn nɨ̀ àwo kì a mà loyn sɨ̂ ŋweyn ijèm. Mɨ n-chwotɨ̂ na wù na kfàʼtɨ̀ àwo nâ kèynà kɨ mɨlvɨ ɨ̀n jɨ̀m ɨ nì àwo kì a ghelɨ ŋweyn Isìlæ̀ nɨn loyn kɨ̀ ighel ta nô mɨ achi à kà nɨn kɨŋ. ⁶⁰Yi gàyn têyn, a ghelɨ tɨlaʼ tɨ mbzɨ nô tɨ̀ jɨ̀m keli na Bôbo nɨn ghɨ Fɨyini samoʼ fɨlifɨ bu ghɨ wi. ⁶¹Yì fu læ̂ mèsì kɨ̀ mesi mɨtêm mzɨ̂ sɨ̂ Bôbo Fɨyini fɨ ghesɨ̀nà nà chî ta tɨsaʼtɨ ŋweyn tɨ nɨn kɨn, nî àwo kì a wù bè na ghɨ ni kɨ̀ têyn ta ghɨ nì layn.”

Sòlomòn ɨ fu ndô Fɨyini sɨ̂ Bôbo

⁶²Fòyn Sòlomòn baʼsɨ̂ nɨ̀ ghelɨ Isìlæ̀ nô ghɨ̀ jɨ̀m ɨ sɨ nyamsɨ nô sɨ idvɨ̀ sɨ ifu sɨ̂ Bôbo. ⁶³Nyamsɨ mbòloʼ sìsɨ̀ a Sòlomòn nɨn sɨ sɨ ifu i yɨnɨ-i nà n-ghɨ nkamsɨ mɨ̀vɨm ɨ̀n bò njvàsɨ̀ bò nɨ̀ njɨ̀sɨ̀ nkam ɨvɨ weʼa nɨn mɨ̀vɨm ɨ̀n bò. À ti iwo zɨ̀ a fòyn ŋêyn ghlɨ Isìlæ̀ nɨn læ nì sɨ fu ndô Fɨyini sɨ̂ Bôbo.

⁶⁴Fòyn Sòlomòn ɨ laynsɨ ɨ̀we vzɨ̀ a wu n-ghɨ kɨ asɨ a ndô Fɨyini. Wu n-fu tɨfu tɨ nyoʼnɨtɨ nɨ̀ tɨ̀fu tɨ̀ asɨ asɨ, nɨ̀ ìso i nyam, izɨ-ì a yi n-ghɨ ifu i yɨnɨ-i. Wu n-fu tɨfu nâ tèyntɨ̀ kɨ̀ ɨwe nâ ghè a wu n-laynsɨ tî. Wu n-nì têyn bòm ta abaŋ ifu akas kì a kɨ nà n-ghɨ asɨ nɨ̀ Bôbo nà n-læ̂ chwôsɨ̀-à ta ghɨ kàʼ a ghɨ lem ɨfwo nâ wèyn ateyn.

⁶⁵Fòyn Sòlomòn ŋêyn ghelɨ Isìlæ nɨn læ keli iyɨ i ghaʼnɨ-i a ndô Fɨyini sɨ a tɨwe tɨ̀ bò. Iyɨ i ghaʼnɨ-i nâ yènì nà n-ghɨ ma ghelɨ lu meyn ilwêʼ ndyèynsɨ abàs ikuè alèʼ ghè a ghɨ n-toŋtɨ na Lebo Hamàt ɨ̀ fì lù abàs itsɨyn afoŋlɨ a Ijìb gvì yvɨ̀ŋtɨ̀ asɨ nɨ̀ Bôbo. ⁶⁶Mɨ̀chi nsòmbo ɨ koʼ mæ̀, ànkùmtɨ̀ ɨwe ɨ se sɨ nà ghɨ a mɨchɨ nfama ta fòyn bè meyn na àŋena kfa, àŋena fu àyòŋnɨ̀ sɨ̂ fòyn ɨ nà kfâ ndû sɨ a ndosɨ nɨ̀ àŋena saŋlɨ̂ a mɨtem nɨ̀ àŋena bòm àwo a juŋà kì a Bôbo nì sɨ̂ wùl ɨ̀ felɨnɨ nɨ̀ ŋweyn Devìt fì nì sɨ̂ ghelɨ ŋweyn Isìlæ̀.