1 Kings 7

Sòlomòn ɨ bàʼlɨ ntoʼ ŋweyn

¹Sòlomòn ɨ lì bèŋ njvàsɨ̀ tal sɨ bàʼlɨ ntoʼ ŋweyn, ɨ bàʼlɨ mèsì nô ì jɨ̀m. ²Wu n-baʼlɨ meyn kɨmɨ ndo akù ɨnkàʼ mɨ̀ Lebanòn yi dyêf ghɨ ntàmsɨ̀ akœ mɨ̀vɨm ɨ̀n bò njvàsɨ̀ tâyn, ighaʼ ateyni ɨ ghɨ ntàmsɨ akœ njvàsɨ̀ bò nɨ̀ àbeʼ a, ngaŋtɨ̂ ghɨ iyvɨ ntàmsɨ̀ akœ nsòmbo nɨ̀ fɨ̀bêʼnɨ̀fɨ̀./ ³Ndo ìyvɨ nà n-ghɨ ma ghɨ tayntɨ meyn meyn ɨ̀tôʼ a mbàŋi sɨ̀ tal nô mɨ mbaŋi ì kà ɨ kelɨ ɨ̀tôʼ njvàsɨ̀ tâyn. Ɨmbûʼtɨ̀ vzɨ̀ a ghɨ màʼ ikaŋ ɨ ghɨ ɨ̀nkâʼ mɨ̀ sedà ma mɨ̀ dyaŋ meyn chɨl tɨkaŋtɨ ndosɨ mbæ̀ sìsɨ̀ mɨ̀vɨm ɨ̀n kæ̀ njvàsɨ tâyn fvɨ̀ chem ɨ̀toʼ a ghɨ ɨ̀nkâʼ mɨ̀ sedà. ⁴Ɨbûʼ afyef nà n-ghɨ ɨ̀wuyn ndo nâ ghàyn mbaŋisɨ sɨ̀ tal, nô mɨ àbûʼ afyef à kà ɨ ghɨ ma kɨ kèʼnɨ̀ kɨ̀ ŋêyn ali-a. ⁵Achfɨ̂ ndosɨ-a ɨ baʼsɨ̂ nɨ̀ ɨ̀bûʼ afyefɨ nô ɨ̀ jɨ̀m nà n-kelɨ tɨ̀wuwu nɨ̀ mɨ̀mbêʼsɨ̀ mɨ ghɨ kɨ ɨfyèʼ ɨ̀ mòʼ. Ɨbûʼ afyef nà n-ghɨ mbaŋi sɨ̀ tal ma nô mɨ à kà kèʼnɨ̀ kɨ̀ ŋêyn ali-a.

⁶Sòlomòn ɨ nì ghɨ bàʼlɨ kɨmɨ àlêʼ a duʼnɨ-ama ghɨ tomtɨ kal kɨ nɨ̀ ɨ̀tôʼ. Alêʼ ateyna nà n-dyêf ghɨ ntàmsɨ̀ akœ nfama nɨ̀ àbeʼa, ghaʼ ghɨ ntàmsɨ akœ sɨ̀ tâyn. Alêʼ a duʼnɨ-a a li-a nà n-ghɨ kɨmɨ asɨ alèʼ ndo ɨ̀tòʼ nâ ghàyn kɨ kelɨ kɨ ɨ̀tôʼ ma ghɨ chɨlɨ meyn àtu ateyn.

⁷Wu n-læ fi nì ghɨ bàʼlɨ àlêʼ kì a ghɨ n-saʼ nsaʼsɨ ghêl ateyn ɨ toŋtɨ ìzɨyn i ndo àteyn na, “Ndo nsaʼsɨ.” Ndo àteyn nà n-ghɨ ma ghɨ lom nɨ̀ ɨ̀nkàʼ mɨ̀ sedà zɨtɨ̀ kɨ a kindo koʼ chem ikàŋ kɨ̀ ɨbyâs ɨ̀ jɨ̀m. ⁸Nchi fòyn nà n-ghɨ ma Sòlomòn bàʼlɨ̀ kɨ̀mɨ nɨ̀ ɨ̀fwo vzɨ̀ aghɨ bàʼlɨ̀ ndô nsaʼsɨ ateyn. Ghɨ nà n-toynɨ̂ a ndô nsaʼsɨ zɨ ndû kɨ a nchi nâ ghàyn. Ndo zɨ̀ a wu n-bàʼlɨ sɨ̂ wî ntoʼ ibàm i nchi nâ ghàyn nà n-ghɨ kɨmɨ ta ɨzɨ̂ ŋweyn/ Ndo ì lì zɨ̂ a wu n-bàʼlɨ sɨ̂ wî ntoʼ ɨ wâyn fòyn Ijìbnà n-ghɨ kɨmɨ ta ɨzɨ̂ ŋweyn.

⁹Ghɨ n-bàʼlɨ ndo nâ sèynsɨ̀ nɨ̀ ngòʼsɨ̀ sɨ jôf nô sɨ a ŋaŋ. Sɨ nà n-ghɨ ma ghɨ sɨ meyn tèyntɨ kɨ̀ ɨbyâs ɨ̀ jɨ̀m nɨ̀ ìfô zɨ̀ a ghɨ nteyntɨ ngòʼsɨ̀ atetyn ɨ nì sɨ nà ghɨ ɨfyèʼ ghè a ghɨ n-kɨŋ. Ghɨ bàʼlɨ̀ ngòʼsɨ ateyn zɨtɨ̀ kɨ achɨ a ndo koʼ mesì iyvɨ, ɨ fi bàʼlɨ̀ ɨ fvɨ ndù nɨ̀ mbàyn ɨwe ɨ ghaʼnɨ. ¹⁰Achɨ a ndo àteyn nà n-ghɨ ma ghɨ we nɨ̀ ngòʼsɨ̀ sɨ jôf nô sɨ a ŋaŋ fî belɨ̂ nô sɨ a ŋaŋ. Ngòʼsɨ lisɨ nà n-ghaʼ ghɨ ntàmsɨ akœ sɨ̀ bò nɨ̀ àbeʼa, sɨ lisɨ ɨ ghɨ ntàmsɨ akœ sɨ̀ bò. ¹¹Ngòʼ sìsɨ̀ a ghɨ n-bàʼlɨ atu achɨ a ndo nâ ghàyn nà n-jôf nô sɨ a ŋaŋ ma ghɨ chuyn meyn ɨfyèʼ ghè a ghɨ n-kɨŋ bàʼlɨ̀ kòʼsɨ tì bàʼsɨ nɨ̀ ɨ̀nkàʼ mɨ̀ sedà. ¹²Ɨwe abe ɨ ghaʼnɨ nɨn ghɨ ma ghɨ baʼlɨ meyn kal nɨ̀ mbàyn yi kelɨ ntèmsɨ ngòʼsɨ chuynɨsɨ sɨ̀ tal. Ghɨ nà n-bâʼlɨ̀ ntèmsɨ ngòʼsɨ̀ sɨ̀ tal ghɨ nyɨ̀ŋsɨ̀ ntèm fɨ̀kàʼ fɨ sedà atu, bâʼlɨ̀ koʼa nî kɨ tì.

Ghɨ fèl ɨ̀fwo vzɨ̀ a wu n-ghɨ a ndô Fɨyini

¹³Fòyn Sòlomòn ɨ tum ghɨ ndu lì Hulàm wu chî ilaʼ i taya ɨ gvì nɨ̀ ŋweyn a Jèlusalèm. ¹⁴Nà ŋweyn nà n-ghɨ wî nkfɨ a ghɨ wul ìsas i ndo nɨ̀ Naftalì, bò ŋweyn ɨ ghɨ wul ɨ̀ Tayà felɨ̀ ɨ̀fwo nɨ̀ ɨkfasɨ. Wu nà n-kelɨ ìtof ifèl nô mɨ ìnkì ifèl ì kà ateyn, wu gvi nì nô ìfêl ì jɨ̀m zɨ̀ a fòyn Sòlomòn nɨn fu sɨ̂ ŋweyn.

¹⁵Wu n-fel ɨtôʼ akas ɨ̀bwò, atôʼ àmòʼ a dyêf iyvɨ sɨ a ntàmsɨ akœ sɨ̀ kæ̀ nɨ̀ àbeʼa, ghaʼ jɨ̀ŋ kalî sɨ a ntàmsɨ akœ sɨ̀ tal. ¹⁶Ɨtôʼ nâ wèyn ɨ̀ bwò nà n-kelɨ ɨ̀tu nô mɨ àtu à kà ɨ ghɨ ntàm ɨ̀kœ nɨ̀ fɨ̀bêʼnɨ̀fɨ̀. ¹⁷Ɨtu ɨtòʼ nâ wèyn nà n-ghɨ ma ghɨ nyotɨ meyn nɨ̀ ɨ̀fwo wu kêʼ ta ɨkwal ɨ nchaʼ mɨ̀nyùŋtɨ̀. Wu nà n-ghɨ ɨ̀ bwò nô mɨ atu àtòʼ à kà kelɨ ɨ̀kwal ɨ nchaʼsɨ mɨnyùŋtɨ̀ nâ wèyn nsòmbo. ¹⁸Wu fi nyòtɨ̀ ɨ faytɨ ɨ̀fwo wu nà njeŋlɨ-à ghɨ ta mɨtam ma wù jɨŋ meyn kalì mbaŋisɨ sɨ̀ bò, nô mɨ atu àtòʼ à kà, ɨtòʼ nâ ghàyn ɨ̀bwo kɨ̀ ighel. ¹⁹A nà n-ghɨ atu àtòʼ wu fi faytɨ kfeynsɨ àtu atòʼ a li-a kɨ kelɨ ɨ̀fwo wu kêʼ tèyn ta baŋalueluèʼsɨ̀ dyêf koʼ iyvɨ sɨ a ntàm ɨkœ. Ɨtôʼ nâ wèyn ɨ̀ bwo, wu faytɨ kɨ tî. ²⁰Ɨfwo wèyn a wu n-faytɨ wu ghɨ ta mɨtam nà n--ghɨ ighɨ ì bò, ghɨ a ntèmsɨ̀ bò ta sɨ jɨ̀ŋ kàli kɨ̀ aleʼ atû àtoʼ afî a kɨ koʼ ngèʼtɨ̀, wu n-faytɨ ɨtôʼ nâ wèyn ɨ̀bwò kɨ̀ ighel. ²¹Wu n-fàytɨ ɨtôʼ nâ wèyn ɨ tomtɨ ɨ̀chfɨ ajeŋ ghè a ghɨ n-toynɨ ateyn zɨ̂ a ndô Fɨyini. Wu n-tom ali-a abàs itsɨyn ɨ toŋtɨ ìzɨyn ateyn na Jakìn ɨ tom ali-a abàs ikuè ɨ toŋtɨ ìzɨyn ateyn na Bowàz. ²²Wu n-fàytɨ ɨfwo atu ɨ̀tòʼ nâ ghàyn wu kêʼ ta baŋaluelueʼsɨ̀. Halàm ɨ fèlɨ̀ tèyn ɨ mèsì ìfêl i ɨtòʼ nâ yèynì.

²³Akaŋ akas a ghaʼnɨ-a nà n-ghɨ ta wù fàytɨ na ghɨ na wê mu ateyn ghɨ toŋtɨ̂ na jvà ighaʼnɨ. kɨ nà n-ghɨ ntàmsɨ̀ bò nɨ̀ àbeɛ sɨ lù ɨchfɨ̀ akaŋ abàs àmòʼ sɨ dyàŋ sɨ chem ɨchfɨ̀ akaŋ abàs a li-a. Kɨ nà n-gaŋtɨ̂ iyvɨ sɨ a ntàm ɨ̀kœ nɨ̀ fɨ̀bêʼnɨ̀fɨ̀. Ighaʼ ateyni sɨ jɨ̀ŋ sɨ kali nà n-ghɨ ntàmsɨ akœ sɨ̀ kæ̀ nɨ̀ àbeʼa. ²⁴A nà n-ghɨ ɨ̀kwal akaŋ nâ ghàyn ma ghɨ nyotɨ meyn nɨ̀ ɨ̀fwo wu kêʼ ta ɨntem mɨ̀ mu. Aabâŋ a nà n-ghɨ sɨ lù awu sɨ chem a ngel ɨ̀kœ, wu nà ghɨ ateyn ìvɨm a ntèm sɨ̀ bò. Wu nà n-ghɨ ma wu jɨn meyn kàli àkaŋ nâ kèyna ghɨ kɨ àfo àmòʼ ŋêyn àkaŋ ateyna.

²⁵Akaŋ a bemnɨ-a nâ kèyna nà n-ti atû nyamsɨ mbòloʼ njvàsɨ̀bò ma ghɨ faytɨ nɨ̀ àkasa tom sɨ na kèʼ fvɨsɨ̀ fvɨsɨ. Sɨ nà n-ti kɨ sɨ̀ tal sɨ̀ ta alèʼ àmòʼ, kêʼ kɨ ɨbyâs sɨ a nyɨŋ sɨ a nyɨŋ. ²⁶Atsɨ̂yn akaŋ a bemnɨ-a nâ kèyna nà n-ghaʼ ghɨ ta woyn ɨwu ghɨ̀ kæ̀. Ɨchfɨ̂ ateyn wèyn ɨ ghɨ ma wu koʼ meyn ngèʼtɨ̀ nà ghɨ ta ɨchfɨ̂ ɨ bom, ghɨ ta baŋaluelue ɨlvɨ ta yì sɨ kɨn sɨ bùs. Akaŋ a bemnɨ-a nâ kèynà nà n-ghɨ ma ghɨ kàʼ a ghɨ we ntòynsɨ̀ mu sɨ ghaʼlɨnɨsɨ ateyn nkamsɨ̀ bò nɨ̀ ɨ̀vɨ a kɨ kæ luyn.

²⁷Wu n-faytɨ meyn tɨ̀kal ìvɨm kɨ timi ateyn ta ghɨ kàʼ a ghɨ na tsɨyn jelɨ̀ nɨ̀ ànkeyna. Tɨkal tɨ ateyntɨ nà n-ghɨ ma ghɨ faytɨ nɨ̀ àkas a, nô mɨ ìkà ɨ dyêf ghɨ ntàm ɨ̀kœ, ghaʼ ghɨ ntàm ɨ̀kœ, ngaŋtɨ̂ iyvɨ sɨ abeʼ a ntàm ma kɨ chwo meyn àntêynɨ̀. ²⁸Ghɨ n-faytɨ tɨkal tɨ ateyn a dzɨ ghàyn: Ghɨ n-li ɨbyâs akas ɨ saŋtɨnɨ ɨ wesɨ a mɨnchaʼ ghè a mɨ nà n-ghɨ kal a mbæ̀. ²⁹A nà n-ghɨ ɨbyâs akas ɨ saŋtɨnɨ nâ ghè ma ghɨ felɨ meyn wèsɨ nyamsɨ mbòlosɨ akas nɨ̀ bzɨ̀nkemsɨ nɨ̀ chelùbsɨ̀, koʼ abàs ikuè kɨ̀ atû ɨ̀fwo nâ ghàyn, ɨ̀ fèl ɨ wèsɨ bàŋaluelueʼsɨ̀ kɨ nɨ̀ àkasa, kàlì abàs itsɨyn isas ateyn ɨ̀ fèlɨ̀ wèsɨ nyamsɨ mbòloʼ nɨ̀ bzɨ̀nkemsɨ. ³⁰Nô mɨ ɨ̀fyeyn ɨ̀kfà nà n-kelɨ tɨ̀ka tɨ akas tɨ̀ kæ̀ ma ghɨ wesɨ meyn ɨ̀fwo vzɨ̀ a ka ikal na bèynlɨ̀ ateyn. Gvì a tɨghaŋ ɨ̀ wèsɨ ɨ̀lwêʼ ta ka wu toʼtɨ akaŋ a ghaʼnɨ-a. Ɨlwêʼ ɨtoʼtɨnɨ nâ wèyn ɨ ghɨ ma ghɨ ma ghɨ felɨ meyn wèsɨ bàŋàluelueʼsɨ̀ akas ateyn. ³¹Ɨchfɨ̂ vzɨ̀ a ghɨ nà n-tuŋ suʼsɨ akaŋ ateyn nà n-ghɨ ma ghɨ faytɨ wu na kelɨ tɨ̀bvɨ tɨ̀ kæ̀ ighel. Ghɨ n-bàʼlɨ alêʼ ɨchfɨ̀ nâ kèynà kɨ nà ngaŋtɨ̂ iyvɨ ghɨ sɨ lù awu sɨ chem a ngel ɨ̀kœ. Abûʼ ɨchfɨ̀ ateyna ɨ ghɨ ma ghɨ fèʼ dyàŋsɨ dyaŋsɨ a kɨ na ghɨ sɨ lù awu sɨ chem a mbèʼ. Ghɨ n-bàʼlɨ alêʼ nâ kèyna, ɨ nyòtɨ̀ nɨ̀ ɨ̀fwo ta ghɨ fèl zɨ̀sɨ̀ akas a saŋtɨnɨ-a afî ɨchfɨ̀ ateyn. ³²Tɨkal tɨ ateyntɨ nà n-ghɨ isas ɨkwas ɨ saŋtɨnɨ afî. Ɨfwo vzɨ̀ a tɨkaltɨ nɨn bêynlɨ̀ ateyn ɨ ghɨ ma ghɨ fèlɨ̀ ghàŋtɨ̀ a mɨnchaʼ ghey a ghɨ bàʼlɨ̀ ɨfyeyn ateyn. Tɨkal tɨ ateyntɨ nà n-gaŋtɨ̂ iyvɨ sɨ lù awu sɨ chem a mbèʼ. ³³Ghɨ n-læ fèl tɨkal tɨ ateyn tɨ nà ghɨ tèyn ta tɨkal tɨ mɨtù mɨ̀ ìwòŋ. Nô ɨ̀byâs ateyn ɨ̀ jɨ̀m nà n-ghɨ ma ghɨ faytɨ kɨ nɨ̀ àkas a.

³⁴Nô mɨ ɨ̀fyeyn ɨ̀kfà nà n-kelɨ ɨ̀lwêʼ vzɨ̀ a wu n-tôʼtɨ̀ ɨ̀ kfœ̀, nô mɨ à kà ɨ fvɨ̂ kɨ ɨfyeyn ateyn. ³⁵A nà n-ghɨ nô mɨ atû ɨ̀fyeyn à kà abuʼà ɨ ghɨ ateyn sœ ghɨ ta ntàm àwu ma ɨlwêʼ ɨtoʼtɨnɨ fvɨ meyn ɨ̀ kfæ̀ a tɨbvɨtɨ ɨfyeyn nâ ghè. Ɨbyâs akas ɨ saŋtɨnɨ nɨ̀ ɨ̀lwêʼ ɨ toʼtɨnɨ ɨ ghɨ ma ghɨ yùyn ndù kɨ̀ ɨfyeyn ateyn. ³⁶Wu nà n-felà sɨ nyòtɨ̀ wu wesɨ chelùbsɨ̀ nɨ̀ bzɨ̀nkemsɨ nɨ̀ àsoma nɨ̀ bàŋàluèluèʼsɨ̀ nô mɨ alèʼ à kà ta wù yeyn ɨkfas akas ɨ saŋtɨnɨ kèsa ɨlwêʼ ɨtoʼtɨnɨ kèsa mɨ̀nchaʼ ghè a ghɨ bàʼlɨ̀ ɨfyeyn ateyn. ³⁷Ɨfyeyn ateyn ìvɨm nà n-ghɨ ma ghɨ faytɨ kɨ nɨ̀ àkas a ɨ̀ fàytɨ kɨ̀ a dzɨ̀ ìmòʼ nô mɨ alèʼ à ka a na ghɨ kɨ ighel kelɨ kɨ ɨ̀fyêʼ ɨ̀ mòʼ. ³⁸Wu n-faytɨ meyn kɨ̀mɨ ɨ̀kfaŋ ìvɨm nɨ̀ àkas a, àmòʼ a ghɨ ma ghɨ kàʼ a ghɨ we tòynsɨ mu sɨ ghaʼlɨnɨsɨ ateyn nkamsɨ̀ kæ̀ nɨ̀ ìghɨ i nfama. Akaŋ ateyn a nà n-ghɨ ntàm ɨ̀kœ ɨlvɨ ta ghɨ fèʼ dyàŋsɨ ɨchfɨ̂ ateyn. Ɨfyeyn ɨ̀ mòʼ nà n-kelɨ àkaŋ àmòʼ. ³⁹Ɨkfaŋ ɨ̀ twâyn nà n-ti abàs itsɨyn, ɨ̀twâyn ɨ ti abàs ikuè. A bemnɨ-a kì a ghɨ nà n-toŋtɨ na, “Jva i ghaʼnɨ” ɨ ti nô abàs itsɨyn a bubuʼ ghè a ɨchfɨ̂ iyvɨ nɨn sal ateyn. ⁴⁰Hulàm nɨn fi meyn ɨ faytɨ ntòynsɨ̀ nɨ̀ fɨsɨ nɨ̀ ɨ̀kfaŋ. Wu ni meyn nô ìfêl ì jɨ̀m zɨ̀ a yi nà n-ghɨ a ndo nɨ̀ Bôbo ta fòyn Sòlomòn nɨn læ bè na wù ni. ⁴¹Wu n-felɨ meyn ɨ̀tôʼ ɨ̀ bwò, ɨ faytɨ ɨ̀tu ɨtòʼ nâ vzɨ̀ wu koʼ ngêʼtɨ̀ ta ɨchfɨ̂ akaŋ, ɨ nyòtɨ̀ nɨ̀ ɨ̀fwo wu tsɨytɨ ɨ̀tu ɨtòʼ ateyn. ⁴²Wu n-faytɨ meyn ɨ̀fwo wu ghɨ ta ɨntem mɨ̀ mù ighɨ ì kæ̀ ɨ zɨsɨ a nchʼ mɨ̀nyùŋtɨ̀ afî a wu nyòtɨ. ⁴³Ɨ faytɨ ɨ̀fwo vzɨ̀ a ka ghɨ na tom ɨ̀kfaŋ mu ateyn ìvɨm, ɨ fi faytɨ ɨ̀kfaŋ ìvɨm atu ɨ̀fwo ateyn. ⁴⁴Ɨ faytɨ akî a ghɨ nà n-toŋtɨ na jva ighaʼnɨ ɨ faytɨ nyamsɨ mbòloʼ sìsɨ̀ a sɨ nà n-kêʼ na sɨ beʼi meyn jva ìghaʼnɨ. ⁴⁵Nô ɨ̀fwo nâ wèyn ɨ̀ jɨ̀m a Hulàm nɨn faytɨ, a ghɨ ntòynsɨ̀ nɨ̀ fɨsɨ nɨ̀ ɨ̀kfaŋ baʼsɨ̂ nɨ̀ ɨ̀fwo ɨ̀ jɨ̀m vzɨ̀ a wu nà n-ghɨ a ndo nɨ̀ Bôbo ta fòyn Sòlomòn bè na wù faytɨ, wu nà n-ghɨ ma ghɨ faytɨ kɨ nɨ̀ àkas a njeyntɨnɨ-a. ⁴⁶Fòyn nɨn læ bè ghɨ nà buŋsɨ̂ àkas nâ kèynà sfɨ̂s kɨ a tɨbɨ tɨ achaʼ a ngoʼ a ibal a ngùŋ jvà Jodàn a nfaynɨsɨ ntèʼ Sukòt ŋêyn Zaletàn. ⁴⁷Sòlomòn nɨn bu bè na ghelɨ ghɨ felɨnɨ nɨ̀ ŋweyn feʼ sɨ yeyn na ɨfwo nâ wèyn a ghɨ fàytɨ têyn nɨn dɨlɨ̀ ghɨ ti-a bòm ta ɨfwo vzɨ̀ a ghɨ n-faytɨ nɨ̀ àkasa nà n-dvɨ̂ chwôsɨ̀-à.

⁴⁸Sòlomòn nɨn be meyn ghɨ faytɨ ɨ̀fwo vzɨ̀ a wu n-kelɨ sɨ nà ghɨ a ndo nɨ̀ Bôbo abaŋ ifu ma ghɨ faytɨ nɨ̀ àso ɨkwo nɨ̀ àbaŋ kì a ghɨ n-lèm abayn ighɨ nɨ̀ Fɨyini fɨ ma ghɨ faytɨ nɨ̀ àso ɨkwo. ⁴⁹Afo kì a ghɨ nà n-tomtɨ ibayn ateyn ma ghɨ faytɨ nɨ̀ àso ɨkwo a juŋà ɨ̀twâyn ɨ ti abàs itsɨyn, ɨ̀twâyn ɨ ti abàs ikuè a ghɨ ɨvzɨ̂ a wu n-ti kɨ nô antêynɨ̀ ndo asɨ alèʼ a laynɨ-a a bemnɨ-a, wu ghɨ ma ghɨ faytɨ nɨ̀ àso ɨkwo a juŋà. Bàŋàluèluèʼ sîsɨ̀ a sɨ n-ghɨ ateyn nɨ̀ ìbayni nɨ̀ ɨ̀nfwalɨ nà n-ghɨ ma ghɨ faytɨ kɨ nɨ̀ àso ɨkwo. ⁵⁰Ntoynsɨ̀ nɨ̀ ɨ̀fwo vzɨ̀ a ghɨ n-kœ̀tɨ abêŋtɨ̀ ɨvɨ̀s ɨchfɨ i bayn, nɨ̀ ɨ̀kfaŋ nɨ̀ ɨ̀ntwàsɨ̀ nɨ̀ ɨ̀faŋ vzɨ̀ a ghɨ n-sef ɨvɨs ateyn nɨn kelɨ sɨ nà ghɨ kɨ aso ɨkwo a juŋà. Ɨfwo vzɨ̀ a ghɨ n-ghaŋsɨ achfɨ̂ ndosɨ ateyn ma à ti ɨchfɨ̂ ɨ ndô Fɨyini nɨ̀ ɨchfɨ̂ vzɨ̀ a wu n-ghɨ asɨ alèʼ a laynɨ-a a bemnɨ-a, nô nɨ̀ ɨ̀chfɨ alèʼ a laynɨ-a, à n-ghɨ kɨ àso ɨkwo a juŋà.

⁵¹Ghɨ mesi nô ìfêl ì jɨ̀m zɨ̀ a fòyn Sòlomòn nà n-kelɨ sɨ nì a ndô Fɨyini, Sòlomòn ɨ lì ɨ̀fwo vzɨ̀ a bò ŋweyn Devìt nɨn læ lèm sɨ a nyɨŋ sɨ̂ Fɨyini fɨ ta aso ɨkwo a fɨfâ nɨ̀ àso ɨkwo nɨ̀ ɨ̀fwo vzɨ̀ a wu n-ghɨ a ndô Fɨyini ɨ zɨsɨ ɨ lèm ɨ̀fwo nâ wèyn a ndo nɨ̀ Bôbo.