1 Kings 6

Sòlomòn ɨ bàʼlɨ̀ ndô Fɨyini

¹Ghelɨ ghɨ felɨnɨ nɨ̀ Sòlomòn nɨn læ zɨ̀tɨ sɨ bàʼlɨ ndô Fɨyini a njôŋ Zîv a ghɨ a ànkùmtɨ̀ a njoŋ a bêŋ. A nà n-ghɨ tì ma fòyn Sòlomòn sɨ ghɨ achɨ sɨ a bèsɨ̀ kæ̀ ma bèŋsɨ chwo meyn ighɨ ìkæ̀ nɨ̀ bèŋ mɨ̀vɨm nfama sɨ achi ta woyn Isìlæ̀ nɨn læ fvɨ̀ sɨ a ilaʼ i Ijìb.

²Ndô Fɨyini zɨ̀ a Sòlomòn nɨn læ bàʼlɨ sɨ̂ Bôbo nà n-ghɨ ntàmsɨ akæ njvàsɨ̀ tâyn dyefɨ̀ ghɨ̀ ntàmsɨ akœ sɨ̀ tâyn ighaʼ, ghɨ ntàmsɨ akœ nsòmbo nɨ̀ àbeʼa idyèf i koʼ. ³Ajeŋa nà n-ghɨ ɨchfɨ ndô Fɨyini ma ghɨ bàʼlɨ̀ idyêf ateyni na ghɨ àkœ à tâyn kɨ̀mɨ ta ighaʼ i ndô Fɨyini nɨn ghɨ. Ighaʼ ateyni ɨ ghɨ àkœ à bò nɨ̀ àbeʼa. ⁴Wundùsɨ ndô Fɨyini nâ yèyn nà n-ghɨ ma ghɨ faytɨ meyn sɨ na falî abe ghaʼ antêynɨ̀. ⁵Sòlomòn ɨ fi bàʼlɨ̀ ndo yi timi kal a mbæ̀sɨ ndô Fɨyini nɨ̀ ìbami. Ndo nâ yèyn nà n-ghɨ ma ghɨ teyntɨ meyn kɨ̀ a ndosɨ a ndosɨ. Yi nà n-ghɨ ma ghɨ bàʼlɨ̀ ndo kɨ̀ atu àteyn nɨ̀ ìlì sɨ chem ɨlweŋ ɨ̀ twal iyvɨ, a ghɨ mɨ ì kà ma ghɨ teyntɨ meyn kɨ̀ a ndosɨ a ndosɨ. ⁶Nô mɨ ndo ì kà zɨ̀ a yi nà n-ghɨ aleŋ a nse nà n-ghɨ ntàm ɨ̀kœ ìmòʼ nɨ̀ fɨ̀bêʼnɨ̀ fɨ̀ ighaʼ. Ɨsîsɨ̀ a sɨ n-ghɨ aleŋ antêynɨ̀ ɨ ghɨ ntàm ɨ̀kœ nɨ̀ àbeʼ a ma kɨ chwo meyn antêynɨ̀. Ɨsîsɨ̀ a sɨ n-ghɨ aleŋ iyvɨ ɨ ghɨ ma à faŋ kɨ fɨfôlɨ̀ sɨ nà ghɨ ntàmsɨ akœ sɨ̀ bò. Afêf kì a kɨ n-ghɨ azɨ a ndô Fɨyini ɨ ghɨ ma kɨ lu meyn nà lælɨ koʼ kɨ koʼ ɨlweŋ ndo nâ ghàyn sɨ gàmtɨ̀ na ndo nâ sèynsɨ̀ a ghɨ tèytɨ têyn yeʼtɨ ɨwùyn azɨ a ndô Fɨyini bula ghɨ fî bàʼlɨ̀ zɨ̀sɨ nɨ̀ àfo a li-a ɨwuyn ndô Fɨyini sɨ tòʼtɨ̀ ateyn. ⁷Ngòʼ sîsɨ̀ a ghɨ nà n-bâʼlɨ̀ ateyn nà n-ghɨ ma ghɨ fytɨ kɨ̀ alèʼ ghè a ghɨ fvɨ̀sɨ̀ ateyn jæ ta ka ghɨ kfa nɨ̀ nseynsɨ abe a ndô Fɨyini. Ghɨ nà n-sɨ bàʼlɨ̀-à, wùl ɨ bu fì yvɨ wi ta ghɨ n-chuyn ngòʼ, yvɨ wi ta ghɨ n-teyn afo nɨ̀ njàm kèsa nɨ̀ àkas kì a ghɨ n-teyn ɨfwo ateyn abe a ndô Fɨyini.

⁸Ɨchfɨ̂ ɨ ndo ìyvɨ̀ aleŋ antêynɨ̀ nà n-ghɨ abàs ɨkœ ɨtwo. Wa nà n-koʼ a mbaŋisɨ ma sɨ nyòynɨ ngòynɨ wa chem aleŋ antêynɨ̀ ɨ̀ nì fì koʼ wa chem aleŋ ghè a kɨ n-ghɨ iyvɨ. ⁹Fòyn Sòlomòn ɨ bàʼlɨ mèsì ndô Fɨyini ɨ ɨ̀mbûtɨ̀ wu ghɨ wi têyn ta ɨvzɨ̂ a ghesɨ̀nà nɨ we ikàŋ nɨ̀ ɨ̀nkàʼ mɨ̀ sedà ɨ fi màʼ ìkaŋ ateyn nɨ̀ ɨ̀byâs ɨnkàʼ mɨ̀ sedà vzɨ̀ a wu n-sâŋtɨ̀ ghaʼlɨ. ¹⁰Ndo zɨ̀ a wu n-bàʼlɨ kal a ndô Fɨyini nà n-ghɨ ma ghɨ teyntɨ meyn a ndosɨ a ndosɨ, nô mɨ ìkà ɨ ngaŋtɨ̂ ghɨ ntàm ɨ̀kœ nɨ̀ fɨ̀bêʼnɨ̀fɨ̀. Sɨ nà n-ghɨ ma ɨmbûʼtɨ̀ ateyn vzɨ̀ a à n-ghɨ ɨnkâʼ mɨ̀ sedà chwo meyn zɨ ɨ̀ yùŋ a ndô Fɨyini.

¹¹Bôbo ɨ bè sɨ̂ Sòlomòn na, ¹²“Ndo yèyn a wà n-bâʼlɨ̀ têyn, wà kæ nà nî awo kì a mà bè na wà ni, yvɨnɨ̂ tɨ̀saʼ temtɨ, chî awo ghèyn a mà fu, a mà ni iwo zɨ̀ sɨ̂ và a mɨ n-læ chfɨ̀nɨ sɨ̂ bò vâ Devìt. ¹³A mà faŋ nà ghɨ kɨ ghɨ a ndô Fɨyini nâ ghàyn antêynɨ̀ nɨ̀ ghelɨ Isìlæ̀ nɨ̀ mà ghêyn læ̀ faŋ tɨ̀ vìsi àŋena.”

¹⁴Sòlomòn ɨ bàʼlɨ mèsì ndô Fɨyini, ¹⁵ɨ lom ɨwuyn ateyn antêynɨ̀ nɨ̀ ɨ̀byâs ɨnkàʼ mɨ̀ Sedà vzɨ̀ a wu nsâŋtɨ̀ ghaʼlɨ lû a nse dyêf koʼ chem ikàŋ. A nà ghɨ a kino wu lì ɨbyâs ɨnkàʼ mɨ̀ sayblès vzɨ̀ a wu n-saŋtɨ̀ ghaʼlɨ ɨ lom ateyn. ¹⁶Alêʼ kì a ghɨ nà n-toŋtɨ na alêʼ a laynɨ-a a bemnɨ-a nà n-ghɨ antêynɨ̀ àbàs ghè a kɨ ndù gyòʼsɨ̀ ibàm. Kɨ nà n-ghɨ ntàmsɨ̀ akœ sɨ̀ tâyn i dyèf ma ghɨ gwònɨ̀ nɨ̀ ɨbyâs ɨ ɨnkàʼ mɨ̀ sedà vzɨ̀ a wu n-sâŋtɨ̀ ghaʼ a wu na lù a nse dyêf koʼ chem ikàŋ. ¹⁷Alêʼ a ndo kì a ghɨ n-teynɨ kɨ nà ghɨ kɨ asɨ alèʼ a laynɨ-a a bemnɨ-a nà n-ghɨ ntàmsɨ akœ ìvɨm. ¹⁸Ɨbyâs ɨnkàʼ mɨ̀ sedà ɨ saŋtɨnɨ vzɨ̀ a ghɨ n-lom ɨwuyn ndo antêynɨ̀ nà n-ghɨ ma ghɨ chufɨ meyn nyòtɨ̀ nɨ̀ ɨ̀fwo wu ghɨ tèyn ta ɨntem mɨ̀ mù nɨ̀ ɨlvɨ wu ghɨ ta bàŋàluè-luêʼsɨ̀. Ghɨ n-lomn tî nô ngòʼ ìmòʼ ɨ nà kêʼ wì.

¹⁹Sòlomòn læ ni, ghɨ faytɨ àlêʼ a laynɨ-a a bemnɨ-a antêynɨ̀ àbàs ghè a kɨ ndù gòʼsɨ̀ ibàm ta ka ghɨ lem àntayntayn a mɨ̂kàyn nɨ̀ Bôbo ateyn. ²⁰Antêynɨ̀ a ndo ì laynɨ i bemnɨ nâ yèyn nà n-ghɨ ntàmsɨ akœ sɨ̀ tâyn idyèf, ghɨ ntàmsɨ akœ sɨ̀ tâyn ighaʼ, ghɨ ntàmsɨ akœ sɨ̀ tâyn ingaŋtɨ ma ghɨ tsɨsɨ meyn nô ì jɨ̀m nɨ̀ àso ɨkwo a juŋà. Wu n-faytɨ meyn kɨmɨ àbaŋ ifu nɨ̀ ɨ̀nkàʼ mɨ̀ sedà. ²¹Sòlomòn ɨ nì ghɨ tsɨsɨ àntêynɨ̀ a ndo ilaynɨ i bemnɨ nâ yèyn nɨ̀ àso ɨkwo a juŋà tî ɨ fi dyaŋsɨ nchaʼsɨ aso ɨkwo asɨ alèʼ a laynɨ-a a bemnɨ-a nâ ghàyn ma ghɨ tsɨsɨ meyn kɨ̀mɨ nɨ̀ àsɨ ɨkwo. ²²Nô mɨ àlêʼ à kà antêynɨ̀ ndô Fɨyini nà n-ghɨ ma ghɨ tsɨsɨ kɨ nɨ̀ àso ɨkwo baʼsɨ̂ nɨ̀ àbaŋ ifu kì a kɨ nà n-ghɨ alèʼ a laynɨ-a a bemnɨ-a.

²³Wu bè ghɨ lì fɨ̀kâʼ fɨ Olìf ɨ faytɨ ɨ̀fow ateyn ɨ̀bwò wu kêʼ tèyn ta nchìsɨ Fɨyini sìsɨ̀ a ghɨ n-toŋtɨ na chelùbsɨ̀ nô mɨ àkà ɨ ngaŋtɨ̂ iyvɨ sɨ a ntàmsɨ akœ sɨ̀ bò nɨ̀ àbeʼa, wu lèm antêynɨ̀ àlèʼ a laynɨ-a a bemnɨ-a. ²⁴Ghɨ n-faytɨ ɨfwo ateyn wu kelɨ tɨ̀wô nô mɨ ìwô ì kà ɨ ngaŋtɨ̂ iyvɨ sɨ a ntàm ɨ̀kœ nɨ̀ fɨ̀bêʼnɨ̀fɨ̀, dyêyn na sɨ lù ighaŋ iwò nɨ̀ àmòʼa sɨ ndù sɨ chem ighaŋ iwò nɨ̀ a li-a nɨn ghɨ ntàmsɨ akœ sɨ̀ bò nɨ̀ àbeʼa. ²⁵Ɨfwo nô wèyn ɨ̀bwò têyn nà n-kelɨ kɨ ɨ̀fyêʼ ɨ̀ mòʼ. ²⁶Nô mɨ à kà ɨ ngaŋtɨ̂ iyvɨ sɨ a ntàmsɨ akœ sɨ̀ bò nɨ̀ àbeʼa. ²⁷Wu bè ghɨ zɨ lèm ɨ̀fwo nâ wèyn alèʼ a layɨ-a a bemnɨ-a. Ghɨ n-tom ighaŋ iwò ateyn nɨ̀ à mòʼa ndu kùm ɨ̀wuyn ndo abàs àmòʼ ighaŋ iwo ̀ nɨ̀ ali-a ndu kùm ɨwuyn ndo abàs a li-a. Tɨwôtɨ àŋena tɨlitɨ ɨ gvi chuʼnɨ ɨ gwò ndo alèʼ a laynɨ-a a bemnɨ-a kɨ̀ itòŋ. ²⁸Ɨfwo nô wèyn ɨ̀bwò a wu nà n-kêʼ têyn ta nchìsɨ Fɨyini sìsɨ̀ a ghɨ n-toŋtɨ na chelùbsɨ̀ nà n-ghɨ ma ghɨ tsɨsɨ meyn nì àsɨ ɨkwo.

²⁹Sòlomòn ɨ bè ghɨ nyòtɨ̀ ɨ̀wuyn ndo antêynɨ̀ àlèʼ a laynɨ-a a bemnɨ-a nɨ̀ àlêʼ kì a ghɨ ntoynɨ ateyn sɨ zɨ alèʼ nâ ghàyn. Ghɨ nyòtɨ̀ nɨ̀ chelùbsɨ̀ nɨ̀ àsoma nɨ̀ bàŋàlueʼlueʼsɨ̀ ta ghɨ chuf ɨwuyn ndo nô ɨ̀jɨ̀m ɨlwèʼ nâ ghàyn. ³⁰Kindo àlèʼ nâ yèyn nɨ ɨzɨ̂ a ghɨ n-toynɨ ateyn sɨ zɨ nà n-ghɨ ma ghɨ tsɨsɨ kɨ nɨ̀ àsɨ ɨkwo.

³¹Achfɨ̂ a ndosɨ kì a kɨ nà n-zɨ alèʼ a laynɨ-a a bemnɨ-a nà n-ghɨ ma ghɨ faytɨ nɨ̀ fɨ̀kâʼ fɨ olìfɨ̀. Mɨ̀mbêʼsɨ̀ mɨ̀ àteyn nɨ̀ tɨ̀wuwutɨ nà n-ghɨ ma ghɨ fàytɨ a dzɨ ta ka ghɨ chfɨŋ ɨbyâʼ ateyn ɨ̀ twâyn./ Ɨchfɨ̂ ɨ ndo vzɨ̀ a wu nà n-zɨ alèʼ a laynɨ-a a bemnɨ-a kelɨ ɨ̀byâʼ ɨ̀ bwò nà n-ghɨ ma ghɨ faytɨ nɨ̀ fɨ̀kâʼfɨ olìfɨ̀. Mɨmbêʼsɨ̀ mɨ̀ àteyn nɨ̀ tɨ̀wuwutɨ ɨ ghɨ ma mɨ̀ kèʼnɨ̀ a dzɨ sɨ̀ tâyn. ³²Ɨbyâʼ achfɨ̀ a ndo nâ weyn nà n-ghɨ fɨ̀kâʼfɨ olìf ma ghɨ chuf chelùbîmsɨ̀ nɨ̀ àsoma nɨ̀ bàŋàluèlueʼsɨ̀ ateyn ɨ̀ tsɨ̀sɨ nɨ̀ àso ɨkwo ma ghɨ buʼ nɨ̀ àmbuʼa. ³³Ɨchfɨ̂ vzɨ̀ a wu nà n-zɨ a ndô Fɨyini nà n-ghɨ ma ghɨ faytɨ nɨ̀ fɨ̀kâʼ gɨ olìfɨ̀ wu ghaʼ ghɨ ta alêʼ àmòʼ ɨlvɨ ta ghɨ gwòtɨ̀ ighaʼ i ndo/abàsa a tɨma a ndo Fɨyini ɨlwêʼ ɨ̀kfæ̀. ³⁴Ɨchfɨ̂ nâ wèyn nà n-kelɨ ɨ̀byâʼ ɨ̀ bwò ma ghɨ chfɨŋ a dzɨ ta ka wu na buʼnɨ-à. ³⁵Wu nà n-ghɨ ma ghɨ nyotɨ meyn nɨ̀ chelùbîmsɨ̀ nɨ̀ àsoma nɨ̀ bàŋalueluèʼsɨ̀ ɨ̀ tsɨ̀sɨ kɨ sɨ afo àmòʼ nɨ̀ àso ɨkwo.

³⁶Sòlomòn ɨ nì ghɨ bàʼlɨ̀ àlêʼ kì a ngàŋsɨ ndô Fɨyinisɨ̀ nɨn duʼ ateyn ma azɨ a ndo jɨŋ meyn kàli. Alêʼ nâ kèyna nà n-ghɨ asɨ a ndô Fɨyini ma à gwònɨ̀ àzɨ a ndo ma ghɨ bàʼlɨ̀ mbàŋsɨ̀ tal nɨ̀ ngòʼsɨ chuynɨsɨ sɨ̀ tâynsɨ̀ nɨ̀ fɨ̀kâʼ fɨ sedafɨ̀ atu ta ghɨ bàs.

³⁷Ghɨ n-we achɨ a ndô Fɨyini fòyn Sòlomòn ɨ ghɨ bèŋsɨ̀ kæ̀ achɨ, a ghɨ a njoŋ zîv. ³⁸A se sɨ nà ghɨ a bèŋsɨ̀ nɨ̀ ŋweyn njvà ìmòʼ achi a njoŋsɨ nfama a ghɨ njoŋ Bûl, ghɨ bàʼlɨ mèsì ɨ faytɨ nô mɨ ghà vzɨ̀ a kɨ n-ghɨ ateyn kɨ̀ ighel ta wù tî bàʼtɨ. Wu n-li bèŋsɨ̀ nsòmbo sɨ bàʼlɨ ndo nâ yèyn.