1 Kings 5

Ibaʼtɨ sɨ bàʼlɨ ndô Fɨyini

¹Hilàm ɨ fòyn ìlaʼ i Tayà nà n-ghɨ wul ìjèl nɨ̀ Devìt. A nà ghɨ ta wù yvɨ na ghɨ lem meyn Sòlomòn sɨ a fòyn, wu tum ghelɨ ghɨ felɨnɨ sɨ̂ ŋweyn. ²Sòlomòn ɨ làʼi ntum yèyn na ghɨ kasi ndù nɨ̀ nyeyn sɨ̂ Hilàm:

³“Nô và nɨn kya na bò wom Devìt nà n-kaʼ wu bû bàʼlɨ̀ ndo zɨ̀ a ka ghɨ na koʼsɨ̂ Bôbo Fɨyini ateyn bòm ta wù tɨm meyn ìwoŋ ŋêyn Mbàynɨ̀ sìsɨ̀ a tɨlaʼ a mbæ̀sɨ. Wu n-tɨm, Bôbo ɨ fu adyaʼ wu tɨm tomtɨ ɨ̀vɨ ŋweyn atu nɨ̀ aŋena. ⁴Mɨtì à n-ghɨ lvɨ̂yn ma Bôbo Fɨyini femfɨ ni meyn mbôynɨ̀ na ghɨ a tɨ̂ghàmi nɨ̀ mà kɨ̀ ɨbyâs ɨ̀ jɨ̀m. Ghelɨ̀ ghem nɨn kelɨ wi ngeʼ nô sɨ ilæ. ⁵A ghɨ tì ma Bôbo ti meyn chfɨ̀nɨ̀ sɨ̂ bò wom Devìt na, “Wâyn vâ vzɨ̀ a ka mà lem sɨ a fòyn ɨlvɨ ta wà bu ghɨ wi, nɨn bâʼlɨ̀ ndo zɨ̀ a ka ghɨ na koʼsɨ̂ mà ateyn. Mɨ n-kɨŋ sɨ bàʼlɨ ndo nâ zɨ̀ a ka ghɨ na koʼsɨ̂ Bôbo Fɨyini femfɨ ateyn. ⁶Gàmtɨ ma ɨ tum ghelɨ̀ ghya àŋena ndu gvèytɨ̀ ɨ̀nkâʼ mɨ̀ sedà a ilaʼ i Lebanòn. Ghelɨ ghɨ felɨnɨ nɨ̀ mà nɨn gvì chɨ̂yntɨ̀ ŋêyn ɨghî a wà n-kelɨ. Mà na laʼ ghelɨ ghɨ felɨnɨ nɨ̀ và nɨ̀ ɨ̀kwo vzɨ̀ a ka wà feʼtɨ. Ba nô và nɨn kya na wùl nɨ̀n ghɨ wi antêynɨ̀ nɨ̀ ghès a wù n-kya sɨ gvèl ɨnkâʼ mɨ̀ sedà tèyn ta ghelɨ ilaʼ i Sidòn.”

⁷A nà ghɨ ta Hilàm yvɨ̀ ntum zɨ̀ a Sòlomòn làʼì, wu nà saŋlɨ̂ nô sɨ a ŋaŋ ɨ bè na, “Mɨ n-koʼsɨ̂ Bôbo ta wù tî fù wayn ɨtofɨnɨ sɨ̂ Devìt na wù saʼ ilaʼ i Isìlæ̀ i bemnɨ-i yèynì.”

⁸Hilàm ɨ làʼi ntum na ghɨ kasi ndù nɨ̀ nyeyn sɨ̂ Sòlomòn ɨ bè na, “Ma yvɨ meyn ntum zɨ̀ a wà làʼì. Mɨ n-nì nô mɨ ghà ta wà bè na mà ni. Mɨ n-bè-à a ghɨ gveytɨ ɨnkâʼ mɨ̀ Sedà nɨ̀ ɨ̀nkàʼ mɨ̀ sayblès. ⁹Ghelɨ ghɨ felɨnɨ nɨ̀ mà na lî ɨ̀nkâʼ mɨ̀ àteyn a Lebanòn kul ɨkwaʼ ɨkwaʼ ghɨ kàysɨ̀ a jvâ ì ghaʼnɨ ɨ lèm alèʼ ghè a ka wà feʼtɨ. Ɨlvɨ nâ ghè a ghelɨ ghya gvi ɨ̀ yàytɨ̀ ɨ̀ lì. Dzɨ zɨ̀ a ka wà gamtɨ ma ateyn nɨn ghɨ na wà na fu mà nɨ̀ ɨ̀fwo ɨ yɨnɨ ta ka mà na yɨsɨ̂ ghelɨ ghem.”

¹⁰Hilàm ɨ bè tì ɨ nà sɨ fu ɨ̀nkâʼ mɨ̀ Sedà nɨ̀ ɨ̀nkàʼ mɨ̀ Sayblès ɨ̀n jɨ̀m mzɨ̀ a Sòlomòn nɨn bè na wù fu. ¹¹Wu n-fu tî, Sòlomòn ɨ boŋ fu ɨkwaŋ ɨnkfɨ̀ŋ mɨ̀ wît nkam nɨ̀ ɨ̀kwaŋ mɨvɨ̀l mɨ̀ olìf nkam ta ka Hilàm na yɨsɨ̂ ghelɨ ateyn. Sòlomòn nà n-fu ɨ̀fwo nâ wèyn kɨ bèŋsɨ̀ jɨ̀m. ¹²Bôbo nà fî fu kɨ fu itof sɨ̂ Sòlomòn kɨ ighel ta wu n-chfɨ̀nɨ. Hilàm ɨ yɨ mɨkâyn ŋêyn Sòlomòn ɨ faŋ nà chî kɨ nɨ̀ mbôynɨ̀.

¹³Sòlomòn ɨ kini ghelɨ Isìlæ̀ nkam mɨ̀vɨm ɨ̀n tal ɨ kàyn ghɨ nà nî ìfêl ghɨ lâʼ wì laʼ. ¹⁴Wu lèm Adonilàm na wù na ghɨ àtu sɨ̂ ghelɨ nâ ghèyn. Ghɨ n-gwòtɨ ghelɨ nâ ghèyn inòyn ì tal, anôyn àmòʼ a ghɨ nkamsɨ ìvɨm. Nô mɨ ànôyn à kà ɨ nà ndû fêl njoŋ ìmòʼ a Lebanòn, kɨ kasi kfa ɨ fèl njoŋ sɨ̀ bò a ndosɨ nɨ̀ àŋena. ¹⁵Sòlomòn nà n-kelɨ ghelɨ nkam mɨ̀vɨm nfama ta ghɨ n-chuyn ngòʼsɨ̀ a kfɨynsɨ. Ghelɨ ghì a ghɨ n-beʼì ɨ ghɨ nkam mɨ̀vɨm nsòmbo. ¹⁶Wu n-lèm ghelɨ nkamsɨ̀ tal nɨ̀ ìghɨ ì tal ta ka ghɨ na ghɨ ɨ̀tu sɨ nà tisɨ ifêl i àŋena. ¹⁷Fòyn Sòlomòn ɨ bè sɨ̂ ghelɨ ghì a ghɨ n-chuyn ngòʼsɨ̀ na àŋena na chuyn kɨ ngòʼ sîsɨ̀ a sɨ n-kelɨ ikêʼ i juŋì ta ka ghɨ baʼlɨ achɨ a ndô Fɨyini ateyn. ¹⁸Ghelɨ ghɨ baʼlɨnɨ nɨ̀ Sòlomòn nɨ ɨghi Hilàm ɨ baʼsɨ nɨ̀ ghelɨ Gebàl ɨ chuyn ngòʼsɨ̀ fî faytɨ̂ ɨ̀nkâʼ ta ka mɨ̀ kfeyn sɨ bàʼlɨ ndô Fɨyini ateyn.