1 Kings 13

Nfèʼtɨ̀ ì ghaʼnɨ ɨ ghàm ìkoʼsɨ i Betèl

¹Kɨ̀ têyn, nfèʼtɨ̀ ì ghaʼnɨ ɨ gvì a Betèl ma yì lù a Judà ma à tum Fɨyini na yì gvi. Yi nà n-gvi-à, Jèlobòwàm ɨ ti a ngùŋ àbaŋ ifu kɨŋ sɨ nyòʼ ɨfwo ɨ lɨmtɨnɨ. ²Nfèʼtɨ̀ ì ghaʼnɨ nâ yèyn ɨ byal nɨ̀ gyà ìto ɨ bè na, ‘Abaŋ ifu a! Tèyn nɨn ghɨ ìwo zɨ̀ a Bôbo bè, “Ghɨ læ̀ bzɨ̂ wayn ɨ lûmnɨ̀ isas i ndo nɨ̀ Devìt izɨyn i ŋweyni ɨ ghɨ Jòsayà a wù li ngàŋsɨ ndô Fɨyini sìsɨ̀ a sɨ n-fu tɨfu ɨlwèʼ ɨ ngaŋtɨnɨ, nyɨ̂ŋsɨ̀ atu nɨ̀ và sɨ fu sɨ ifu. Wu læ̀ nyôʼ ɨ̀vɨf ɨ ghêl atu nɨ̀ và sɨ ifu.’” ³Wu taŋi tì ɨ bè na tèyn nɨ̀n ghɨ nchwæ zɨ̀ a Fɨyini fɨ fu. Ghɨ læ̀ bɨ̂ytɨ̀ àbaŋ ifu ateyn, sfɨ̀s àbvɨ ichɨ kì a kɨ n-ghɨ ateyn. ⁴A nà ghɨ ta fòyn yvɨ awo kì a nfèʼtɨ̀ ì ghaʼnɨ bè kɨ jofɨ̀ wì kûm àbaŋ ifu a Betèl, Jèlobòwàm ɨ nàysɨ fvɨ̀sɨ ndù nɨ̀ àwu a ŋweyna a atû àbaŋ ifu ɨ bè na, “Yì ghalɨ ŋweyn.” Awu kì a wù nàysɨ̀ fvɨ̀sɨ̀ ɨ̀ sòʼ nfèʼtɨ̀ ì ghaʼnɨ ateyn ɨ yum, ɨ nà bu ghɨ wi sɨ suʼsɨ. ⁵Abaŋ ifu nâ kì ti sɨ ghɨ ma ghɨ n-læ meyn bɨ̀ytɨ̀ ɨ sfɨ̀s àbvɨ ichɨ kì a kɨ nà n-ghɨ ateyn. Yi n-læ gàyn sɨ luynsɨ iwo zɨ̀ a nfèʼtɨ̀ ì ghaʼnɨ nɨn læ bè ma à tum Bôbo bèŋsɨ chwô nô sɨ a idvɨ̀ yi jæ gàyn.

⁶Foyn Jèlobòwàm ɨ bè sɨ̂ nfèʼtɨ̀ ì ghaʼnɨ na, “Mɨ n-chwotɨ̂ và, chwotɨ̂ Bôbo Fɨyini fìfɨ̀ a wà n-koʼsɨ, fɨ ni awu/ɨkœ wom kasi nà ghɨ a jûŋ. Nfèʼtɨ̀ ì ghaʼnɨ ɨ chwotɨ Bôbo wu nì awu a ŋweyna kasi nà ghɨ kɨ ta kɨ nà ghɨ sɨ asɨ.

⁷Fòyn ɨ bè sɨ̂ nfèʼtɨ̀ ì ghaʼnɨ na, “Gvi ghesɨ̀và kfa wà yɨ afo. Ɨmyaʼtɨ nɨn ghɨ ta ka mà fu sɨ̂ và.”

⁸Mɨtì, nfèʼtɨ̀ ì ghaʼnɨ ɨ be sɨ̂ fòyn na, “Wà bàynɨ̀ ntôʼ zyâ kɨ̀ antêynɨ̀ àntêynɨ̀ ɨ̀ fu sɨ̂ mà, mɨ n-bu kfa ghesɨ̀và. Mɨ n-yɨ wi afo kèsa mu afêyn. ⁹Bôbo bè meyn sɨ̂ mà na ka mɨ n-yɨ afo kèsa nô mɨ ghà sɨ nyvɨ, fi bè na ka mɨ n-kàsi kfa a dzɨ ghê a mà nì gvì ateyn.” ¹⁰Wu taŋi tì ɨ lì dzɨ zɨ̂lù sɨ kfa ateyn a ghɨ wi ɨzɨ̂ a wù nì gvì ateyn.

Nfèʼtɨ̀ ì ghaʼnɨ nɨ̀ ìlemanɨ ma yì lù a Betèl

¹¹A nà n-ghɨ a mɨchi nâ ghè, nfèʼtɨ̀ ì ghaʼnɨ ilemanɨ ìlì ɨ chî a Betèl. Wâyn ŋweyn ɨ lûmnɨ̀ ɨlvɨ̀ ɨ ndù ɨ fèʼtɨ̀ sɨ̂ ŋweyn awo kì a nfèʼtɨ̀ ì ghaʼnɨ nì achi nâ ghè nô à jɨ̀m, ɨ fi fèʼtɨ̀ àwo kì a wù bè sɨ̂ fòyn. ¹²Bò àŋena ɨ bɨf na, “Wù nì ndù a dzɨ ì kà?” Woyn ŋweyn ɨ dyèyn dzɨ zɨ̀ a nfèʼtɨ̀ ì ghaʼnɨ ɨ Judà nì ndù ateyn. ¹³Wu bè sɨ̂ woyn ŋweyn na, “Yi sali njàkâs sɨ̂ mà. Àŋena sali wu koʼ ateyn ɨ lù, ¹⁴ɨ ndù ibam nɨ̀ ŋweyn ɨ koli ŋweyn ma wù duʼi meyn isas i fɨ̂kàʼ fɨ ghaʼnɨ fɨ. Wu bɨf sɨ̂ ŋweyn na, “À n-ghɨ và ɨ nfèʼtɨ̀ ì ghaʼnɨ zɨ̀ a yì lù a Judà ma?” Wu bè na, “À n-ghɨ mà.”

¹⁵Wu bè sɨ̂ ŋweyn na, “Gvi ghesɨ̀và kfa wà yɨ afo.”

¹⁶Wu bèynsɨ̀ ɨ bè na, “Ghesɨ̀và nɨn kfâ wì, ghɨ wi sɨ yɨ kèsa sɨ nyvɨ afo afêyn, ¹⁷bòm ta Bôbo be meyn na ka mɨ n-yɨ kèsa sɨ nyvɨ afo, fì bè na ka mɨ n-kàsɨ kfa a dzɨ afî a mà nì gvì ateyn.”

¹⁸Nfèʼtɨ̀ ì ghaʼnɨ i lemanɨ nâ yèyn ɨ bè na, “Mɨ n-ghɨ kɨmɨ nfèʼtɨ̀ ì ghaʼnɨ ta vâ.Bôbo tum meyn nchì ŋweyn na yì be sɨ̂ mà na mà li vâ ghesɨ̀và kasi kfa a ndo ta ka wà yɨ afo fì nyvɨ̀ mu. Wu bê tì wam wam. ¹⁹Tèyn nfèʼtɨ̀ ì ghaʼnɨ nâ yèyn a yì lù a judà ɨ kasi ŋêyn ŋweyn ɨ kfa a ndo nɨ̀ ŋweyn ɨ yɨ ɨfwo ɨ yɨnɨ ɨ nyvɨ mu.

²⁰A nà n-ghɨ ta àŋena dùʼì nà yɨ-a, Bôbo ɨ fu iwo sɨ̂ nfèʼtɨ̀ ì ghaʼnɨ ilemanɨ zɨ̀ a yì lì kàsi kfa nɨ̀ ŋweyn a ndo. ²¹Wu byal a gyâ ito ɨ bè sɨ̂ nfèʼtɨ̀ ì ghaʼnɨ zɨ̀ a yì lù a Judà na, “Tèyn nɨn ghɨ ìwo zɨ̀ a Bôbo bè, “Ta wà bû yvɨ̀nɨ ìwo zɨ̀ a Bôbo bè sɨ̂ và, faŋ tɨ̀ nì iwo zɨ̀ a wù fu na wà ni. ²²Wà kasi meyn kfa alèʼ ghè a wù bè na ka wa n-yɨ afo ateyn kèsa sɨ nyvɨ nyvɨ. Wà yɨ meyn fì nyvɨ. Bòm tèyn, ghɨ ngvɨ̀mì wì igvɨyn ìzæ a tɨ̂sè nɨ̀ ghɨ̀ bo ghya.”

²³A nà ghɨ ta wù yɨ̀ meyn fì nyvɨ, nfèʼtɨ̀ ì ghaʼnɨ ilemanɨ zɨ̀ ɨ sali njàkâs sɨ nfèʼtɨ̀ ì ghaʼnɨ zɨ̀ a yì lù a Judà, ²⁴wu koʼ ateyn ɨ lù ɨ se sɨ ndu, bzɨ̀nkem ku ŋweyn ɨ zue ɨ màʼ ìgvɨyn i ŋweyn a dzɨ njàkâs zɨ̀ ɨ timi a ngùŋ àteyn, bzɨ̀nkem àteyn ɨ boŋ timi kɨ afu. ²⁵Ghelɨ nà sɨ chwô yeyn igvɨyn i nfèʼtɨ̀ ì ghaʼnɨ nâ yèynì a dzɨ, yeyn bzɨ̀nkem zɨ̀ yi ti kɨ a ngùŋ àteyn, àŋena kfa ɨ fèʼtɨ̀ a ntèʼ afî a nfèʼtɨ̀ ìghaʼnɨ ilemanɨ zɨ̀ nɨn chi ateyn.

²⁶A nà ghɨ ta nfèʼtɨ̀ ilemanɨ nâ yèyn yvɨ, “À n-ghɨ nfèʼtɨ̀ ì ghaʼnɨ zɨ̀ a yì tî faŋ tɨ̀ yvɨ̀nɨ iwo zɨ̀ a Bôbo bè sɨ̂ ŋweyn. À ti iwo zɨ̀ a yi nì Bôbo nî bzɨ̀nkem zue ŋweyn kɨ̀ ighel ta ntum Bôbo nì gvì sɨ̂ ŋweyn.”

²⁷Wu bè sɨ̂ woyn ŋweyn na, “Yì sali njàkâs sɨ̂ mà.” Àŋena sali kɨ ta wù bè. ²⁸Wu ndù ɨ yeyn igvɨyn i nfèʼtɨ̀ ì ghaʼnɨ nâ zɨ̀ yi nyɨŋ a dzɨ, njàkâs zɨ̀ ɨ ti a ngùŋ àteyn, bzɨ̀nkem ɨ ghɨ bula yì kfɨl ìgvɨyn ateyn, njàkâs ɨ ghɨ bula yì zue. ²⁹Nfèʼtɨ̀ ì ghaʼnɨ ilemanɨ ɨ chàʼsɨ̀ ìgvɨyn i ngèʼtɨ̀ ì ghaʼnɨ nâ zɨ̀ ɨ koʼsɨ atû njàkâs ɨ kasi kfa gvì nɨ̀ ɨ̀nyeyni a ntèʼ nɨ̀ ŋweyn ɨ dzɨ̀ ŋweyn ɨ gvɨ̀mì. ³⁰Nfèʼtɨ̀ ì ghaʼnɨ ilemanɨ nɨn gvɨ̀mi igvɨyn i nfèʼtɨ̀ ìghaʼnɨ nâ yèyn a isè nɨ̀ ghɨ̀ bo ŋweyn ɨ gvɨ̀mì tì ɨ dzɨ̀ nfèʼtɨ̀ i ghaʼnɨ àteyn.

³¹Wu gvɨ̀mì tì ɨ bè sɨ̂ woyn ŋweyn na, “Ma læ̂ kfɨ yi gvɨ̀mì mà kɨ̀mɨ isè nâ ghè, yi lèm ɨ baʼsɨ mà a ngùŋ nɨ̀ ŋweyn. ³²Iwo zɨ̀ a Bôbo ti tum nfèʼtɨ̀ ì ghaʼnɨ yèyn na yì be kûm àbaŋ ifu kì Betèl nɨ̀ ɨvzɨ̂ a wù n-ghɨ ɨlwèʼ ɨngaŋtɨnɨ fî ghɨ a ntèʼ sɨ lisɨ a Sàmalìyà, yi n-gâyn kɨ tì ta wù tî bè.”

Jèlobòwam ɨ nà bu nî kɨ nɨ̀ mbɨ

³³Nô mɨ ta yi n-gàyn têyn fòyn Jèlobòwàm ɨ nà bu nì ndû kɨ ndu nɨ̀ mbɨ. Wu n-choʼtɨ ngàŋsɨ ndô Fɨyini antêynɨ̀ nɨ̀ ghelɨ kɨ ghɨ̀ jɨ̀m ɨ lèm na àŋena na ghɨ ngàŋsɨ ndô Fɨyini ɨlwèʼ ɨ ngaŋtɨnɨ. ³⁴Mbɨ nâ yèyn a Jèlobòwàm nà n-kolî mɨ ndà choʼ kɨ̀ sɨ a ngàŋ ndô Fɨyini, a nà sɨ ghɨ kɨ mbɨ isas i ndo nɨ̀ ŋweyn zɨ̀ a ka yì zue isas i ndo ateyn nô ì jɨ̀m.