1 Kings 12

Asas a ndosɨ ikuè ɨ nà nû Lehobòwàm

¹Lehobòwàm nɨn læ ndù a Shekèm ta asas a ndosɨ abàs ikuè ilaʼ i Isìlæ̀ ndù meyn yvɨ̀ŋtɨ̀ afu sɨ lem ŋweyn sɨ a fòyn. ²A nà ghɨ ta Jèlobòwàm ɨ wâyn Nebàt yvɨ saʼgha àteyn bu ghɨ kɨ a Ijìb alèʼ ghè a wù n-læ leʼ fòyn Sòlomòn ɨ ndu dùʼì ateyn, ³ghɨ tum jàŋ ŋweyn ŋêyn àsas a ndosɨ abàs ikuè nâ kèynà ɨ ndù ɨ yeyn Lehobòwàm ɨ bè sɨ̂ ŋweyn na, ⁴“Bò vâ ti meyn nà fu ngeʼ sɨ̂ ghès nô sɨ a ŋaŋ, fu ɨ̀fwo na, wu dɨlɨ̀ nô sɨ a ŋaŋ. Wà kæ nì abeʼi à kesa nâ kèyna nyâŋsɨ̀ ɨ̀ nà bu fu wi ngeʼ sɨ̂ ghès, a ghès na nì ta wà n-kɨŋ.”

⁵Wu bè sɨ̂ àŋena na, “Yì ndu kàsi gvì yèyn ma ibàm i mɨchi ɨ̀n tal.”

⁶Fòyn Lehobòwàm ɨ ndu yeyn chyeʼ sìsɨ̀ a sɨ tî nà tebtɨ bò ŋweyn Sòlomòn ɨ bɨf sɨ̂ àŋena na, “Iwo zɨ̀ a yì kàʼ a yì tebtɨ ma na mà be sɨ̂ ghelɨ ghèyn nɨn ghɨ na gha?”

⁷Àŋena bèynsɨ̀ ɨ bè sɨ̂ ŋweyn na, “Wà kæ nà ghɨ wul ɨ̀ felɨnɨ nɨ̀ àŋena, taŋî a jûŋ sɨ̂ àŋena, a àŋena na ghɨ ghelɨ ghɨ felɨnɨ nɨ̀ và kɨ̀ sɨ chem a ngòʼsɨ.”

⁸Mɨtì wu chas itebtɨ zɨ̀ a chyeʼ nâ sìsɨ̀ fù sɨ̂ ŋweyn ɨ li kɨ izɨ-ì a woynda tɨkùŋ bè a ghɨ ghelɨ ijèl nɨ̀ ŋweyn duʼ a ngùŋ nɨ̀ ŋweyn. ⁹Wu n-bè sɨ̂ àŋena na, “Yì feʼtɨ iwo zɨ̀ a ka ma be sɨ̂ ghelɨ ghèyn a ghɨ gvì nà bê sɨ̂ mà na mà suʼsɨ adɨli kì a bò wom tî kòʼsɨ atu nɨ̀ àŋena.”

¹⁰Àŋena bèynsɨ̀ ɨ bè na, “Bè sɨ̂ àŋena na baŋ àwu nɨ̀ mà igoʼsɨnɨ nɨn ghaʼ chwô àkuʼtɨ a bò wom. ¹¹Bè sɨ̂ àŋena na, “Bò wom ti meyn kòʼsɨ àdɨli atu nɨ̀ zɨ̀ kɨ dɨlà, akî a mɨ n-koʼsɨ kɨ na dɨlɨ̀ chwô akî a bò wom a. Wù tî nà leŋ zɨ̀ nɨ̀ ngvàlìsɨ̀, mà na leŋ zɨ̀ nɨ̀ ìnfòmi ma ghɨ chfɨŋtɨ meyn ɨ̀kfas ateyn.”

¹²Mɨ̀chi chwò ɨ̀n tal kɨ̀ ta Lehobòwàm nɨn bè, Jèlobòwàm ɨ kasi gvì ŋêyn ghelɨ nô ghɨ̀ jɨ̀m, ¹³ma fòyn chas meyn ìtebtɨ zɨ̀ a chyeʼsɨ tî fù sɨ̂ ŋweyn, wu taŋi àwo sɨ̂ àŋena kɨ fom wi, ¹⁴a ghɨ àwo kì a ngwaʼ ŋweyn tî tèbtɨ na wù be, wu bè sɨ̂ àŋena na, “Bò wom ti meyn kòʼsɨ àdɨli atu nɨ̀ zɨ̀ kɨ̀ dɨlɨ̀-à, a kema na dɨlɨ̀ chwô a ki a bò wom a. Wù tî nà leŋ zɨ̀ nɨ̀ gvàlìsɨ̀, mà na leŋ zɨ̀ nɨ̀ ìnfòmi ma ghɨ chfɨŋɨ meyn ɨ̀kfas ateyn.” ¹⁵À n-læ ni Fɨyini na yi gayn a dzɨ nâ ghàyn ta ka iwo zɨ̀ kfeyn a fɨ n-læ tum ɨ nfèʼtɨ̀ ìghaʼnɨ Ahijà ɨ wul ɨ̀ Shilò, wu taŋi sɨ̂ Jèlobòwàm ɨ wâyn Nebàt. À ti iwo zɨ̀ a ghelɨ nɨn taŋi fòyn ɨ teyn na yi n-yvɨ wi iwo sɨ̂ àŋena.

¹⁶A nà ghɨ ta asas a ndosɨ abàs ikuè yèyn meyn kèli na fòyn bû yvɨ̀tɨ ìtebtɨ zɨ̀ a àŋena fù sɨ̂ ŋweyn, àŋena byal ɨ bè sɨ̂ fòyn na, “Ghès nɨn kelɨ wi iwo sɨ ni nɨ̀ Devìt. Ghès nɨn kelɨ wi afo a li-a a wayn nɨ̀ Jesè ta ghès kàʼ a ghɨ be na à n-ghɨ a kesa. Ghesɨ̀nà lu, nô mɨ ndà na kfâ ndû a ŋweyn a ndo. Ghesɨ̀nà sɨ abàs ikuè, ghesɨ̀nà lu nà kfâ, ghesɨ̀nà visi isas i ndo nɨ̀ Devìt wù na saʼ ghelɨ ŋweyn. ¹⁷Mɨtì, Lehobòwàm ɨ nà bu ghɨ kɨ fòyn sɨ̂ ghelɨ asas a ndosɨ abàs ikuè ghì a ghɨ nà n-chi a Ntèʼsɨ a Judà.

¹⁸Fòyn Lehobòwàm ɨ tum Adonilàm vzɨ̀ a wù n-ghɨ atu sɨ̂ ghelɨ ghɨ felɨnɨ, kfâyntɨ̀-à ghɨ felɨ̀-à na wù ndu ɨ̀ tàŋi sɨ̂ ghelɨ Isìlæ̀ abàs ikuè. Wu ndù àŋena tɨmlɨ ɨ zue ŋweyn nɨ̀ ngòʼsɨ̀. Fòyn Lehobòwàm ɨ koʼ a mɨtù mɨ̀ ìwòŋ ɨ leʼ ndù a Jèlusalèm. ¹⁹Tèyn asas a ndosɨ nɨ̀ ghelɨ Isìlæ̀ nâ kèynà abàs ikuè na lum bimî wì sɨ koʼ sɨ chem layn na wùl ìsas i ndo nɨ̀ Devìt nɨn ghɨ fòyn sɨ̂ àŋena.

²⁰A læ nà ghɨ achi a li-a ghelɨ Isìlæ ɨ yvɨ na Jèlobòwàm kasi meyn kfa sɨ a Ijìb, àŋena ɨ yvɨ̀ŋɨ̀ ɨ tum jàŋ ŋweyn ɨ lèm ŋweyn sɨ̂ a fòyn ghelɨ Isìlæ̀. Ghelɨ ɨ bimi nô ghɨ̀ jɨ̀m na wù n-ghɨ fòyn a faŋ kɨ ghelɨ isas i ndo nɨ̀ Judà ɨ nà bimî kɨ ɨ̀fôyn vzɨ̀ a wu n-fvɨ̀ isas i ndo nɨ̀ Devìt.

Nfèʼtɨ̀ i ghaʼnɨ, Shèmayà ɨ yeʼnɨ ìnû i woyn ghɨ̂nì

²¹A nà ghɨ ta Lehobòwàm gvì a Jèlusalèm, wu yvɨ̀ŋtɨ̀ ghelɨ ghì a ghɨ n-faytɨ kya iwòŋ isas i ndo nɨ̀ Judà nɨ̀ izɨ-i Benjamìn ì, àŋena nà n-chɨ̂yntɨ̀ ghɨ nkam ɨvɨ weʼa nɨ̀ mɨ̀vɨm nfama. Wu n-choʼtɨ têyn ta ka àŋena nu asas a ndo nɨ̀ Isìlæ̀ kì abàs ikuè ɨ̀ kàsi chɨ̀yntɨ̀ fu ɨfôyn ateyn sɨ̂ Lehobòwàm ɨ wâyn Sòlomòn.

²²Mɨtì Fɨyini fɨ ɨ aŋi sɨ̂ Shèmayà ɨ nfèʼtɨ̀ i ghaʼnɨ ɨ bè sɨ̂ ŋweyn na, ²³wù be sɨ̂ Lehobòwàm ɨ wâyn Sòlomòn ɨ fòyn Judà baʼsɨ̂ nɨ̀ ghelɨ Judà ɨ̀ bè sɨ̂ ghelɨ Benjamìn nô mɨ nɨ̀ nda ɨ̀lvɨ̀ na, ²⁴Bôbo bè na, ‘Ka yi ndù nù woynà ghi ɨ ghelɨ Isìlæ̀. Yì kasi nà kfâ sɨ a ndosɨ nɨ̀ zɨ̀ bòm ta à nì mà na iwo nâ yèynì gàyn.’ Àŋena yvɨ iwo zɨ̀ a Bôbo bè ɨ kasi kfa kɨ ta Bôbo bè.

Jèlobòwàm ɨ faŋ tɨ̀ yvɨ̀nɨ Fɨyini

²⁵Jèlobòwàm ɨ kasi bàʼlɨ̀ ɨ wesɨ àdyaʼ ɨlwèʼ ɨ mbàyn ntèʼ Shekèm zɨ̀ a yì n-ghɨ ilaʼ i kfɨynsɨ nɨ̀ Eflèm ɨ lèm ntoʼ ŋweyn a ntèʼ nâ ghàyn, ɨ chitɨ koʼ ɨ ndu kasi bàʼlɨ̀ ɨ wesɨ àdyaʼ ɨlwèʼ ɨ mbàyn ntèʼ Benùwèl.

²⁶A nà ghɨ achi a li-a, Jèlobòwàm ɨ kfàʼtɨ̀ item nɨ̀ ŋweyn na, “Ghelɨ ghɨ̀ jɨ̀m nɨn lù-à ɨ ndù a Jèlusalèm sɨ fu tɨfu tɨ àŋena sɨ̂ Bôbo. ²⁷A dzɨ afî a awo nɨn ghɨ ateyn, àŋena ti kæ faŋ nà ndû kɨ a Jèlusalèm nì kæ bimi na Lehobòwàm ɨ fòyn Judà nɨ̀n ghɨ fòyn àŋena, a àŋena zue ma.”

²⁸Ta wù kfàʼtɨ̀ awo nâ kèynà ɨ bɨf sɨ̂ ghelɨ ghì a ghɨ n-tebtɨ ŋweyn iwo zɨ̀ a ka wù ni, ɨ kæ faytɨ nyamsɨ mbòloʼ sɨ̀ bò nɨ̀ àso ɨkwo ɨ bè sɨ̂ ghelɨ ŋweyn na, “Yi ndu meyn chwòsɨ̀ a Jèlusalèm, yi ndu meyn kfeyn. Ghelɨ Isìlæ̀, ɨmêyn nɨn ghɨ mɨ̀yìnì mzɨ̀ a mɨ n-læ li fvɨ nɨ̀ zɨ̀ sɨ a Ijìb.” ²⁹Ta wù bè tî ɨ lì nyam ìmòʼ ɨ tom a Betèl ɨ ndu tom ìlì a ntèʼ Dân. ³⁰Iwo nâ yèyni ɨ nì, ghelɨ Isìlæ̀ ɨ nì mbɨ bòm ta àŋena nɨn zɨtɨ meyn nà ndû a ntèʼ Dân nɨ̀ ntèʼ Betèl sɨ koʼsɨ ɨ̀nfyèʼsɨ̀ ɨ nyâmsɨ mbòloʼ nâ wèyn.

³¹Jèlobòwàm ɨ fi bàʼlɨ̀ ɨ̀lwêʼ vzɨ̀ a ka ghɨ na koʼsɨ̂ Fɨyini ateyn atû kfɨ̀ynsɨ ɨ choʼtɨ ngàŋsɨ ndô Fɨyini kɨ̀ antêynɨ̀ nɨ̀ ghelɨ sɨ idvɨ̀ a ghɨ wi ghelɨ isas i ndo nɨ̀ Levì. ³²Jelobòwàm ɨ choʼnɨ àchi a iyɨ i ghaʼnɨ-i ɨ lèm ɨ na kɨ na ghɨ a mɨchɨ njvàsɨ̀ tâyn a njoŋsɨ nfam, ghɨ nà yɨ n-sɨnɨ̂ àchi kì a ghɨ n-yɨ ateyn a Judà. Wu n-lem ngàŋsɨ ndô Fɨyini sìsɨ̀ a wù choʼtɨ a Betèl ŋêyn àŋena nà fu tɨ̀fu sɨ̂ nyamsɨ aso ɨkwo sìsɨ̀ a wù fàytɨ. ³³A nà ghɨ a mɨchi njvàsɨ̀ tâyn a njoŋsɨ nfama (a ghɨ achi ma wù fàytɨ kɨ̀ ikfàʼtɨ̀ nɨ̀ ŋweyn) wu fu tɨfu abaŋ ifu afî a wù bàʼlɨ̀ a Betèl. Wu n-lem meyn àchi iyɨ ighaʼnɨ-i kì a wù n-kɨŋ na ghelɨ Isilæ̀ na yɨ ateyn ɨ koʼ timi abaŋ ifu ɨ nà fu tɨ̀fu ateyn fî nyôʼ ɨ̀fwo ɨ lɨmtɨnɨ.