1 Kings 14

Wâyn Jèlobòwàm ɨ kfɨ

¹Kɨ̀ a mɨchi nâ ghè, Ahijà ɨ wâyn Fòyn Jèlobòwàm ɨ nà sɨ koʼi-à, ²Jèlobòwàm ɨ bè sɨ̂ wî ŋweyn na, “Ni ngêŋ zyâ ɨ nà kêʼ ta wul ɨ wûlù ta ka wùl ɨ̀ na yeyn kelî wì vâ ɨ ndù a Shilò a ntèʼ afî a nfèʼtɨ̀ ì ghaʼnɨ zɨ̀ nɨn chi ateyn, ɨ nfèʼtɨ̀ zɨ̀ a yi n-læ bè na mà na ghɨ fòyn Isìlæ̀. ³Wà ndû, wa fu tɨghef tɨ abayn sɨ̂ ŋweyn ìvɨ̀m nɨ̀ ɨ̀fwo ɨ yɨnɨ vzɨ̀ a wu n-ghɨ a mɨ̂ bàynɨ̀ a mɨ̂bàynɨ̀, baʼsɨ̂ nɨ̀ àkal ɨ lù-à. Wu n-fèʼtɨ̀ sɨ̂ và iwo zɨ̀ a yi n-gâyn sɨ̂ wàyn.” ⁴Wî Jèlobòwàm ɨ ni kɨ ta wù bè ɨ ndù a Shilò ɨ ndu zɨ a ndo nɨ̀ Àhijà. A nà ghɨ tì ma wùl lema meyn nà bu tòʼ yeyn wi ɨlwêʼ, ⁵ma Bôbo sɨ ghɨ ma wù feʼtɨ meyn sɨ̂ ŋweyn na wî Jèlobòwàm nɨn gvì sɨ yvɨ iwo kûm wâyn ŋweyn vzɨ̀ a wù n-koʼi. Bôbo nà sɨ ghɨ mà wù feʼtɨ meyn ìwo zɨ̀ a ka Àhijà be, wî Jèlobòwàm nɨn gvì-à nà kem kèʼ na yi n-ghɨ wul ɨ wûlù.

⁶Mɨtì Àhijà ɨ yvɨ ta wù n-zɨ gvî ɨchfɨ ndo ɨ bè sɨ̂ ŋweyn na, “Zɨ gvi mɨ n-kya na wà n-ghɨ wî Jèlobòwàm wà n-kem kêʼ na wà n-ghɨ wul ɨ wûlù bò ghà? Mɨ n-kelɨ saʼgha ibɨ sɨ̂ và. ⁷Wa ndû wa bè sɨ̂ Jèlobòwàm na tèyn nɨn ghɨ ìwo zɨ̀ a Bôbo ɨ Fɨyini fɨ Isìlæ fɨ bè sɨ̂ ŋweyn, “Mà tî choʼ fvɨ̀sɨ̀ và antêynɨ̀ nɨ̀ ghelɨ ɨ̀ lèm và sɨ a fòyn sɨ̂ ghelɨ Isìlæ̀ ɨ ghelɨ̀ ghem. ⁸Mà tî fsɨ ɨfôyn nâ wèyn sɨ̂ ghelɨ isas i ndo nɨ̀ Devìt ɨ̀ fù sɨ̂ và mɨtì wà na ghɨ wi ta wul ɨ̀ felɨnɨ nɨ̀ mà Devìt. Wu na nî àwo kì a mà bè na wù ni nì, nɨ̀ àtem a ŋweyn à jɨ̀m, nî àwo kì a kɨ n-ghɨ àtì-ati asɨ nɨ̀ mà. ⁹Wà ni meyn àwo kɨ befɨ chwô akî a ghelɨ ghɨ tisɨnɨ nô ghɨ̀ jɨ̀m tî nì jæ na wà gvi. Wà bêyn meyn jɨm sɨ̂ mà, ɨ nì ɨtôŋ wom yaf bòm mɨyini mzɨ̀ a wà fàytɨ nɨ̀ akasa nà koʼsɨ-à.

¹⁰Bòm ìwo nâ yèyni, mɨ nì ngeʼ sɨ̂ ìsas i ndo nɨ̀ Jèlobòwàm ɨ wâyn lûmnɨ̀ nɨn bu fì koʼ wi isas i ndo nâ ghàyn kèsa ɨvzɨ̂ a wù bu ghɨ ɨ bol, kèsa ɨvzɨ̂ a wù lèma meyn. Mɨ n-yès ìsas i ndo nɨ̀ và kɨ̀ ì jɨ̀m kɨ ta wùl ɨ̀ nî wu yès ìlɨŋ a nô wùl na bu kalɨ wi ateyn. ¹¹Nô mɨ wul ìsas i ndo nɨ̀ và ɨ̀kfà vzɨ̂ a wù kfɨ a ntèʼ, bɨsɨ nɨn kfɨlɨ ìgvɨyn i ŋweyn, ɨvzɨ̂ a wù se sɨ kfɨ ma wù fvɨ meyn sɨ a ntèʼ ìŋòʼingumi nɨn kfɨlɨ ìgvɨyn i ŋweyn. À bè mà, ɨ ma Bôbo Fɨyini.

¹²“Ahijà ɨ taŋi tèyn ɨ bè sɨ̂ wî Jèlobòwàm na, “Kasi wa kfâ ndu-à. Wà na kfâ chem ndû kɨ a ntèʼ têyn, a wâyn àteyn kfɨ. ¹³Wu n-kɨ-a a ghelɨ Isìlæ̀ nô ghɨ̀ jɨ̀m dzɨ ŋweyn ɨ̀ gvɨ̀mì ŋweyn. À ti kɨ̀ wul ɨ vzɨ̀ ɨ̀ mòʼ isas i ndo nɨ̀ Jèlobòwàm a ghɨ n-gvɨ̀mì bòm ta à n-ghɨ kɨ ŋweyn isas i ndo nâ ghàyn a wù tî nà kelɨ iwo zɨ̀ a yi nì na Bôbo, ɨ Fɨyini fɨ Isìlæ̀ na saŋlɨ-à.

¹⁴“BôBo nɨn lèm fòyn vzɨ̀ a ka wù saʼ ghelɨ Isìlæ̀, a ghɨ fòyn vzɨ̀ a ka wù mesi ɨfôyn vzɨ̀ a wu n-ghɨ sɨ̂ ghelɨ isas i ndo nɨ̀ Jèlobòwàm. Yi n-gàyn à, ma yi sɨ ghɨ sɨ gayn kɨ nô lvɨ̂yn. ¹⁵Bôbo nɨn fu ngeʼ sɨ̂ ghelɨ Isìlæ̀. Wu ni-à a àŋena fayn, ɨ fàyn nà neʼà ta lèŋa lèŋa antêynɨ̀ jvà. Wu n-gùf fvɨsɨ̀ àŋena sɨ a nse afô a wù n-læ fu sɨ̂ ghɨ̀bo àŋena ɨ̀ sàs àŋena màʼ ndù injɨyn i nvâ yufɨ̀lèt. Bôbo nɨn nì ì̀wo nâ yèynì bòm ta àŋena ti meyn bàʼlɨ̀ ɨ̀tôʼ sɨ nà koʼsɨ mɨ̀yìnì ɨ̀n lì ateyn, ɨtoŋ ŋweyn yaf. ¹⁶Wu n-visî ghelɨ Isìlæ̀ a àŋena le bòm àwo a bɨ-a kì a Jèlobòwàm nì. Awo a bɨ-a nɨ̀ ŋweyn a ni meyn ghelɨ Isìlæ̀ nî mbɨ.”

¹⁷Wu taŋi tì wî Jèlobòwàm ɨ lù ɨ kasi kfa a ntèʼ Tilzà. Ta wù kfa nà tom gvî nɨ̀ àvɨ-a ɨchfɨ ndo ghè a wayn ɨ koʼinɨ nɨn ghɨ ateyn, wayn àteyn ɨ kfɨ. ¹⁸Ghelɨ Isìlæ ɨ gvɨ̀mì ŋweyn ɨ dzɨ̀ ŋweyn kɨ̀ ighel ta Bôbo tî tàŋi tòynɨ a wûl ɨ̀ felɨnɨ nɨ̀ ŋweyn Àhijà ɨ nfèʼtɨ̀ ì ghaʼnɨ.

Jèlobòwàm ɨ kfɨ

¹⁹Nô mɨ ghà ta Jèlobòwàm nɨn læ ni nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyntɨ Isìlæ̀, ɨ tɨwoŋ tìtɨ̀ a wu n-læ tɨm nɨ̀ ìsaʼ zɨ̀ a wu n-læ saʼ. ²⁰Jelobòwàm nɨn læ saʼ ta fòyn sɨ a bèŋsɨ̀ mɨ̀vɨm ɨ̀n bò njvàsɨ̀ bò, ɨ kfɨ ghɨ gvɨ̀mì ŋweyn isè nɨ̀ ghɨ̀bo ŋweyn. Wâyn ŋweyn Nadàb ɨ dùʼì achɨ isas nɨ̀ bò ŋweyn.

Rehobòwàm ɨ koʼ achɨ a tɨ̂fòyn a Judà

²¹Lehobòwàm ɨ wâyn Sòlomòn nɨ̀n læ koʼ achɨ sɨ saʼ ta fòyn a Judà ma wù sɨ ghɨ bèŋ mɨ̀vɨm ɨ̀n kæ̀. Wu n-saʼ a Jèlusalèm a ghɨ ntèʼ zɨ̀ a Bôbo nɨn læ choʼnɨ antêynɨ̀ ntèʼsɨ Isìlæ̀ na ghɨ na koʼsɨ̂ ŋweyn ateyn, sɨ a bèŋ njvàsɨ̀ nsòmbo. Nà ŋweyn nà n-ghɨ Namà ma wù lù ilaʼ i Amòn.

²²Ghelɨ Judà ɨ nà nî kɨ àwo kì a kɨ n-ghɨ wi asɨ nɨ̀ Bôbo ɨ nì wu nyòʼsɨ̀ ɨ̀toŋ sɨ̂ àŋena chwô ta wu n-læ nyòʼsɨ sɨ̂ ghɨ̀bo àŋena. ²³A nà n-ghɨ ma àŋeŋa baʼlɨ meyn ɨ̀lwêʼ vzɨ̀ a ka ghɨ na koʼsɨ̂ ateyn a kfɨynsɨ, ɨ tomtɨ ngèʼsɨ̀ sɨ nà koʼsɨ Ashelìm ateyn a kfɨynsɨ ngaŋtɨnɨsɨ, ɨ lèm ɨ̀lwêʼ asas ɨnkàʼ afî a mɨ n-kelɨ tɨfvɨ sɨ nà koʼsɨ̂ ateyn, ²⁴Fî kinî ghɨ̀lûmnɨ̀ ilaʼ, àŋena nà nyɨŋì achɨ nɨ̀ ghɨkì asɨ a mɨyinini nɨ̀ àŋena, a ghɨ kɨmɨ àwo a nyelɨnɨ-a kì a ghelɨ tɨlaʼ nâ ghèyn tî nà ni-à jæ ta ka Bôbo saŋ fvɨ̀sɨ̀ àŋena ɨ̀ fu tɨlaʼ tɨ ateyn sɨ̀ ghelɨ Isìlæ̀.

²⁵Lehobòwàm ɨ se sɨ chi sɨ chem bèŋsɨ̀ tâyn, Shishàk ɨ fòyn Ijìb ɨ koʼ gvì a Jèlusalèm sɨ nu ŋweyn, ²⁶ɨ li lù nô mɨ nɨ̀ àfo ɨkwo à kà kî a kɨ tî nà ghɨ a ndo nɨ̀ Bôbo nɨ̀ ɨvzɨ̂ a wu tî nà ghɨ a ntoʼ. Wu n-li meyn ɨ lu kɨmɨ nɨ̀ ɨ̀fwo vzɨ̀ a ghɨ ni-à kɨ̂ŋtɨ ɨwuyn ateyn ɨlvɨ ta ghɨ n-tɨm iwoŋ a ghɨ ɨ̀fwo ma à n-læ faytɨ Sòlomòn nɨ̀ àsɨ ɨkwo. ²⁷Fòyn Lehobòwàm ɨ kasi faytɨ ɨ̀nkɨ̀ŋtɨ̀ ɨwùyn ɨlvɨ nɨ̀ àkasa bùlûnsɨ̀ ɨ fu sɨ̂ ghelɨ ghì a ghɨ nà n-chi ndô Bôbo nɨ ɨghî a ghɨ nà n-chi ntoʼ. ²⁸Fòyn nà n-se sɨ zɨ a ndo nɨ̀ Bôbo nô mɨ ɨlvɨ gha, nchìsɨ̀ ɨ lì ɨ̀nkɨ̀ŋtɨ̀ ɨ ndù ŋêyn fòyn, wù nî mèsì, àŋena kasi ndu lèm ɨ̀nkɨ̀ŋtɨ̀ ateyn a ndo ghè a ghɨ n-lêm ateyn.

²⁹Nô mɨ ghà ta Lehobòwàm nɨn læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ mɨ̀ tɨ̀fòyn tɨ Judà. ³⁰Lehobòwàm ŋêyn Jèlobòwàm nà n-lum ghɨ mɨlvɨ ɨ̀n jɨ̀m nû kɨ nu/tɨm kɨ ìwoŋ. ³¹Lehobòwàm ɨ kfɨ ghɨ gvɨ̀mì ŋweyn ŋêyn ghɨ̀bo ŋweyn a ntèʼ ntoʼ nɨ̀ Devìt. Nà ŋweyn nà n-ghɨ Namà ma wù lù a ilaʼ i Amòn. Abijà ɨ wâyn Lehobòwàm ɨ koʼ achɨ isas nɨ̀ bò ŋweyn.