1 Chronicles 27

Devìt ɨ lèm ìnôyn i sugèyʼsɨ̀ na yi na fèl a njoŋ a njoŋ

¹Akeynà nɨn ghɨ àzɨyn a ɨtu asas a ndo a Isìlæ̀ nɨ̀ àzɨyn a ɨtu sugèyʼsɨ̀ vzɨ̂ a wu n-tisɨ inôyn i sugèyʼsɨ nkam, nɨ ɨghî a ghɨ n-tisɨ inôyn ighɨ, nɨ akɨ ghelɨ ghɨli ghì a ghɨ nà n-felɨ̀ sɨ̂ fòyn, kɨnî ìnôyn i sugèyʼsɨ̀ zì a yi nà fêl a bêŋ kɨ̀ a njoŋ a njoŋ. Nômɨ ànôyn a sugèyʼsɨ̀ àka nà n-kelɨ sugèyʼsɨ̀ ateyn nkam mɨ̀vɨm ɨ̀mbò njvàsɨ̀ bò. ²Ɨghêyn nɨn ghɨ ɨ̀tu ɨ sugèyʼsɨ vzɨ̂ a wu nà n-tisɨ nô mɨ a joŋ ìkà, nômɨ àkà kelɨ sugèyʼsɨ̀ nkam mɨ̀vɨm ɨ̀mbò njvàsɨ̀ kæ̀ a ŋweyn isas isaʼ, Jàshobìm ɨ wâyn Zabiyèl nà n-tisɨ̂ ànôyn akɨ asɨ-a a njoŋ iyî àsɨ. ³Wu n-læ nà ghɨ wulɨ̀ ndo nɨ̀ Belès, tisɨ̂ sugèyʼsɨ̀ nô sɨ̀jɨ̀m. ⁴Dodadayì ɨ wâyn ɨ wulɨ̀ Ahò, nà n-tisɨ̂ ànôyn ali-a a ànkùmtɨ̀ a njoŋ. Ànkùmtɨ̀ a ŋweyn a nà n-ghɨ Mikilòt. ⁵Bènayà ɨ wâyn Jehoyadà ɨ ngàŋ ndo Fɨyini nà n-tisɨ̂ ànôyn ali-a a njoŋ ìlì. ⁶Bènayà nâwèyn nà n-ghɨ nôwul ìghoŋ ɨbemnɨ anteynɨ̀ nɨ̀ ghelɨ iwòŋ ghî mìvɨm ɨ̀ntal, to chwò àŋena kɨ ghɨ̀jɨ̀m. Wâyn ŋweynm ,a àti Àmizadàb n-ghɨ ànkùmtɨ a ŋweyn. ⁷Asahèl ɨ wâynà Juwàb nà n-tisâ ànoyn ali-a a njoŋ ìlì, ànkùmtɨ̀ a ŋweyn a ghɨ wâyn ŋweyn, ɨ Zèbàdayà. ⁸Shamhùt ɨ wulɨ̀ ndo nɨ̀ Izà nà n-tisɨ̂ ànoyn ali-a a njoŋ ìlì. ⁹Ilà, ɨ wâyn Ikèsh , ɨ wulɨ̀ Tekowàt nà n-tisɨ̂ kɨmɨ ànoyn ali-a a njoŋ ilì. ¹⁰Helèz, ɨ wulɨ̀ ndo nɨ̀ Belo vzɨ̀ a wu nà n-ghɨ wulɨ̀ ndo nɨ Efilèm tì, nà n-tisɨ̂ ànoyn ali-a a njoŋ ilì. ¹¹Sìbekayà, ma wu;fvɨ̀ a Hushà ɨ wulɨ̀ ndo nɨ̀ Zalà, nà n-tisâ ànoyn ali-a, a njoŋ ìlì. ¹²Àbiyesà, ma wù lù a Anatòt nà n-tisɨ̂ ànoyn ali-a a njoŋ ilì. ¹³Màhalayì ma wù fvɨ̀ a Netofatàt ɨ wulɨ̀ ndo nɨ̀ Zelà nà n-tisɨ̂ ànoyn ali-a a njoŋ ìlì. ¹⁴Bènayà, ma wù fvɨ̀ a Bilatòn ɨ wulɨ̀ ndo nɨ̀ Eflèm nà n-tisɨ̂ ànoyn ali-a a njoŋ ìlì. ¹⁵Heldayì, ma wù fvɨ̀ a Netofàt, ɨ wulɨ̀ ndo nɨ̀ Otnèl nà n-tisɨ̂ ànoyn agoʼsɨna a njoŋ ìgòʼsɨnɨ, a bêŋ. Anoyn a ŋweyna nà n-kelɨ sugèyʼsɨ̀ nkam mɨ̀vɨm ɨ̀mbò, njvàsɨ̀ kæ̀.

Devìt ɨ choʼ atu a Sugèyʼ nômɨ a isas i ndo ìkà

¹⁶Akeynà nɨn ghɨ àzɨyn a ɨtu sugèyʼsɨ̀ vzɨ̂ a ghɨ n-læ choʼtɨ nômɨ isas i ndo ìkà. Ghɨ n-choʼ meyn Èlizà ɨ wâyn Ziklì a ndo nɨ̀ Lubèn, ɨ choʼ Shefatiyà ɨ wâyn Makà a ndo nɨ̀ Simìyòn, ¹⁷nɨ̀ Hàshàbayà ɨ wâyn Kemwèl a ndo nɨ̀ Levì nɨ̀ Zadòk a ndo nɨ̀ Alòyn, ¹⁸nɨ̀ Èlihùnɨ wâyn nà Devìt a ndo nɨ̀ Judà nɨ̀ Omilì ɨ wâyn Mayikèl a ndo nɨ̀ Isakà, ¹⁹nɨ, Ìshmayà ɨ wâyn Obàdayà a ndo nɨ̀ Zebulùn ŋêyn Jelimòt ɨ wâyn Azlèl a ndo nɨ̀ Naftalì. ²⁰Ghɨ n-cho meyn kɨmɨ Hoshì ɨ wâyn Àzaliyà a ndo nɨ̀ Eflèm ŋêyn Juwèl ɨ wâyn Bèdayà abàs a ndo nɨ̀ Mànasè ali-a, ²¹nɨ̀ Idò ɨ wâyn Sàkàliyà abàs a ndo nɨ̀ Mànasè ali-a Gilèd ŋêyn Jasiyèl ɨ wâyn Abinà a ndo nɨ̀ Benjamìn, ²²nɨ̀ Àzalèl ɨ wâyn Jèlohìm a ndo nɨ̀ Dân. ɨgheyn nâ ghèyn nà n-ghɨ ghelɨ ghì a ghɨ nà n-choʼtɨ lem sɨ a ɨtu sugèyʼsɨ̀ asas a ndo a Isìlæ̀. ²³Devìt nɨn bu læ taŋ ghelɨ ghì a ghɨ nà ghɨ kɨ bèŋ mɨ̀vɨm ɨ̀mbò sɨ kàlì ibàm bòmta Bôbo Fɨyini nà n-ghɨ ma wù chfɨnɨ meyn na wù ni-à a ghelɨ Isìlæ̀ na dvɨ̀ kɨ ta mɨnjêyn a iyvɨ. ²⁴Juwàb ɨ wâyn Zèluyiyà nɨn læ meyn zɨ̀tɨ̀ sɨ taŋ ghelɨ mɨtì ɨ faŋ tɨ̀ taŋ tɨ̀ mèsì. Fɨyini fɨ nɨn fu meyn ngeʼ sɨ̂ ghelɨ Isilæ̀ bòm ìtaŋ ighêl nâ yèyni ghɨ faŋ tɨ̀ nyàʼtɨ akôyn ateyn a ŋwàʼlɨ̀ mɨ̀tɨtɨ̂ nɨ̀ fòyn.

Devìt ɨ choʼtɨ lèm ghelɨ ghɨtisɨnɨ kɨ̀ a ɨlweŋ lweŋ

²⁵Àzimavèt ɨ wâyn Adìyèl nà n-fêl a ndosɨ afî a ghɨ nà n-lêm ɨfwo ateyn a n-toʼ. Jonatàn ɨ wâyn Uziyà, ɨ fêl a ndosɨ afî a ghɨ n-lêm ɨtwo ateyn a ntèʼ sɨ lælɨnɨsɨ nɨ sɨ ghaʼlɨnɨsɨ nɨ̀ ɨ̀lwêʼ vzɨ̀ a ghɨ nkoʼ duʼì ateyn ghɨ nà ki ɨ̀lwêʼ. ²⁶Èlizà ɨ wâyn Kelùb nà n-tisɨ̂ ghelɨ ghì a ghɨ n-fêl gveynsɨ. ²⁷Shimèyi ɨ wul ɨ̀ Lamàt ɨ fêl a gvêynsɨ̀. Zabdi ɨ wulɨ̀ Shît ɨ faytɨ̂ mɨlûʼ nɨ̀ gɨ̀lêbsɨ̀, wê a nsàlsɨ mɨ̂lùʼ. ²⁸Bal Hanàn ɨ wulɨ̀ Gedà ɨ felɨ̀ a ɨnkàʼ mɨ̀ Olìfsɨ̀ nɨ mɨ̂ Sikamò a kfɨynsɨ, abàs ghè a ichfɨ iyvɨ-i nɨn sœ ateyn. Juwàsh ɨ faytɨ̂ mɨ̀vɨl mɨ̀ Olìfsɨ̀. ²⁹Shitlæ̀ ɨ wulɨ̀ Shalòn ɨ kinî nyam sisɨ̀ a sɨ n-ghɨ a mɨ̂fòŋlɨ. ³⁰Obìl ɨ wulɨ̀ ndo nɨ̀ Ishmèl ɨ kinî kàmêlsɨ̀. Jèdeyà ɨ wulɨ̀ Melonòt ɨ kinî mɨ̀njàki. ³¹Jazìz ɨ wulɨ̀ Haglì ɨ chî Bzisɨ.

A nà n-ghɨ ghelɨ nâ ghèyn nô ghɨ̀jɨ̀m a ghɨ nà n-tôʼnɨ̀ nɨ̀ ɨ̀fwo Devìt ɨ̀. ³²Jonatàn ɨ lùmsɨ̂ nà Devìt, nà n-ghɨ wulɨ vzɨ̀ a wù ntebtɨ ghelɨ, tofa, fî ghɨ ndyèynsɨ̀ ìsaʼ. Jehiyèl ɨ wâyn Hakmonì nà n-yeʼî woyn Devìt. ³³Àhitofèl nà n-ghɨ wul vzɨ̀ a wù n-tebtɨ Devìt. Hushayì ɨ wulɨ̀ Akì, nà n-ghɨ sûyn fòyn. ³⁴Àhitofèl nɨn læ kfɨ, Jèhoyadà ɨ wâyn Bènayà ɨ yɨ ndo ŋweyn, ɨ læ kfɨ Àbiyatà ɨ lì àlêʼ a ŋweyn.

Jowàb nɨn læ nà ghɨ àtu a sugèyʼ sìsɨ̀ a sɨ nà n-chi fòyn.