1 Chronicles 28

Devìt ɨ taŋi ɨ gòʼsɨ̀ sɨ̂ ghelɨ Isìlæ̀ ɨ lèm Solomùn achɨ

¹Devìt nɨn læ meyn yvɨ̀ŋtɨ̀ ghelɨ ghɨfelɨnɨ a Isìlæ̀ nô ghɨ̀jɨ̀m a Jèlusalèm. Ghelɨ ateyn nà n-ghɨ ɨ̀tu asas a ndo nɨ̀ ɨ̀tu inòyni sugèyʼsɨ̀ nɨ̀ ɨ̀tu ghêl ghì a ghɨ nà felɨ̀ sɨ̂ fòyn, nɨ̀ ɨtu sugèyʼsɨ̀ vzɨ̂ a wu nà n-tisɨ inôyni sugèyʼsɨ̀ nkam nɨ ɨvzɨ̂ a wu nà n-tisɨ inôyn ɨvɨ nɨ̀ ghelɨ ghì a ghɨ nà n-kini ɨfwo fòyn nô ɨ̀jɨ̀m, nɨ ɨghî a ghɨ nà kini nyamsɨ nɨ̀ wowyn ŋweyn, nɨ̀ ghelɨ ghì a ghɨ nà n-felɨ̀ a ntoʼ, baʼsɨ̂ nɨ̀ ghelɨ ighòŋ nô ghɨ̀jɨ̀m.

²Devìt nɨn lali timi iyvɨ ɨ bè sɨ̂ àŋena na, “Yì yvɨtɨ a ghelɨ ghem, ma ti meyn nà kfâʼtɨ̀ sɨ bàʼlɨ ndo na ghɨ lem àntayntayn a mɨ̂kàyn nɨ̀ Bôbo Fɨyini ateyn; alêʼ kì aka Bôbo na tomtɨ̂ ɨ̀vɨ ŋweyn ateyn. Mà sɨ ghɨ ma ma ti meyn nì ìbaʼtɨ sɨ bàʼlɨ̀ ndo àteyn. ³Mɨtì Bôbo tî bè sɨ̂ mà na, ‘Wa n-bâʼlɨ̀ wì ndo yem bòm ta wà zuetɨ meyn ghelɨ. ⁴Nô mɨ ta Fɨyini fɨ Isìllæ̀ fɨ nɨn læ choʼ ma a isas i ndo nɨ̀ ghès nô ìjɨ̀m, ghesɨ̀ woyn ghem na ghesɨ saʼ Isìlæ̀ kɨ̀ samoʼ. Wu n-læ choʼ Judà sɨ atu isas i ndo ɨ gvi a ndo nɨ̀ ghès ɨ gvì antêynɨ̀ woyn nɨ̀ bò wom, ɨ choʼ ma na mà ghɨ fòyn a atu nɨ̀ ghelɨ Isìlæ̀ nô ghɨ̀jɨ̀m. ⁵Antêynɨ̀ woyn nɨ̀ mà ghi a wù fu ghɨ dvɨ̂ kɨ tèyn, wu choʼ wâyn lwom Solomùn na wù duʼi achi nâ ghàyn nà saʼ ghelɨ Fɨyini. ⁶Bôbo tî bè sɨ̂ mà na, ‘A n-bâʼlɨ̀ wâyn vâ bàʼlɨ̀ ndo yem bòm ta ma choʼ meyn ŋweyn sɨ a ma wâyn, nà ghɨ bæ̀ sɨ̂ ŋweyn. ⁷Mɨ n-ni-à a ɨfôyn ɨŋweyn faŋ kɨ̀ samoʼ ɨlvɨ ta wù faŋ nà lêm kɨ lem tɨsaʼ ɨ̀temtɨ kɨ̀ ta wù lêm lvɨ̂yn.’ ⁸Ma na sɨ bê sɨ̂ zɨ̂ lvɨ̂yn asɨ nɨ̀ ghelɨ Isìlæ̀ nô ghɨ̀jɨ̀m, ma àti ghelɨ Fɨyini, nô nɨ̀ Fɨyini fɨ na yì momsɨ kɨ̀ dzɨ sɨ̀jɨ̀m sɨ lem tɨsaʼ tɨ Bôbo Fɨyini fifɨ nô tɨ̀jɨ̀m ta ka yì faŋ nà chî kɨ ilaʼ ijuŋì afêyn, ɨ̀ læ̀ fù sɨ̂ woyn ghi , a àŋena faŋ ateyn kɨ̀ sɨ amoʼ. ⁹Sɨ̂ và A wayn wom, Solomùm, yeʼtɨ kɨ iwom nɨ̀ Fɨ̀yini fifɨ̂ a bò vâ nɨ̀n koʼsɨ, ɨ fèl sɨ̂ ɨ̀feynfɨ nɨ̀ ìkoŋì, nɨ̀ àtem àkya àjɨ̀mà bòm ta wù n-yeyn nô mɨ àtem a nda, kya nô mɨ ìkfâtɨ̀ i nda, nɨ̀ àwo kì a wul àteyn nɨŋ kɨŋ. Wà kæ sɨ kɨŋ ŋweyn a wà yeyn ŋweyn, ɨ̀ kàsi sɨ a ŋweyn ibàm a wù maʼi vâ kɨ̀ sɨ amoʼ. ¹⁰Wa kya lyɨ̂n na Bôbo Fɨyini choʼ meyn và na wà baʼlɨ ndô ŋweyn. Wa kelɨ àtem ato, ɨ nì ìfel ateyn. ¹¹Devìt nɨn taŋi tî ɨ dyèyn ìbaʼtɨ xɨ̀ a wù nì kûm àbâʼlɨ̀ a ndo Fɨyini nâ kì nô àjɨ̀m , baʼsɨ̂ nɨ̀ àlêʼ kì a ka fòyn na zɨ̂ fêl ateyn, nɨ̀ lûm sìsɨ̀ a ghɨ na chi ateyn, nɨ ɨsîsɨ̀ a ghɨ na lèm ɨ̀fwo ateyn, nɨ̀ lûmsɨ iyvɨsɨ, nɨ̀ àlêʼ kì a kɨ layn ngòʼsɨ̀. ¹²Wu n-læ meyn dyèyn ɨ̀baʼtɨ zɨ̀ a ayvɨs aŋwaʼna fu a ŋweyni ikfàʼtɨ̀ na wù baʼlɨ tɨwe tɨ ndô Fɨyini, nɨ̀ lûm sìsɨ̀ a sɨ n-ghɨ a mbæ̀sɨ tɨwè nâ ghè nɨ̀ lûm sisɨ̀ a ghɨ n-lêm ɨfwo ɨ ndô Fɨyini ateyn nɨ̀ ɨsîsɨ̀ a ghɨ n-fu ifu sɨ̂ Fɨyini fɨ ateyn. ¹³Wu n-feʼtɨ meyn dzɨ zɨ̀ a ka Solomùn gwotɨ afyâʼ ateyn sɨ̂ ngàŋ sɨ ndô Fɨyini ŋèyn ghelɨ ndo nɨ̀ Levì ta ka àŋena na kya sɨ nì ifêl nô ìjɨ̀m a ndô Fɨyini, fî kya sɨ tòʼnɨ nɨ̀ ɨ̀fwo vzɨ̀ nô ɨ̀jɨ̀m a ghɨ n-felɨ nɨ̀ ɨ̀ŋweyn ateyn a ndô Fɨyini. ¹⁴Wu n-feʼtɨ meyn àkôyn aso ɨkwo abaŋna kì a ka ghɨ feʼ, ɨ̀ fàytɨ ɨ̀fwo ɨfelɨnɨ ateyn, kɨ̀ mɨ nɨ̀ àkôyn aso ɨkwo ɨ fɨfâ kì a ka ghɨ feʼ, fàytɨ ɨ̀fwo ɨ felɨnɨ ateyn sɨ nà ni nô mɨ ìnki ifèl ìkà nɨ̀ ɨfwo ateyn. ¹⁵Wu n-feʼtɨ meyn àkôyn aso ɨkwo abaŋna kì a ka ghɨ feʼ fàytɨ lâmsɨ nɨ̀ ɨ̀fwo vzɨ̀ a ghɨ n-tomtɨ làmsɨ̀ atu àteyn kɨ̀mɨ nɨ̀ àkôyn aso ɨkwo ɨ fɨfâ kì a ka ghɨ feʼ, fàytɨ lâmsɨ̀ ateyn nɨ̀ ɨ̀fwo vzɨ̀ a ka sɨ na ti atu àteyn, kɨ̀ ta ifêl i lâmsɨ̀ ateynsɨ nà dyêyn. ¹⁶Wu n-feʼtɨ meyn àkoyn aso abaŋna kì a ka ghɨ feʼ, fàytɨ àbaŋ, nà lêm àbayn ateyn asɨ nɨ̀ Fɨyini fɨ nɨ̀ àkoyn aso ɨkwo a fɨfâ kì a ka ghɨ feʼ, ɨ̀ fàtɨ ɨ̀bwaŋ ɨlvi ateyn, ¹⁷nɨ̀ àkôyn aso ɨkwo a baŋna ajûŋ kì a ka ghɨ feʼ ɨ̀ fàytɨ ɨ̀ntwàsɨ̀ vzɨ̂ a ka ghɨ na chuʼ njwò ateyn, nɨ̀ ɨ̀kfaŋ alèl-alel vzɨ̀ a ka ghɨ na wê mɨ̀luŋ mɨ̀ nyamsɨ ateyn musì-à, nɨ̀ ntòynsɨ̀ nɨ̀ ɨ̀kfaŋ, nɨ̀ àkôyn aso ɨkwo a fɨfâ kì a ka ghɨ feʼ ɨ̀ fàytɨ ɨ̀kfaŋ ateyn, ¹⁸nɨ̀ àkôyn aso ɨkwo abaŋnɨ kì a ghɨ n-nyoʼ fɨsɨ̀ ileŋ ateyn, nɨ akî a ka ghɨ feʼ ɨ̀ fàytɨ àbaŋ nà nyôʼ ìleŋ ateyn. Wu n-feʼtɨ meyn kɨmɨ dzɨ zɨ̀ a ka ghɨ faytɨ chelùbîmsɨ̀ ateyn atû àntàyntayn a mɨ̂kàyn ma sɨ yasɨ meyn tɨ̀wô, nɨ̀ àso ɨkwo abaŋnɨ-a. ¹⁹Devìt nɨn be meyn na, “Ma nyaʼ meyn àwo nâ kèynà nô àjɨ̀m bòm ta Bôbo tî gàmtɨ̀ mà ɨ̀ fèʼtɨ̀ nô mɨ fɨ̀ghà ta mà tî nà kelɨ sɨ nà kya kùm ìbaʼtɨ nâ yèynì.” ²⁰Devìt nɨn be meyn kɨmɨ sɨ̂ Solomùn na, “Wà kelɨ àtem ato-a, nɨ̀ ànkàyntà sɨ ni ifêl ateyn. Ka wa n-fàyn àfo, kèsa sɨ boli bòm ta Bôbo Fɨyini fîfɨ̀ a mɨ nkoʼsɨ nɨn ghɨ zɨ̂ ŋweyn amoʼ. Wu nì fesɨ̂ wì vâ, nì faŋtɨ̀ beyn jɨm sɨ̂ và nô sɨ chem ta ka wà ni mèsì ìfêl i ndo nɨ̀ ŋweyn. ²¹Ghɨ sɨ ghɨ ma ghɨ gwotɨ meyn ngàŋsɨ ndô Fɨyini ŋêyn ghelɨ ndo nɨ̀ Levì, ɨ̀ lèm kɨ̀ inòyn inòyn, àŋena na gvɨ̂tɨ̀ sɨ ni nô mɨ ìfêl ìkà a ndô Fɨyini. Nô mɨ ndà vzɨ̂ a wù n-koŋ sɨ fèl, kya sɨ ni nô mɨ inkì ifèl ìkà, ɨ nì gâmtɨ̀ và, a wà ni ifêl ateyn nô ìjɨ̀m. Ghelɨ ghɨtisɨnɨ ɨ nì nî nô mɨ ghà ta wà bè sɨ̂ àŋena.