1 Chronicles 26

Ghelɨ ghì a ghɨ nà n-chi achfɨ̂ a Mbàyn ndô Fɨyini

¹Iyeynì nɨn ghɨ ìnoyn i ghêlɨ zɨ̀ a yi nà n-chi ndô Fɨyini, ma ghɨ fvɨ̀ kɨ̀ a ndo nɨ̀ Mèshelèmayà, ɨ wâyn Kolè vzɨ̀ a wu nà n-ghɨ wâyn Asàf, ɨ̂lvɨ̀, nɨn fvɨ̀ a ndo nɨ̀ Kolè. ²Wu nà n-kelɨ woyn nsòmbo, wayn ɨlwema ghɨ Sàkàliyà, ghɨli ghɨ Zèbàdayà nɨ̀ Jatniyèl, ³nɨ̀ Elàm nɨ̀ Jèhohanàn nɨ̀ Èliyèhonayì. ⁴Ghelɨ nɨn fvɨ meyn kɨmɨ a ndo nɨ̀ Obed-Edòm vzɨ̀ a Fɨyini fɨ nɨn læ boysɨ nɨ̀ woyn nfama tî, ɨwu asɨ ɨ ghɨ Shèmayà, ànkùmtɨ̀ a ghɨ Jehozabàd, ghɨli ghɨ Juwàʼ nɨ̀ Sakà nɨ̀ Nètanèl nɨ̀ Amiyèl nɨ̀ Isakà nɨ Bèwuletayì. ⁵Aiyèl nɨn læ nà ghɨ wayn ntufa, nsòmbo ɨ ghɨ Isakà, Buletây ɨ ghɨ nfama. Fɨyini fɨ nà n-ghɨ ma fɨ boysɨ meyn Obed-Edòm. ⁶Wâyn ɨlwema nɨ̀ Obed-Edòm ɨ Shemayà , nà n-kelɨ kɨmɨ woyn a ghɨ ghelɨ ghɨtisɨnɨ a àŋena isas i ndo bòm ta àŋena nà n-to àdyaʼ. ⁷Woyn Shèmayà nâ n-ghɨ Otinì nɨ̀ Lefayèl nɨ̀ Obèd ŋêyn Èlizabàt. Woyn ŋweyn ghɨli ghɨ Èliyù nɨ̀ Sèmàkayà a ghɨ kɨmɨ ghelɨ, kelɨ àdyaʼ. ⁸Ghelɨ ndo nɨ Obed-Edòm nâ ghèyn têyn nà n-chɨ̂yntɨ̀ ghɨ njvàsɨ̀bò a mɨ̀vɨm ntufa, nô ghɨ̀j᷆ɨ̀m. Àŋena nɨ̀ woyn àŋena nà n-ghɨ ghelɨ, kelɨ to àdyaʼ, kfeynɨ̂ sɨ ni ifêl. ⁹Meshelemiyà nà n-chɨ̂yntɨ̀ kelɨ ghelɨ njvàsɨ̀ nfama, nô ghɨ̀jɨ̀m ɨ to àdyaʼ a ghɨ woyn ŋweyn nɨ̀ ghelɨ ndo nɨ̀ àŋena. ^10-11Ghelɨ Hosà , ɨ wulɨ̀ Melalì vzɨ̀ nà n-chɨ̂yntɨ̀ ghɨ njvàsɨ̀ tal nô ghɨ̀jɨ̀m a ghɨ woyn ŋweyn nɨ̀ ghelɨ ndo nɨ̀ àŋena. Wâyn Hosà ɨwû àsɨ nà n-ghɨ Shiminì nô mɨ ta à n-læ lem bò ŋweyn na wù na ghɨ wayn asɨ, wu ghɨ wi wayn àsɨ. Hilkayà nà n-ghɨ ànkùmtɨ̀ a wayn woyn ghɨli ghɨ Tàbaliyà ŋêyn Sàkàliyà. ¹²Ghɨ n-læ gwòsɨ inôyn i ghêl ghì a ghɨ n-chi ndo Fɨyini, ɨ fu ifêl sɨ̂ àŋena kɨ̀ ta ghɨ n-læ fu sɨ̂ ghelɨ ndo nɨ̀ àŋena ghɨli, toynɨ̂ a ghelɨ ghɨtisɨnɨ nɨ̀ àŋena. ¹³Ghɨ nà ndû nô mɨ ɨchfɨ mbàyn ɨ̀kfà ghɨ boŋtɨ àzɨyn kɨ̀ ta asas a ndo nɨ̀ n-ghɨ sɨ yeyn na à na fèl ìsas i ndo ìkà afu a. Ghɨ nà n-boŋtɨ̂ kɨ ghɨ̀jɨ̀m a ndo, ɨ woynda nɨ̀ ghɨ̀lema. ¹⁴Izɨyn i Shèlemayà nɨn fvɨ meyn a Ichfɨ mbàyn afî a wu n-ghɨ abàs ghè a ichfɨ̂ iyvɨ-i nɨn sal ateyn. Izɨyn i wâyn ŋweyn Sàkaliyà vzɨ̀ a wu nà n-kelɨ itof , tebtɨ̂ ghelɨ, fî fvɨ ɨchfɨ mbàyn ghè a wu nà n-ghɨ a abàs ikuè. ¹⁵Izɨyn i Obed-Edòm nɨn fvɨ meyn a ɨchfɨ mbàyn ghè a wu nà n-ghɨ abàs itsɨyn, azɨyn a woyn nchì ndo zɨ̀ a ghɨ n-lêm ɨfwo ateyn. ¹⁶Azɨyn a Shubìm ŋêyn Hosà ɨ fvɨ̀ na àŋena na chî ɨ̀chfɨ mbàyn vzɨ̀ a wu n-ghɨ abàs ghè a ɨchfɨ̂ iyvɨ-i nɨn sal ateyn nɨ̀ ɨ̀chfɨ ɓàyn Shalekèt, a dzɨ afɨ a yì n0chwô abàs ikuè. Wùl nà n-lam chwò wi ɨ̀lvì a nchì. ¹⁷A nà n-ghɨ nô mɨ àchi àkà ghelɨ chî ɨchfɨ mbàyn vzɨ̀ a wu n-ghɨ abàs ghè a ɨchfɨ iyvɨ-i nɨn sal ateyn ntufa. chî ɨvzɨ̂ abàs ikuè ghɨ̀kæ̀, chî ɨwu abàs itsɨyn ghɨ̀kæ̀, a ghɨ nô mɨ ɨlvɨ gha ghelɨ chî ndo zɨ̀ a ghɨ n-lêm ɨfwo ateyn ghɨ̀bò. ¹⁸A nà n-ghɨ abàs abe a ndo Fɨyini ghè a ɨchfɨ iyvɨ-i nɨn sal ateyn, nchìsɨ ghɨ a dzɨ sɨ̀ kæ̀ ghɨ sɨ̀bò a ɨwe ɨ ndo Fɨyini. ¹⁹Iyeyn nâ yèyni nà n-ghɨ ìnoyn i ghelɨ ghì a ghɨ n-chî ndô Fɨyini, a ghɨ ghelɨ ndo nɨ̀ Kolà ŋêyn Melalì.

Ghelɨ ghì a ghɨ nà n-kini ɨfwo

²⁰Ghelɨ ndo nɨ̀ àŋena ghɨli nà n-kini lûm zɨ̀ a ghɨ n-lem ɨfwo ateyn a ndo Fɨyini nɨ ɨzɨ̂ a ghɨ nà n-lêm tɨfu tìtɨ̀ a ghɨ fu sɨ̂ Fɨyini fɨ ateyn. ^21-22Ghelɨ ndo nɨ̀ Geshòn ɨ woyn Ladàn ghì a a nà ghɨ ɨtu asas a ndo nɨ̀ Ladàn, nà n-kinî lû zɨ̀ a ghɨ n-lêm ɨfwo ateyn a ndo Fɨyini. A nà n-ghɨ Jehiyelì ŋêyn woyn ŋweyn, ma àti Zetàn ŋêyn wâyn-nà ŋweyn, Juwèl. ²³Ghelɨ ndo nɨ̀ Amlàm nɨ ighɨ Izà nɨ ɨghɨ Heblòn nɨ̀ ɨghɨ Uziyèl nà n-kinî lûm sìsɨ̀ a ghɨ n-lêm ɨfwo ateyn. ²⁴A nà n-tisɨ̂ Shubèl awo a lûm sisɨ̀ a ghɨ n-lêm ɨfwo ateyn. Wù nà n-ghɨ wulɨ ndo nɨ̀ Geshòm ɨ wâyn Mosìs. ²⁵Woyn-nà ŋweyn ghɨli, ma àti woyn Èlizà nɨ̀ Jèshayà ɨ woyn Lèhabiyà nɨ̀ Jolàm ɨ wâyn Jèshayà nɨ̀ Ziklì ɨ wâyn Jolàm nɨ̀ Shelomìt ɨ wâyn Ziklì. ²⁶Shelomìt ŋêyn ghelɨ ndo nɨ̀ ŋweyn nà n-kinî lûm sisɨ̀ a ghɨ n-lêm ɨfwo ateyn ta fòyn Devìt fu sɨ̂ Fɨyini fɨ ŋêyn ɨ̀tu asas a ndo nɨ̀ ɨ̀tu sugeyʼsɨ̀ ghi a ghɨ nà ghɨ anòyn nkam, nɨ ighɨ̂ a ghɨ nà n-ghɨ anòyn ɨvɨ, kɨ̀mɨ nɨ̀ ɨ̀tu sugèyʼsɨ ɨlvi. ²⁷Àŋena nɨn fu meyn ɨ̀fwo ɨlvi vzɨ̀ a ghɨ n-læ ghaytɨ fsɨ a ɨtwâ ighòŋ na ghɨ faytɨ ndô Fɨyini nɨ̀ ɨ̀ŋweyn. ²⁸Shelomìt ŋêyn ghelɨ ndo nɨ̀ ŋweyn nà n-tôʼnɨ̀ nô nɨ̀ ɨ̀fwo vzɨ̀ ɨ̀jɨ̀m a ghɨ fu sɨ̂ Fɨyini fɨ, baʼsɨ̂ nɨ̀ ɨvzɨ̂ nô ɨ̀jɨ̀m a Samuwèl, ɨ fèʼtɨ̀ Fɨyini nɨn læ fu ŋêyn Sôl, ɨ wâyn Kîsh nɨ̀ Abnà, ɨ wâyn Nê nɨ̀ Juwàb ɨ wâyn Zèluyà. ²⁹Ghɨ n-choʼ meyn Kènànayà ŋêyn woyn ŋweyn, nɨ ghelɨ ndo nɨ̀ Izà na àŋena na ghɨ ghelɨ ghɨtisɨnɨ nɨ̀ ghɨsaʼnɨ a Isìlæ̀, a ghɨ wi a ndô Fɨyini. ³⁰A nà n-ghɨ a ndo nɨ̀ Heblòn ghɨ choʼ Hàshabiyà ŋêyn ghelɨ ndo nɨ̀ ŋweyn àŋena chɨ̂yntɨ̀ ghɨ ghelɨ ighɨ nsòmbo, kelɨ àdyà, na àŋena na nî ìfêl i Fɨyini nɨ̀ iyi fòynì abàs a jvâ Jodàn ghè a ɨchfɨ̂ iyvɨ-i nɨn sœ ateyn. ³¹Jèhiya;nà n-ghɨ àtu a isas i ndo nɨ̀ Heblòn kɨ̀ ighel ta ŋwàʼlɨ̀ àzɨyn a ghɨbo àŋena nà n-dyêyn. A nà n-ghɨ a bêŋ afî a Devìt luyn bèŋsɨ̀ mɨ̀vɨm ɨ̀nkæ̀ achɨ, ghɨ kɨŋ a ŋwàʼlɨ̀ àzɨ̀yn nâ ghàyn ɨ yeyn na ghelɨ ndo nɨ̀ Heblòn ghɨli nɨn chî a ntèʼ Jazà a Gilèd to àdyà. ³²Fòyn Devìt nɨn choʼtɨ meyn ghelɨ ndo nɨ̀ Jeliyà mɨ̀vɨm ɨ̀mbò njvàsɨ̀ nsòmbo, àŋena to àdyaʼ ghɨ ɨ̀tu asas a ndo, ɨ lèm na ghɨ ma tisɨ̂ ghelɨ ndo nɨ̀ Lubèn nɨ ɨghɨ ndo nɨ̀ Gâd nɨ̀ àbas a ndo nɨ̀ Mànasè ali-a. Àŋena nà n-ki nô mɨ ghà ta yi n-kûm Fɨyini fî kûm fòyn.