1 Chronicles 21

Devìt ɨ taŋ ghɨ̀lûmnɨ ghì a ghɨ kfèyn meyn sɨ nù

¹A n-læ meyn nà ghɨ achi a li-a, dêbɨ̀ ɨ nà kɨŋ sɨ làysɨ̀ inû a Isilæ̀, ɨ nì na Devìt taŋ ghelɨ Isìlæ̀ ghì a ghɨ kàʼ a ghɨ nu. ²Devìt ɨ bè sɨ̂ Juwàb ŋêyn ɨ̀tu sugèyʼsɨ na, “Yì ndu tàŋ ghɨ̀lumnɨ̀ Isìlæ̀, kɨ̀ sɨ zɨ̀tɨ̀ a Beshebà sɨ ndù sɨ chem a Dân, kàsi gvì fèʼtɨ̀ sɨ̂ mà na àŋena nɨn ghɨ ghɨ̀sèʼa.̀” ³Mɨtì Juwàb ɨ bè sɨ̂ ŋweyn na, “Mɨ n-jêm na Bôbo Fɨyini kfeynsɨ ghelɨ ighoŋ nɨ̀ ŋweyn ghɨ na jvɨ̀ chwo ta ghɨ tî nà ghɨ nô sɨ chem aghayn ɨvɨ. Ba gelɨ nâ ghèyn nô ghɨ̀jɨ̀m tèyn nɨ̀n kelɨ kɨ và a mbæ̀? Bòm ghà ta wà n-kɨŋ sɨ ni ìnkì iwo nâ yèynì sɨ̂ ghelɨ ghya na àŋena zɨ a mbɨ a mbæ̀?” ⁴Mɨtì, iwo zɨ̀ a fòyn nɨn læ nà sɨ ghɨ ma wù be meyn nà ghɨ kɨ izɨ-ì a ka yi na ghɨ. Juwàb ɨ lù lvɨ̂yn, ɨ jèl ɨ taŋ ghelɨ a Isìlæ̀ kɨ ghɨ̀jɨ̀m, ɨ kasi kfa a Jelusalèm. ⁵Wu n-læ meyn kasi kfa ɨ fèʼtɨ̀ àkoyn a ghelɨ ghì a wù tàŋ sɨ̂ Devìt; Ghɨ̀lumnɨ̀ ghì a wu n-læ taŋ a Isìlæ̀ nà n-chɨ̂yntɨ̀ ghɨ molàyn nɨ̀ ghɨ̀lumnɨ̀ nkam ɨvɨ, ghɨ a Judà nkam ighɨ ìkæ̀ nɨ̀ ghelɨ nkam mɨ̀vɨm nsòmbo. ⁶Juwàb nɨn bu læ taŋ woyn Levì baʼsɨ̂ nɨ̀ woyn Benjamìn bòmta wù nà n-kôŋ wi no mɨ iwo nâ zɨ̀-ì a fòyn nɨn læ bè na ghɨ ni tî. ⁷Bôbo Fɨyini nɨn læ meyn fu ngeʼ sɨ̂ ghelɨ Isilæ̀ bòm ta wu n-bu læ nà kôŋ ìwo nâ zɨ̀ a fòyn Devìt nɨn læ nà ni tî.

Devìt ɨ dzɨ̀ ìkumi iwùyn sɨ̂ Bôbo Fɨyini

⁸Devìt nɨn læ meyn bè sɨ̂ Fɨyini fɨ na, “Ma ni meyn mbɨ ibemnɨ bòm ìwo yèynì a mà mòm têyn. Mɨ n-chwotɨ na wà lesɨ fù ma, ɨ wul ɨ̀fèlɨnɨ nɨ̀ và. Ma ni meyn kɨ nô ìwo-i àngù.” ⁹Bôbo Fɨyini ɨ bè sɨ̂ Gàd, ɨ fèʼtɨ̀ ìghàgnɨ zɨ̀ a yi nà n-felɨ sɨ̂ Devìt na, ¹⁰“Ndu bè sɨ̂ Devìt na Bôbo Fɨyini nɨn bê na, ‘Mɨ n-fu àwo àtal sɨ̂ và; choʼ ìmòʼ zɨ-ì a ka mà ni sɨ̂ và.’” ¹¹Gâd ɨ ndu yeyn Devìt ɨ bè sɨ̂ ŋweyn na, “Bôbo Fɨyini bè na wà choʼ iwo zɨ̀ a wà n-kôŋ atêynɨ àwo afêyn àtal tèyn; ¹²na wù ni jèŋ ku vâ sɨ a bèŋsɨ̀ tal ma? Wù ni mbàynɨ̀ shyasɨ to chwò và, ɨ̀ nyɨŋ a wa ibàm sɨ a njoŋ sɨ̀tal ma? Wù tum ikoʼi a wa ilaʼ a Isilæ̀, baʼsɨ̂ nɨ̀ nchì ŋweyn sɨ a mɨchi ɨ̀ntal ɨ̀ zuètɨ ghelɨ sɨ a Isìlæ̀ kɨ ghɨ̀jɨ̀m a? Mà kasi ndù bè na gha sɨ̂ Bôbo vzɨ̀ a wù tùm ma a?” ¹³Devìt ɨ bè sɨ̂ Gâd na, “Mɨ n-ghɨ a ngeʼ ibemnɨ. Mɨ n-kôŋ na à fu kɨ̀ Bôbo Fɨyini fù ngeʼ sɨ̂ mà, a ghɨ wi wulɨ̀ mɨ̀sòŋ, bòmta Bôbo Fɨyini nɨ̀n keli ìkoynsɨ isuyn nô sɨ a ŋaŋ.” ¹⁴Bòbo Fɨyini ɨ tum ikoʼi ili a Isilæ̀, yi zuetɨ ghelɨ Isìlæ̀ nkam mɨ̀vɨm nsòmb, ¹⁵ɨ fi tum nchì ŋweyn na yì zuetɨ ghelɨ a Jèlusalèm. Mɨtì a nà ghɨ ta yì gvì ɨ̀ zɨ̀tɨ̀ sɨ zuetɨ, Fɨyini fɨ ɨ kasi choʼnɨ sɨ na yi n-bu zuetɨ wì ghelɨ ateyn, ɨ kæ sɨ be sɨ̂ nchì zɨ̀ a yì nà zuetɨ ghelɨ na, “Ghelɨ ghì a wà zuètɨ kfeyn meyn, ka fì zuètɨ.” Nchì àteyn nà n-ti alèʼ ghè a Àlunà, ɨ wulɨ̀ Jebùs vzɨ̀ nɨn læ nà chyeʼ asaŋ a ŋweyn ateyn tì. ¹⁶Devìt ɨ sesɨ ki sɨ koʼsɨ, ɨ yeyn nchì àteyn a iyvɨ nɨ̀ fɨnyù fɨ awu, gvɨ̂tɨ̀ sɨ suʼi a Jèlusalèm. Devìt ɨ yeyn tî ŋêyn chyeʼsɨ Isilæ̀ sɨ̀, ma ghɨ maʼ meyn fɨ̀ntsi, ɨfe a nse, àkfɨ̀-akfɨ. ¹⁷Devìt ɨ bè sɨ̂ Fɨyin fɨ na, “À tî bè mà na ghɨ taŋ ghelɨ iwòŋ, à fe mà, ɨ wulɨ vzɨ̀ a wù n-tisɨ ghelɨ nâ ghèyn, à nì mà mbɨ. Ghelɨ nâ ghèyn nɨn ghɨ kɨ ta njɨ̀sɨ̀, ma ghɨ ta nchì àteyn. Wà n-fu ngeʼ sɨ̂ àŋena ma àŋena bebsɨ ghà? Bôbo Fɨyini femfɨ, kwo fu kɨ ngeʼ sɨ̂ mà ghesɨ̀ ìsas i ndo nɨ̀ mà i. Ka wa n-vìsi ìkoʼi yèynì faŋ nà ndû nɨ̀ ghelɨ ghya.”

Devìt ɨ bàʼlɨ̀ àbaŋ ifu alèʼ ghè a Alunà nà n-chyeʼ asaŋ ateyn

¹⁸Devìt nɨn jèm tî nchì Bôbo Fɨyini àteyn ɨ bè na Gâd be sɨ̂ Devìt na wù koʼ ndù bàʼlɨ̀ àbaŋ ifu ghɨ na koʼsɨ̂ Fɨyini ateyn alèʼ ghè a Àlunà, ɨ wulɨ̀ Jebùs vzɨ̀ nɨn læ nà chyeʼ asaŋ ateyn. ¹⁹Devìt ɨ yvɨnɨ ìwo zɨ̀ a Bôbo Fiyini bè na Gâd ɨ̀ be sɨ̂ ŋweyn, ɨ lù ɨ koʼ afu. ²⁰Àlunà nà n-chyeʼ àsaŋ a wît ŋêyn woyn ghɨlumnɨ̀ nɨ̀ ŋweyn ghɨ̀kæ̀, ɨ sesɨ bèynsɨ̀ sɨ ki, ɨ yeyn nchì Fɨyini, woyn ŋweyn ɨ leʼ lèytɨ̀. ²¹Devìti ɨ nà sɨ baʼsɨ̂ ndu afu, Àlunà ɨ yeyn ta wù n-gvî, ɨ gvi ɨ suʼi gvɨmtɨ asɨ nɨ̀ Devìt, ɨ chuʼ ɨchfɨ̂ atu nɨ̀ ŋweyn a nse, ²²Devìt ɨ bè sɨ̂ ŋweyn na, “Wa n-fu àlêʼ àkya kèynà a wà n-chyeʼ asaŋ ateyn tèyn, a mà baʼlɨ abaŋ ifu ateyn sɨ̂ Bôbo Fɨyini ta ka ikoʼi zɨ̀ a yì kù ghelɨ ghem têyn mæ. Mɨ n-làʼ kɨ ɨkwo ɨ̀jɨ̀m alèʼ nâ ghàyn ta wà n-kɨŋ.” ²³Àlunà ɨ bè sɨ̂ ŋweyn na, “Lì alêʼ ateyn. Ni iwo zɨ̀ a wà n-koŋ nɨ̀ àlêʼ ateyna a mbæ̀. Mɨ n-fu mbòŋsɨ̀ sɨ a ifu inyoʼni, ɨ̀fu ɨbwas ɨnkàʼ vzɨ a ghɨ n-chyeʼ asaŋ atu àteyn sɨ a ɨnkàʼ ɨ̀nkwonɨ̂, fì fu asaŋ a wît sɨ a ifu ɨfwo ɨyɨnɨ. Mɨ n-fu ɨfwo nâ wèyn nô ɨ̀jɨ̀m. ²⁴Mɨtì fòyn Devìt ɨ bè sɨ̂ ŋweyn na, “ɨ̀ngaŋ ma lem meyn na mɨ n-làʼ ɨ̀kwo alèʼ nâ wèyn kɨ ɨ̀jɨ̀m. Mɨ n-fu wi afo sɨ̂ Bôbo Fɨyini a kelɨ và, ɨ̀ faŋ tɨ̀ fu ifu inyoʼni sɨ̂ Fɨyini fɨ bula ma lâʼ afo jæ ta ka mà keli.” ²⁵Devìt ɨ bè tì, ɨ yuyn alêʼ ateyn kɨ àjɨ̀m sɨ̂ Àlunà sɨ a gûl ighɨ ntufa. ²⁶Devìt nɨn baʼlɨ meyn àbaŋ ifu afu sɨ̂ Bôbo Fɨyini ɨ fu tɨfu tɨ nyoʼnɨ tɨ, nɨ̀ tɨfi tìtɨ a tɨ n-nî na ghɨ na ghɨ ajûŋ asɨ nɨ̀ Fɨyini fɨ. Wu n-jem meyn sɨ̂ Fɨyini fɨ, ɨvɨsɨ suʼi atu àbaŋ ifu nâ ghè. ²⁷Bôbo Fɨyini ɨ bè, nchì ŋweyn zɨ̀ ɨ kasi tuŋ we fɨ̀nyù fifɨ sɨ a ɨkfɨ a wù nà n-kelɨ awu tì. ²⁸À nà n-ghɨ a ɨlvɨ nâ ghè ta Devìt yeyn na Bôbo Fɨyini beynsɨ meyn ìjêm i ŋweyn alèʼ nâ ghè a Àlunà, ɨwul ɨ̀ Jebùs, nɨn læ nà chyeʼ asaŋ a ŋweyn ateyn, wu fu tɨfu sɨ̂ Fɨyini fɨ afu. ²⁹A nà ghɨ tì fɨ̀ndo fi Bôbo Fiyini fifɨ̀ a Mosìs nɨn læ bàʼlɨ a nse iyum tì, nɨ̀ àbaŋ kì a ghɨ n-fu tɨfu tɨ nyoʼnɨtɨ atu àteyn, ɨ ghɨ alèʼ ghè a ghɨ n-koʼsɨ Fɨyini ateyn a Gibìyòn. ³⁰Mɨtì yi nà n-boynɨ̂ wì sɨ̂ Devìt sɨ nà ndu koʼsɨ Fɨyini afu bòm ta wu nà n-fayn fɨ̀nyù fifɨ̀ a nchì Bôbo Fɨyini nɨn læ ghal awu tì.