1 Chronicles 22

Ghɨ baʼtɨ sɨ bàʼlɨ ɨ ndo Fɨyini

¹Devìt nɨn læ meyn bè na, “Ndô Bôbo Fɨyini baʼsɨ̂ baʼsɨ̂ nɨ̀ àbaŋ ifu kì a ka ghelɨ Isìlæ̀ na fu ifu inyoʼnɨ-i ateyn sɨ̂ Fɨyini fɨ, na ghɨ alèʼ ghàyn. ²Devìt nɨn læ meyn bè sɨ̂ ghelɨ Isìlæ̀ na àŋena yvɨ̀ŋtɨ̀ ghelɨ ɨtum ghì a ghɨ nà n-chi a Isìlæ̀, ɨ̀ choʼtɨ ighî a ghɨ n-kya sɨ zue ngòʼsɨ̀ ta ka àŋena zue ngòʼsɨ̀ a ghɨ baʼlɨ ndô Fɨyini ateyn. ³Wu n-læ meyn fu akas kɨ̀ sɨ a idvɨ̀, baʼsɨ̂ nɨ̀ ìdyani ghɨ taŋ lè ɨ̀tu, na ghɨ faytɨ mbaynsɨ ateyn, bayn achfɨ̂ a ndosɨ Fɨyini nâ kì ateyn, baʼsɨ̂ nɨ̀ mbàyn àteyn. ⁴Ghelɨ Tayà nɨ̀ ghelɨ Sidòn nɨn læ meyn gvi fu kɨmɨ ɨ̀nkâʼ mɨ̀ sedà sɨ̂ Devìt mɨ dvɨ-à, ghɨ taŋ lè ɨtu, wu fu na ghɨ baʼlɨ ndo Fɨyini nâ zɨ̀ ateyn. ⁵Devìt nɨn læ bè na, “Wayn wom, Solomùn bu læ̂, itof iŋweyni tebtɨ-à iwo abàʼlɨ̀, yi n-jof na mà baʼtɨ ɨfwo abàʼlɨ̀ nâ wèyn ta ka wù læ̂ bàʼlɨ ndo Fɨyini yi jofà, koʼnɨ-à, ghɨ na kya kɨ mbzɨ ìjɨ̀m. Devìt nɨn læ sesɨ kfɨ ma wù baʼtɨ meyn ɨ̀fwo abàʼlɨ̀ a ndô Fɨyini nâ vzɨ̀ nô sɨ a idvɨ̀. ⁶A n-læ nà ghɨ ta wù bàʼtɨ ɨfwo ateyn, wu jàŋ Solomùyn ɨ bè sɨ̂ ŋweyn na wù baʼlɨ ndo Bôbo Fɨyini, ɨ Fɨyini fɨ Isìlæ̀. ⁷Wu n-læ bè sɨ̂ Solomùyn na, “Mɨ n-læ meyn nà kɨŋ sɨ bàʼlɨ ndô Bôbo Fɨyini, ɨ Fɨyini femfɨ, ⁸Mɨtì Bôbo ɨtaŋi sɨ̂ mà, ɨ bè na, ‘Wà tɨm meyn chwòsɨ̀ ìwoŋ, ɨ̀ zuetɨ chwòsɨ̀ ghelɨ, mà kàʼ ma bû vìsi na wà baʼlɨ̀ ndo yem bòmta wà zuetɨ meyn chwòsɨ̀ ghelɨ. ⁹Mɨtì wà læ̀ bzɨ̂ wayn ɨlumnɨ̀, wu kôŋ mbôynɨ̀, kôŋ wi iwoŋ, a mà ni a wù na chî nɨ̀ mbôynɨ kɨ̀ ŋêyn ghelɨ ghɨ̀jɨ̀m. Ghɨ n-læ̀ nà toŋtɨ̂ ŋweyn na Solomùyn. À læ̀ nà ghɨ ta wù n-saʼ Isìlæ̀, a mà ni a ghelɨ Isilæ̀ na kelɨ mbôynɨ̀. ¹⁰À læ̀ bâʼlɨ̀ ŋweyn, bàʼlɨ̀ ndô yem, wù læ̀ nà ghɨ wayn sɨ̂ mà, ma ghɨ bæ̀ sɨ̂ ŋweyn. Mà læ̀ ni-à, a à læ nà lum saʼ kɨ woyn ŋweyn saʼ Isìlæ̀.’ ¹¹“Ma na sɨ jèm lvɨ̂yn a wayn wom na Bôbo Fɨyini na ghɨ zɨ̂ ŋweyn amoʼ, ta ka wà keli sɨ bàʼlɨ ndô ŋweyn, kɨ̀ ighel ta wu n-læ bè na wà læ̀ bâʼlɨ̀-à. ¹²Mɨ n-jêm na à læ̂ chèm a ɨtuʼ ta ka wà saʼ Isìlæ̀, Bôbo fu itof sɨ̂ và ta ka wà keli sɨ lèm tɨsaʼ tɨ ŋweyn, ɨ Bôbo Fɨyini fyafɨ. ¹³Wà ka sɨ lèm tɨsaʼ tìtɨ̀ a Bôbo nɨn læ fu sɨ̂ ghelɨ Isìlæ̀ a wà na ghalɨ nô ghà yi nà ndû kɨ nɨ̀ àsɨ-a.Ka wâ n-læ̀ fàyn, kèsa ɨ̀ bòli, wa kelɨ kɨ àtem ato-a. ¹⁴Ma felɨ meyn nô nɨ̀ àdyaʼa sɨ baʼtɨ abâʼlɨ̀ a ndô Fɨyini nâ kèyn, fì lèm àso ɨkwo abaŋna chem ndù bòsɨ̀ nkam sɨ̀ kæ̀, nɨ afɨfâ kɨ chem ndù bòsɨ̀ nkam mɨ̀vɨm ɨ̀nkæ̀. Ma lem meyn kɨ̀mɨ àkas nɨ̀ ìdyani ghɨ taŋ lè ɨ̀tu. Ma lem meyn kɨ̀mɨ ɨ̀nkâʼ, baʼsɨ̂ nɨ̀ ngòʼsɨ̀, mɨ̀tì wà kàʼ a wà læ̂ yuyn kfeynsɨ kɨmɨ ɨlvi ateyn. ¹⁵Wà n-kelɨ ghelɨ ghɨfelɨnɨ ghɨ kɨ̀ sɨ a idvɨ̀; ghelɨ nɨn ghɨ ma ghɨ kàʼ a ghɨ na zue ngòʼsɨ̀, ghɨli bâʼlɨ̀-à, ghɨli bayn a, ghɨli ghɨ ma ghɨ kàʼ a ghɨ fel nô mɨ ìnkì ifèl ìkà. ¹⁶Ghelɨ ateyn kàʼ a ghɨ fel ɨfwo nɨ̀ àso ɨkwo abaŋna nɨ afɨfâ, nɨ̀ àkas a. Mɨ n-jêm na wà zɨtɨ abâʼlɨ̀ a ndo Fɨyini ateyn lvɨ̂yn Bôbo na ghɨ amoʼ zɨ̂ ŋweyn, ɨ̀ gàmtɨ̀ và.” ¹⁷Devìt nɨn læ meyn chwòsɨ̀ sɨ isaʼ na ghelɨ ghɨtisɨnɨ nô ghɨ̀jɨ̀m a Isìlæ̀ nɨn kelɨ sɨ tòʼtɨ wâyn ŋweyn, Solomùyn. ¹⁸Wu n-læ bè sɨ̂ àŋena na, “Ba Bôbo Fɨyini nɨn ghɨ zɨ̂ àŋena amoʼ, ma wù gamtɨ meyn zɨ̀, yi tɨm yɨ mbàynɨ̀ sisɨ kɨ̀ a ɨlwèʼ s̀i a idvɨ̀ ɨ̀ nì yi na kelɨ mbôynɨ̀? Wu n-læ meyn nì ma tɨm yɨ ghelɨ ilaʼ afêyn nô ghɨ̀jɨ̀m, àŋena na sɨ ghɨ isas isaʼ nɨ̀ Bôbo, a tisɨ̂ zɨ̀ tisɨ̂ àŋena. ¹⁹Yì felɨ sɨ̂ Bôbo lvɨ̂yn, ɨ Fɨyini fifɨ, nɨ̀ tɨ̀kfâʼtɨ̀ titɨ tɨ̀jɨ̀m, nɨ̀ àyvɨs àki-a àjɨ̀m à. Yì zɨtɨ sɨ bàʼlɨ ndô Fɨyini ta ka yì læ̂ gvì nɨ̀ àntayntayn a mɨ̂kàyn nɨ̀ ŋweyna ɨ̀ lèm ateyn, bàʼsɨ nɨ̀ ɨ̀fwo ɨlvi vzɨ̀ a ghɨ n-koʼsɨ Bôbo Fɨyini nɨ̀ ɨ̀ŋweyn, ɨlvɨ ta yì bàʼlɨ̀ mèsì ndô Bôbo Fɨyini àteyn.