1 Chronicles 20
Devìt ɨ tɨm yɨ ghelɨ Amòn, ɨ lì ntèʼ ighaʼnɨ nɨ̀ àŋena
1A n-læ meyn nà ghɨ nɨ̀ lùm, ɨlvɨ ghê a tɨfôyn tɨ̀ nà lum seʼ iwoŋ ateyn, Juwàb ɨ li seʼ nɨ̀ sugèyʼsɨ ŋweynsɨ ɨtwaʼ ighòŋ, mɨtì Devìt ɨ faŋ kɨ a Jèlusalèm. Wu ndù ɨ sàs ìlaʼi Amòn, ɨ lù sɨ afu ŋêyn sugèyʼsɨ ŋweynsɨ, ɨ ndù jɨŋ kal ilaʼi Labà, ɨ nù ghelɨ ateyn, ɨ sàs ìlaʼ ateyn. 2Devìt ɨ choʼ afol a tɨ̂fòyn sɨ atu nɨ̀ fòyn Labà. Afol ateyn a nà n-dɨ̂lɨ̀ chem ndù kilù sɨ aso ɨkwo a baŋnɨ-a mɨ̀vɨm ntal, njvàsɨ̀ kæ̀. Kɨ nà n-ghɨ ma ghɨ faytɨ meyn nyòtɨ̀ nɨ̀ àso ɨkwo-a. Devìt nɨn li meyn kɨmɨ ɨ̀fwo a ntèʼ nâ ghè nô sɨ idvɨ̀ ɨ lù nɨ̀ ɨ̀ŋeyn. 3Devìt nɨn ghaytɨ meyn ɨ lù nɨ̀ ghelɨ ghì a ghɨ nà n-ghɨ afu, ɨ lèm àŋena sɨ ɨkòs na ghɨ na bàsɨ̀ ɨ̀nkâʼ, sayn ɨ̀n lì nɨ̀ njàmsɨ. Wu n-læ nà ni kɨ tì sɨ̂ ntèʼsɨ Amòn sisɨ̀ a wù tɨm yɨ a iwòŋ. Wu n-læ ni tî nô mɨ ɨlvɨgha, ŋêyn sugèyʼsɨ ̀nweynsɨ nô sɨ̀ jɨ̀m ɨ kasi ɨkfa sɨ a Jèlusalèm.
Devìt ɨ nù ghelɨ Fìlisiyà
4A n-læ meyn nà ghɨ achi a li-a, ghelɨ Isìlæ̀ ɨ fi zɨ̀tɨ̀ sɨ tɨm ighoŋ ŋêyn ghelɨ Fìlisiyà a Gezà. A nà n-ghɨ ɨtuʼ nâ ghè Sibekày, ɨ wul ɨ̀ ndo nɨ̀ Hushà ɨ zue Sibày, ɨ wul ɨ̀ ndo nɨ̀ Lefèt ɨ̀lvì, ɨ tɨm yɨ ghelɨ Fìlisiyà.
5Ighoŋ ili nɨn læ meyn fi làlì kɨmɨ sɨ̂ ghelɨ Isìlæ̀ ŋêyn ghelɨ Filisiyà, Elhanàn ɨ wâyn Jây ɨ zue Lamì ɨ wâynà Gòliyàt, ɨ wul ɨ̀ Gît vzɨ̀ a ighoŋ iŋweyni nà ghaʼ, fî dyêyfɨ̀ ghɨ tèyn ta mbàŋ zɨ̀ a ghɨ nà bo bòsɨ̀ ateyn.
6Iwoŋ ili nɨn læ meyn fi làlì a Gât, wùl ɨlvì ghɨ afu, nô mɨ àwu a ŋweyn à kà ɨ kelɨ baŋsɨ ɨwu ntufa, ɨvɨ ŋweyn kelɨ kɨ tì, wu chɨ̂yntɨ̀ kelɨ baŋsɨ ɨwu nɨ̀ baŋsɨ ɨvɨ̀ mɨvɨm ɨ̀mbò, njvàsɨ kæ̀. Wu nà n-ghɨ kɨmɨ wul ɨ̀ ndo nɨ̀ Lafà. 7A nà n-ghɨ ta wù tèlɨ ghelɨ Isìlæ̀, Jònatàn ɨ zue ŋweyn. Jònatàn nà n-ghɨ wâyn Shimèy, ɨ wâynà Devìt.
8Ghelɨ nâ ghèyn a Devìt ŋêyn ghelɨ ŋweyn nɨn læ zuetɨ têyn nà n-ghɨ ghelɨ ndo nɨ̀ Lefà ɨ wul ɨ̀ Gât.