1 Chronicles 19

Devìt ɨ tɨm yɨ ghelɨ Amòn

¹Ghɨ n-læ chitɨ koʼ, Nahàsh ɨ fòyn Amòn, ɨ kfɨ, wayn ŋweyn ɨ yɨ achi a ŋweyn. ²Devìt ɨ kfàʼtɨ kɨ sɨ a ŋweyn a ngeŋ na, “Mà na tòʼnɨ̀ nɨ̀ Hanùm, ɨ wâyn Nahàsh, bòm ta bò ŋweyn ti meyn nà tôʼnɨ̀ nɨ̀ mà.” Devìt nɨn kfàʼtɨ tî, ɨ tum ghelɨ na ghɨ ndu chàmnɨ ìwuyn sɨ̂ ŋweyn a ikfɨ nɨ̀ bò ŋweyn. A nà ghɨ ta ghelɨ ntum nɨ̀ Devìt ndù yèyn Hanùn a Amòn, ³ɨtu sugèyʼsɨ̀ a Amòn ɨ bè sɨ̂ Hanùn na, “A wà ti kfâʼ na Devìt nɨ̀n gâmtɨ̀ bò vâ ta wù tùm ghelɨ na ghɨ gvi chàmnɨ ɨ̀wuyn sɨ̂ và? Ba ghelɨ ntum nɨ̀ ŋweyn gvì kɨ̀ sɨ ki sɨ yeyn na ilaʼi zya nɨn bolî wo ta ka wù gvi tɨm yɨ? ⁴Àŋena bè tì Hanùn ɨ ghaytɨ ghelɨ ntum nɨ̀ Devìt ɨ kom ɨtu àŋena, ɨ fi bàytɨ̀ dzɨsɨ àŋena, ghɨ nà ghɨ kɨ nɨ àsas a yuma, wu sàŋ àŋena.

⁵Wu n-læ nì tî, wùlɨ nyaʼtɨ ndu fèʼtɨ̀ sɨ̂ Devìt, Devìt ɨ tum ghelɨ na ghɨ fvɨ ndù kòynɨ̀ nɨ̀ àŋena, bòm ta iwo ateyn i nà n-wumi nô sɨ a ŋaŋ. Fòyn Devìt ɨ bè na àŋena duʼi kɨ̀ a Jelikò, ɨtu àŋena kasî chɨl jæ ta ka àŋena kasî kfa.”

⁶A nà n-ghɨ ta ghelɨ Amòn yeyn na ɨtoŋ Devìt ɨ yafɨ meyn, wù na sɨ bàyn àŋena, Hanùn ŋêyn ghelɨ Amòn ɨ làʼ ghelɨ ghi a ghɨ nà nyɨŋ nyamsɨ iwòŋ a Alam Nàhalèm, nɨ̀ Alàm Makà, baʼsɨ̂ nɨ̀ Zobà. ⁷Àŋena nɨn læ làʼ mɨ̀nchaʼ mɨ̀ ìghòŋ nkam mɨ̀vɨm ntal, njvàsɨ̀ bò, baʼsɨ̂ nɨ̀ ghelɨ ghì a ghɨ n-nyɨŋ mɨ̀nchaʼ mɨ̀ àteyn.Àŋena nɨn laʼ meyn kɨmɨ fòyn Makà ŋêyn sugèyʼsɨ ŋweynsɨ, àŋena gvi ɨ bɨ̀ a ngùŋ Medebà, ghelɨ Amòn ɨ fvɨ gvì sɨ àŋena ntèʼsɨ sɨ nù.

⁸Devìt nɨn læ yvɨ iwo ateyn nô mɨ ɨlvɨ gha, ɨ baʼtɨ ghelɨ iwoŋ nɨ̀ ŋweyn nô ghɨ̀ jɨ̀m. ⁹Ghelɨ Amòn ɨ fvɨ̀ ɨ timi a dzɨ ta yì n-zɨ ilaʼ nɨ̀ àŋena sɨ nù. A ghɨ tì ma tɨfôyn tìtɨ̀ a tɨ fvɨ̀ gvì sɨ gàmtɨ̀ sɨ nù, timi meyn kɨ̀ andayn.

¹⁰Juwàb ɨ yeyn na ghelɨ ighòŋ jɨŋ meyn kàli ŋweyn, wu choʼtɨ sugèyʼ sɨ tosɨ a Isìlæ̀ ɨ tum na sɨ ndu nù ghelɨ Alàm. ¹¹Wu n-læ meyn visi ghelɨ ighòŋ ghɨli na wâynà ŋweyn, Abishày na tisɨ-à, ɨ tum na àŋena ndu nù ghelɨ Amòn. ¹²Juwàb ɨ bè na, “Yì kæ sɨ yeyn ghelɨ Alàm to chwò mà nô mɨ ɨlvɨ gha, yi gvi gàmtɨ̀ mà. Mɨtì, mà kæ sɨ yeyn na ghelɨ Amòn nɨn to chwò zɨ̀, a mà gvi gàmtɨ̀ zɨ̀.” ¹³Yì nà kelɨ àtem ato-a, ta ka ghesɨ̀nà nu gàmtɨ̀ ghelɨ ghesɨ̀nà, gàmtɨ̀ ntèʼsɨ Fɨyini. Bôbo Fɨyini nɨn nì kɨ ìwo zɨ̀ a yi n-jôfɨ̀ sɨ̂ ŋweyn.

¹⁴Juwàb nɨn læ taŋi tî, sugèyʼ sisɨ̀ a sɨ nà ghɨ ŋêyn àŋena amoʼ ɨ lu ndù sɨ nù ghelɨ Alàm, ghelɨ ateyn ɨ nyɨŋ leʼnɨ. ¹⁵Ghelɨ Amòn ɨ yeyn nô mɨ ɨlvɨ gha na ghelɨ Alàm nyɨŋnɨ meyn leʼnɨ, àŋena boŋ leʼnɨ. Àbishày, ɨ wâynà Juwàb, ɨ zɨ àŋena ntèʼ, Juwàb ɨ kasi ndù a Jèlusalèm.

¹⁶A nà ghɨ ta ghelɨ Alàm yeyn na ghelɨ Isìlæ̀ ɨ yɨ meyn àŋena, àŋena tum ghelɨ ghɨ ndu jàŋtɨ̀ ghelɨ Alàm a injɨyni jvâ Yuflèts, ghɨ gvì, a tisɨ̂ Shofàch, atu a Sugèyʼsɨ nɨ̀ Hadadezà, tisɨ̂ àŋena.

¹⁷Ghɨ fèʼtɨ̀ ìwo ateyn sɨ̂ Devìt, wu yvɨ̂ŋtɨ̀ sugèyʼsɨ Isìlæ̀ nô sɨ̀ jɨ̀m, ŋêyn àŋena ɨ dyàŋ jva Jodàn, wu ndu kèʼ àŋena ŋêyn àŋena ɨ nù. Devìt nɨn ndu tas ighoŋ sɨ nu ghelɨ Alàm ŋêyn àŋena ɨ zɨ̀tɨ̀ ìnû. ¹⁸Mɨtì, ghelɨ Alàm nâ ghì ɨ nyɨŋnɨ leʼ. Devìt ɨ zuetɨ sugèyʼ sɨ àŋena nkamsɨ nsòmbo, sɨ nyɨŋ a mɨ̀nchaʼ mɨ̀ ìghòŋ, baʼsɨ̂ nɨ̀ sugèyʼsɨ̀ nkam mɨ̀vɨm ɨ̀n kæ̀ sɨ jelɨ̀ nɨ̀ ɨ̀vɨ. Wu n-læ meyn zue kɨmɨ Shofàk, atu a sugèyʼsɨ nɨ̀ àŋena.

¹⁹A nà ghɨ ta tɨfôyn tìtɨ̀ a tɨ nà ghɨ a isas isaʼ nɨ̀ Hàdadezà yeyn meyn na ghelɨ Isìlæ̀ tɨm meyn yɨ àŋena, àŋena gvi yeyn Devìt, ŋêyn àŋena taŋi ta ka mboynɨ̀ na ghɨ, àŋena nà sɨ ghɨ isas isaʼ nɨ̀ Devìt. Ghelɨ Alàm ɨ nà bu kòŋ wì sɨ læ̀ sɨ fi sɨ gàmtɨ̀ ghelɨ Amòn nô sakos.