1 Chronicles 18

Devìt ɨ tɨm yɨ tɨlaʼ tìtɨ̀ a tɨ nà n-baʼsɨ a Isìlæ̀

¹Devìt nɨn læ meyn làlì achi a li-a, ɨ ndu tɨm yɨ tɨm yɨ ilaʼi Fìlisiyà, ɨ ghaytɨ ghelɨ ateyn. Wu n-læ meyn ghalɨ fsɨ ntèʼ Gât, baʼsɨ̂ nɨ̀ ntèʼ sɨli sìsɨ̀ a sɨ nà n-baʼsɨ afu sɨ awu sɨ̂ ghelɨ Filisiyàp

²Devìt nɨn læ meyn tɨm yɨ kɨ mɨ ghelɨ Mowàb, àŋena nà sɨ ghɨ a ŋweyn isas isaʼ, lâʼ taks sɨ̂ ŋweyn.

³Devìt nɨn læ meyn lù sɨ afu, ɨ nà ndu dzɨ a mbæ̀ jvà Yuflèt sɨ tɨm sɨ yɨ ntèʼ sisɨ̀ a sɨ nà n-ghɨ afu, ɨ sesɨ ndù abàs nâ ghè, ɨ tɨm yɨ kɨmɨ Hàdadezà, ɨ fòyn Zobà, a ngùŋ ntèʼ Hamàt. ⁴Devìt nɨn læ ghal ɨ fsɨ nyam sìsɨ̀ a sɨ nà n-gûf mɨ̀nchaʼ mɨ̀ ìghòŋ sɨ̂ Hàdadezà nkam, baʼsɨ̂ nɨ̀ sugèyʼ sìsɨ̀ a sɨ nà nyiŋ atu ateyn nkamsɨ nsòmbo, kɨ̀mɨ nɨ̀ sugèyʼsìsɨ̀ a sɨ nà n-jêl a nse nkam mɨ̀vɨm ɨ̀mbò. Wu n-læ meyn leŋ kòytɨ̀ àfyen a nyamsɨ kfaŋ nɨ̀ àŋena nô sɨ̀ jɨ̀m, ɨ vɨsi kɨ nyamsɨ kfaŋ ɨvɨ na sɨ na gùfɨ̀ mɨ̀nchaʼ mɨ̀ iwòŋ.

⁵Sugèyʼsɨ Alàm sɨ nɨn læ meyn gvì sɨ gàmtɨ Hadadeza, ɨ fòyn Zobà mɨtì, Devìt ɨ zuetɨ ateyn nkam mɨ̀vɨm ɨ̀mbò. ⁶Devìt nɨn læ meyn lèm ànoyn a sugèyʼsɨ̀ a ilaʼi Alàm, ma à ti a Dàmaskùs, ghelɨ Alàm ɨ nà sɨ ghɨ isas isaʼ nɨ̀ ŋweyn, lâʼ tâks sɨ̂ ŋweyn. Bôbo Fɨyini nɨn læ meyn nì Devìt ɨ tɨm yɨ tɨlaʼ tɨ jvɨ̂ kɨ tèyn.

⁷Devìt nɨn læ meyn lì ɨ̀kfɨ awòŋ ma ghɨ faytɨ nɨ̀ àso a ɨkwo abaŋna, ɨ gvì nɨ̀ ɨ̀ŋweyn a Jèlusalèm. ⁸Wu n-læ meyn fɨ̀sɨ̀ kɨmɨ ìdyayn nô sɨ idvɨ̀ a ntèʼ Tebà nɨ̀ ntèʼ Kûn, a ghɨ kɨmɨ ntèʼsɨ a isas nɨ̀ Hadadezà. Wâyn Devìt, ɨ Solomòn, ɨ læ gvi lì ɨ faytɨ àfo a mu ateyn kɨ ghàg kɨ tèyn, ɨ bàʼlɨ kɨmɨ ɨ̀tôʼ ɨ ndo ateyn.

⁹A n-læ nà ghɨ ta Tû, ɨ fòyn Hamàt, yvɨ na Devìt zuetɨ meyn mèsì sugèyʼsɨ Hadadezà, ɨ fòyn Zoba, nô ghɨ̀ jɨ̀m, ¹⁰wu tum wâyn ŋweyn ɨ Hadolàm, na wù ndu tòŋtɨ Devìt, ɨ̀ fu àyòŋnɨ̀ sɨ̂ ŋweyn ta wù tɨm yɨ Hadadezà, ma wu n-læ meyn nà nû ŋweyn. Hadolàm nɨn læ meyn gvi nɨ̀ tɨ̀nkì tɨ ɨfwo tɨ kɨ tɨ̀ jɨ̀m ma ghɨ faytɨ nɨ̀ àso ɨkwo abaŋna, nɨ a fɨfâ, kɨ̀mɨ nɨ̀ ìdyani.

¹¹Fòyn Devìt nɨn læ meyn lì ɨ̀fwo nâ vzɨ̀ nô ɨ̀ jɨ̀m, ɨ fu sɨ̂ Bôbo Fɨyini kɨ̀mɨ ta wu n-læ fu aso ɨkwo abaŋna, nɨ a fɨfâ kì a wu n-læ lì a Edòm nɨ̀ Mowàb nɨ̀ Amòn, kɨ̀mɨ nɨ̀ Fìlisiyà, baʼsɨ̂ nɨ̀ Amalèk.

¹²Àbishày, ɨ wâyn Zeluyà nɨn læ meyn zuetɨ ghelɨ Edòm nkam njvasɨ̀ nfama afoŋlɨ afî a ghɨ toŋtɨ na afoŋlɨ a Figvaŋ. ¹³Devìt nɨn læ meyn lèm ànoyn a sugèyʼsɨ̀ a Edòm, ghelɨ Edòm nô ghɨ̀ jɨ̀m ɨ nà sɨ ghɨ kɨ a isas isaʼ nɨ̀ Devìt. Bốbo Fɨyini nɨn læ meyn gàmtɨ Devìt, wu nà seʼ tɨm ìwoŋ nô mɨ awo, yɨ kɨ yɨ.

Ghelɨ iwòŋ nɨ̀ Devìt

¹⁴Devìt nɨn læ nà saʼ ghelɨ Isìlæ̀ nô ghɨ̀ jɨ̀m kɨ àtì-ati. ¹⁵Juwàb, ɨ wâyn Zèluyìhà nɨn læ nà ghɨ àtu a sugèyʼsɨ̀, Jèhoshafàt , ɨ wâyn Àhilùd ɨ lêm ŋwàʼlɨ̀sɨ̀, ¹⁶Zadòk ɨ wâyn Àhitùb nɨ̀ Àhimelèk ɨ wâyn Abiyatà ɨ ghɨ ngàŋsɨ ndô Fɨyini. Shavshà ɨ nyâʼtɨ̀ nyaʼtɨ. ¹⁷Bènayà ɨ wâyn Jèhuwadà ɨ tisɨ̂ ghelɨ Kelèt nɨ̀ ghelɨ Pelè. Woyn Devìt ɨ ghɨ ghelɨ ghɨtisɨnɨ ghɨ ngaŋtɨnɨ ghì a ghɨ nà n-baʼsɨ sɨ̂ ŋweyn.