Psalms 91

Bôbo Fɨyini nɨn ghɨ àlêʼ a leytɨnɨ-a nɨ̀ ghelɨ ŋweyn

¹Mɨ n-ghɨ kɨ isas i tɨ̂wò nɨ̀ và vzɨ̀ a wà ngàŋtɨ chwò

Alêʼ a leytɨnɨ-a nɨ̀ mà nɨn ghɨ kɨ a ngùŋ nɨ̀ Bò ɨ̀dwaʼ ɨ̀ jɨ̀m.

²Mɨ n-bê sɨ̂ và a BÔBO na, “Wà n-ghɨ Fɨyini femfɨ, ghɨ àlêʼ a leytɨnɨ-a nɨ̀ mà,

Wà n-ghɨ nchì yem, ma samsɨ̂ kɨ và.”

³Wu nì fvɨsɨ̀ và sɨ atam ghè a mbàynɨ̀ shyasɨ bèynà.

Ɨ̀ chùʼ vâ sɨ a tɨ̂koʼi ka tɨ zue vâ.

⁴Wu nì chɨytɨ̂ và isas i tɨ̂wò nɨ̀ ŋweyn A wà na kelɨ mbôynɨ̀

Wù n-ghɨ nkyà zyâ, ghɨ sɨ nà kɨ̂ŋtɨ vâ

Wù n-chfɨ̂nɨ̀ mɨ ghà nî kɨ tì.

⁵Wà læ̀ nà bu fàyn wì awo a bɨ-a kì a kɨ n-gâyn nɨ̀ntuʼ,

Kèsa akî a kɨ n-gâyn nɨ̀nchuè.

⁶Wà læ̀ bu fàyn wì ikfɨ zɨ̀ a yi n-jelɨ̀ chwô a n-finisɨ,

Kèsa ngeʼ sìsɨ̀ a sɨ n-bebsɨ ghelɨ a ntô chuè.

⁷Ghelɨ læ̀ nà fê kfɨtɨ a wa ngùŋ dvɨ̂ kɨ tèyn

Ghelɨ læ̀ nà kfɨtɨ a wa ngùŋ ghɨ taŋ lê ɨ̀tu

Mɨtì a nô ìwo i li faŋ tɨ̀ gàyn sɨ̂ và.

⁸Wà læ̀ yeyn kɨ yeyn iwo zɨ̀ a ka yi gayn nɨ̀ àsɨ à kya

Wà læ̀ yeyn ngeʼ zɨ̀ a ka yì gayn sɨ̂ ghelɨ awo a bɨ-a.

⁹BÔBO nɨn ghɨ àlêʼ a leytɨnɨ-a nɨ̀ và

Ɨvzɨ̂ a wù ngàŋtɨ chwò nɨn ghɨ ɨvzɨ̂ a wà n-yeʼtɨ a ŋweyn.

¹⁰Nô ìwo i bzɨ-i i li læ̀ kolî wì vâ

Nô ìkoʼi i bzɨ-i i li læ̀ baʼsɨ̂ wì alèʼ ghè a wà n-ghɨ ateyn.

¹¹BÔBO læ̀ tum nchìsɨ ŋweyn a sɨ na chì và

nô mɨ wo ta wà n-ghɨ.

¹²Nchìsɨ ŋweynsɨ læ̀ njesɨ̂ và iyvɨ

A wà faŋ tɨ̀ tɨm avɨ à kyà a ngòʼ.

¹³Wà læ̀ jêylɨ̀ nyamsɨ abo, nɨ̀ mbamsɨ

Wa læ̀ jêylɨ̀ nyoytɨ̂ nyamsɨ abo nɨ̀ mbamsɨ bɨsɨ nɨ̀ ɨ̀vzɨ.

¹⁴BÔBO bè na, “Mɨ n-kɨ̀ŋtɨ̀ wul ɨ vzɨ̀ a wù n-samsɨ ma kôŋ mà,

Ɨ̀ fvɨ̀sɨ̀ ŋweyn sɨ a ngeʼ ta wù dyèyn meyn na yi n-kya mà.”

¹⁵Wù bɨ̀f mɨ ghà a mà fu sɨ̂ ŋweyn

Wù zɨ mɨ a ngeʼ ì kà a mà na ghɨ kɨ ghesɨ̀ ŋweyn

Ɨ̀ fvɨ̀sɨ̀ ŋweyn sɨ ateyn ɨ̀ làysɨ̀ ŋweyn iyvɨ.

¹⁶Wù læ̀ chî kfeyn kɨ ta wù n-kôŋ

A mà dyeyn mèsì ìbœ̂ zɨ̀ a mɨ n-gvî nɨ̀ ìnyeyni sɨ̂ ŋweyn.