Psalms 63
This book is a draft. It has been translated but has not yet finished checking, and is published here so the community can read and respond to it.
Ikôŋ i Fɨyini nɨn chwô ìchi i wûl
Njàŋ ta Devit nɨn læ betɨ ɨ nà yem a nse iyum a Juda.̀
1Fɨyini fɨ, wà n-ghɨ kɨ nô Fɨyini femfɨ
Mɨ n-lutɨ̂ sû dzɨ̂ kɨ nô dzɨ sɨ yeyn vâ
Mɨ n-lutɨ̂ sû kôŋ kɨ nô koŋ sɨ yeyn vâ
Mɨ n-ku kɨ ta nse ɨlvɨ ta yì yum ɨ̀ kàʼtɨ.
2Wà ti meyn fvɨ̀ a ma ikèʼ ta wà fvɨ̀ a jêm Alèʼ a laynɨ-a nɨ̀ và
Ma yeyn àdyaʼ à kya nɨ̀ ìŋwâʼ ì zæ.
3Ikôŋ i mɨ̂kàyn nɨ̀ và i nɨn jofɨ̀ chwô ìchi sɨ̂ mà
Mà na beyn và.
4Mà na ghaʼsɨ̂ ìzɨyn ì zæ
Lâysɨ̀ ɨ̀wu wom iyvɨ koʼsɨ̂ và.
5Wà boysɨ meyn mà nɨ̀ ɨ̀fwo ɨ jûŋ Ma na sàm kɨ antêynɨ̀ àteyn tèyn.
Mà na yem njàŋsɨ̀ saŋlɨ-à, koʼsɨ̂ và.
6Mɨ n-nyiŋì mɨ nyiŋi ma bû lèsɨ̀ và
Mɨ n-nyiŋì nɨ̀ntuʼ ma nà kfâʼtɨ̀ kɨ và.
7Bòm ta wà n-ghɨ ngàmtɨ̀ yem
Mɨ n-duʼ kɨ isas i tɨ̂wò nɨ̀ và Yem njàŋsɨ̀ saŋlɨ-à
8Mɨ n-yeʼtɨ̂ kɨ a vâ,
Wa ghalɨ mà nɨ̀ ɨkœ ɨ two nɨ̀ và.
9Ghelɨ ghì a ghɨ n-kɨŋ sɨ zue ma
Læ̀ ndû kɨ ilaʼ i nse.
10Wùl sɨ ateyn læ̀ kfɨ kɨ ma à sù fɨ̀nyuè
A bɨsɨ ɨtwaʼsɨ kfɨl ŋweyn.
11Mɨtì a fòyn faŋ nà saŋlɨ̂ kɨ saŋlɨ bòm Fɨyini
A nô mɨ ndà vzɨ̂ a wù jàŋ izɨyn i Fɨyini na dêŋsɨ̀ kɨ deŋsɨ
A achfɨ̂ a ghelɨ ànkaŋa chimi kɨ̀ têyn moŋ.