Psalms 62
This book is a draft. It has been translated but has not yet finished checking, and is published here so the community can read and respond to it.
Njàŋ ta Devìt nɨn læ betɨ ɨ fu sɨ̂ nchfɨ̀ njàŋ ɨ Jedutùn.
1Atem à kema nɨn yvɨ̂tɨ̀ kɨ tèyn bòm Fɨyini
À n-fvɨsɨ̀ kɨ ŋweyn fvɨsɨ̀ mà sɨ a ngeʼ.
2À n-ghɨ kɨ ŋweyn ifô zɨ̀ a mɨ n-lêytɨ̀ antêynɨ̀ àteyn
A n-fvɨsɨ̀ kɨ ŋweyn fvɨsɨ̀ mà sɨ a ngeʼ
Wù n-ghɨ àlêʼ a leytɨnɨ-a a juŋà nɨ̀ mà Wù n-visî wì na àfo a neʼsɨ ma sɨ a ŋaŋ.
3Yi ti læ̀ nû mà ndù chèm wo
Zɨ ghɨ jɨ̀m ti læ̀ nyɨŋ a ma ibàm sɨ zue ndù chèm wo?
Mɨ n-ghɨ kɨ tèyn ta azɨ a mbàyn ma kɨ yeŋa meyn, Ghɨ ta mbàyn a yì n-kolì.
4Samoʼ mɨ̀naŋ mɨ̀ àŋena nɨn ghɨ kɨ sɨ kòs achɨ sɨ a ma isas
Àŋena nɨn kôŋ kɨ sɨ nà lɨsɨ ghelɨ
Àŋena nɨn bemsɨ̂ wul kɨ̀ atu ɨ̀chfɨ̀,
mɨtì telɨ̂ a mɨtem.
Yì toʼ yvɨ̀tɨ.
5Wa yvɨ̂tɨ̀ a mà, chîtɨ̀ Fɨyini
Bòm ta mɨ n-yeʼtɨ̂ kɨ a ŋweyn.
6À n-ghɨ kɨ ŋweyn ifô zɨ̀ a mɨ n-lêytɨ̀ antêynɨ̀ àteyn
Wù n-ghɨ àlêʼ a leytɨnɨ-a a juŋà nɨ̀ mà
Wù n-visî wì na afo-a neʼsɨ̀ mà.
7A n-fvɨsɨ̀ kɨ Fɨyini fvɨsɨ̀ mà sɨ a ngeʼ, ni-à ma koʼnɨ-à.
Fɨyini fɨ̀ nɨn ghɨ ìfô zɨ̀ a mɨ n-lêytɨ̀ antêynɨ̀ ateyn Wù n-ghɨ àlêʼ a leytɨnɨ-a nɨ̀ mà.
8Zɨ ghɨ̀ jɨ̀m na samsɨ̂ ŋweyn kɨ̀ mɨlvɨ ɨ̀n jɨ̀m;
Yì gvi nɨ̀ àfɨm à ki-a sɨ̂ ŋweyn
Fɨyini fɨ nɨn ghɨ àlêʼ a leytɨnɨ-a nɨ̀ ghesɨ̀nà.
Yì toʼ yvɨ̀tɨ
9Mɨtì wùl ɨ ghɨ kɨ àfyef
Wùl ɨ̀ mɨ̀sòŋ nɨn kêʼ na wù n-ghɨ àfo, mɨtì ghɨ kɨ àlêʼ a yuma
Ghɨ kæ koʼsɨ ghelɨ ɨfyèʼ nô ghɨ̀ jɨ̀m, ghɨ bû kfèyn iwo
Àŋena ghɨ̀ jɨ̀m nɨ̀n kfeynɨ̂ wì mɨ ta afyef.
10Ka wùl ɨ̀ na yeʼtɨ̂ afo ma wù ghal fsɨ̀ sɨ̂ wùl sɨ adyaʼ
Ka wùl na lèm ìkfâʼtɨ̀ i ŋweyn sɨ nà chi sɨ ichoŋ
Wà kæ ghaʼ bòm ìfêl awu nɨ̀ và,
ka wà na yeʼtɨ̂ ateyn.
11Fɨyini fɨ taŋi meyn ìwo ìmòʼ,
ma yvɨ àwo à bo
À n-kelɨ Fɨyini kelɨ àdyaʼ
12Ikôŋ i mɨ̂kàynì nɨn lû sɨ̂ và a Bôbo.
Wà n-mâʼtɨ̀ nô mɨ ndà,
kɨ̀ ighel ta ifêl i ŋweyni nɨn dyêyn.