Psalms 45

Nchfɨ̀ njàŋ yvɨtɨ. Njàŋ yèyn nɨn ghɨ sɨ nà yem a gyâ “Njàŋ ɨ̀lwàŋ azyæ̀’’

À n-ghɨ njàŋ sɨ a nyɨŋ ma à bètɨ woyn Kolà. À n-ghɨ njàŋ malâ Tɨ̀fòyn

¹Awo a juŋà nɨn ghɨ ma kɨ luyn meyn a ma ɨlvà sɨ bè;

Mɨ n-yem njàŋ nâ yèyn sɨ̂ fòyn;

Mɨ n-taŋî kɨ lvɨ̂yn ta ichɨ i ŋwàʼlɨ̀ nɨ̀ wùl njàŋsɨ̀.

²Wà n-ghɨ kɨ nô fòyn tɨ̀kùŋ,

Itaŋi ɨchfɨ̀ nɨ̀ và i nɨn fom sɨ a nyɨŋ,

À n-ghɨ nchwæ na Fɨyini fɨ boysɨ meyn và kɨ̀ samoʼ.

³Kul ɨkfɨ ifò nɨ̀ và a wa isas a fòyn ɨ̀ ghaʼnɨ;

Wà n-bayn ta njoŋ, ɨchfɨ̂ i yvɨ i salɨnɨ-i.

⁴Sal ta ɨchfɨ̂-iyvɨ a fòyn ɨ ghaʼnɨ ɨ tɨm yɨ.

Wa saʼ kɨ sijya sijya, saʼ nɨ̀ mbôynɨ̀, saʼ samoʼ, kɨ àtì-ati.

Wà n-môm àwo a kaynɨ-a nɨ̀ àdyaʼ kì a wà n-kelɨ.

⁵Awoŋa nɨn fvɨ̂ a wa awu zuetɨ mbàynɨ̀ shyasɨ;

Wà n-chyeʼsɨ̂ mbàynɨ̀ shyasɨ kɨ nɨ̀ ɨ̀vɨ.

⁶Ɨfôyn va faŋ meyn kɨ̀ samoʼ a Fɨyini fɨ.

Wà n-saʼ ɨ̀fôyn va fyeʼtɨ̂ wì iwo.

⁷Wà n-kôŋ kɨ àwo a àtì-ati Wà n-bâyn àwo a bɨ-a;

A ghɨ nchwæ na Fɨyini fɨ boysɨ meyn và chwò tɨ̀fôyn tɨ litɨ.

⁸Dàla shya sɨ̀ jɨ̀m nɨn lɨ̂mtɨ̀ kɨ mɨ̀yisi mɨ̀ ɨ̀kwo;

Wà n-chî a ntoʼ ma ghɨ nyòtɨ̀ kɨ nɨ̀ àsoŋ a àtàm à,

Tɨluŋtɨ nɨn kumà wa saŋlɨ-à.

⁹Ghɨ̀kì ghɨ li nɨn felɨ̀ sɨ̂ và a ntoʼ a ghɨ woyn ntoʼ tɨ̂laʼ tɨ litɨ.

Wi ntoʼ nɨn ti a wa ɨkœ ɨ two, tɨfwo tɨ ŋweyntɨ ɨ ghɨ ma ghɨ tsɨ kɨ nɨ̀ àso ɨkwo a baŋnɨ-a

Aso ɨkwo ma kɨ lù a Ofì.

¹⁰Yvɨtɨ a wâyn ntoʼ, toʼ kfàʼtɨ awo kèynà:

Ka n-fì kfàʼtɨ̀ ìwo kûm ghelɨ̀ ghya, Ka n-fì kfàʼtɨ̀ ìwo kûm àbe a bò vâ.

¹¹Wà n-jofà, fòyn nɨ̀n semtɨ̂ và.

Wa n-gvɨmlɨ̂ ŋweyn, Wù n-ghɨ bòbe nɨ̀ và.

¹²Ghelɨ ghɨ to nɨn lù a Tayà ɨ̀ gvì nɨ̀ tɨ̀fu tɨ sɨ fu sɨ̂ và

Ta ka wà na kòŋ àŋena.

¹³Wâyn ntoʼ nɨ̀n so kɨ tèyn nchès;

Ndzɨsɨ ŋweynsɨ ɨ ghɨ ma ghɨ nyòtɨ̀ nɨ̀ àso ɨkwo a baŋnɨ-a.

¹⁴Ghɨ li meyn ŋweyn nɨ̀n ndzɨsɨ jûŋ sìsɨ̀, nà ndû sɨ fu sɨ̂ fòyn;

Ghɨ̀ki lum ɨ jûmtɨ̀ ndû ibàm

Sɨ nà duʼ a ŋweyn a ngùŋ.

¹⁵Àŋena nɨn zɨ̂ gvî a ntoʼ sɨ yeyn fòyn, saŋlɨ-à.

Àŋena nɨn zɨ̂ gvî a ntoʼ sɨ yeyn fòyn, dyala.

¹⁶Woyn ghya læ̀ saʼ kɨ ta ghɨ̀bo ghya;

Wà læ̀ ni-à a àŋena koʼ tɨfôyn.

¹⁷Mɨ n-ni-à a izɨyn ì zæ faŋ kɨ̀ samoʼ;

Tɨlaʼtɨ mbzɨtɨ nô tɨ̀ jɨ̀m læ̀ nà koʼsɨ̂ và nô ta ka ghɨ̀ læ̂ ghɨ̀.