Numbers 8

Dzɨ̀ zɨ̂ a ka ghɨ na tomtɨ̂ lâmsɨ̀ ateyn

¹Bôbo Fɨyini nɨ̀n be meyn sɨ̂ Mosìs na, ²“Taŋi sɨ̂ Alòyn ɨ bè sɨ̂ ŋweyn na wù na se sɨ tomtɨ̂ lâm sìsɨ̀ nsòmbo atû àfo ghè a ghɨ n-tomtɨ lâmsɨ̀ ateyn, wu tom a dzɨ ta ka sɨ na bayn asɨ afo ghè a sɨ n-ti atu àteyn.”

³Alòyn ɨ tomtɨ lâmsɨ ateyn sɨ nà bayn asɨ afo ghè a ghɨ n-tomtɨ lâmsɨ̀ atu àteyn kɨ̀ ighel ta Bôbo nɨ̀n bè sɨ̂ Mosìs. ⁴Ghɨ n-læ faytɨ afo kì a ghɨ n-tomtɨ lâmsɨ̀ ateyn nɨ̀ àso ɨkwo a baŋnɨ-a ma ghɨ leŋ meyn màmtɨ kɨ̀ sɨ zɨ̀tɨ̀ isas sɨ koʼ sɨ chem alèʼ ghè a ghɨ n-tomtɨ lâmsɨ̀ ateyn.

Ghɨ lèm ghelɨ isas i ndo nɨ̀ Levì sɨ a nyɨŋ

⁵Bôbo Fɨyini nɨ̀n fi meyn bè sɨ̂ Mosìs na, ⁶“Fvɨ̀sɨ ghelɨ ndo nɨ̀ Levì sɨ antêynɨ̀ nɨ̀ ghelɨ Isìlæ̀ ɨ nì àŋena na layn ta isaʼi nɨn dyêyn. ⁷Sɨ nì na àŋena na layna, wa n-mɨ̀sì mu mzɨ̀ a mɨ̀ n-nî na ghelɨ na layna ɨwùyn nɨ̀ àŋena, ɨ̀ bè àŋena kom nyuŋsɨ ɨwùyn nɨ̀ àŋena nô sɨ̀ jɨ̀m, ɨ̀ sù ndzɨsɨ àŋena ta ka àŋena na layn ta isaʼi nɨn dyêyn. ⁸Bè na àŋena gvi nɨ̀ wâyn nyàm mbòloʼ ilûmnɨ̀ baʼsɨ̂ nɨ̀ ìfu i ɨfwo ɨ yɨnɨ a ghɨ ɨ̀nkfɨ̂ŋ ma ghɨ gvâ meyn mɨ̀ faytɨ kfɨ ghɨ fyes nɨ̀ mɨ̀vɨ̂l. Àŋena gvî wa lì wâyn nyàm mbòloʼ ɨ̀ fù sɨ ifu na Bôbo Fɨyini lesɨ fù mbɨsɨ àŋena. ⁹Ghelɨ ndo nɨ̀ Levì gvî nɨ̀ ìfu ateyn i wa bè àŋena gvi ɨchfɨ fɨndo nɨ̀ Bôbo wà yvɨŋtɨ ghelɨ Isìlæ̀ nô ghɨ̀ jɨ̀m afu. ¹⁰Wà n-kelɨ sɨ gvi nɨ̀ ghelɨ ndo nɨ̀ Levì asɨ nɨ̀ Bôbo Fɨyini na ghelɨ Isìlæ̀ lem ɨwu a àŋena ɨtu. ¹¹Ghɨ n-lèmà, a Alòyn laysɨ ɨwu ɨ ŋweyn iyvɨ, ɨ̀ fu ghelɨ ndo nɨ̀ Levì sɨ ifu nɨ̀ ghelɨ Isìlæ̀, a ghɨ ìfu sɨ a nyɨŋ sɨ̂ Bôbo Fɨyini ta ka àŋena na felɨ̀ sɨ̂ ŋweyn.”

¹²“Alòyn nɨn fu-a, a ghelɨ ndo nɨ̀ Levì lem ɨwu àŋena atu nɨ̀ nyamsɨ mbòloʼ ghê sɨ̀ bò, a wà li ìmòʼ ɨ̀ fu sɨ ifu na Bôbo lesɨ fù mbɨsɨ àŋena, ɨ̀ fu ìlì sɨ ifu i nyoʼnɨ-i sɨ yuyn atu a ghelɨ ndo nɨ̀ Levì nô ghɨ̀ jɨ̀m ɨ̀ lì ìlì zɨ̂ ɨ̀ fù sɨ ifu i nyoʼnɨ-i. ¹³Ghɨ fu wa bè ghelɨ ndo nɨ̀ Levì gvi tìmi asɨ nɨ̀ Alòyn ŋêyn woyn ŋweyn wà laysɨ ɨwu iyvɨ ɨ̀ fu àŋena sɨ ifu sɨ a nyɨŋ sɨ̂ Bôbo Fɨyini. ¹⁴À ti ta wa n-lèm ghelɨ ndo nɨ̀ Levì sɨ a nyɨŋ sɨ̂ ghelɨ Isìlæ̀ ghɨ li na àŋena na ghɨ ghelɨ̀ ghem.”

¹⁵“À na ghɨ ta wà nì àŋena na layna, a wà laysɨ ɨwû va iyvɨ ɨ̀ fu àŋena sɨ ifu sɨ̂ Bôbo Fɨyini, a àŋena na kfeynɨ̂ sɨ nà nî ifêl i àŋena a fɨndo nɨ̀ Bôbo. ¹⁶Ghelɨ ndo nɨ̀ Levì nɨn ghɨ ghelɨ Isìlæ̀ ghì a yi n-kelɨ sɨ fu sɨ̂ mà kɨ̀ samoʼ. Ma lî meyn àŋena à na ghɨ ghelɨ ghem alèʼ nɨ̀ woyn ghɨ lûmnɨ̀ ɨ ghɨ asɨ a Isìlæ̀. ¹⁷Nô mɨ wayn ɨ̀ lûmnɨ̀ ɨwû àsɨ ɨ̀kfà a Isìlæ̀ nɨ̀n kelɨ mà, kèsa à n-ghɨ wayn wùl ma ɨwû nyàm a. À nà n-ghɨ ta mà zuètɨ woyn ghɨ lûmnɨ̀ ɨ ghɨ asɨ a Ijìb nɨ̀ nyamsɨ ɨ̀ lèm woyn ghɨ lûmnɨ̀ ɨ ghɨ asɨ nɨ̀ ghelɨ Isìlæ̀ sɨ a nyɨŋ baʼsɨ̂ nɨ̀ woyn nyam sɨ lûmnɨ̀sɨ̀ ɨ sɨ asɨsɨ a nà kelɨ mà. ¹⁸Ma lî meyn ghelɨ ndo nɨ̀ Levì alèʼ nɨ̀ woyn ghɨ lûmnɨ̀ ɨ ghɨ asɨ nɨ̀ ghelɨ Isìlæ̀ nô ghɨ̀ jɨ̀m. ¹⁹Ma fu meyn ghelɨ ndo nɨ̀ Levì sɨ ifu sɨ̂ Alòyn ŋêyn woyn ŋweyn antêynɨ̀ nɨ̀ ghelɨ Isìlæ̀ na àŋena na felɨ̀ a fɨndo nɨ̀ Bôbo Fɨyini alèʼ nɨ̀ ghelɨ Isìlæ. Àŋena na fu tɨ̀fu sɨ̂ Fɨyini fɨ sɨ yuyn atu a ghelɨ Isìlæ̀ ta ka ngeʼ i bemnɨ ì lì læ̂ faŋ tɨ̀ fe atu nɨ̀ ghelɨ Isìlæ̀ ɨlvɨ ta àŋena kɨ̀ŋtɨ bàʼsɨ a ngùŋ fɨ̀ndo nɨ̀ Bôbo Fɨyini.”

²⁰Mosìs ŋêyn Alòyn nɨ̀ ghelɨ Isìlæ̀ nô ghɨ̀ jɨ̀m nɨ̀n læ meyn nì nô mɨ ghà sɨ̂ ghelɨ ndo nɨ̀ Levì kɨ̀ ighel ta Bôbo Fɨyini nɨn bè sɨ̂ Mosìs. ²¹Ghelɨ ndo nɨ̀ Levì ɨ lèm ngeŋsɨ àŋena nɨ̀ ìlayni, ɨ sù ndzɨsɨ àŋena. Alòyn ɨ làysɨ̀ ɨ̀wu iyvɨ ɨ fu àŋena sɨ ifu sɨ a nyɨŋ sɨ̂ Bôbo Fɨyini sɨ yuyn ɨtu àŋena ta ka àŋena na layna. ²²Alòyn nɨ̂n mèsi, ghelɨ ndo nɨ̀ Levì ɨ zɨ sɨ nà nî ifêl i àŋena a fɨndo nɨ̀ Bôbo isas isaʼ nɨ̀ Alòyn ŋêyn woyn ŋweyn. Àŋena nɨ̀n læ ni sɨ̂ ghelɨ ndo nɨ̀ Levì kɨ̀ ighel ta Bôbo Fɨyini nɨ̀n læ̀ bè sɨ̂ Mosìs.

²³Bôbo Fɨyini nɨ̀n bê meyn sɨ̂ Mosìs na, ²⁴“Nô mɨ wul ɨ̀ ndo nɨ̀ Levì ɨ̀lûmnɨ̀ ɨ̀ kfà ta wù chèm meyn bèŋ mɨ̀vɨm ɨ̀m bò njvàsɨ̀ tâyn sɨ ndù asɨ nɨn kelɨ sɨ nà ni ifêl i ŋweyn a fɨndo nɨ̀ Bôbo. ²⁵Mɨtì wùl sɨ̂ àŋena lema koʼ chem bèŋ mɨ̀vɨm ɨ̀n tâyn wu visi ìfêl ɨ kfa yvɨ̀tɨ̀. ²⁶Wu n-kfâ nà ghɨ ma wù kàʼ a wù na gâmtɨ woynà ŋweyn ifèl nɨ̀ àŋena a fɨndo nɨ̀ Bôbo. Mɨtì ma wù kàʼ wu bû fì nì ìfêl sɨ a ŋweyn a ngeŋ. À ti dzɨ zɨ̀ a wà n-kelɨ sɨ nà gwôtɨ̀ ifêl ateyn sɨ̂ ghelɨ ndo nɨ̀ Levì.”