Numbers 6

Ghelɨ ghì a ghɨ fù ngeŋsɨ àŋena sɨ a nyɨŋ sɨ̂ Bôbo Fɨyini

¹Bôbo Fɨyini nɨ̀n be meyn sɨ̂ Mosìs na, ²taŋi sɨ̂ ghelɨ Isìlæ̀ ɨ bè sɨ̂ àŋena na, “Wùl ɨ̀ lûmnɨ̀ kèsa wul ɨ wi kæ chfɨ̀nɨ sɨ lem ngêŋ ŋweyn sɨ a nyɨŋ sɨ nà felɨ̀ sɨ̂ Bôbo Fɨyini, ³a wù na kelɨ wi sɨ nà nyvɨ mɨ̂lùʼ ɨn to kèsa nô mɨ ìnki ì kà. Wù n-kelɨ wi sɨ nà nyvɨ nô mɨ ɨmzɨ̂ a ghɨ faytɨ nɨ̀ mɨ̀tam mɨ̀ gɨ̀lebsɨ̀ kèsa sɨ kfɨl mɨtam mɨ̀ gɨ̀lebsɨ̀ kèsa sɨ kfɨl lesìnsɨ̀. ⁴Wùl kæ choʼnɨ sɨ fu ngeŋ ŋweyn sɨ a nyɨŋ sɨ nà felɨ̀ sɨ̂ Bôbo Fɨyini, wu bû læ̀ fì yɨ afo ma ghɨ faytɨ nɨ̀ mɨ̀tam mɨ̀ gɨ̀lebsɨ̀ kèsa nɨ̀ mɨ̀saŋ mɨ̀ gɨ̀lebsɨ̀ kèsa jɨmsɨ ateyn.”

⁵“Wùl kæ nà ghɨ ma wù choʼnɨ meyn sɨ lem ngêŋ ŋweyn sɨ a nyɨŋ sɨ nà felɨ̀ sɨ̂ Bôbo Fɨyini, ka ɨkfêm nɨn læ̀ kùm àtu a ŋweyn. Wù n-kelɨ sɨ nà layn kɨ layn nô ta ka aleŋ ɨlvɨ nâ kèynà a wù lèm ngêŋ ŋweyn sɨ a nyɨŋ tèyn chwo, kelɨ sɨ visi na atu a ŋweyna koʼ. ⁶Wù n-kelɨ wi sɨ nà ndû baʼsɨ̂ a ngùŋ ìgvɨyn nɨ̀ wûl nô ta ka ɨlvɨ vzɨ̀ a wù chòʼnɨ sɨ lem ngêŋ ŋweyn sɨ̂ Bôbo Fɨyini chwo. ⁷À kæ nà ghɨ nô mɨ ìgvɨyn i bò ŋweyn kèsa igvɨyn i nà ŋweyn, kèsa igvɨyn i wâynà ŋweyn kèsa iyi jêmtɨ̀ ŋweyn, ka wu n-kùm sɨ nà layn wi ta isaʼi nɨn dyêyn. Wù n-kelɨ wi sɨ bebsɨ ngêŋ ŋweyn sɨ nà layn wi ta isaʼi nɨn dyêyn bòm ta nchwæ zɨ̀ a yì n-dyêyn na wù n-ghɨ wul sɨ a nyɨŋ sɨ̂ Bôbo Fɨyini nɨn ghɨ àtu kì a wù kòʼsɨ tî. ⁸Wù n-kelɨ sɨ nà layn kɨ layn aleŋ ɨlvɨ nâ ghàyn a wù lèm ngêŋ ŋweyn sɨ a nyɨŋ sɨ̂ Bôbo Fɨyini tèyn.

⁹“Wùl kæ gvɨ̀tɨ kfɨ̀ kfɨ a ŋweyn a ngùŋ iwo ateyn i nî nyuŋsɨ atu nɨ̀ ŋweyn sìsɨ̀ a wù lèm sɨ a nyɨŋ tì na bu layn wi, a wù na kelɨ sɨ kom atu a ŋweyn ibàm i mɨchi nsòmbo sɨ nà kasi layn ta isaʼi nɨn dyêyn. ¹⁰À na ghɨ a mɨchi nfama a wù na kelɨ sɨ gvi nɨ̀ mɨ̀nlàynɨ̀ ɨ̀n bò kèsa woyn ɨ̀lwàlàtoto ɨ̀ bwò sɨ fu sɨ̂ ngàŋ ndô Fɨyini ɨchfɨ fɨndo nɨ̀ Bôbo. ¹¹Wu n-ndù fu-a a ngàŋ ndô Fɨyini li fɨlifɨ ɨ̀ fu sɨ ifu na Fɨyini fɨ lesɨ fù mbɨ ŋweyn, ɨ̀ fù fɨlifɨ sɨ ifu i nyoʼnɨ-i sɨ yuyn atu a ŋweyn bòm ta wù yeyn igvɨyn i wûl. À na ghɨ kɨmɨ achi nâ ghè a wù na kelɨ sɨ kasi sɨ lèm atu a ŋweyn sɨ a nyɨŋ sɨ̂ Bôbo Fɨyini. ¹²Wù n-kelɨ sɨ kasi sɨ fu ngêŋ ŋweyn sɨ̂ Fɨyini fɨ kɨ̀mɨ sɨ aleŋ ɨlvɨ ghê a wù tî fù sɨ asɨ bòm ta ghɨ bu n-fì taŋ wi mɨchi mzɨ̀ a mɨ̀ chwò jæ ta ka wu bebsɨ ngêŋ ŋweyn. Wù na kelɨ sɨ gvi nɨ̀ àyaʼa kɨ ghɨ bèŋ sɨ fu sɨ ifu sɨ dyèyn na wù nî meyn mbɨ.

¹³“À ti isaʼ zɨ̀ a wùl ɨ̀ vzɨ̀ a wù lèm ngêŋ ŋweyn sɨ a nyɨŋ sɨ̂ Bôbo Fɨyini nɨn kelɨ sɨ nà lemà ɨlvɨ ta aleŋ ɨlvɨ ateyn a mæ̀. Ghɨ n-kelɨ sɨ lì sɨ ndu nɨ̀ ŋweyn ɨchfɨ fɨndo nɨ̀ Bôbo. ¹⁴Ghɨ n-ndù nɨ̀ ŋweyn a wù fu ayaʼ kɨ chem bèŋ sɨ ifu i nyoʼnɨ-i ɨ̀ fu njɨ̀ ma yì chem kɨ bèŋ sɨ ifu na Fɨyini lesɨ fù mbɨ ŋweyn ɨ̀ fì fu ayaʼ sɨ ifu sɨ nà chi nɨ̀ mbôynɨ̀. Nyam nâ sèynsɨ̀ nô sɨ̀ jɨ̀m nɨn kelɨ sɨ nà ghɨ kelɨ wi nseʼi. ¹⁵Wu n-fu baʼsɨ̂ nɨ̀ ìfu i nyvɨnɨ-i kɨ̀mɨ nɨ̀ ìfu ɨfwo ɨ yɨnɨ-i nɨ̀ fɨ̀nshwo fɨ abaynfɨ ma ghɨ lam bula fɨ̀shɨ̀k. Tɨghef tɨ abayn tɨ ɨ ghɨ ateyn ma ghɨ fyes meyn nɨ̀ mɨ̀vɨl mɨ̀ olìfsɨ̀, a li-a ɨ ghɨ a mɨ̂bàŋnɨ̀ a mɨ̂bàŋnɨ̀ ma ghɨ yoʼ meyn mɨ̀vɨl ateyn.

¹⁶“Wu n-fu-a, a Ngàŋ ndô Fɨyini fu tɨfu tɨ ateyn sɨ̂ Bôbo Fɨyini. Wu n-fu ìfu a Fɨyini fɨ lesɨ fù mbɨ wùl àteyn ɨ̀ fu kɨ̀mɨ ìfu i nyoʼnɨ-i. ¹⁷Wu n-fu-a ɨ̀ fu fɨ̀nshwo fɨ abayn fìfɨ̀, ɨ̀ sɨ ayaʼ kì sɨ ifu sɨ nà chi nɨ̀ mbôynɨ̀. Wu n-fu kɨmɨ ìfu ɨfwo ɨ yɨnɨ-i nɨ̀ ìfu i nyvɨnɨ-i.”

¹⁸“Ngàŋ ndô Fɨyini nɨn fu mesì-à, a wùl nâ vzɨ̀ a wù tî lèm ngêŋ ŋweyn sɨ a nyɨŋ sɨ nà felɨ sɨ̂ Bôbo Fɨyini tî kom nyuŋ sɨ atu nɨ̀ ŋweyn sìsɨ̀ a wù tî lèm sɨ a nyɨŋ tì ɨchfɨ fɨndo nɨ̀ Bôbo Fɨyini. Wu n-koma ɨ̀ nyòʼ nyuŋsɨ ateyn ɨvɨ̀s ghè a wu n-koʼ isas abaŋ ifu ghè a ghɨ nyòʼ ifu zɨ̀ ateyn sɨ nà chi nɨ̀ mbôynɨ̀.”

¹⁹“Wu n-kom àtu a ŋweyn kì a kɨ ndyêyn na wù lem meyn ngêŋ ŋweyn sɨ a nyɨŋ sɨ nà felɨ̀ sɨ̂ Bôbo Fɨyini tì, a ngàŋ ndô Fɨyini li awu ayaʼ kì a ghɨ kfè tî, ɨ̀ lì ìghef abayn ìmòʼ nɨ̀ fɨ̀bâŋnɨ̀ fɨ abayn fɨ a fɨ̂nshwo afî ɨ̀ chɨ̀yntɨ̀ fù a ŋweyn awu. ²⁰Ngàŋ ndô Fɨyini nɨn fu tì ɨ̀ kàsi fsɨ ɨ̀ làysɨ̀ iyvɨ sɨ ifu sɨ̂ Bôbo Fɨyini. Ifu ateyn i nɨn layna a kelɨ ngàŋ ndô Fɨyini, baʼsɨ̂ nɨ̀n nkumtɨ zɨ̀ a ghɨ làysɨ̀ tî, nɨ̀ àbî ayaʼ kì a ghɨ fù sɨ̂ Fɨyini fɨ tî. Ghɨ n-nî mesì àwo nâ kèynà, a wùl nâ wèyn a wù lèm ngêŋ ŋweyn sɨ a nyɨŋ sɨ̂ Bôbo Fɨyini na sɨ ghɨ ma wù kàʼ a wù nyvɨ mɨlûʼ ɨn to.”

²¹“À ti isaʼ zɨ̀ a wùl ɨ̀ vzɨ̀ a wù lèm ngêŋ ŋweyn sɨ a nyɨŋ sɨ nà felɨ sɨ̂ Bôbo Fɨyini nɨn kelɨ sɨ nà lema baʼsɨ̂ nô mɨ nɨ̀ ghà vzɨ̀ a wù kàʼ a wù keli sɨ fu. Wù n-kelɨ sɨ luynsɨ ichfɨ̂nɨ̀ zɨ̀ a wù tî lèm kɨ̀ ighel ta isaʼ i nɨn dyêyn na wù ni.”

Iboysɨ zɨ̀ a ngàŋ ndô Fɨyini nɨn fu

²²Bôbo Fɨyini nɨ̀n be meyn sɨ̂ Mosìs na, ²³Bè sɨ̂ Alòyn ŋêyn woyn ŋweyn na, à ti dzɨ zɨ̀ a ka àŋena na boysɨ̂ ghelɨ Isìlæ̀ ateyn, bê na,

²⁴“Mɨ n-jêm na Bôbo Fɨyini boysɨ zɨ,

fì tòʼnɨ̀ nɨ̀ zɨ̀,

²⁵jêm na Bôbo Fɨyini dyeyn atem a juŋà sɨ̂ zɨ̀

ɨ̀ kèli ìkoynsɨ isuyn sɨ̂ zɨ̀.

²⁶Mɨ n-jêm na Bôbo Fɨyini kini zɨ,

ɨ̀ fù mbôynɨ̀ sɨ̂ zɨ̀.”

²⁷À ti ta Alòyn ŋêyn woyn ŋweyn na boysɨ ghelɨ Isìlæ̀ a ma izɨyn, ma boysɨ̂ àŋena.