Numbers 36

Tɨsaʼ kûm ghɨ̀kì ghɨ malanɨ nɨ̀ ɨ̀lwêʼ ɨ yɨnɨ

¹À nà n-læ meyn nà ghɨ achi a li-a, ghelɨ ghɨ tisɨnɨ isas i ndo nɨ̀ Gilèd ɨ wâyn Makì ɨ ndù ɨ taŋi sɨ̂ Mosìs ŋêyn ghelɨ ghɨ tisɨnɨ ghɨ li. Makì nà n-ghɨ wâyn Mànasè ɨ wul ìsas i ndo nɨ̀ Josèf. ²Àŋena nɨn bè na, “À nà n-ghɨ ta Bôbo Fɨyini bè sɨ̂ và a bô na wà tɨm bèyʼ ɨ̀ gwòtɨ̀ ɨ̀lwêʼ sɨ̂ ghelɨ Isìlæ̀, wu bè na wà fu ɨlweʼ wâynà wes ɨ Zèlofehàd sɨ̂ woyn ŋweyn ghɨki. ³Mɨtì ma àŋena kæ mala asas a ndosɨ a kɨ lu-à a Isìlæ̀, a ɨlweʼ vzɨ̀ a à n-kelɨ àŋena na sɨ kelɨ àsas a ndosɨ kì a àŋena màla ateyn yi dyêyn na ɨlwêʼ wesɨ ɨlvɨ na bu kelɨ wi ghes. ⁴À na ghɨ a bêŋ ghè a ghɨ n-kasi fu ɨfwo ghêl ateyn, a ɨwu woyn ghɨki nɨ̀ Zèlofehàd ndu sɨ̂ àsas a ndosɨ kì a àŋena màla ateyn, yi dyêyn na ɨlwêʼ wes ɨlvɨ na bu kelɨ wi ghes.”

⁵Àŋena nɨn tàŋi tî, Mosìs ɨ bè ìwo zɨ̀ a Bôbo Fɨyini bè sɨ̂ ghelɨ Isìlæ̀. Wu n-bè na, “Iwo zɨ̀ a ghelɨ isas i ndo nɨ̀ Josèf bè nɨn ghɨ samoʼ. ⁶À ti iwo zɨ̀ a Bôbo Fɨyini bè kûm woyn ghɨ̂ki nɨ̀ Zèlofehàd tèyn. Wù bè na àŋena kàʼ a ghɨ mala nô mɨ ndà ta ghɨ n-kôŋ kɨ̀ ɨlvɨ ta à n-ghɨ wul ìsas i ndo nɨ̀ Bò àŋena. ⁷Nô mɨ àlêʼ isas i ndo à kà a Isìlæ̀ nɨn kelɨ sɨ faŋ kɨ sɨ̂ ghelɨ isas i ndo nâ ghì, kelɨ wi sɨ ndu sɨ̂ ìsas i ndo i yilu-ì. Nô mɨ wul ɨ̀ Isìlæ̀ ɨ̀ kfà nɨn kelɨ sɨ faŋ kɨ alèʼ ghè a ghɨ n-læ fu sɨ̂ ghɨ̀bo àŋena. ⁸Nô mɨ wayn ɨ wi ɨ̀ kfà a Isìlæ̀ ta wù lì alêʼ isas i ndo nɨ̀ àŋena nɨ̀n kelɨ sɨ mala kɨ wul ìsas i ndo nɨ̀ ghɨ̀bo àŋena ta ka nô mɨ wul ɨ̀ Isìlæ̀ ɨ̀ kfà faŋ kɨ̀ alèʼ isas i ndo nɨ̀ ghɨ̀bo ŋweyn. ⁹Nô mɨ àlêʼ isas i ndo à kà a Isìlæ̀ nɨn kelɨ sɨ faŋ kɨ sɨ̂ ghelɨ isas i ndo nâ ghì, kelɨ wi sɨ ndu sɨ̂ ìsas i ndo i yilu-ì. Nô mɨ ìsas i ndo ì kà a Isìlæ̀ nɨn kelɨ sɨ faŋ kɨ alèʼ ghè a ghɨ n-læ fu sɨ̂ ghɨ̀bo àŋena.”

¹⁰Mosìs nɨn taŋi tî, woyn ghɨ̂kì nɨ̀ Zèlofehàd ɨ ni kɨ ta Bôbo Fɨyini bè sɨ ŋweyn. ¹¹Malà nɨ̀ Tizà nɨ̀ Hoglà nɨ̀ Milkà baʼsɨ̂ nɨ̀ Nuwà nà n-ghɨ woyn Zèlofehàd ɨ ma mala woyn wâynà bò àŋena. ¹²Àŋena nɨn læ kasi mala kɨ asas a ndosɨ nɨ̀ woyn Mànasè ɨ wâyn Josèf, ɨlwêʼ àŋena ɨ faŋ kɨ a isas i ndo nɨ̀ ghɨ̀bo àŋena.

¹³À ti tɨsaʼ tìtɨ̀ nɨ̀ ìyeʼi zɨ̀ a Bôbo Fɨyini nɨ̀n læ fu sɨ̂ ghelɨ Isìlæ̀ toynɨ̂ a Mosìs ibal i Mowàb a mbæ̀ jvà Jodàn injɨyn i Jèlikò.