Numbers 35

Ntèʼsɨ Ghelɨ ndo nɨ̀ Levì

¹A nà n-ghɨ ta ghelɨ Isìlæ nɨn ghɨ ibal i Mowàb a mbæ̀ jvà Jodàn injɨyn i Jèlikò, Bôbo Fɨyini ɨ bè sɨ̂ Mosìs na, ²“Bè sɨ̂ ghelɨ Isìlæ̀ na àŋena fu ntèʼsɨ lisɨ sɨ̂ ghelɨ isas i ndo nɨ̀ Levì antêynɨ̀ ntèʼsɨ ghê a àŋena nɨn keli, ghelɨ ndo nɨ̀ Levì na chî ateyn. Àŋena fu, ghɨ fu baʼsɨ kɨmɨ ɨ̀twaʼ nyâmsɨ̀ a mbæ̀sɨ ateyn. ³Àŋena nɨn fu-a, a ghelɨ isas i ndo nɨ̀ Levì na chi ateyn, kelɨ kɨmɨ ɨ̀twaʼ sɨ nà maʼ nyamsɨ mbòloʼ nɨ̀ bzɨsɨ baʼsɨ̂ nɨ̀ nyamsɨ àŋena sɨ lisɨ ateyn.”

⁴“Ɨtwaʼ nyamsɨ vzɨ̀ a ka ghɨ fu sɨ̂ ghelɨ Levì nɨn kelɨ sɨ nà zɨ̀tɨ ɨwuyn mbàyn ntèʼ fvɨ̂ chem ntàmsɨ̀ ighɨ ì kæ̀ nɨ̀ ntàmsɨ̀ mɨ̀vɨm ɨ̀n tâyn kɨ̀ ɨbyâs ɨ̀ jɨ̀m. ⁵Yi n-kelɨ sɨ feʼ ntàmsɨ̀ ighɨ bulamòʼ kɨ ɨbyâs ɨ̀ jɨ̀m nô mɨ ibàm i mbàyn ntèʼ ì kà. Ɨlwêʼ nâ wèyn na ghɨ ɨ̀twaʼ nyâmsɨ̀ sɨ̂ ntèʼ nâ sèynsɨ̀ sɨ̀ jɨ̀m.”

⁶“À na ghɨ a ntèʼsɨ ghê a yi n-fu sɨ̂ ghelɨ ndo nɨ̀ Levì, ntèʼsɨ ɨ ghɨ ateyn ntufa a ghɨ ntèʼ sìsɨ̀ a wùl ɨ̀ jas zuè wul a wù leʼ ndù lèytɨ̀ ateyn. Yi n-kelɨ sɨ fu sɨ kfeynsɨ ntèʼ sɨ lisɨ mɨ̀vɨm ɨ̀n kæ̀ njvàsɨ̀ bò sɨ̂ ghelɨ isas i ndo nɨ̀ Levì. ⁷Yi n-kelɨ sɨ chɨ̀yntɨ̀ sɨ fu ntèʼsɨ mɨ̀vɨm ɨ̀n kæ̀ njvàsɨ̀ nfama sɨ̂ ghelɨ ndo nɨ̀ Levì baʼsɨ̂ nɨ̀ ɨ̀twaʼ nyâmsɨ̀. ⁸Ntèʼ sîsɨ̀ a ghelɨ Isìlæ̀ nɨn fu sɨ̂ ghelɨ isas i ndo nɨ̀ Levì na ghɨ kɨ ighel ta àŋena tî kèli. Asas a ndosɨ kì a kɨ n-kelɨ ntèʼsɨ sɨ idvɨ̀ na fu ntèʼ sɨ dvɨnɨsɨ, asas akî a kɨ n-kelɨ ntèʼsɨ sɨ ilæ ɨ fu ntèʼsɨ kɨ̀ sɨ ilæ.”

Ntèʼ sîsɨ̀ a ka ghɨ na leʼ ndù lêytɨ̀ ateyn

⁹Bôbo Fɨyini nɨ̀n be meyn sɨ̂ Mosìs na, ¹⁰“Taŋi sɨ̂ ghelɨ Isìlæ̀ ɨ be sɨ̂ àŋena na ghɨ læ̂ dyàŋ jvâ Jodàn ɨ̀ zɨ ilaʼ i Kenàn, ¹¹ghɨ choʼtɨ ntèʼ sɨ lisɨ à na ghɨ ntèʼ sîsɨ̀ a wùl kæ jas zue wul a wù leʼ ndù lèytɨ̀ ateyn. ¹²Ntèʼ nâ sèynsɨ̀ na ghɨ àlêʼ a leytɨnɨ-a sɨ̂ wùl vzɨ̀ a wu jas ɨ̀ zuè wul na ka ghɨ boŋ zuè ŋweyn. Ghɨ n-kelɨ wi sɨ zue ŋweyn bula ghɨ saʼ ŋweyn asɨ nɨ̀ ghelɨ Isìlæ̀. ¹³Ntèʼ nâ sèynsɨ̀ ntufa a yi n-fu na ghɨ ntèʼ sîsɨ̀ a wùl jas zuè wul a wù leʼ ndù lèytɨ̀ ateyn. ¹⁴Yì fu ntèʼ sɨ̀ tal abàs a jvâ Jodàn ghè a ɨchfɨ̂-iyvɨ i nɨn sal ateyn ɨ̀ fu kɨ̀mɨ sɨ̀ tal abàs ghè a ɨchfɨ̂-iyvɨ i nɨn sœ ateyn a Kenàn ta ka ghelɨ na leʼ ndù lêytɨ̀ ateyn. ¹⁵Ntèʼ nâ sèynsɨ̀ ntufa na ghɨ àlêʼ a leytɨnɨ-a sɨ̂ ghelɨ Isìlæ̀ nɨ̀ ghelɨ ɨtum ghì a ghɨ n-chi a Isìlæ̀ nɨ̀ ɨghî a ghɨ n-chwô chwo ta ka wùl na jas zue wul, wu leʼ ndu lèytɨ̀ ateyn.”

¹⁶“Mɨtì ma wùl ɨ̀ kæ kfɨ̀yn zuè wul nɨ̀ àfo a ma ghɨ faytɨ nɨ̀ àkasa, a à na ghɨ na wù n-zue-a, ghɨ kelɨ sɨ zue ŋweyn. ¹⁷Wùl kæ kfɨ̀yn zuè wul nɨ̀ ngòʼ, a à na ghɨ na wù n-zue-a, ghɨ kelɨ sɨ zue ŋweyn. ¹⁸Wùl ɨ kæ leŋ zue wul nɨ̀ àfo a ma ghɨ faytɨ nɨ̀ fɨ̀kâʼfɨ̀, a à na ghɨ na wù n-zue-a, ghɨ kelɨ sɨ zue ŋweyn. ¹⁹Wùl kæ zue wul, a à na kelɨ kɨ wâynà wùl ɨ̀ vzɨ̀ a ghɨ zuè sɨ sɨ̀sɨ ikfɨ i wâynà ŋweyn. Wù kæ koli ŋweyn nô mɨ wo a wù na kelɨ sɨ zue ŋweyn. ²⁰Wùl ɨ̀ kæ nà bâyn wul ɨ̀ tsɨyn ŋweyn wù fe kèsa ɨ̀ tɨ̀m ŋweyn nɨ̀ àfo a, wù kfɨ, ²¹kèsa wùl ɨ̀ nyòʼsɨ̀ ɨ̀toŋ ɨ̀ kfɨ̀yn wul nɨ̀ fɨ̀nkàmfɨ̀ wù kfɨ, a à na ghɨ na wù n-zue-a ghɨ kelɨ sɨ zue ŋweyn. Wâynà wùl ɨ vzɨ̀ a ghɨ zue kæ koli ŋweyn nô mɨ a wo a wù na kelɨ sɨ zue.

²²“Mɨtì ma wùl ɨ̀ kæ jas tsɨyn bàʼ wul, kèsa tɨ̀m ŋweyn nɨ̀ àfo a, bâyn wi ŋweyn, ²³kèsa wù màʼ ngòʼ a wùl atu yeyn wi wù kfɨ, a ghɨ tì wu bâyn wi ŋweyn bula wù nî nà baʼtɨ̂ sɨ ni iwo i bzɨ-i sɨ̂ ŋweyn, ²⁴a ghelɨ Isìlæ̀ na kelɨ sɨ saʼ nsaʼ àteyn. Àŋena nɨn saʼ wùl ɨ̀ vzɨ̀ a wù n-kelɨ sɨ sɨ̀sɨ̀ ikfɨ ateyn ŋêyn wul ɨ̀ vzɨ̀ a wù zuè wul kɨ ighel ta isaʼi nɨn dyêyn. ²⁵Ghɨ kæ saʼ ɨ̀ yeyn na wù tî jas zuè zue, a ghɨ na kelɨ sɨ kɨ̀ŋtɨ ŋweyn na ka wùl ɨ̀ vzɨ̀ a wù n-sɨ̂sɨ̀ ikfɨ zue ŋweyn. Ghɨ n-kɨ̀ŋtɨ̀ ŋweyn a wù kasi ndù a ntèʼ afî a wùl nɨ̀n jas zue wul wu leʼ ndù lèytɨ̀ ateyn. Wu n-ndù-à nà kelɨ sɨ faŋ kɨ afu nô ta ka ngàŋ ndô Fɨyini ì ngaŋtɨnɨ læ̂ kfɨ.”

²⁶“Wùl ɨ̀ vzɨ̀ a wù jas zuè wul kæ læ̀ fvɨ̀ sɨ a ntèʼ afî a wùl nɨ̀n jas zue wul wu leʼ ndu lèytɨ̀ ateyn, ²⁷wùl ɨ̀ vzɨ̀ a wù n-kelɨ sɨ sɨ̀sɨ ikfɨ koli ŋweyn ma wù fvɨ meyn sɨ a ntèʼ nâ ghè, wù kâʼ a wù zue ŋweyn a ghɨ faŋ tɨ̀ ghal ŋweyn na wù zue meyn wul. ²⁸Wùl ɨ̀ vzɨ̀ a wù tî jas zuè wul nɨn kelɨ sɨ faŋ kɨ a ntèʼ afi a wùl nɨ̀n jas zue wul wu leʼ ndu lèytɨ̀ ateyn nô ta ka ngàŋ ndô Fɨyini ì ngaŋtɨnɨ læ̂ kfɨ, a wù kæ kasi sɨ kfa sɨ a ŋweyn a ndo.

²⁹“À ti tɨsaʼ tìtɨ a yi n-kelɨ sɨ nà lemà nô mɨ ajàŋ à kà nô mɨ wo ta yi n-ghɨ.

³⁰“Wùl ɨ̀ kæ zue wul a ghɨ na kelɨ sɨ zue ŋweyn kɨ̀ ɨlvɨ ta nchwò sɨ nsaʼsɨ nɨn ghɨ. Mɨtì ghɨ kelɨ wi sɨ zue wul ɨlvɨ ta à n-ghɨ kɨ nchwò nsaʼ ìmòʼ.

³¹“Wùl kæ zue wul ghɨ na kelɨ sɨ zue ŋweyn, ka wu n-yùyntɨ zɨ̀ nɨ̀ àfo a na yì faŋ tɨ̀ zue ŋweyn. Yi n-kelɨ kɨ sɨ zue ŋweyn.

³²“Wùl ɨ̀ kæ nà ghɨ ma wù leʼ meyn ndù lèytɨ̀ a ntèʼ ghè a wùl ɨ̀ nɨn jas zue wul wu ndu lèytɨ̀ ateyn, ka wu n-læ̀ yùyntɨ zɨ̀ nɨ̀ afo a sɨ kasi kfa sɨ a ŋweyn a ndo bula ngàŋ ndô Fɨyini ì ngaŋtɨnɨ kfɨ.

³³“Yi n-kelɨ wi sɨ bebsɨ ìlaʼ yèynì a yi n-chi ateyn. Ghɨ n-zue wul ghɨ bebsɨ ìlaʼ a nà ghɨ ma ghɨ kàʼ ghɨ bû yuyn teyn, a bu kɨ na ghɨ zuè wul ɨ vzɨ̀ a wù zuè wul. ³⁴Ka yi n-bèbsɨ ìlaʼ nâ yèynì a yi n-chi ateyn tèyn bòm ta nô mà Bôbo Fɨyini nɨn chî ateyn. À n-ghɨ mà Bôbo Fɨyini chî antêynɨ̀ nɨ̀ ghelɨ Isìlæ̀.”