Numbers 21

Ghelɨ Isìlæ̀ ɨ tɨm yɨ ghelɨ Alàd

¹À nà n-ghɨ ta fòyn ghelɨ Kenàn vzɨ̀ a wu nà n-saʼ Alàd a nse iyum yvɨ̀ na ghelɨ Isìlæ̀ gheyn n-gvî dzɨ a Atalìm, wu fvɨ̀sɨ̀ sugèyʼsɨ ŋweyn sɨ fvɨ nù ghelɨ Isìlæ̀ ɨ ghaytɨ ghɨli. ²Ghelɨ Isìlæ̀ ɨ chfɨ̀nɨ̀ sɨ̂ Bôbo Fɨyini ɨ bè na, “Wà kæ gàmtɨ ghes, ghesɨ tɨm yɨ̀ ghelɨ ghèyn, a ghèsɨ̀ bebsɨ ntèʼsɨ àŋena nô sɨ̀ jɨ̀m.” ³Bôbo Fɨyini ɨ yvɨ idzɨ̂ i ghelɨ Isìlæ̀ ɨ nì àŋena tɨm yɨ ghelɨ Kenàn ɨ bebsɨ ntèʼsɨ àŋena. Ghɨ n-bèbsɨ tî ɨ nà sɨ toŋtɨ̂ àlêʼ ateyn na Homà ma à ti ibebsɨ.

Ghɨ faytɨ mbam nɨ̀ ìdyayn i

⁴Ghelɨ Isìlæ̀ nɨn lù sɨ a kfɨ̂yn Hôl ɨ ndù dzɨ a jvâ i baŋnɨ sɨ jɨ̀ŋ sɨ kal Edòm. A nà ghɨ ta àŋena jèlɨ̀ bol, ⁵ɨ nà sɨ ghâm Fɨyini fî ghâm Mosìs bê na, “Yì tî fvɨ̀sɨ ghès sɨ a Ijìb na ghès gvi kfɨ̀tɨ a nse iyum afêyn bòm ghà? Ɨfwo ɨ yɨnɨ nɨn ghɨ wi afêyn, nô mɨ mu ɨ ghɨ wi, ghès ɨ kôŋ wì ɨfwo ɨ yɨnɨ wèyn a wu n-befɨ têyn.” ⁶Bôbo Fɨyini ɨ kæ fvɨ̀sɨ mbamsɨ bɨsɨ antêynɨ̀ nɨ̀ ghelɨ Isìlæ̀, sɨ lumlɨ àŋena, ghɨ kfɨtɨ kɨ sɨ idvɨ̀. ⁷Ghelɨ Isìlæ̀ ɨ gvi dzɨ̀ sɨ̂ Mosìs ɨ bè na, “Ghèsɨ ni meyn mbɨ bòm ta ghèsɨ̀ tàŋi awo a bɨ-a kûm Fɨyini, fì tàŋi kùm và. Jèm na Bôbo Fɨyini fvɨsɨ mbam sèynsɨ̀ sɨ a ghès antêynɨ̀.” Mosìs ɨ kæ jèm sɨ̂ àŋena. ⁸Bôbo Fɨyini ɨ kæ bè sɨ̂ Mosìs na, “Faytɨ ànfèʼsɨ̀ a mbam ɨ ghaŋsɨ atû fɨ̀kfɨ̀s. Mbam kæ lum nô mɨ ndà, wù ki kòʼsɨ nɨ̀ ànfèʼsɨ̀ nâ kì a wù to.” ⁹Mosìs ɨ kæ faytɨ ànfèʼsɨ̀ a mbam nɨ̀ ìdyayn i sɨ ghaŋsɨ atû fɨ̀kfɨ̀s. Mbam ɨ nà lum nô mɨ ndà, wù ki kòʼsɨ nɨ̀ ànfèʼsɨ̀ a mbam nâ kì-à wu to kɨ to.

Ghelɨ Isìlæ̀ ɨ ndù a Mowàb

¹⁰Ghelɨ Isìlæ̀ nɨn fi meyn lù sɨ afu ɨ ndu bɨ̀ a Obòt. ¹¹Àŋena nɨ̂n lù a Obòt ɨ ndu bɨ̀ a Iye Abalìm a nse iyum yi kêʼnɨ̀ Mowàb abàs ghè a ɨchfɨ-iyvɨ nɨn sal ateyn a Mowàb. ¹²Àŋena nɨ̂n lù a Iye Abalìm ɨ ndu bɨ̀ ɨfyayn Zelèd, ¹³ɨ lù ɨfyayn Zelèd ɨ ndu bɨ̀ abàs ikuè a jvâ Alnòn. Jvà Alnòn nɨ̀n ghɨ a nse iyum baʼsɨ̂ alèʼ ghè a ghelɨ Amò nɨn chi ateyn. Alnòn nɨn ghɨ ighami nɨ̀ ghelɨ Mowàb nɨ̀ ghelɨ Amò.

¹⁴À ti iwo zɨ̀ a ŋwàʼlɨ̀ tɨ̀wòŋ nɨ̀ Bôbo Fɨyini nɨn taŋi kûm,

“Ntèʼ Wahèb zɨ̀ a yì n-ghɨ a Sufà kɨ̀mɨ nɨ̀ ɨ̀fyayn jvâ Alnòn. ¹⁵Ŋwàʼlɨ̀ àteyn nɨn taŋî kûm kɨmɨ ɨ̀fyayn vzɨ̀ a wu ndû chem a Âl ighami nɨ̀ Mowàb.”

¹⁶Ghelɨ Isìlæ̀ nɨ̂n lù sɨ a Alnòn ɨ ndu chem a Bæ̂, alèʼ ghè a Bôbo Fɨyini nɨ̂n bè sɨ̂ Mosìs na, “Yvɨ̀ŋtɨ ghelɨ mà fu mu a àŋena nyvɨ.”

¹⁷À nà n-ghɨ alèʼ nâ ghàyn, ghelɨ Isìlæ̀ ɨ yem njàŋ yèyn na,

“Isɨ i lɨmà lɨ̀mà fvɨsɨ mu.

Ghèsɨ̀ fsɨ nɨ̀ njàŋ,

¹⁸ibɨ i mu ma à tɨ̀m ghelɨ ghɨ tisɨnɨ,

ibɨ i mu ma à tɨ̀m chyeʼsɨ.”

Àŋena tɨm nɨ̀ mbàŋ sìsɨ̀ a sɨ n-dyêyn adyaʼ, ɨ̀ tɨm nɨ̀ mbàŋsɨ nyamnɨsɨ nɨ̀ àŋena.

Ghelɨ Isìlæ̀ nɨ̂n lù sɨ a nse iyum nâ ghè ɨ ndù a Màtanà, ¹⁹ɨ lù sɨ a Màtanà ɨ ndù a Nahalèl, ɨ fi lù sɨ a Nahalèl ɨ ndù a Bamòt. ²⁰Àŋena nɨ̂n lù a Bamòt ɨ ndu bɨ̀ ibal i Mowàb isas i kfɨyn Bisgà ghè a ghɨ n-timi atû àteyn ghɨ na ki kâysɨ̀ nɨ̀ nse iyum.

Ghelɨ Isìlæ̀ ɨ tɨm yɨ fòyn Sihòn ŋêyn fòyn Ôg

²¹Ghelɨ Isìlæ̀ nɨn tum meyn ntum sɨ̂ fòyn Sihòn ɨ fòyn ghelɨ Amò ɨ bè na,

²²“Ghès nɨn chwotɨ̂ na wà visi ghèsɨ̀ toynɨ chwò a wa ilaʼ. Ghès nɨn toynɨ̂ wì a gvêynsɨ ɨfwo ɨ yɨnɨ nɨ̀ zɨ̀, ɨ̀ faŋ tɨ̀ tòynɨ a gveynsɨ mɨtàm nɨ̀ zɨ̀. Ghès nɨn nyvɨ wi nô mɨ mu a ibɨ i mu nɨ̀ zɨ̀. Ghès na ndù kɨ a dzɨ i to ɨ̀ faŋ tɨ̀ bɨ̀ nô ta ka ghès nî tòynɨ chwò.”

²³Mɨtì fòyn Sihòn ɨ faŋ tɨ̀ bɨ̀mi na ghelɨ Isìlæ̀ chwo dzɨ a ŋweyn ilaʼ, ɨ fvɨ̀sɨ sugèyʼsɨ ŋweyn nô sɨ̀ jɨ̀m na àŋena ndu nù ghelɨ Isìlæ̀ a nse iyum. Àŋena ndu chem a Jahàz ɨ nù ghelɨ Isìlæ̀. ²⁴Mɨtì ghelɨ Isìlæ̀ ɨ zuetɨ àŋena ɨ lì nse àŋena kɨ̀ sɨ zɨ̀tɨ̀ a jvâ Alnòn ɨ ndu chem a jvâ Jabòk kɨ̀ ighami nɨ̀ ghelɨ Amòn bòm ta ghelɨ Amòn nà n-ghɨ ma ghɨ tɨm meyn mbàyn jɨ̀ŋ kàli ntèʼ àŋena. ²⁵Ghelɨ Isìlæ̀ nɨ̀n tɨm meyn yɨ ntèʼsɨ Amò nô sɨ̀ jɨ̀m nɨ̀ ntèʼ Heshbòn baʼsɨ̂ nɨ̀ mɨ̀lêʼnɨ̀ mzɨ̀ a ghɨ bàʼlɨ̀ a ngùŋ àteyn nô ɨ̀n jɨ̀m. ²⁶Heshbòn nà n-ghɨ ntèʼ ighaʼnɨ zɨ̀ a fòyn Sihòn nà n-saʼ Amò chi ateyn. Wù n-læ tɨm yɨ fòyn vzɨ̀ a wu nà n-saʼ Mowàb sɨ asɨ, ɨ ghal ɨ fsɨ nse ŋweyn nô ì jɨ̀m sɨ ndù sɨ chem a jvâ Alnòn.

²⁷À ti iwo zɨ̀ a ghelɨ ghì a ghɨ n-nyaʼ awo a gyâ njàŋsɨ̀ nɨn læ nyàʼ na,

“Yì gvi ghesɨ̀nà kasi bàʼlɨ̀ Heshbòn,

ghesɨ̀nà baʼlɨ ntèʼ ì ghaʼnɨ nɨ̀ fòyn Sihòn yì kasi nà ghɨ kɨ ta yì tî nà ghɨ.”

²⁸“Ɨvɨsɨ nɨn læ meyn fvɨ̀ a Heshbòn,

ilemi ɨvɨ̀s i ɨ lù a ntèʼ i ghaʼnɨ nɨ̀ Sihòn,

ɨ̀ ndu nyòʼ ntèʼ Âl ilaʼ i Mowàb,

ɨ bebsɨ nô mɨ ghà a kfɨynsɨ sɨ ndù sɨ chem a jvâ Alnòn.

²⁹Ngeʼ nɨn ghɨ sɨ̂ zɨ̀ a ghelɨ Mowàb.

Ghɨ bebsɨ meyn zɨ̀ ghî a yi n-koʼsɨ Kemòs

Kemòs ni meyn ghɨ lûmnɨ̀ na ghɨ ghelɨ ma ghɨ lèʼ iwòŋ,

ɨ̀ nì ghɨ̀kì na ghɨ ɨ̀kôs,

sɨ̂ Sihòn ɨ fòyn ghelɨ Amò.”

³⁰“Mɨtì ghesɨ tɨm meyn yɨ àŋena

sɨ zɨ̀tɨ̀ a Heshbòn sɨ ndù sɨ chem a Dibòn.

Ghesɨ̀ zuetɨ meyn àŋena ndù chèm a Nofà,

a ngùŋ Medebà.”

³¹Ghelɨ Isìlæ̀ ɨ kæ zɨ̀tɨ̀ sɨ nà chî ilaʼ nɨ̀ ghelɨ Amò.

³²Mosìs nɨ̀n læ meyn tum gvèsɨ̀ na sɨ ndu ki ntèʼ Jazà. A nà ghɨ ta àŋena kàsi gvì, ghelɨ Isìlæ̀ ɨ ndu tɨm yɨ mɨ̀ntèʼtɨ̂ mzɨ̀ a mɨ̀ jɨ̀ŋ kal ntèʼ àteyn, ɨ saŋ fvɨ̀sɨ̀ ghelɨ Amò ghì a ghɨ nà n-chi afu. ³³Àŋena nɨn sàŋ tî ɨ bèynlɨ̀ ɨ koʼ a dzɨ ta yì n-ndû a Bashàn. Fòyn Ôg vzɨ̀ a wù nà n-saʼ Bashàn ɨ fvɨ ŋêyn sugèyʼsɨ ŋweynsɨ nô sɨ̀ jɨ̀m ɨ ndu sɨ nu ghelɨ Isìlæ̀ a Edlè.

³⁴Bôbo Fɨyini ɨ bè sɨ̂ Mosìs na, “Ka n-fàyn Ôg ma fu meyn sugèyʼsɨ ŋweynsɨ nô sɨ̀ jɨ̀m baʼsɨ̂ nɨ̀ nse ŋweyn a wa awu. Ni kɨ iwo zɨ̀ sɨ̂ ŋweyn a wà tî nì sɨ̂ Sihòn ɨ fòyn ghelɨ Amò vzɨ̀ a wu nà n-saʼ a Heshbòn.”

³⁵Ghelɨ Isìlæ̀ ɨ kæ zue fòyn Ôg ŋêyn woyn ghɨ lûmnɨ̀ nɨ̀ ŋweyn baʼsɨ̂ nɨ̀ sugèyʼsɨ ŋweynsɨ nô sɨ̀ jɨ̀m ɨ faŋ tɨ̀ vìsi nô wul ɨ̀mòʼ. Ghelɨ Isìlæ̀ nɨn fsɨ meyn kɨmɨ nse ghelɨ Bashàn.