Numbers 20
Mu ɨ fvɨ̀ iwu
1Ghelɨ Isìlæ̀ nɨ̀n læ meyn ndù ɨ chem a nse iyum a Zîn a njoŋ ɨ yî àsɨ a bêŋ ɨ bɨ̀ a Kadèsh. A nà ghɨ ta àŋena nɨn ghɨ afu, Meliyàm ɨ kfɨ ghɨ gvɨ̀mì ŋweyn afu. 2À nà n-ghɨ tì mu ɨ ghɨ wi afu. Ghelɨ Isìlæ̀ ɨ nà bu fì yvɨnɨ̂ wì Mosìs ŋêyn Alòyn. 3Àŋena nà n-yôl sɨ̂ Mosìs bê na, “Ndà fu ma ghèsɨ̀ tî kfɨ̀tɨ ndù kɨ̀ ghesɨ̀ woynà ghesɨ ghì a ghɨ tî fèlɨ kfɨ̀tɨ asɨ a fɨndo nɨ̀ Bôbo. 4Bòm ghà ta wà tî lì gvì nɨ̀ ghès a nse iyum afêyn na ghèsɨ̀ gvi kfɨtɨ bàʼsɨ nɨ̀ nyam seysɨ a? 5Bòm ghà ta wà tî lì fvɨ̀ nɨ̀ ghès sɨ a Ijìb ɨ̀ gvì nɨ̀ ghès alèʼ a bɨ-a afêyn a? Ɨfwo ɨ yɨnɨ nɨn koʼ wi alèʼ nâ ghàyn nô mɨ fiksɨ̀ kèsa gɨ̀lebsɨ̀ nô mɨ nɨ̀ bòmenglanètsɨ̀, nô mɨ mu ɨ ghɨ wi sɨ nyvɨ.”
6Mosìs ŋêyn Alòyn ɨ fvɨ̀ sɨ antêynɨ̀ nɨ̀ ghelɨ Isìlæ̀ ɨ ndù ɨchfɨ fɨndo nɨ̀ Bôbo ɨ fe kfɨsɨ àkêʼ a àŋena a nse. Àŋena nɨn fe kfɨsɨ akêʼ tì, ibayn i Bôbo Fɨyini ɨ fvɨ̀ a àŋena asɨ. 7Bôbo Fɨyini ɨ bè sɨ̂ Mosìs na, 8“Li mbàŋ zɨ̀ asɨ antayntayn a mɨ̂kàyn nɨ̀ Bôbo zɨ̂ wâynà vâ Alòyn yvɨŋtɨ ghelɨ Isìlæ̀ nô ghɨ̀ jɨ̀m. Yi n-yvɨ̀ŋtɨ̀-à, a wà taŋi sɨ̂ ìwu i, a mu fvɨ ateyn àŋena yeyna, a wà fu a àŋena yvɨ ɨ̀ fu kɨ̀mɨ sɨ̂ nyamsɨ àŋenasɨ a sɨ nyvɨ.” 9Mosìs ɨ lì mbàŋ nâ zɨ̀ asɨ nɨ̀ Bôbo kɨ̀ ighel ta wù bè sɨ̂ ŋweyn. 10Mosìs ŋêyn Alòyn nɨ̀n ndu meyn ɨ yvɨ̀ŋtɨ̀ ghelɨ Isìlæ̀ asɨ iwu, Mosìs ɨ bè sɨ̂ àŋena na, “Yì yvɨtɨ a ghelɨ atu a tonɨ-a ghèyn. Ba à ti n-ghɨ na ghès nɨn fvɨ̀sɨ̀ mu iwu afêyn ɨ̀ fù sɨ̂ zɨ̀ a?” 11Mosìs nɨn taŋi tî ɨ làysɨ̀ mbàŋ zɨ̀ a ŋweyn awu, ɨ leŋ iwu ateyn ìngal ì bò. Mu ɨ fvɨ̀ ateyn, ghelɨ Isìlæ̀ nô ghɨ̀ jɨ̀m nɨ̀ nyamsɨ àŋenasɨ ɨ nyvɨ. 12Bôbo Fɨyini ɨ yòl sɨ̂ Mosìs ŋêyn Alòyn na, “Ta yì faŋ tɨ̀ sàmsɨ ma sɨ chem aleŋ ta ka ghelɨ Isìlæ̀ yeyn na mɨ n-ghɨ Fɨyini, layna, à læ̀ zɨ̂ wì zɨ nɨ̀ ghelɨ ghèyn ilaʼ ghè a mɨ n-fu sɨ̂ àŋena.”
13Yi n-gàyn tî, àŋena kæ fu izɨyn alèʼ nâ yèynì na Melibà ma à ti “Iyôl” bòm ta ghelɨ Isìlæ̀ nɨn læ yòl sɨ̂ Bôbo Fɨyini afu, Bôbo Fɨyini ɨ dyèyn sɨ̂ àŋena na yi n-ghɨ Fɨyini layna.
Fòyn Edòm ɨ bè na ghelɨ Isìlæ̀ nɨn chwò wì a ŋweyn ilaʼ
14A nà ghɨ ta ghelɨ Isìlæ̀ nɨn ghɨ a Kadèsh, Mosìs ɨ tum ghelɨ sɨ̂ fòyn Edòm na àŋena ndu bè sɨ̂ ŋweyn na,
“Woynà ghya ɨ ghelɨ Isìlæ̀ bè na wà n-kya ngeʼ sìsɨ̀ a sɨ kòli ghes. 15Ghɨ̀bo ghesɨ nɨn læ kàli a Ijìb, ghèsɨ̀ àŋena ɨ chi afu sɨ a ndyèyn ìdyà, ghelɨ Ijìb nyàblɨ̀ nɨ̀ ghesɨ ghɨ̀bo ghesɨ nô sɨ a ŋaŋ. 16Ghès ɨ dzɨ̀ sɨ̂ Bôbo Fɨyini wu yvɨ idzɨ̂ ì yesi ɨ tum nchì ŋweyn yi li fvɨ̀ nɨ̀ ghès sɨ a Ijìb.”
“Ghès nɨn ghɨ lvɨ̂yn ighami nɨ̀ và a ntèʼ Kadèsh. 17Ghès nɨn chwotɨ̂ na wà visi ghèsɨ̀ toynɨ chwò a wa ilaʼ. Ghès nɨn toynɨ̂ wì a gvêynsɨ ɨfwo ɨ yɨnɨ nɨ̀ zɨ̀, ɨ̀ faŋ tɨ̀ tòynɨ a gveynsɨ mɨtàm nɨ̀ zɨ̀. Ghès nɨn nyvɨ wi nô mɨ mu a ibɨ i mu nɨ̀ zɨ̀. Ghès na ndù kɨ àtì-ati a dzɨ i to ɨ̀ faŋ tɨ̀ bɨ̀ ɨkœ ɨ two ɨ̀ faŋ tɨ̀ bɨ̀ ɨkœ nɨ̂nkœ̀ nô ta ka ghès nî tòynɨ chwò.” 18Mɨtì fòyn Edòm ɨ bèynsɨ̀ ɨ bè na, “Ka yi n-tom avɨ a ma nse. Yì kæ mòm a mà fvɨsɨ sugèyʼ semsɨ a sɨ keʼ zɨ nɨ̀ mɨ̀nyuè.”
19Ghelɨ Isìlæ̀ ɨ bèynsɨ̀ ɨ bè na,
“Ghès nɨn chwò kɨ a dzɨ a dzɨ. Wùl sɨ̂ ghès kèsa nyam yes kæ nyvɨ mu mzɨ̂, a ghèsɨ̀ laʼ. Ghès nɨn chwotɨ kɨ na wà visi ghèsɨ̀ chwo dzɨ ilaʼ nɨ̀ và. Ghès nɨn kɨŋ kɨ dzɨ sɨ chwò.”
20Fòyn Edòm ɨ fi be kɨ na, “Yi n-chwò wì dzɨ a ma ilaʼ.”
Wu n-bè tî ɨ fvɨ̀sɨ sugèyʼ sɨ tosɨ kɨ̀ sɨ idvɨ̀ na sɨ keʼ ghelɨ Isìlæ̀. 21Ghelɨ Edòm nɨn tuynsɨ na ghelɨ Isìlæ̀ nɨn toynɨ̂ chwò wì a àŋena ilaʼ, ghelɨ Isìlæ̀ ɨ bèynlɨ̀ ɨ ndù dzɨ a dzɨ ɨ yîlù.
Alòyn ɨ kfɨ
22Ghelɨ Isìlæ̀ nɨ̀n lu meyn sɨ a Kadèsh nô ghɨ̀ jɨ̀m ɨ ndù chem a kfɨ̂yn Hôl. 23A nà ghɨ ta àŋena nɨn ghɨ a kfɨyn Hôl ighami nɨ̀ Edòm, Bôbo Fɨyini ɨ bè sɨ̂ Mosìs ŋêyn Alòyn na, 24“Ɨlvɨ kfeyn meyn na Alòyn kfa ndù yeyn ghɨ̀bo ŋweyn. Wu n-zɨ̂ wì ilaʼ ghè a mɨ n-fu sɨ̂ ghelɨ Isìlæ̀ bòm ta zɨ̂ ŋweyn bu tî yvɨ̀nɨ mà alèʼ ghè a mu n-fvɨ̀ iwu a Melibà. 25Lì Alòyn ŋêyn wâyn ŋweyn Elezà zɨ̂ àŋena koʼ atû kfɨyn Hôl. 26Wà koʼ, wa choʼ ndzɨsɨ ngàŋ ndô Fɨyini sɨ ɨwuyn nɨ̀ Alòyn ɨ màʼ ɨwùyn nɨ̀ Elezà ɨ wâyn ŋweyn. Alòyn nɨn kfɨ afu ɨ̀ kfa ndù yeyn ghɨ̀bo ŋweyn.”
27Mosìs ɨ ni kɨ ta Bôbo Fɨyini bè sɨ̂ ŋweyn. Àŋena ghɨ̀ tal ɨ koʼ a kfɨyn Hôl ghelɨ Isìlæ̀ nô ghɨ̀ jɨ̀m ɨ ki-a. 28Àŋena nɨn koʼ ɨ chem atû kfɨ̀yn, Mosìs ɨ choʼ ndzɨsɨ ngàŋ ndô Fɨyini sɨ ɨwuyn nɨ̀ Alòyn ɨ màʼ ɨwùyn nɨ̀ Elezà ɨ wâyn Alòyn. Wu n-màʼ tî, Alòyn ɨ kfɨ atû kfɨ̀yn afu, Mosìs ŋêyn Elezà ɨ kasi kàlì. 29A nà ghɨ ta ghelɨ Isìlæ̀ yèyn na Alòyn kfɨ meyn, àŋena nô ghɨ̀ jɨ̀m ɨ chɨ̀yntɨ̀ ɨ dzɨ̀ ŋweyn sɨ a mɨchi mɨ̀vɨm ɨ̀n tal.