Leviticus 9

Ngàŋsɨ Ndô Fɨyinisɨ ɨ zɨ̀tɨ̀ ìfêl i àŋena

¹Ghɨ n-læ lì mɨchi mzɨ̀ nsòmbo ɨ yisi Alòyn ŋêyn woyn ŋweyn, a nà ghɨ a mɨchi nfama, Mosìs ɨ jàŋtɨ̀ Alòyn ŋêyn woyn ŋweyn, baʼsɨ̂ nɨ̀ chyeʼsɨ Isìlæ̀sɨ̀, ²ɨ bè sɨ̂ Alòyn na, “Lì wâyn nyàm mbòloʼ i lûmnɨ̀ yi kelɨ wi nseʼi, ɨ gvi fu sɨ ifu sɨ̂ Bôbo Fɨyini wù lesɨ fu mbɨ̂ sisɨ, nɨ̀ àyaʼ a kɨ kelɨ wi nseʼi, ɨ gvi nyòʼ atû àbaŋ ifu sɨ a ifu i nyoʼnɨ-i sɨ̂ Bôbo Fɨyini. ³Wà ni wa bè sɨ̂ ghelɨ Isìlæ̀ na, ‘Yì gvi nɨ̀ ìfef i ɨ fu ta ka Fɨyini fɨ lesɨ fu mbɨ̂ sisɨ. Yi nî yi gvi kɨmɨ nɨ̀ wâyn nyàm mbòloʼ, nɨ̀ wâyn njɨ̀ sɨ ifu i nyoʼnɨ-i. Nyamsɨ ateynsɨ nɨn kelɨ sɨ nà ghɨ ma sɨ chem meyn bèŋ, kelɨ wi nseʼi. ⁴Yì gvi kɨ̀mɨ nɨ̀ mbòŋ nɨ̀ àyaʼ a ɨ̀ fu sɨ̂ Bôbo Fɨyini sɨ a ifu sɨ nà chi nɨ̀ mbôynɨ̀, nɨ̀ ìfu i ɨfwo ɨ yɨnɨ ma ghɨ fyesɨ meyn nɨ̀ mɨ̀vɨ̂l bòm ta Bôbo Fɨyini nɨn fvɨ̀ a yi ikèʼ layn.’”

⁵Àŋena nɨn li meyn ɨ̀fwo nâ vzɨ̀ a Mosìs bè ɨ ndù nɨ̀ ɨ̀ŋweyn ɨchfɨ fɨndo nɨ̀ Bôbo Fɨyini. Ghelɨ Isìlæ̀ ɨ yvɨ̀ŋtɨ gvì ɨ timi asɨ nɨ̀ Bôbo Fɨyini nô ghɨ̀ jɨ̀m. ⁶Mosìs ɨ kæ bè sɨ̂ àŋena na, “Iyeynì nɨn ghɨ ìwo zɨ̀ a Bôbo Fɨyini bè na yì ni ta ka yì yeyn iŋwâʼ i ŋweyn.”

⁷Mosìs nɨ̀n fi meyn ɨ bè sɨ̂ Alòyn na, “Ndu fu ifu abaŋ ifu ta ka Bôbo Fɨyini lesɨ fu mbɨ shyasɨ, ɨ fu ifu i nyoʼnɨ-i ta ka Bôbo Fɨyini lesɨ fu mbɨsɨ ghelɨ Isìlæ̀. Fu tɨfu nâ tèyntɨ̀ ta ka Bôbo Fɨyini lesɨ fu mbɨsɨ àŋena kɨ̀ ighel ta wù bè.”

⁸Mosìs nɨn taŋi tî, Alòyn ɨ ndù ɨ sɨ wâyn nyàm mbòloʼ vzɨ̀ atu àbaŋ ifu na Bôbo Fɨyini lesɨ fu mbɨsɨ ŋweyn. ⁹Woyn ŋweyn ɨ gvì nɨ̀ mɨ̀luŋ mɨ̀ àteyn, wu tuŋ baŋ àwu ateyn ɨ yoʼ a mɨ̂choʼ afî a mɨ nà n-ghɨ a tɨ̂ghaŋ tɨ abaŋ ifu tì ta ndoŋsɨ nyâm, ɨ sfɨ̀s àbes ateyn isas abaŋ. ¹⁰Wu n-sfɨ̀s tî, ɨ nyòʼ ìso i nyâm nâ zɨ̀ nô ì jɨ̀m, nɨ̀ fyeŋsɨ akɨŋsɨ, nɨ̀ àlêʼ a jûŋ kì a kɨ n-ghɨ ɨtwem ikuè atû àbaŋ ifu kɨ̀ ighel ta Bôbo Fɨyini nɨn læ bè sɨ̂ Mosìs. ¹¹Mɨtì ɨ lì njwò zɨ̀ a yì faŋ baʼsɨ̂ nɨ̀ gvɨ àteyn, ɨ fvɨ̀ sɨ alèʼ ghè a àŋena bɨ̀ ateyn, ɨ nyòʼ.

¹²Wu n-nyòʼ tî, ɨ kæ sɨ ɨzɨ̂ a ghɨ gvì nɨ̀ ɨ̀nyeyn sɨ ifu i nyoʼnɨ-i sɨ̂ Bôbo Fɨyini, woyn ŋweyn ɨ lì gvi nɨ̀ mɨ̀luŋ mɨ̀ àteyn ɨ fu sɨ̂ ŋweyn, wu mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m. ¹³Woyn ŋweyn ɨ kaʼtɨ njwò àteyn kɨ̀ a tɨ̂kàʼ a tɨ̂kàʼ ɨ gvì fu sɨ̂ ŋweyn baʼsɨ̂ nɨ̀ àtu ateyn a, wu nyòʼ atû àbaŋ ifu, ¹⁴ɨ sù ɨ̀fwo ɨlvà baʼsɨ̂ nɨ̀ àfyeyn a ateyn a, ɨ lèm atu ìfu i nyoʼnɨ-i afî atû àbaŋ ifu, ɨ nyòʼ.

¹⁵Alòyn nɨn fu mèsi ifu i ŋweyn, ɨ kæ gvi nɨ̀ bzɨ zɨ̀ a ghɨ nì fu na Fɨyini fɨ lesɨ fù ghelɨ Isìlæ̀ tì, sɨ sɨ sɨ a ifu sɨ̂ Bôbo Fɨyini kɨ̀ ighel ta wù tî nì nɨ ɨyî àsɨ zɨ̀.

¹⁶Wu n-nì tî, ɨ lì nyam ìfu i nyoʼnɨ-i zɨ̀ ɨ fu kɨ a dzɨ ghè a Bôbo Fɨyini nɨn læ bè na ghɨ fu ateyn. ¹⁷Alòyn nɨn li meyn kɨmɨ ìfu i ɨfwo ɨ yɨnɨ, ɨ myèytɨ̀ àwu ateyn, ɨ nyòʼ atû àbaŋ sɨ baʼsɨ ifu afî a ghɨ n-bɨsɨ nyòʼ nyoʼ.

¹⁸Wu n-læ meyn sɨ kɨmɨ mbòŋ zɨ̀ baʼsɨ̂ nɨ̀ àyaʼ kì sɨ ifu na ghelɨ Isìlæ̀ nà chi nɨ̀ mbôynɨ̀, woyn ŋweyn ɨ lì ɨ fu mɨluŋ mɨ̀ àteyn sɨ̂ ŋweyn wu mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m. ¹⁹Mɨtì ɨ lì ìso ɨ mbòŋ zɨ̀, nɨ̀ iyi ayaʼ zɨ̀, ma à ti izɨ-ì a yi n-ghɨ a ɨnkùyn, nɨ izɨ-ì a yi n-ghɨ a nfyeŋsɨ akɨŋ, baʼsɨ̂ nɨ̀ àlêʼ a jûŋ kì a kɨ n-ghɨ ɨtwem ikuè, ²⁰ɨ lèm ɨ̀fwo ateyn atû nkumtɨ afî, Alòyn ɨ chɨ̀yntɨ̀ nyòʼ atu àbaŋ ifu. ²¹Alòyn nɨn læ meyn làysɨ̀ koʼsɨ nkumtɨ zɨ̀ baʼsɨ̂ nɨ̀ àbî ɨkœ ɨ two kì iyvɨ sɨ a ifu sɨ̂ Bôbo Fɨyini, kɨ̀ ighel ta Mosìs nɨ̂n bè.

²²Alòyn ɨ kæ nàysɨ̀ sɨ ndùsɨ̀ nɨ̀ ɨ̀wu ɨ ŋweyn atu nɨ̀ ghelɨ Isìlæ̀ ɨ boysɨ àŋena. A nà ghɨ ta wù fu mesì ifu na Bôbo Fɨyini lesɨ fu mbɨsɨ ghelɨ Isìlæ̀, nɨ̀ ìfu i nyoʼnɨ-i, nɨ̀ ìfu i sɨ nà chi nɨ̀ mbôynɨ̀, wu suʼi kàlì sɨ alèʼ ghè a abaŋ ifu a nà n-ghɨ ateyn.

²³Mosìs nɨn læ suʼi kàli tî ŋêyn Alòyn ɨ ndù ɨ zɨ a fɨndo nɨ̀ Bôbo Fɨyini ɨ kasi fvɨ gvì ɨ boysɨ ghelɨ Isìlæ̀ nô mɨ ɨlvɨ gha, iŋwâʼ i Bôbo Fɨyini ɨ gvɨtɨ fvɨ̀ ikèʼ nɨ̀ àŋena nô ghɨ̀ jɨ̀m. ²⁴Bôbo Fɨyini ɨ tum ɨvɨs wu suʼi ɨ nyòʼ tɨ̀fu tìtɨ̀ a tɨ nà n-ghɨ atû àbaŋ nô tɨ̀ jɨ̀m, baʼsɨ̂ nɨ̀ ìso zɨ̀. Ghelɨ Isìlæ̀ nô ghɨ̀ jɨ̀m ɨ yeyn tî ɨ nà sɨ byatɨ-à, felɨ̂ nɨ̀ àkeʼà a nse.