Leviticus 8

Ghɨ yisi Alòyn ŋêyn woyn ŋweyn

¹Bôbo Fɨyini nɨn be meyn sɨ̂ Mosìs na, ²“Li gvi nɨ̀ Alòyn ŋêyn woyn ŋweyn, nɨ̀ ndzɨsɨ ngàŋsɨ ndô Fɨyinisɨ̀ baʼsɨ̂ nɨ̀ mɨ̀vɨ̂l mzɨ̀ a ghɨ n-yisi ngàŋsɨ ndô Fɨyini ateyn, nɨ̀ nyâm mbòloʼ i lûmnɨ̀ zɨ̀ sɨ ifu na Bôbo lesɨ fù mbɨsɨ àŋena, nɨ̀ ɨ̀ywaʼ vzɨ̀ ɨ̀ bwo, baʼsɨ̂ nɨ̀ nkwò àbayn zɨ̀ kɨ kelɨ wi fɨ̀shɨ̀k. ³Wà gvî wa yvɨ̀ŋtɨ̀ ghelɨ Isìlæ̀ nô ghɨ̀ jɨ̀m ɨchfɨ fɨndo nɨ̀ Bôbo Fɨyini.” ⁴Mosìs ɨ ni kɨ iwo zɨ̀ a Bôbo Fɨyini bè, ghelɨ Isìlæ̀ ɨ yvɨ̀ŋtɨ̀ nô ghɨ̀ jɨm ɨchfɨ fɨndo nɨ̀ Bôbo Fɨyini.

⁵Mosìs ɨ bè sɨ̂ àŋena na, “Akeynà nɨn ghɨ àwo kì a Bôbo Fɨyini bè na ghesɨ̀nà ni.” ⁶Wu n-taŋi tî, ɨ jàŋ Alòyn ŋêyn woyn ŋweyn asɨ nɨ̀ ghelɨ Isìlæ̀ ɨ sù àŋena, ⁷ɨ màʼ ndzɨsɨ dyâsɨ̀ ɨwuyn nɨ̀ Alòyn, ɨ kul akue awaf atû àteyn, ɨ màʼ dàla a ŋweyn ɨwùyn, nɨ̀ àwaf a atû àteyn ɨ kul nɨ̀ akue a ma ghɨ faytɨ meyn tɨm. ⁸Mosìs nɨ̀n læ meyn baysɨ kɨmɨ fɨ̀bò fɨ àngàŋtɨ̀ a àngàŋtɨ̀ nɨ̀ Alòyn, ɨ we Yùlîm ateyn nɨ̀ Tùmîm. ⁹Wu n-læ nì tî, ɨ lì àbâs afo kì a ghɨ n-lɨm atu, ɨ lɨm atu nɨ̀ Alòyn, ɨ baysɨ fɨ̀bâynɨ̀ fɨ afo ateyn ma ghɨ faytɨ nɨ̀ àso ɨkwo a baŋnɨ-a, sɨ a nchwæ na ghɨ fu meyn Alòyn sɨ̂ Fɨyini fɨ. Wù n-læ ni kɨ ighel ta Bôbo Fɨyini nɨn læ bè na wù ni.

¹⁰Mosìs nɨ̂n nì tî, ɨ lì mɨ̀vɨl mzɨ̀ a ghɨ n-yisi ngàŋ ndô Fɨyini ateyn ɨ yoʼlɨ a fɨndo nɨ̀ Bôbo Fɨyini, baʼsɨ̂ nɨ̀ ɨ̀fwo vzɨ̀ a wu n-ghɨ antêynɨ̀ àteyn nô ɨ̀ jɨ̀m. À ti ta wu n-læ ni ɨfwo ateyn ɨ nà ghɨ sɨ a nyɨŋ sɨ̂ Bôbo Fɨyini. ¹¹Wù n-læ meyn sfɨ̀ytɨ kɨmɨ mɨ̀vɨl ɨ̀n lì atû àbaŋ ifu aghayn nsòmbo, ɨ fi yoʼ ɨ̀n lì ɨfwo ghè a wu nà n-ghɨ ateyn nô ɨ̀ jɨ̀m, nɨ̀ àkaŋ a ghaʼnɨ-a kì a ghɨ n-we mu ateyn, baʼsɨ̂ nɨ̀ àfo kì a kɨ nà n-ti atû àteyn ta ka ɨfwo ateyn na ghɨ sɨ a nyɨŋ sɨ̂ Bôbo Fɨyini. ¹²Mosìs nɨ̀n læ meyn sfɨ̀ytɨ̀ mɨ̀vɨl ɨ̀n lì atu nɨ̀ Alòyn ɨ yisi ŋweyn ɨ lèm sɨ a nyɨŋ sɨ̂ Bôbo Fɨyini. ¹³Mosìs nɨn læ yisi Alòyn tì ɨ bè woyn ŋweyn ɨ fvɨ gvì asɨ, wu màʼ ndzɨsɨ fɨfâ sɨ dyefɨnɨsɨ a àŋena ɨwùyn, ɨ kul ɨkue ɨwaf atû àteyn, ɨ lì ɨbyâs ɨfwo vzɨ̀ a ghɨ n-lɨm atu, ɨ lɨm a àŋena ɨtu, kɨ̀ ighel ta Bôbo Fɨyini nɨn læ bè na wù ni.

¹⁴Mosìs nɨn læ nì tî, ɨ lì nyam mbòloʼ i lûmnɨ̀ zɨ̀ a ghɨ gvì sɨ fu ifu ateyn na Bôbo Fɨyini lesɨ fù mbɨsɨ ghêl tî, ɨ bè Alòyn ŋêyn woyn ŋweyn ɨ lèm ɨ̀wu àŋena atû àteyn. ¹⁵Mosìs ɨ sɨ nyam àteyn ɨ lì mɨ̀luŋ mɨ̀ àteyn ɨ̀n lì nɨ̀ baŋ àwu ɨ yoʼlɨ a mɨchoʼ ghè a mɨ̀ n-ghɨ atu àbaŋ ifu tì ta ndoŋsɨ nyâm nô ɨ̀n jɨ̀m, ta ka kɨ na layna. Wu n-læ nì tî, ɨ lì mɨ̀luŋ mzɨ̀ a mɨ̀ faŋ ɨ sfɨ̀s isas àbaŋ ifu nâ ghè. À ti ta wu n-læ nì ɨ lèm abaŋ ateyn kɨ nà ghɨ sɨ a nyɨŋ, kfeynɨ-à sɨ nà fu tɨfu ateyn sɨ̂ Bôbo Fɨyini. ¹⁶Mosìs nɨn læ meyn ɨ li kɨmɨ ìso zɨ̀ a yi n-ghɨ ɨfwo ɨlvà nô ì jɨ̀m, nɨ izɨ-ì a yi n-ghɨ a ɨtwem ikuè, nɨ̀ fyeŋsɨ akɨŋsɨ baʼsɨ̂ nɨ̀ ìso zɨ̀ a yi n-ghɨ ateyn, ɨ nyòʼ atu àbaŋ ifu. ¹⁷Mɨtì ɨ lì njwò zɨ̂ a yì faŋ, nɨ̀ gvɨ àteyn, baʼsɨ̂ nɨ̀ mɨ̀tû, ɨ fvɨ̀ sɨ alèʼ ghè àŋena bɨ̀ ateyn, ɨ nyòʼ, kɨ̀ ighel ta Bôbo Fɨyini nɨn læ bè na wù ni.

¹⁸Wu n-læ nì tî ɨ lì àyaʼ kì a ghɨ gvì sɨ fu ifu i nyoʼnɨ-i ateyn, Alòyn ŋêyn woyn ŋweyn ɨ lèm ɨ̀wu àŋena atu àteyn. ¹⁹Mosìs ɨ sɨ ayaʼ ateyn ɨ lì mɨ̀luŋ mɨ̀ àteyn ɨ mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m, ²⁰ɨ kaʼtɨ àyaʼ ateyn kɨ̀ a tɨ̂kàʼ a tɨ̂kàʼ, ɨ nyòʼ àtu ateyn nɨ̀ tɨ̀kaʼ tɨ ateyn tɨ, baʼsɨ nɨ̀ ìso ateyn i. ²¹Wu n-nyòʼ tî, ɨ sù ɨ̀fwo ɨlvà, nɨ̀ àfyeyn a, ɨ chɨ̀yntɨ ɨ nyòʼ ɨ̀lwêʼ ateyn nô ɨ̀ jɨ̀m atû àbaŋ ifu sɨ a ifu i nyoʼnɨ-i, yi jofà, fî lɨ̂mtɨ̀ fom sɨ̂ Bôbo Fɨyini. Wu n-læ ni awo nâ kèynà kɨ̀ ighel ta Bôbo Fɨyini nɨn læ bè na wu ni.

²²Mosìs nɨn læ nì tî ɨ lì àyaʼ a li-a kì a ghɨ nà n-kelɨ sɨ sɨ ɨlvɨ ta ghɨ n-yisi ngàŋ ndô Fɨyini, Alòyn ŋêyn woyn ŋweyn ɨ lèm ɨ̀wu àŋena atu àteyn. ²³Mosìs ɨ sɨ ayaʼ ateyn ɨ lì mɨ̀luŋ mɨ̀ àteyn ɨ̀n lì ɨ yoʼ atuŋlɨ ɨkœ ɨ two nɨ̀ Alòyn, ɨ yoʼ ɨ̀n lì a lum àwu ɨkœ ɨ two nɨ̀ ŋweyn, ɨ fi yoʼ ɨ̀n lì a lum àvɨ̀ ɨkœ ɨ two. ²⁴Mosìs nɨn læ meyn jàŋtɨ kɨmɨ woyn Alòyn, ɨ yoʼ mɨluŋ ɨ̀n lì ɨtùŋlɨ akœ ɨ two nɨ̀ àŋena, ɨ yoʼ ɨ̀n lì a lumsɨ ɨvɨ̀, ɨ yoʼ ɨ̀n lì a lumsɨ ɨwu akœ ɨ two nɨ̀ àŋena, ɨ lì ɨmzɨ̂ a mɨ̀ faŋ ɨ mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m. ²⁵Wu n-læ nì tî, ɨ lì ìso ateyn, iso zɨ̀ a yi n-ghɨ a ɨ̀nkùyn, nɨ̀ ìso zɨ̀ a yi n-ghɨ ɨfwo ɨlvà, nɨ̀ àlêʼ a jûŋ kì a kɨ n-ghɨ ɨtwem ikuè, nɨ̀ fyeŋsɨ akɨŋsɨ baʼsɨ̂ nɨ̀ ìso zɨ̀ a yi n-ghɨ ateyn, nɨ̀ àbî ɨkœ ɨ two a, ²⁶ɨ fvɨ̀sɨ̀ àbayn àmòʼ a fɨnshwo afî a ghɨ nà n-we abayn ateyn bula fɨ̀shɨ̀k ma ghɨ fu meyn sɨ̂ Bôbo Fɨyini, ɨ fvɨ̀sɨ̀ ìghef i li ma ghɨ we meyn mɨ̀vɨl ateyn, baʼsɨ̂ nɨ̀ fɨ̀bâŋnɨ̀ fɨ abayn fɨ ma ghɨ yoʼ meyn mɨ̀vɨl ateyn, ɨ lèm atu ìso afî nɨ̀ àbî ɨkœ ɨ two kì. ²⁷Mosìs nɨn læ ni tî, ɨ chɨ̀yntɨ̀ ɨ fu ɨfwo nâ wèyn nô ɨ̀ jɨ̀m ɨwu nɨ̀ Alòyn ŋêyn woyn ŋweyn, ɨ bè àŋena làysɨ ɨ̀ kòʼsɨ iyvɨ sɨ a ifu sɨ a nyɨŋ sɨ̂ Bôbo Fɨyini. ²⁸Mosìs ɨ kæ kasi sɨ fsɨ ɨfwo ateyn sɨ a ɨwu nɨ̀ àŋena, sɨ nyòʼ sɨ baʼsɨ nɨ̀ ìfu i nyoʼnɨ-i atû àbaŋ sɨ a ifu sɨ yisi Alòyn ŋêyn woyn ŋweyn. A ghɨ ifu sɨ a nyɨŋ ma ghɨ nyòʼ nyoʼ, yi jofà lɨ̂mtɨ̀ fom sɨ̂ Bôbo Fɨyini. ²⁹Mosìs nɨn læ meyn ɨ lì kɨmɨ nkumtɨ àyaʼ zɨ̀ a ghɨ n-sɨ sɨ yisi Alòyn ŋêyn woyn ŋweyn, ɨ làysɨ̀ ɨ koʼsɨ iyvɨ sɨ ifu sɨ̂ Bôbo Fɨyini, kɨ̀ ighel ta Bôbo Fɨyini nɨn læ bè na wù ni. Nkumtɨ àyaʼ nâ zɨ̀ nà n-ghɨ a kelɨ Mosìs.

³⁰Wù n-li meyn kɨmɨ mɨ̀vɨl ɨ̀n lì mzɨ̀ a ghɨ n-yisi ngàŋ ndô Fɨyini ateyn, baʼsɨ̂ nɨ̀ mɨ̀lûŋ ɨ̀n lì atu àbaŋ ifu, ɨ mɨ̀sì ɨwùyn nɨ̀ Alòyn, ɨ fi mɨ̀si kɨmɨ a ndzɨsɨ nɨ̀ ŋweyn. Wù n-mɨsi meyn kɨmɨ ɨwùyn nɨ̀ woyn Alòyn, ɨ fi boŋ mɨ̀sì a ndzɨsɨ nɨ̀ àŋena. À ti ta Mosìs nɨn læ yisi Alòyn ŋêyn woyn ŋweyn baʼsɨ̂ nɨ̀ ndzɨsɨ àŋenasɨ sɨ a ngàŋsɨ ndô Fɨyini.

³¹Mosìs nɨn yisi tî ɨ bè sɨ̂ Alòyn ŋêyn woyn ŋweyn na, “Yì li njwò zɨ̂ ɨ ndu kfè ɨchfɨ fɨndo nɨ̀ Bôbo Fɨyini, ɨ̀ yɨ sɨ abayn afî a kɨ n-ghɨ a nkwò ɨ̀byayn afî a ghɨ n-fu ɨlvɨ ta ghɨ n-yisi ngàŋ ndô Fɨyini tì. Yì ni kɨ̀ ta Bôbo nɨn læ bè sɨ̂ mà. ³²Yi yɨ, à bɨsɨ nô mɨ ghà ateyn, yi nyòʼ. ³³Mɨ̀chi mzɨ̀ a ghɨ n-kelɨ sɨ yisi sɨ lem zɨ sɨ a ngàŋsɨ ndô Fɨyini ateyn nɨn ghɨ nsòmbo, yi kelɨ sɨ faŋ kɨ ɨchfɨ fɨndo nɨ̀ Bôbo Fɨyini nô ta ka mɨ̀chi nâ mèyn chwo. ³⁴Iwo nâ yèynì a ghɨ nì layn tèyn nɨn ghɨ ìwo ma à n-læ bè Bôbo Fɨyini na ghɨ ni ta ka wù lesi fu awo a bɨ-a nɨ̀ zɨ̀. ³⁵Yi n-kelɨ sɨ faŋ kɨ ɨchfɨ fɨndo nɨ̀ Bôbo Fɨyini sɨ a mɨchi nsòmbo, yisî kɨ tèyn kfâ chi-à. Yì na nî kɨ ìwo zɨ̀ a Bôbo Fɨyini nɨn kɨŋ na yì na nì-à, bu tì a yì kfɨtɨ. À ti iwo zɨ̀ a Bôbo Fɨyini nɨn læ bè na mà ni.”

³⁶Mosìs nɨn læ taŋi tî, Alòyn ŋêyn woyn ŋweyn ɨ ni kɨ ta Bôbo Fɨyini nɨn læ bè sɨ̂ àŋena toynɨ̂ a Mosìs.