Leviticus 19

Tɨsaʼ kûm ìchi i àtì-ati

¹Bôbo Fɨyini nɨn bê meyn sɨ̂ Mosìs na, ²“Taŋi sɨ̂ ghelɨ Isìlæ̀ nô ghɨ̀ jɨ̀m ɨ bè sɨ̂ àŋena na, ‘Yi n-kelɨ sɨ nà layna bòm ta mà, Bôbo Fɨyini, ɨ Fɨyini fifɨ nɨn layna.’”

³“Nô mɨ ndà a yi antêynɨ̀ nɨ̀n kelɨ sɨ nà ngvɨmlɨ bò ŋweyn nɨ̀ nà ŋweyn, kelɨ sɨ nà yɨ mɨchi mɨ̀ ɨ̀tuʼ ilaʼ nɨ̀ mà. À n-ghɨ mà Bôbo Fɨyini, ɨ Fɨyini fifɨ.”

⁴“Ka yi n-vìsi mà, nà koʼsɨ̂ ɨ̀nfyèʼsɨ̀, kèsa ɨ̀ fàytɨ mɨyini nɨ̀ àkasa, nà koʼsɨ-à. À n-ghɨ mà Bôbo Fɨyini, ɨ Fɨyini fifɨ.”

⁵“Yì na sɨ nyam ìfu sɨ̂ Bôbo Fɨyini sɨ nà chî nɨ̀ mbôynɨ̀, yi fu a dzɨ ta ka mà fsɨ ifu ateyn i. ⁶Yi fu, yi kfɨl njwò àteyn kɨ̀ achi ghè a yì fù ateyn, yì bɨsɨ ɨtuʼ layn yi fi kfɨl. Njwò àteyn kæ sɨ chi sɨ chem mɨchi ɨ̀n tal, ka wùl nɨ̂n fì kfɨl, yi nyoʼ kɨ nyoʼ. ⁷Mɨtì, ghɨ kæ sɨ kfɨl njwò àteyn ma yì chi meyn chem mɨchi ɨ̀n tal, a mà faŋ tɨ̀ fsɨ ifu ateyn bòm ta yi na bu layn wi. ⁸À kfɨ̀l mɨ ndà njwò nâ zɨ̀ a mà fu ngeʼ sɨ̂ ŋweyn bòm ta wù bèbsɨ meyn ìfu ateyn yi na bu layn wi asɨ nɨ̀ Bôbo Fɨyini, a ghɨ na kelɨ sɨ sàŋ sɨ fvɨ̀sɨ wul àteyn sɨ a antêynɨ̀ nɨ̀ ghelɨ Fɨyini.”

⁹“Yì na se sɨ kfì ɨfwo ɨ yɨnɨ a yi a gvêynsɨ̀, ka yì na ghayn ndû mesì a tɨ̂ghàmi, ka yi n-sàyntɨ ɨvzɨ̂ a ghɨ tî nà chwôsɨ̀-à. ¹⁰Wùl ɨ̀ kœ̂ mɨ̀tam mɨ̀ gɨ̀lêbsɨ̀ a ŋweyn a gvêyn, ka wû n-fì kàsi sèʼ sɨ kœ̀ sɨ mèsì kèsa sɨ boŋtɨ ɨmzɨ̂ a mɨ̀ chèmlɨ a nse. Yì na visî ɨmzɨ nâ mzɨ̀ sɨ̂ ghelɨ ànfɨf nɨ̀ ghelɨ ɨtum. À n-ghɨ mà Bôbo Fɨyini, ɨ Fɨyini fifɨ.”

¹¹“Ka wùl nɨ̂n læ̀ choŋ afo a wûl.”

“Ka wùl nɨ̂n læ̀ wam ànkaŋ.”

“Ka wùl sɨ̂ zɨ̀ nɨ̂n læ̀ lɨ̀sɨ wul.”

¹²“Ka wùl nɨn læ̀ chfɨ̀nɨ̀ ìwo ìzɨyn nɨ̀ mà ghɨ wi sɨ nì, ɨ̀ wùmsɨ mà. À n-ghɨ mà Bôbo Fɨyini.”

¹³“Ka wùl nɨ̂n læ̀ lì afo a wâynà ŋweyn sɨ a itof, kèsa sɨ choŋ choŋ ŋweyn.”

“Ka wùl nɨn læ̀ ghàl afo kì a wù n-kelɨ sɨ laʼ wul vzɨ̀ a wù fèl sɨ̂ ŋweyn kɨ chi kɨ̀ nô àchi àmòʼ.”

¹⁴“Ka wùl nɨn læ̀ te ànkùʼ, kèsa ɨ̀ lèm àfo na ànfèfà dyamtɨ ateyn, mɨtì yì na ngvɨmlɨ̂ Fɨyini. À n-ghɨ mà Bôbo Fɨyini.”

¹⁵“Ka wùl nɨn læ̀ fyèʼ nsaʼ, ka wùl nɨn læ̀ saʼ yèʼtɨ wul ànfɨf, kèsa ɨ̀ saʼ tòʼ wul ɨ two. Yì na saʼ ghelɨ kɨ àtì-ati.”

¹⁶“Ka wùl sɨ̂ zɨ̀ na jelɨ̀ wam ànkaŋ atu nɨ̀ wâynà ŋweyn.”

“Ka wùl nɨn læ wam ànkaŋ, ɨ̀ we wâynà ŋweyn a ngeʼ. À n-ghɨ mà Bôbo Fɨyini.”

¹⁷“Ka wùl na bâyn wâynà ŋweyn. Wùl ɨ̀ nî ìwo i bzɨ-i sɨ̂ và, wa yòl sɨ̂ ŋweyn bu tì a à na ghɨ kɨmɨ na wà ni meyn mbɨ.”

¹⁸“Yì na kôŋ woynà ghi kɨ̀ ighel ta yi n-kôŋ ngêŋ sisɨ, ka wùl nɨn læ̀ sɨ̀sɨ̀ mbɨ, kèsa ɨ̀ ghàl wul a ŋweyn item. À n-ghɨ mà Bôbo Fɨyini.”

¹⁹“Ka wùl nɨ̂n læ̀ tòʼ tɨ̀nkì tɨ ngœ̀ tɨ̀ bò a gvêyn ìmòʼ, ka wùl nɨn læ̀ kèʼsɨ nyam nɨ̀ ìnkì i yilu-ì.”

“Ka wùl nɨn læ̀ màʼ ndzɨsɨ ma ghɨ tɨm nɨ̀ tɨ̀nkì tɨ àmbyèyn tɨ̀ bò tɨ.”

“Yì na lèm tɨ̀saʼ temtɨ.”

²⁰“Wùl kæ chfɨ̀nɨ̀ sɨ ndu wul ɨ wi a ghɨ àkôs a wùl a ndo, nà bu duʼ tɨ̀ fu afo a ŋweyn atu, wul ɨwu lù chi nɨ̀ ŋweyn a ghɨ na kelɨ sɨ fu ngeʼ sɨ̂ àŋena. Ghɨ fu mɨ tì, ɨ̀ faŋ tɨ̀ zue àŋena bòm ta bò ìfel nɨ̀ wul ɨ wi nâ vzɨ̀ ti nà bu duʼ tɨ visi ŋweyn na wù lu. ²¹Yi gàyn tî a wùl ɨ lûmnɨ̀ àteyn na kelɨ sɨ gvì nɨ̀ àyaʼa ɨchfɨ fɨndo nɨ̀ Bôbo sɨ fu sɨ a ifu ta ka Bôbo Fɨyini lesɨ fù mbɨ ŋweyn. ²²Wù gvî, ngàŋ ndô Fɨyini ɨ lì àyaʼ ifu nâ kì sɨ dyèyn na wù ni meyn mbɨ, ɨ fu sɨ ifu sɨ̂ Bôbo Fɨyini sɨ a nchwæ na Bôbo lesɨ meyn fù mbɨ zɨ̀ a wù tî nì, a Bôbo lesɨ fù ŋweyn.”

²³“Yi ndû zɨ ilaʼ afî a mɨ n-fu sɨ̂ zɨ̀, ɨ̀ tòʼ nô mɨ ìnkì i fɨ̂kàʼ fɨ fɨtam fɨ̀ kà, fɨ kola, ka yi n-læ̀ kfɨl mɨtam mɨ̀ àteyn nô ta ka bèŋsɨ̀ chwo sɨ̀ tal bòm ta mɨ̀ n-layn wi ta isaʼi nɨn dyêyn. ²⁴À na ghɨ a bèŋsɨ̀ kæ̀, a mɨ̀tam mɨ̀ àteyn nô ɨ̀n jɨ̀m na layna, a yì fu ifu nɨ̀ ɨ̀mêyn sɨ koʼsɨ ma, ɨ Bôbo Fɨyini. ²⁵Mɨtì à na ghɨ a bèŋsɨ̀ tâyn, yi na kfɨl mɨ̀tam mɨ̀ àteyn. Yì kæ sɨ nì têyn a ɨ̀nkàʼ mzɨ̂ na faytɨ̂ kolâ mɨ̀tam nô sɨ idvɨ̀. À n-ghɨ mà, Bôbo Fɨyini.”

²⁶“Ka wùl sɨ̂ zɨ̀ nɨn læ̀ kfɨl njwò bula ghɨ sɨ nyam àteyn na mɨluŋ fvɨ.”

“Ka yì na fyeŋ mɨ̀nyaʼ kèsa kfɨl àvɨ̂ŋ.”

²⁷“Ka yì na lotɨ̂ ɨ̀tu ɨ̀ vzɨ, kèsa sɨ fàf sɨ teyn tɨ nyuŋsɨ adyèl nɨ̀ zɨ̀.”

²⁸“Yi se sɨ dzɨ̀ ikfɨ ka yì nà sɨlɨ̂ ngêŋ sisɨ. Ka yì na nyàʼ ɨ̀fwo a yi ɨwùyn sɨ chwæ̀ ngêŋ sisɨ. À n-ghɨ mà Bôbo Fɨyini.”

²⁹“Ka yì na tsɨyn woyn ghɨ̂kì nɨ̀ zɨ̀ àŋena ndû sɨ a ɨ̀kfàlà a ndosɨ mɨyini, a ghɨ ìkoʼsɨ sɨ̂ mɨyini, wumsɨ̂ àŋena. Yì kæ nà ni têyn a yì kasi nà koʼsɨ̂ mɨyini ɨ̀n lì a à na dvɨ̀ kɨ àwo a bɨ-a ilaʼ nâ ghàyn.”

³⁰“Yì na bam mɨchi mɨ̀ ɨtuʼ ilaʼ nɨ̀ mà, ngvɨmlɨ̂ àlêʼ kì a ghɨ n-koʼsɨ ma ateyn. À n-ghɨ mà Bôbo Fɨyini.”

³¹“Ka yì na seʼ fyeŋ àwo sɨ̂ ghelɨ mɨnyaʼ, kèsa sɨ̂ ghelɨ ghì a ghɨ bɨf àwo sɨ̂ nkfɨsɨ nsesɨ bòm ta ghelɨ nâ ghèyn nɨn bebsɨ̂ zɨ̀. À n-ghɨ mà Bôbo ɨ Fɨyini fifɨ.”

³²“Yì na ngvɨmlɨ̂ ghɨ̀ lema fî yvɨnɨ̂ àŋena. Yì na ngvɨmlɨ̂ Fɨyini fifɨ. À n-ghɨ mà Bôbo Fɨyini.”

³³“Wùl àtum gvî nà chî zɨ̂ àŋena, ka yì na nyàblɨ̀ nɨ̀ ŋweyn. ³⁴Yì nà tôʼnɨ̀ nɨ̀ ghelɨ ɨtum ghì a ghɨ n-chi zɨ̂ àŋena, kɨ̀ ta yi n-tôʼnɨ̀ nɨ̀ ghelɨ Isìlæ̀ ghɨ li. Yì na kôŋ àŋena kɨ̀ ta yi n-kôŋ ngêŋ sisɨ bòm ta yi n-læ meyn nà ghɨ kɨmɨ ghelɨ ɨtum a Ijìb. À n-ghɨ mà Bôbo Fɨyini, ɨ Fɨyini fifɨ.”

³⁵“Yì na se sɨ fèʼ afo, kèsa yi n-fêʼ sɨ yeyn na kɨ n-dyêf ghɨ ti-a, kèsa yi n-kɨŋ sɨ yeyn na kɨ ndɨ̂l ghɨ ti-a, kèsa yi n-fêʼ sɨ yeyn na kɨ n-dvɨ̂ ghɨ ti-a, yi feʼ kɨ nɨ̀ ɨ̀fyêʼ àtì-ati. ³⁶Yì na fêʼ ɨ̀fwo kɨ̀ ɨfyèʼ afî a wu n-ghɨ àtì-ati kèsa yi n-fêʼ ìdɨ̂l i ɨfwo kèsa yi n-fêʼ ifùʼ ma a fɨntòyn a. À n-ghɨ mà Bôbo Fɨyini ɨ Fɨyini fifɨ fì a fɨ n-læ fvɨ̀sɨ zɨ sɨ a Ijìb.”

³⁷“Yì na yvɨnɨ̂ tɨ̀saʼ temtɨ kɨ tɨ̀ jɨ̀m nî àwo kì a mà bè nô à jɨ̀m. À n-ghɨ mà Bôbo Fɨyini.”