Leviticus 18

Ka wùl nɨ̂n chi nɨ̀ wùl ɨ wi a ghɨ wi wî ŋweyn.

¹Bôbo Fɨyini nɨ̀n bê meyn sɨ̂ Mosìs na, ²“Taŋi sɨ̂ ghelɨ Isìlæ̀, ɨ bè sɨ̂ àŋena na, ‘À n-ghɨ mà Bôbo Fɨyini, ɨ Fɨyini fifɨ. ³Yi n-kelɨ wi sɨ nà ni awo kì a ghelɨ Ijìb ghì a yi na n-chi a àŋena ilaʼ nà n-nî, kelɨ wi sɨ nà ni akî a ghɨ n-nî ilaʼ i Kenàn afî a mɨ n-lì zɨ nɨ̀ zɨ̀ ateyn. Ka yì na chî nchînɨ̀ sìsɨ̀ a àŋena nɨn chi. ⁴Yi n-kelɨ sɨ nà lêm tɨsaʼ temtɨ, chî kɨ ta mà bè na yì na chî ateyn. À n-ghɨ mà Bôbo Fɨyini ɨ Fɨyini fifɨ. ⁵Yì na lêm tɨsaʼ temtɨ chî kɨ ta mà bè. Wùl vzɨ̀ a wu n-yvɨnɨ tɨsaʼ temtɨ na chî bòm ɨ̀nteyntɨ. À n-ghɨ mà Bôbo Fɨyini.’”

⁶“Ka wùl sɨ̂ zɨ̀ nɨn læ̀ chi nɨ̀ wùl ɨwi ma ŋêyn ŋweyn fvɨ̀ isas i ndo ìmòʼ. À n-ghɨ mà Bôbo Fɨyini.”

⁷“Ka wùl nɨn læ̀ chi nɨ̀ nà ŋweyn ɨ̀ wumsɨ bò ŋweyn. Ka wùl nɨ̂n læ̀ mòm sɨ chi nɨ̀ nì.”

⁸“Ka wùl nɨn læ̀ chi nɨ̀ wî bò ŋweyn bòm ta à mòm mɨ ndà a à na ghɨ ma wù wumsɨ meyn bò ŋweyn.”

⁹“Ka wùl nɨn læ̀ chi nɨ̀ jêmtɨ̀ ŋweyn, kèsa à n-ghɨ jêmtɨ̀ ŋweyn ni ɨ̀mòʼ kèsa bæ̀ ɨ̀mòʼ a kèsa wù n-ghɨ ma ghɨ bzɨ ŋêyn ŋweyn abe àmòʼ ma wù n-ghɨ ma wù zɨ gvì gvi a.”

¹⁰“Ka wùl nɨn læ̀ chi nɨ̀ wâyn wayn ŋweyn bòm ta à mòm mɨ ndà, a wù wumsɨ ngêŋ ŋweyn.”

¹¹“Ka wùl nɨn læ̀ chi nɨ̀ wâyn bò ŋweyn bòm ta à n-ghɨ jêmtɨ̀ ŋweyn.”

¹²“Ka wùl nɨn læ̀ chi nɨ̀ jêmtɨ̀ bò ŋweyn bòm ta wù n-ghɨ kɨ nô nà bò ŋweyn.”

¹³“Ka wùl nɨn læ̀ chi nɨ̀ wâynà nà ŋweyn bòm ta wâynà nà ŋweyn nɨn ghɨ kɨ nô nà ŋweyn.”

¹⁴“Ka wùl nɨn læ̀ chi nɨ̀ wî wâynà bò ŋweyn ɨ̀ wùmsɨ bò ŋweyn bòm ta wî wâynà bò ŋweyn nɨ̀n ghɨ kɨ nô nà ŋweyn.”

¹⁵“Ka wùl nɨn læ̀ chi nɨ̀ wî wàyn ŋweyn bòm ta wù n-ghɨ wî wâyn ŋweyn.”

¹⁶“Ka wùl nɨn læ̀ chi nɨ̀ wî wâynà ŋweyn bòm ta wù mòm a wù wumsɨ wâynà ŋweyn.”

¹⁷“Ka wùl nɨn læ̀ chi nɨ̀ wùl ɨ wi ɨ̀ fì chi nɨ̀ wâyn wùl ɨ wi nâ vzɨ̀. Ka wùl nɨn læ̀ chi nɨ̀ wùl ɨ wi ɨ̀ fì chi nɨ̀ wâyn wayn ŋweyn ɨ lûmnɨ̀ kèsa ɨ wi. Wùl kæ sɨ mòm, a à na ghɨ kɨ nô ìwo i bzɨ-i bòm ta à n-ghɨ kɨ woyn wûl ɨ̀mòʼ.”

¹⁸“Ka wùl nɨn læ̀ lì wâynà wi nɨ̀ ŋweyn sɨ a wi, ɨ̀ chi nɨ̀ ŋweyn, wî ŋweyn ɨ bu duʼ tɨ̀ kfɨ.”

¹⁹“Ka wùl nɨn læ̀ chi nɨ̀ wul ɨ wi wu ghɨ a ŋweyn ɨlvɨ bòm ta wù n-layn wi ta isaʼi nɨn n-dyêyn.”

²⁰“Ka wùl nɨn læ̀ chi nɨ̀ wî wùl, ɨ̀ bèbsɨ ngêŋ ŋweyn nà layn kfeynɨ̂ wì ta isaʼi nɨn dyêyn.”

²¹“Ka wùl nɨn læ̀ fù wâyn ŋweyn na ghɨ nyoʼ sɨ a ifu sɨ̂ fɨyini fìfɨ̀ a ghɨ n-toŋtɨ na Molèk bòm ta à mòm mɨ ndà a à na ghɨ ma wù wumsɨ meyn Fɨyini fifɨ. À n-ghɨ mà Bôbo Fɨyini.”

²²“Ka wùl ɨ lûmnɨ̀ nɨn læ̀ chi nɨ̀ wùl ɨ lûmnɨ̀ ɨ̀ lvɨ̀ ta wùl ɨ̀ nî wù nà chî nɨ̀ wul ɨ wi bòm ta à n-ghɨ ìwo chaʼnɨ-à.”

²³“Ka wùl nɨn læ̀ chi nɨ̀ nyàm ɨ̀ bèbsɨ ngêŋ ŋweyn, nà layn wi ta isaʼi nɨn dyêyn. Ka Wùl ɨ wi nɨn læ fù ngêŋ ŋweyn na nyàm chi nɨ̀ ŋweyn, bòm ta à n-ghɨ kɨ nô ìwo i bzɨ-i.”

²⁴“Ka yi n-bèbsɨ ngêŋ sisɨ nɨ̀ àwo nâ kèynà, nà layn wi ta isaʼi nɨn dyêyn. Tɨlaʼ tìtɨ̀ a mɨ n-sàŋ fvɨsɨ̀ a yi asɨ nɨn môm kɨ awo nâ kèynà ɨ bebsɨ ngeŋsɨ àŋena ɨ nà bu layn wi ta isaʼi nɨn dyêyn. ²⁵Nse ìlaʼ nâ yèyn nɨn befɨ meyn bòm àwo a chaʼnɨnɨ-a nâ kèynà a àŋena nɨ̂n nì, ma fu ngeʼ sɨ̂ àŋena, nse àŋena fî mo àŋena. ²⁶Yi n-kelɨ sɨ nà yvɨnɨ ma, lêm tɨ̀saʼ temtɨ kɨ tɨ̀ jɨ̀m. Ghelɨ Isìlæ̀, kèsa ɨtum vzɨ̀ a wu n-ghɨ a yi antêynɨ̀ nɨn kelɨ wi sɨ nà mom tɨ̀nkì tɨ awo nâ tèyntɨ̀. ²⁷Awo nâ kèynà nô à jɨ̀m nɨn læ nà môm ghelɨ ghì a ghɨ n-læ nà chi a ilaʼ nâ ghàyn jæ ta ka yì gvi. Àŋena nɨn læ meyn nì ilaʼ ateyn i nà layn wi ta isaʼi nɨn dyêyn. ²⁸Yì kæ bebsɨ nse ìlaʼ nâ yèyn yì na layn kfeynɨ̂ wì ta isaʼi nɨn dyêyn, a nse àteyn mo zɨ kɨ̀ ta yì n-læ mo ghelɨ ghì a ghɨ nà n-chi ateyn sɨ asɨ.”

²⁹“À kæ mòm nô mɨ ndà iwo antêynɨ̀ àwo a chaʼnɨnɨ-a nâ ghàyn, a ghɨ na kelɨ sɨ sàŋ sɨ fvɨ̀sɨ ŋweyn sɨ antêynɨ̀ nɨ̀ ghelɨ Isìlæ̀. ³⁰Yì na yvɨnɨ̂ tɨ̀saʼ tìtɨ̀ a mà fu nô tɨ̀ jɨ̀m. Ka yì na nì àwo a chaʼnɨnɨ-a nâ kèynà a ghelɨ ghì a ghɨ n-læ na chi ilaʼ nâ ghàyn nà n-nî. Ka yi n-bèbsɨ ngêŋ sisɨ nɨ̀ àwo a bɨ-a nâ kèynà sɨ nà layn wi. À n-ghɨ mà Bôbo Fɨyini, ɨ Fɨyini fifɨ.”