Joshua 23

Joshwà ɨ taŋi gòʼsɨ̀ sɨ̂ ghelɨ ghɨ tisɨnɨ a Isìlæ̀

¹Bôbo Fɨyini nɨn læ meyn gàmtɨ̀ ghelɨ Isìlæ̀ ghɨ nà chi koʼ kɨ nô nɨ̀ mbôynɨ̀ ŋêyn mbàynɨsɨ àŋena sɨ a ndyèyn ìdyà. A nà n-sɨ ghɨ ma Joshwà lema meyn nô a jûŋ, ²wu jàŋtɨ̀ ghelɨ Isìlæ̀ nô ghɨ̀ jɨ̀m, ɨ chyeʼsɨ nɨ̀ ghelɨ ghɨ tisɨnɨ nɨ̀ ghelɨ ghɨ saʼnɨ nɨ̀ ghelɨ ghɨ felɨnɨ ɨ bè sɨ̂ àŋena na, “Mà sɨ ghɨ tèyn ma ma lema meyn nô sɨ a ŋaŋ. ³Yi yeyn meyn kɨ̀ nô sɨ a yi a ngeŋsɨ iwo zɨ̀ a Bôbo Fɨyini fifɨ nì sɨ̂ tɨ̀laʼ tèyntɨ̀ bòm zɨ̀. Fɨ gamtɨ meyn yi tɨm yɨ mbàynɨ̀ sisɨ. ⁴Yì na kya na ma fu meyn ɨ̀lwêʼ vzɨ̀ a mà tɨm yɨ, nɨ ɨvzɨ̂ a ghɨ bu duʼ tɨ̀ tɨm tɨ̀ yɨ sɨ̂ asas a ndo nɨ̀ zɨ̀ kɨ̀ sɨ zɨ̀tɨ̀ a mbæ̀ jvà Jodàn sɨ ndù sɨ chem a jvâ ìghaʼnɨ a Mèdìtèlenìyà abàs ghè a ɨchfɨ iyvɨ i nɨn sœ ateyn na à na kelɨ kɨ nô zɨ̀. ⁵Bôbo Fɨyini, ɨ Fɨyini fɨ ghesɨ̀nàfɨ nì sâŋ fvɨsɨ̀ ghelɨ ghì a ghɨ bu chi afu. Fɨ n-nì nà sâŋ ndû nɨ̀ àŋena a yi asɨ, yi fsɨtɨ̂ ndû nɨ̀ ɨ̀lwêʼ vzɨ̀ a Bôbo Fɨyini, ɨ Fɨyini fifɨ nɨn læ chfɨ̀nɨ sɨ̂ zɨ̀.”

⁶“Yì na kelɨ mɨ̀tem ɨn to, yvɨnɨ̂ kɨ àwo à jɨ̀m ta ghɨ nyàʼ a ŋwàʼlɨ̀ tɨ̀saʼ nɨ̀ Mosìs. Ka yi n-fyèʼtɨ ki abâs a li-a. ⁷Ka yì na yɨnɨ̂ zɨ̂ ghelɨ ghì a ghɨ n-chi a yi antêynɨ̀ a ghɨ wi ghelɨ Isìlæ̀. Ka yi n-læ̀ jèm sɨ̂ mɨyini mɨ̀ àŋena. Ka yi n-læ̀ yɨ mɨkâyn izɨyn nɨ̀ mɨyini mɨ̀ àŋena. Ka yi n-læ̀ ngvɨ̀mlɨ mɨyini mɨ̀ àteyn. ⁸Yì na kwo nî kɨ ìwo zɨ̀ a Bôbo Fɨyini ɨ Fɨyini fifɨ nɨn kɨŋ kɨ̀ ta yì tî nà nî sɨ koʼ sɨ chem layn.”

⁹“Yi ti meyn yèyn ta Bôbo Fɨyini sàŋ fvɨ̀sɨ̀ tɨlaʼ tɨ totɨ a yi asɨ. Sɨ koʼ sɨ chem layn, nô ìlaʼi bû tìmi to chwò zɨ̀. ¹⁰Wùl ɨ̀mòʼ a yi antêynɨ̀ læ̀ nà to chwò ghelɨ nkam antêynɨ̀ nɨ̀ àŋena bòm ta Bôbo Fɨyini, ɨ Fɨyini fifɨ nɨn nû sɨ̂ zɨ̀ kɨ̀ ighel ta wu n-læ chfɨ̀nɨ ¹¹Yi ti n-dyêyn na yi n-kelɨ sɨ nà koŋ Bôbo Fɨyini, ɨ Fɨyini fifɨ.”

¹²“Mɨtì ma yì kæ sɨ kasi nà yɨnɨ̂ zɨ̂ ghelɨ nâ gheyn a ghɨ fàŋ a yi antêynɨ̀ tèyn, malâ àŋena, fî nî kôynɨ̀ àwo zɨ̂ àŋena, ¹³yi nà kya na Bôbo Fɨyini, ɨ Fɨyini fifɨ nɨn bu gâmtɨ̀ wi zɨ na yì saŋ fvɨ̀sɨ̀ àŋena. Yì nì tî a àŋena na kwo ghɨ teyn ta ɨtwam ɨlvɨ ta ghɨ bèyntɨ̀ sɨ kutɨ zɨ, fî ghɨ tèyn ta ngvàlìsɨ̀ a ghɨ n-leŋ zɨ ateyn, ghɨ ta sùnjoŋnjoŋsɨ a sɨ n-chuʼlɨ asɨ à ki-a nô ta ka yì læ̂ kfɨ̀tɨ mèsì sɨ a nse ì jùŋ nâ ghàyn a Bôbo Fɨyini, ɨ Fɨyini fifɨ fù sɨ̂ zɨ̀ têyn.”

¹⁴“Ɨlvɨ ikfɨ nɨ̀ mà sɨ ghɨ ma wu baʼsɨ meyn ta ka mà kfɨ kɨ̀ ta nô mɨ ndà nɨn kelɨ sɨ kfɨ. Yi n-faytɨ̂ kya a yi a mɨ̂tèm na Bôbo nî meyn nô mɨ ghà sɨ̂ zɨ̀ kɨ̀ ighel ta wù n-læ chfɨ̀nɨ. ¹⁵Wù ni meyn nô àwo a juŋà à jɨ̀m sɨ̂ zɨ̀ ta wu n-læ chfɨ̀nɨ, mɨtì ghɨ sɨ ni kɨmɨ a bɨ-a ɨlvɨ ta yì nì mbɨ. Yì kæ sɨ mòm ɨ̀ ni mbɨ a wu saŋ fvɨ̀sɨ̀ zɨ̀ sɨ a alèʼ a juŋà nâ ghàyn a wù fu sɨ̂ zɨ̀ têyn. ¹⁶Yì kæ sɨ faŋ tɨ̀ yvɨ̀nɨ tɨsaʼ tìtɨ̀ a Bôbo Fɨyini, ɨ Fɨyini fifɨ nɨn læ fu sɨ̂ zɨ̀, ɨ̀ ndù nà koʼsɨ̂ mɨyini ɨ̀n lì, fî felɨ̀ sɨ̂ ɨ̀mêyn, a ɨtoŋ Bôbo yaf sɨ̂ zɨ̀ nô sɨ a ŋaŋ a wu mesi zɨ sɨ a alèʼ a juŋà nâ ghàyn a wù fù sɨ̂ zɨ̀ têyn.”