Joshua 22

Asas a ndo kì a kɨ nà n-ghɨ injɨyn i jvâ Jodàn ɨ kasi kfa

¹Joshwà nɨn jaŋtɨ meyn ghelɨ isas i ndo nɨ̀ Lubèn nɨ̀ ghelɨ isas i ndo nɨ̀ Gâd nɨ̀ àbâs isas i ndo nɨ̀ Mànasè a li-a, ²ɨ bè sɨ̂ àŋena na, “Yi ni meyn nô mɨ ghà ta Mosìs, ɨ wul ɨ̀ fèlɨnɨ nɨ̀ Bôbo Fɨyini nɨn læ bè, ɨ̀ fì yvɨ̀nɨ mà kɨ̀ awo à jɨ̀m ta mà bè. ³À n-ghɨ ndyèyn lvɨ̂yn bula yi leʼ vìsi ghelɨ̀ ghi, ma à ti ghelɨ Isìlæ̀. Yi ni meyn ìwo zɨ̀ a Bôbo Fɨyini, ɨ Fɨyini fifɨ nɨn læ bè na yì ni. ⁴Bôbo Fɨyini, ɨ Fɨyini fɨ ghesɨ̀nà fɨ fu meyn mbôynɨ̀ sɨ̂ woynà ghesɨ̀nà kɨ̀ ighel ta wu n-læ chfɨ̀nɨ. Yi kasi kfa sɨ a yi a mɨ̂bè, ɨlwèʼ ghè a Mosìs nɨ̂n fù sɨ̂ zɨ̀ injɨyn i jvâ Jodàn. ⁵Mɨtì, yi n-kelɨ sɨ nà lem tɨsaʼ tìtɨ̀ a Mosìs ɨ wul ɨ̀ felɨnɨ nɨ̀ Bôbo Fɨyini nɨn læ fu sɨ̂ zɨ̀. Wu n-læ bè na yì na kôŋ Bôbo Fɨyini ɨ Fɨyini fifɨ, jelɨ̀ kɨ a dzɨsɨ nɨ̀ ŋweyn, lêm tɨ̀saʼ tɨ ŋweyn, yeʼtɨ̂ kɨ ɨwùyn nɨ̀ ŋweyn, fî felɨ̀ sɨ̂ ŋweyn nɨ̀ mɨ̀tem mzɨ̂ ɨ̀ jɨ̀m nɨ̀ ayvɨs à ki-a à jɨ̀mà.”

⁶Joshwà nɨn læ taŋi tî, ɨ boysɨ àŋena ɨ bè na ghɨ kasi kfa, àŋena kasi kfa sɨ a àŋena mɨ̂bè. ⁷Mosìs nà n-ghɨ ma wù fu meyn àlêʼ a Bashàn sɨ̂ àbâs isas i ndo nɨ̀ Mànasè a li-a, Joshwà ɨ fu alêʼ dzɨ abàs injɨyn i jvâ Jodàn sɨ̂ àbâs isas i ndo a li-a. Àŋena se sɨ lù wu jèm na Bôbo boysɨ àŋena. ⁸Wu n-bè sɨ̂ àŋena na, “Yì kasi kfa sɨ a yi a ntèʼsɨ nɨ̀ ìghaʼ ì zɨ-i, ma à ti inôyn i nyâmsɨ̀ nɨ̀ àso ɨkwo a fɨfâ nɨ a baŋnɨ-a nɨ̀ ìdyayn i nɨ̀ àkasa baʼsɨ̂ nɨ̀ ndzɨsɨ sɨ dvɨ̂ kɨ tèyn fî jôf nô a jûŋ. Yi ndû yi gwòtɨ̀ ɨ̀fwo nâ wèyn a yì fsɨ̀ sɨ̂ mbàynɨ̀ sisɨ zɨ̂ woynà ghi ghɨli.” ⁹Nô mɨ ɨlvɨ gha, ghelɨ isas i ndo nɨ̀ Lubèn nɨ̀ ɨ ghɨ Gâd nɨ̀ ɨ ghɨ abàs isas i ndo nɨ̀ Mànasè a li-a ɨ lu visi ghelɨ Isìlæ̀ ghɨli a Shilò ilaʼ i Kenàn. Àŋena nɨn lù tî, ɨ kasi kfa ndù a àŋena ntèʼsɨ a Gilèd, alèʼ ghè a Mosìs nɨn læ fu sɨ̂ àŋena kɨ̀ ighel ta Bôbo Fɨyini nɨn læ bè.

¹⁰A nà sɨ ghɨ ta àŋena ndù chèm a ntèʼ Gelilòt a mbæ̀ jvà Jodàn ilaʼ i Kenàn ghelɨ isas i ndo nɨ̀ Lubèn nɨ̀ ghelɨ isas i ndo nɨ̀ Gâd nɨ̀ àbâs isas i ndo nɨ̀ Mànasè a li-a, ɨ bàʼlɨ̀ àbaŋ ifu afu kɨ ghaʼ kɨ tèyn a mbæ̀ jvà Jodàn. ¹¹Ghelɨ Isìlæ̀ ɨ yvɨ na àŋena baʼlɨ meyn àbaŋ ifu a ntèʼ Gelilòt ighami i Kenàn a mbæ̀ jvà Jodàn, abàs nɨ̀ ghelɨ Isìlæ, ¹²ɨ chɨ̀yntɨ̀ nô ghɨ̀ jɨ̀m a Shilò sɨ ndù sɨ nu àŋena.

¹³Ghelɨ Isìlæ̀ ɨ kæ tum Fineghàs ɨ wâyn Elezà ɨ ngàŋ ndô Fɨyini na wù ndu a Gilèd ɨ̀ tàŋi sɨ̂ ghelɨ isas i ndo nɨ̀ Lubèn, nɨ̀ ɨ ghɨ Gâd, nɨ̀ àbâs isas i ndo nɨ̀ mànasè a li-a. ¹⁴Àŋena nɨn tum ŋweyn ŋêyn ghelɨ ghɨ tisɨnɨ ìvɨm, ma ghɨ choʼ kɨ̀ wul ɨ̀moʼ ɨ̀mòʼ asas a ndo nɨ̀ ghelɨ Isìlæ̀ ghè ìvɨm a Shilò. Nô mɨ ndà antêynɨ̀ nɨ̀ àŋena nà n-ghɨ wul ɨ̀ tisɨnɨ ɨchfɨ ndo nɨ̀ àŋena.

¹⁵Àŋena ndu chem a Gilèd ɨ yeyn ghelɨ isas i ndo nɨ̀ Lubèn, nɨ̀ ɨ ghɨ Gâd baʼsɨ̂ nɨ̀ àbâs isas i ndo nɨ̀ Mànasè a li-a ɨ bè sɨ̂ àŋena na, ¹⁶“Nô ghelɨ Isìlæ̀ ghɨ̀ jɨ̀m ɨ̀ bɨf na, ‘Bòm ghà ta yì to nɨ̀ àtu a sɨ̂ Bôbo ɨ̀ bàʼlɨ̀ àbaŋ ifu kèyn sɨ̂ ngeŋ sisɨ a? ¹⁷Yi lesɨ meyn ìwo zɨ̀ a yi n-læ gàyn a Beyò a? Ghelɨ Isìlæ̀ ghɨli nɨn læ meyn kfɨtɨ bòm ìwo nâ zɨ̀, ghesɨ̀nà na bu yeyn kɨ ngeʼ sɨ koʼsɨ chem layn kɨ bòm mbɨ nâ zɨ̀. ¹⁸A ti n-ghɨ na yi bu fì yvɨnɨ wi Bôbo Fɨyini ma?’”

“‘Yì kæ faŋ tɨ̀ chfɨ tɨ̀ màʼì iwo nâ yèynì a Bôbo nyoʼsɨ ɨtoŋ sɨ̂ ghesɨ̀nà ghelɨ Isìlæ̀ kɨ ghɨ̀ jɨ̀m. ¹⁹Yì kæ sɨ nà kfâʼtɨ̀ na alêʼ kì a ghɨ fù sɨ̂ zɨ̀ nɨn ghɨ wi nɨ̀ ìlayn i, yi kasi gvì a ghès a ilaʼ ghè a fɨ̀ndo fɨ Bôbo Fɨyini nɨn ghɨ ateyn. Yi gvî ka yi n-fì to nɨ̀ àtu a sɨ̂ Bôbo Fɨyini kèsa sɨ̂ ghès sɨ bàʼlɨ abaŋ ifu sɨ ngêŋ sisɨ a bu kɨ àbaŋ ifu nɨ̀ Bôbo ɨ Fɨyini fɨ ghesɨ̀nà. ²⁰Ba yi n-kya na à nà n-ghɨ ta Akàn ɨ wâyn Zelà faŋ tɨ̀ yvɨ̀nɨ Bôbo Fɨyini, ngeʼ ɨ gvi kɨ sɨ̂ ghelɨ Isìlæ̀ ghɨ̀ jɨ̀m. Akàn nɨn kfɨ meyn bòm mbɨ ŋweyn, ghelɨ Isìlæ̀ ghɨli ɨ boŋ kfɨtɨ kɨmɨ bòm mbɨ àteyn.’”

²¹Ghelɨ isas i ndo nɨ̀ Lubèn nɨ̀ ghelɨ Gâd nɨ̀ àbâs isas i ndo nɨ̀ Mànasè a li-a ɨ bèynsɨ̀ ɨ bè na, ²²“Bôbo Fɨyini, ɨ Fɨyini fɨ ngaŋtɨnɨfɨ nɨn kya ìwo zɨ̀ a ghès ɨ̀ bàʼlɨ̀ abaŋ ateyn bòm ìnyeyni ghès ɨ kôŋ na yì na boŋ kya. Ghès ɨ̀ kæ sɨ nà ghɨ ma ghɨ to meyn nɨ̀ àtu a, ɨ̀ faŋ tɨ̀ yvɨ̀nɨ Bôbo Fɨyini, yi zuetɨ ghès. ²³Ghès kæ sɨ nà ghɨ ma ghèsɨ kôl meyn ìsaʼ i Bôbo Fɨyini kɨ̀ nô ìmòʼ wu fu ngeʼ sɨ̂ ghès. Ghès ɨ bu tî bàʼlɨ̀ àbaŋ ateyn sɨ nà fu tɨfu tɨ nyoʼnɨtɨ ateyn nɨ̀ tɨ̀fu tɨ ɨfwo ɨ yɨnɨ nɨ̀ tɨfu tɨ sɨ nà chî nɨ̀ mbôynɨ̀.

²⁴“Ɨ̀ngaŋ, ghès tî bàʼlɨ̀ ta ghès nɨn fâyn na à kàʼ a à læ nà ghɨ achi a li-a, a wôyn ghi be sɨ̂ wôyn ghes na, ‘Yi n-kelɨ wi iwo ili sɨ ni nɨ̀ Bôbo Fɨyini ɨ Fɨyini fɨ ghelɨ Isìlæ̀.’ ²⁵Bôbo Fɨyini gwosɨ meyn ghesɨ̀nà nɨ̀ jvâ Jodàn, ɨ zɨ ghelɨ isas i ndo nɨ̀ Lubèn nɨ̀ ghelɨ isas i ndo nɨ̀ Gâd, yi dyêyn na yi n-kelɨ wi sɨ nà koʼsɨ Bôbo Fɨyini. Ghès ti nà kfâʼ kɨ na wôyn ghi kàʼ a ghɨ læ nì a woyn ghes ɨ na bu fâyn wì Bôbo Fɨyini.

²⁶“À ti iwo zɨ̀ a ghès tî bàʼlɨ̀ abaŋ ifu. Ghesɨ bu tî bàʼlɨ̀ sɨ nà nyoʼ nyamsɨ ateyn kèsa sɨ nà fu tɨfu ateyn. ²⁷Ghès tî kwo bàʼlɨ̀ àbaŋ ifu nâ kèyn sɨ a nchwò nsaʼ sɨ̂ ghesɨ̀nà nɨ̀ ɨ̀jwâŋ vzɨ̀ a wu n-læ̀ koʼ ibàm na ghès nɨn koʼsɨ̂ Bôbo Fɨyini nɨ̀ tɨ̀futɨ nyoʼnɨtɨ nɨ̀ tɨ̀fu tɨ tɨlitɨ, nɨ̀ tɨ̀futɨ sɨ nà chi nɨ̀ mbôynɨ̀. Ghès tî nì tèyn bòm ta ghès nɨn kôŋ wì na wôyn ghi læ̂ bè sɨ̂ woyn ghes na, ‘Yi n-kelɨ wi iwo i li sɨ ni nɨ̀ Bôbo Fɨyini.’”

²⁸“Ghès tî kfàʼtɨ̀ na wôyn ghi kæ læ̀ bè ìnkì iwo tèyn sɨ̂ ghès kèsa sɨ̂ wôyn ghes, a ghès be na, yi bû yeyn abaŋ ifu ta ghɨ̀bo ghes nɨn læ bàʼlɨ̀ kɨ lutɨ̂ ghɨ kɨ ta a kɨ Bôbo Fɨyini mɨtì ghès ɨ nyôʼ wì tɨfu atû àteyn. Abaŋ nâ kèynà nɨn ghɨ kɨ nchwò nsaʼ sɨ dyèyn na ghès nɨn ghɨ kɨmɨ ghelɨ Isìlæ̀ ta zɨ.”

²⁹“Ghès kàʼ ghɨ bû læ̀ to nɨ̀ àtu a sɨ̂ Bôbo Fɨyini, sɨ faŋ tɨ̀ ni iwo zɨ̀ a wù n-kɨŋ, sɨ bàʼlɨ̀ àbaŋ sɨ nà fu tɨfu tɨ nyoʼnɨtɨ, nɨ̀ tɨ̀futɨ ɨfwo ɨ yɨnɨ, kɨ̀mɨ nɨ̀ tɨ̀fu tɨlitɨ ateyn, a bu kɨ àbaŋ a Bôbo Fɨyini, ɨ Fɨyini fɨ ghesɨ̀nà kì a kɨ n-ti asɨ a fɨndo nɨ̀ Bôbo Fɨyini.” ³⁰A nà ghɨ ta Fineghàs ɨ ngàŋ ndô Fɨyini ŋêyn ghelɨ ghɨ tisɨnɨ asas a ndo nɨ̀ ghelɨ Isìlæ̀ yvɨ iwo zɨ̀ a ghelɨ Lubèn nɨ̀ ghelɨ Gâd nɨ̀ àbâs isas i ndo nɨ̀ Mànasè a li-a kì bè, àŋena nà saŋlɨ̂ nô a jûŋ. ³¹Fineghàs ɨ wâyn Elezà ɨ ngàŋ ndô Fɨyini ɨ kæ bè sɨ̂ àŋena na, “Ghès ɨ keli meyn lvɨ̂yn na Bôbo Fɨyini nɨn ghɨ ghesɨ̀na nɨ̀ àŋena amoʼ bòm ta yi bu tî to nɨ̀ àtu a sɨ̂ Bôbo Fɨyini iwo nâ ghàyn a yì tî nì têyn. Yi gamtɨ meyn na ka Bôbo Fɨyini fu ngeʼ sɨ̂ ghelɨ Isìlæ̀.” ³²Fineghàs ɨ wâyn Elezà ɨ ngàŋ ndô Fɨyini ɨ taŋi tì ŋêyn ghelɨ Isìlæ̀ ɨ lù ɨ visi ghelɨ isas i ndo nɨ̀ Lubèn nɨ̀ ghelɨ isas i ndo nɨ̀ Gâd a Gilèd ɨ kasi ndù a Kenàn ɨ fèʼtɨ̀ ìwo zɨ̀ sɨ̂ ghelɨ Isìlæ̀ a yi gàyn. ³³Àŋena yvɨ saʼgha àteyn ɨ nà saŋlɨ̂ nô sɨ a ŋaŋ tɨm tɨ̀kfɨm, fu àyòŋnɨ̀ sɨ̂ Fɨyini fɨ, ɨ læ faŋ tɨ̀ fì tɨ̀ bè iwo kum ìwoŋ sɨ nu ghelɨ isas i ndo nɨ̀ Lubèn, nɨ̀ ghelɨ isas i ndo nɨ̀ Gâd sɨ bebsɨ ilaʼ i àŋena.

³⁴Ghelɨ isas i ndo nɨ̀ Lubèn nɨ̀ ghelɨ isas i ndo nɨ̀ Gâd ɨ bè na abaŋ nâ kèynà nɨn ghɨ nchwò nsaʼ sɨ̂ ghesɨ̀nà ghelɨ Isìlæ̀ nô ghɨ̀ jɨ̀m na Bôbo nɨn ghɨ Fɨyini, ɨ kæ chfɨ̀ izɨyn abaŋ ifu nâ kì na, “Nchwò Nsaʼ.”