Joshua 20

Ntèʼ sîsɨ̀ a ka ghɨ na leʼ ndù lêytɨ̀ ateyn

¹Bôbo Fɨyini nɨn læ meyn bè sɨ̂ Joshwà na, ²“Bè sɨ̂ ghelɨ Isìlæ̀ na àŋena choʼtɨ ntèʼsɨ ta wùl kàʼ a wù leʼ ndù lèytɨ̀ ateyn ɨlvɨ ta ghɨ n-kɨŋ sɨ zue ŋweyn, kɨ̀ ighel ta mɨ n-læ bè na Mosìs be sɨ̂ zɨ̀. ³Yì choʼtɨ ntèʼsɨ ateyn ta ka wùl sɨ̂ zɨ̀ kæ sɨ jas zue zue wul, a wù leʼ ndù ateyn ka ghɨ zue ŋweyn.”

⁴“Wùl kæ zue wul, ɨ̀ leʼ ndù chem nô mɨ a ɨchfɨ ntèʼ ì kà antêynɨ̀ ntèʼsɨ nâ ghè, a wù timi afu ɨ̀ fèʼtɨ̀ ìwo zɨ̀ a yi gàyn sɨ̂ ŋweyn sɨ̂ chyeʼsɨ ntèʼ nâ sìsɨ̀. Àŋena kæ sɨ bɨmi iwo zɨ̀ a wù bè, a àŋena visi a wù zɨ, a ghɨ fu alêʼ a wù na chî ateyn ŋêyn àŋena. ⁵Wùl ìsas i ndo nɨ̀ wùl vzɨ̀ a ghɨ zue kæ sɨ nà kɨŋ gvì nɨ̀ ŋweyn sɨ sɨ̀sɨ̀ ikfɨ i wâynà ŋweyn, ka chyeʼsɨ ntèʼ nâ sìsɨ̀ nɨ̂n vìsi wul vzɨ̀ a wù nì jas zuè wul tì na ghɨ zue bòm ta wù bu nì bàʼtɨ baʼtɨ sɨ zue. ⁶Wùl nâ vzɨ̀ a wù zuè wul tì na kelɨ sɨ faŋ kɨ a ntèʼ nâ ghè sɨ chem ta ka ghɨ saʼ ŋweyn, sɨ fì sɨ chem ta ka ngàŋ ndô Fɨyini i ngaŋtɨnɨ zɨ̀ a yì n-saʼ a ntèʼ nâ ghè læ̂ kfɨ, a wù kæ kasi sɨ ndù sɨ a ntèʼ afî a wù tî lù ateyn ɨlvɨ ta wù n-kôŋ.”

⁷Ghelɨ Isìlæ̀ ɨ kæ choʼ ntèʼ Kadèsh a Galìlî, ilaʼ afî a yi nà n-ghɨ atû kfɨ̂yn Naftalì, nɨ̀ Shekèm a ghɨ kɨmɨ ìlaʼ atû kfɨ̂yn Eflèm nɨ̀ Kiliyat Abà ma à ti Heblòn, ilaʼ atû kfɨ̂yn Judà. ⁸A nà ghɨ a Jèlikò injɨyn i jvâ Jodàn, ghɨ choʼ ntèʼ Bezà ibal atû kfɨ̀yn a nse ìyum, alèʼ ghè a isas i ndo nɨ̀ Lubèn nà n-chi ateyn, nɨ̀ ntèʼ Lamòt a Gilèd alèʼ ghè a isas i ndo nɨ̀ Gâd ì nà n-chi ateyn nɨ̀ ntèʼ Golàn a Bashàn alèʼ ghè isas i ndo nɨ̀ Mànasè nà n-chi ateyn. ⁹Nô mɨ wul ɨ̀ Isìlæ̀ ɨ̀kfà kèsa wul àtum ta wu nà n-chi ŋêyn àŋena nà n-kaʼ a wù leʼ ndù a ntèʼsɨ nâ ghàyn a ghɨ n-chòʼtɨ têyn ɨlvɨ ta wù jas zuè zue wul. Wu nà n-kaʼ a wù leʼ ndù ka ghɨ boŋ zuè ŋweyn bula ghɨ saʼ ŋweyn