Isaiah 56
This book is a draft. It has been translated but has not yet finished checking, and is published here so the community can read and respond to it.
Fɨyini fɨ læ̀ boysɨ̂ tɨ̀laʼ tɨ̀ jɨ̀m a mbzɨ
1Bôbo Fɨyini bè na,
“Yì na nî kɨ àwo kì a isaʼi nɨn ndyêyn. Yì na nî kɨ àwo kì a kɨ n-ghɨ àtì-ati bòm ta ɨlvɨ sɨ baʼsɨ̂ gvi-à ta ka mà gvi ɨ̀ bœ̀sɨ̀ zɨ̀. Yi nì yeyn ta mɨ n-nî awo à ki-a kɨ àtì-ati.
2Njùŋ nɨ̀n ghɨ sɨ̂ wùl ɨ̀ vzɨ̀ a wù n-nî kɨ iwo zɨ̀ a yi n-ghɨ àtì-atì. Àŋena nɨn kelɨ sɨ nà yvɨnɨ tɨsaʼ temtɨ. Àŋena nɨn kelɨ sɨ nà bam achfɨ̂ ɨtuʼ ilaʼ nɨ̀ mà. Àŋena nɨn kelɨ sɨ leʼ sɨ ibàm awo a bɨ-a.”
3Wùl àtum kæ nà sɨ koʼsɨ̂ mà, ka wu n-læ̀ bè na, “Bôbo Fɨyini ɨ nì visî wì ma antêynɨ̀ nɨ̀ ghelɨ ŋweyn. Ka wùl ɨ̀ vzɨ̀ a ghɨ yàʼ meyn ŋweyn nɨ̂n bè na mà sɨ ghɨ kɨ ta fɨkâʼ ɨlvɨ ta fɨ yum.
4Iwo zɨ̀ a Bôbo Fɨyini nɨ̂n bè nɨn ghɨ na, “Ghɨ̀lûmnɨ̀ ghì a ghɨ yaʼ àŋena, àŋena lem achi ɨtuʼ ilaʼ nɨ̀ mà, nì kɨ̀ awo kì a kɨ n-jôf sɨ̂ mà fì lèm tɨ̀saʼ tɨ mɨ̂kàyn nɨ̀ mà nô tɨ̀ jɨ̀m.
5Mɨ n-nì bâʼlɨ̀ àzɨ a ma ndo, nyàʼ àzɨyn a àŋena nô ghɨ̀ jɨ̀m ateyn baʼsɨ̂ nɨ̀ ɨ̀lɨŋsɨ àŋena ta ka wu faŋ kɨ̀ afu nô ta ka ghɨ̀ læ̂ ghɨ̀. Ghɨ læ̀ nà bêtɨ̀ kɨ betɨ àŋena mɨlvɨ ɨ̀n jɨ̀m. Iyeyn nâ yèynì ɨ jofɨ̀ chwô sɨ nà kelɨ woyn ghɨ lûmnɨ̀ nɨ̀ woyn ghɨ̂kì. Mɨ n-nì fu ìzɨyn sɨ̂ àŋena a yi faŋ kɨ̀ samoʼ. Mɨ n-nì fu ìzɨyn sɨ̂ àŋena ma ghɨ kàʼ ghɨ bû læ̀ lèsɨ̀.
6Mà læ̀ boysɨ̂ kɨmɨ ghelɨ ɨtum ghì a à n-ghɨ wi ghelɨ Isìlæ̀. Ɨghî a ghɨ n-jûmtɨ̀ ma, kôŋ mà, koʼsɨ̂ mà, fî lêm àchi ɨtuʼ ilaʼ nɨ̀ mà sɨ a nyɨŋ, lêm tɨ̀saʼ tɨ mɨ̂kàyn nɨ̀ mà, yvɨnɨ̂ mà.
7Mà læ̀ ni-à a àŋena gvi a kfɨyn i laynɨ nɨ̀ mà. Mà læ̀ ni-à a àŋena na saŋlɨ̂ a ma ndo. Mà læ̀ fsɨ tɨ̀fu tɨ nyoʼnɨ nɨ̀ tɨ̀fu tɨ ɨfwo ɨ lɨmtɨnɨ atu àbaŋ ifu. Ghɨ læ̀ nà toŋtɨ̂ ndô yem ɨ ndo zɨ̀ a ghɨ n-jêm ateyn (ndo ìjèm) nɨ̀ ghelɨ ɨtum nô ghɨ̀ jɨ̀m.
8Bôbo Fɨyini ɨ bò mbzɨ ì jɨ̀m vzɨ̀ a wù yvɨ̀ŋtɨ̀ ghelɨ Isìlæ̀ ghì a àŋena nɨn ghɨ a tɨ̂laʼ tɨ lûtɨ̀ nɨ̂n bè na, “Mɨ n-nì yvɨ̂ŋtɨ̀ kɨmɨ ghelɨ ghɨ li baʼsɨ̂ sɨ̂ ghelɨ Isìlæ̀.
Fɨyini fɨ ɨ fu nfàsì nfàsì sɨ̂ ghelɨ ghɨ tisɨnɨ a Isìlæ̀.”
9Bôbo Fɨyini nɨn bè na, yì gvi a tɨ̂laʼ tìtɨ̀ a tɨ n-ghɨ mbàynɨ̀sɨ Isìlæ̀. Yì gvi mèsì kɨ̀ mesi àŋena (Nyamsɨ ɨtwaʼsɨ nô sɨ̀ jɨ̀m yì gvi. Nyamsɨ ɨtwaʼ sìsɨ̀ a sɨ n-ghɨ akù, yì gvi. Yì gvi mèsì kɨ̀ mesi ghelɨ Isìlæ̀)
10Ghelɨ ghɨ tisɨnɨ a Isìlæ̀ ghì a à n-ghɨ nchìsɨ̀ nɨn ghɨ ta ɨ̀nfyèf. Àŋena nô ghɨ̀ jɨ̀m nɨn kelɨ wi itof. Àŋena nô ghɨ̀ jɨ̀m nɨn ghɨ ta bɨsɨ a sɨ ntsɨ kɨ tèyn moŋ bufɨ wi Àŋena nɨn kôŋ kɨ sɨ nà nyɨŋì-à, ghɨ nà buni-à, jemsɨ ɨ chɨ àŋena.
11Àŋenanɨn ghɨ ta bɨsɨ, jeŋsɨ lum yaf kɨ yaf àŋena. Àŋena yɨ nô mɨ ti-a, ghɨ bû kul. Àŋena nɨn ghɨ ta nchì sìsɨ̀ a sɨ n-kya wi awo. Àŋena nô ghɨ̀ jɨ̀m nɨn nî ndû kɨ nɨ̀ àwo a àŋena. Nô mɨ ndà ɨ dzɨ̂ kɨ ɨ̀chfɨ ŋweyn.
12Wùl sɨ ateyn bê kɨ sɨ̂ ghɨli na yì gvi ghesɨnà ndù mà kini mɨlûʼ ghesɨ̀nà nyvɨ. Ghesɨ̀na n-yvɨ àwo læ̀ nà ghɨ a jûŋ a libɨs chwô ta kɨ n-ghɨ layn.