Isaiah 36

Sugèyʼsɨ Asilìyàsɨ̀ ɨ nù/kèʼ Judà

¹A nà n-ghɨ a bêŋ ghè a fòyn Hèzèkayà nɨn saʼ Judà na à na sɨ ghɨ bèŋsɨ̀ njvàsɨ̀ kæ̀, Sènachelìb ɨ fòyn Asilìyà ɨ gvi nù ɨ tɨm yɨ ntèʼ sɨ Judà sìsɨ̀ nô sɨ̀ jɨ̀m a ghɨ tɨm mbàyn jɨ̀ŋ kàli. ²Fòyn Asilìyà nɨn tum meyn àtu a sugèyʼsɨ̀ a ghaʼnɨ-a nɨ̀ ŋweyn, àŋena lu a Lakìsh ndù nù fòyn Hèzèkayà a Jèlusalèm. Àŋena koʼ a Jèlusalèm ɨ timi a dzɨ afî a yì n-koʼ ndû achɨ̀m afî a kɨ n-ghɨ abàs ikuè, a dzɨ àlèʼ ghè a ghɨ n-sû ndzɨsɨ ateyn. ³Wu n-ndù tî, Elìyakìm ɨ wâyn Hìlkayà nɨ̀ Shebnà ŋêyn Jowà ɨ wâyn Asàf ɨ ndù sɨ yeyn ŋweyn. Elìyakìm nà n-ghɨ wul ɨ vzɨ̀ a wù n-tisɨ nô mɨ ghà a ntoʼ/ àtu sɨ̂ ghelɨ ghɨ felɨnɨ a ntoʼ, Shebnà ɨ ghɨ wul ɨ̀ nyaʼnɨ, Jowà ɨ ghɨ ntum fòyn.

⁴Atu a sugèyʼsɨ̀ a Asilìyà kì ɨ bè sɨ̂ àŋena na, “Yì be sɨ̂ fòyn Hèzèkayà na, ‘Fòyn ɨ ghaʼnɨ ɨ fòyn Asilìyà bɨfɨ na à n-nî ghà na wà na kfâʼ na wa n-tɨm yɨ sugèyʼsɨ Asilìyà a? ⁵Wà n-bê na wà n-kelɨ mɨ̀dvzɨtɨ̂ sɨ nu ma, kelɨ sugèyʼsɨ̀ sɨ kelɨ àdyaʼ mɨtì yuʼ/leŋ kɨ ɨ̀chfɨ̂. Wà n-kâʼ na à kàʼ a à gamtɨ nô ndà vâ ta ka wà tɨm yɨ̀ ma a?/wù nu ma a? ⁶A wà ti n-kfâʼtɨ̀ na Ijìb kàʼ a yì gamtɨ vâ? Ijìb nɨn ghɨ kɨ ta mbàŋ ì nyamnɨ, to wi mɨtì ma wùl ɨ̀ mòmsɨ̀ sɨ jèl ateyn a yì kola. Yì n-ghɨ kɨ ta fɨchɨlɨ̂ fɨ fɨ̂kàʼ ma fɨ kàʼ a fɨ chuʼ bùʼ àwu à kya. À yèʼtɨ mɨ ndà ɨwuyn nɨ̀ fòyn Ijìb na wù gamtɨ ŋweayn a wù gvi nɨ̀ ngeʼ sɨ̂ wùl àteyn. ⁷Wà kàʼ a wà na bê sɨ̂ mà na yi n-yeʼtɨ̂ kɨ ɨwuyn nɨ̀ Bôbo Fɨyini ɨ Fɨyini fifɨ. Mɨtì ka yi n-lèsɨ̀ na fòyn Hèzèkayà nɨ̀n læ meyn lìsì/bebsɨ ɨ̀bwaŋ ɨ tɨ̂fu nɨ̀ ɨ̀lwêʼ ɨ laynɨ vzɨ̀ a ghɨ n-koʼsɨ ŋweyn ateyn ɨ bè sɨ̂ ghelɨ Judà nɨ̀ ɨghɨ Jèlusalèm na, “Yi n-kelɨ sɨ nà koʼsɨ Fɨyini kɨ̀ abaŋ ifu afêyn a Jèlusalèm.”

⁸Yi n-kelɨ sɨ yɨ mɨkâyn lvɨ̂yn zɨ̂ bò ìfèl nɨ̀ mà ta ka mà fu nyamsɨ kfaŋ sɨ̂ zɨ̀ nkamsɨ̀ bò ɨlvɨ ta yi nkelɨ ghelɨ a yi antêynɨ̀ ma ghɨ kàʼ a ghɨ nyɨŋ nyamsɨ ateyn. ⁹Yì ti kàʼ yi to chwò ti nô sugèyʼ zɨ̀ a yì bòli/yòli gòʼsɨ̀ antêynɨ̀ sugèyʼ sɨ bò ìfèl nɨ̀ mà, yeʼtɨ̂ kɨ ɨwùyn nɨ̀ Ijìb na yì fu zɨ nɨ̀ mɨ̀nchaʼ mɨ̀ ìwòŋ nɨ̀ sugèyʼ sìsɨ̀ a sɨ n-nyɨŋ atû nyamsɨ kfaŋ a? ¹⁰Yì ti n-kfâʼ na mà gvì sɨ nù sɨ bebsɨ ilaʼ yèynì Bôbo Fɨyini ɨ kya wi ma? À tî bè kɨ̀ nô Bôbo Fɨyini sɨ̂ mà/nɨ̀ ngêŋ ŋweyn na mà gvi ɨ̀ nù/kèʼ ìlaʼ yèynì ɨ̀ bèbsɨ ìlaʼ ateyn.

¹¹Atu a sugèyʼsɨ Asilìyà nâ kì nɨn taŋi tî, Eliyakìm ŋêyn Shebnà baʼsɨ̂ nɨ̀ Jowàb ɨ bè sɨ̂ ŋweyn na, “Taŋi sɨ̂ ghès/ghelɨ ghɨ felɨnɨ nɨ̀ và itaŋi Alàm bòm ta ghès nɨn yvɨ kelî ìtaŋi ateyn nô a jûŋ. Ka wa n-fì tàŋi ìtaŋi i Hibɨ̀lù ka ghelɨ ghì a ghɨ n-chi baʼsɨ ɨwuyn mbàyn ntèʼ na yvɨ-a/yvɨtɨ-à.”

¹²Mɨtì wu bè sɨ̂ àŋena na, “Bò ìfèl nɨ̀ ma bu tùm na mà gvi làʼì ntum yèyn kɨ̀ sɨ̂ zɨ̀ nɨ̀ bò ìfèl nɨ̀ zɨ̀/fòyn. Ghelɨ ghì a ghɨ n-nduʼ a mbàyn ntèʼ nɨn kelɨ kɨmɨ sɨ yvɨ ntum nâ yèyn. Àŋena nì yɨ ɨ̀wâl ɨ àŋena ɨ̀ nyvɨ mɨnjî mɨ̀ àŋena kɨ̀ ta zɨ.

¹³Atu a sugèyʼsɨ̀ nâ kì ɨ kæ timi sɨ jàŋ sɨ bè itaŋi i Hibɨ̀lù na, “Yì yvɨtɨ iwo zɨ̀ a fòyn Silìyà ɨ fòyn ɨ̀ ghaʼnɨ bè! ¹⁴Wu bè na ka yi n-vìsi fòyn Hèzèkayà lɨsɨ zɨ. Wù kàʼ wu bû gàmtɨ̀ zɨ̀. ¹⁵Ka yi n-vìsi wù na lɨsɨ̂ zɨ̀ na yì na koʼsɨ̂ Bôbo Fɨyini bê na, “Samoʼ Bôbo Fɨyini nɨn gàmtɨ̀ ghesɨ̀nà. Wu n-visî wì na fòyn Silìyà tɨm yɨ̀ ilaʼ yèynì.”

¹⁶Ka yi n-yvɨ iwo zɨ̀ a Hèzèkayà nɨ̀n bê. Fòyn Asilìyà nɨ̀n bê na, “Ghesɨ̀nà baʼtɨ awo yì fvɨ gvì ɨ̀ yèyn ma. Yì kæ yvɨ iwo zɨ̀ a mɨ n-bê, a nô mɨ ndà a yi antêynɨ̀ nî nà kfɨl kɨ mɨ̀tam mɨ̀ gɨ̀lèbsɨ̀ nɨ̀ ŋweyn, nyvɨ mu ma wù tu kɨ̀ nô ibɨ i mu nɨ̀ ŋweyn, ¹⁷sɨ chem ta ka mà gvi lì ndù nɨ̀ zɨ̀ ilaʼ yi ghɨ kɨ ta ilaʼ ì zɨ-i. À n-ghɨ ìlaʼ asaŋ a koʼ ateyn, mɨ̀lùʼ ɨ ghɨ ateyn, ɨfwo ɨ yɨnɨ ɨ ghɨ ateyn nɨ̀ gveynsɨ mɨtàmsɨ.

¹⁸Ka yi n-vìsi fòyn Hèzèkayà na lɨsɨ̂ zɨ̀ bê na, “Bôbo Fɨyini nɨn gàmtɨ̀ ghesɨ̀nà.” Nô fɨyini fɨ ilaʼ i li bû tìmi ghal fsɨ ilaʼ ateyn sɨ awu nɨ̀ fòyn Asilìyà. ¹⁹Mɨ̀yìnì mɨ̀ Hamàt bà? Ɨmzɨ̂ Sèfàvayìm nɨ̀ Ivà bà? Mɨ̀ ti meyn fsɨ Sàmalìyà sɨ a ma awu-a? ²⁰Fɨyini fɨ lifɨ nɨn ghɨ wi antêynɨ̀ mɨ̀yìnì mɨ̀ tɨ̀laʼ nâ ghàyn a fɨ tìmi fsɨ ilʼ i ɨ̀nfeynfɨ sɨ a ma awu. Bôbo Fɨyini kàʼ wu bû fsɨ Jèlusalèm sɨ a ma awu.

²¹Wu n-tàŋi tî, ghelɨ ateyn ɨ chimi kɨ moŋ ɨ faŋ tɨ̀ fɨ̀ysɨ iwo bòm ta à nà n-ghɨ ma fòyn Judà bê meyn na ka wùl nɨ̂n fɨ̀ysɨ̀ ìwo sɨ̂ àtu a sugèyʼsɨ̀ nâ kì.

²²Elìyakìm ɨ wâyn Hìlkayà ɨ wul ɨ vzɨ̀ a wù n-tisɨ awo a ntoʼ ŋêyn Shebnà ɨ wul ɨ̀ nyaʼnɨ baʼsɨ̂ nɨ̀ Jowàb ɨ wâyn Asàf ɨ ntum fòyn ɨ kasi ndu yèyn Hèzèkayà ma àŋena baytɨ meyn ndzɨsɨ sɨ ɨwùyn ɨ fèʼtɨ̀ ìwo zɨ̀ sɨ̂ ŋweyn a atu a sugèyʼsɨ̀ nɨ̀ ghelɨ Asilìyà bè.