Isaiah 35
This book is a draft. It has been translated but has not yet finished checking, and is published here so the community can read and respond to it.
Ghelɨ Isìlæ̀ læ̀ kasî ndû a Jèlusalèm nɨ̀ ìsaŋlɨ i
1Nse iyum læ̀ nà saŋlɨ-à. Ɨlwêʼ vzɨ̀ a wu lum yum kɨ tèyn læ̀ nà boŋ saŋlɨ-à. Ivɨ i læ̀ suʼi a nse ìkosɨnɨ a yì na saŋlɨ-à. Ɨ̀nfùʼ læ̀ nà lemâ, a nse ikosɨnɨ ni a yì boli. 2Ɨ̀nfùʼ læ̀ bûs afu nà so kɨ tèyn nchès. Ghɨ læ̀ nà yem njàŋsɨ̀ nɨ̀ gya sɨ tosɨ saŋlɨ-à. Bôbo Fɨyini læ̀ ni-à a ɨfwo yvɨ afu nà ghɨ ta aku a Lebanòn, ɨ̀ nì a nse Lebanòn to nà ghɨ ta gveynsɨ̀ a kfɨ̂yn Kamèl. Ghelɨ læ̀ yeyn ìŋwâʼ i Bôbo Fɨyini. Ghelɨ læ̀ yeyn ìjôf i Fɨyini fɨ ghesɨnà.
3Zɨ̀ ghî a ɨwuyn sɨ boli, yì na tosɨ̂ ɨ̀wuyn vzɨ. Zɨ̀ ghî a yi n-fâyn, alvɨ à ki-a ɨ chɨŋà, yì na to a.
4Yì be sɨ̂ ghelɨ ghì a ghɨ n-kusɨ nkèyn na,
àŋena na tosɨ̂ mɨ̀tem fâyn wì. Bè na Fɨyini fɨ àŋena fɨ læ̀ gvi-à. Fɨyini fɨ læ̀ gvî zuetɨ̂ mbàynɨ̀ sisɨ. Fɨyini fifɨ læ̀ gvî bœ̂sɨ̀ zɨ̀.
5Wu læ̀ gvî ni-à a ghelɨ ghɨ fefɨnɨ kasi nà yeyn ɨ̀lwêʼ. Wu læ̀ gvi-à ɨ̀ nì a ghɨ̀ n-kfɨ ɨ̀tùŋlɨ na ghɨ àwo.
6Ghelɨ ghɨ lvɨŋnɨ læ̀ nà nyɨŋà châʼtɨ̀ ta fɨchue. Ɨ̀nkùʼ læ̀ nà yem njàŋsɨ̀ saŋlɨ-à. Mu læ̀ nà fvɨ̂ a nse iyum, jvàsɨ ɨ kalì a nse iyum.
7Ɨlwêʼ vzɨ̀ a abɨlà nɨn lûm kɨ ateyn tèyn nchuŋ læ̀ kasî sɨ a achɨ̀m a mu. Asɨ a lɨmàlɨ̀mà læ̀ nà fvɨ̂ koʼ a nse, a mu na leŋ kalì yvɨ̂sɨ̀ nse zɨ̀ a yì kàʼtɨ ɨlwèʼ ghè a nyamsɨ ɨtwaʼ sɨ bɨsɨ nɨn yisi ateyn kasi sɨ ɨlwèʼ achàʼlɨ̀, a ɨ̀nfùʼ nɨ̀ ɨ̀nkàʼ lema kòʼ afu.
8Dzɨ̀ ito læ̀ nà chwô a nse iyum nâ ghè. Ghɨ læ̀ nà toŋtɨ̂ dzɨ ateyn na dzɨ ito i laynɨ. Ghelɨ ghì a ghɨ n-layn wi ta isaʼi nɨn dyêyn læ̀ nà jelɨ wì a dzɨ nâ ghàyn. À læ̀ nà jelɨ̀ kɨ ghelɨ Fɨyini a dzɨ nâ ghàyn. Ghelɨ awo a bɨ-a nɨ̀ ɨ̀ngu læ̀ jasɨ wi sɨ chwò ateyn.
9Nyam àbo læ̀ nà fâynsɨ̀ wì wul a dzɨ nâ ghàyn, a nô nyam i bɨ i bemnɨ læ̂ faŋ tɨ̀ chwò afu. À læ̀ nà chwô kɨ ghelɨ ghì a Bôbo Fɨyini kàsi meyn yuyn tèyn àŋena a zɨ nâ ghàyn.
10Ghelɨ ghì a Bôbo Fɨyini bœ̀sɨ̀ meyn àŋena læ̀ nà kasî gvî a Jèlusalèm saŋlɨ-à. Àŋena læ̀ nà zɨ̂ a Zayòn yem njàŋsɨ̀ saŋlɨ-à. Àŋena læ̀ nà yvɨ njùŋ zɨ̀ a yì fàŋ meyn kɨ̀ samoʼ. Àŋena læ̀ nà saŋlɨ̂ kɨ saŋlɨ̀. Wùl sɨ̂ àŋena læ̀ nà bu fì koynsɨ̂ wì isuyn, a ànsoma mæ sɨ àŋena ɨchfɨ̀.