Isaiah 30

Ngeʼ nɨn ghɨ sɨ̂ ìlaʼ zɨ̀ a yi n-to nɨ̀ àtu-a

¹Bôbo Fɨyini (nɨ̀n) bè na, “Ngeʼ nɨn ghɨ sɨ̂ ghelɨ ghì a ghɨ n-to nɨ̀ ɨ̀tu, ɨ ghelɨ ghì a ghɨ n-nî kɨ àwo kì a àŋena nɨn baʼtɨ, a ghɨ wi awo kì a mà bè.” Àŋena nɨn yɨnɨ̂ ŋêyn ghelɨ a ghɨ wi ibaʼtɨ ì yemi, nî tì kfeynsɨ̂ kɨ kfeynsɨ mbɨsɨ àŋena.

²Àŋena ndu meyn yèyn ghelɨ Ijìb na ghɨ gamtɨ àŋena bula ghɨ bɨf ìwo sɨ̂ mà. Àŋena nɨn kɨŋ na fòyn Ijìb na kɨ̂ŋtɨ̀ àŋena, àŋena nɨn kɨŋ àlêʼ a leytɨnɨ-a isa nɨ̀ ghelɨ Ijìb.

³Mɨtì, fòyn Ijìb ɨ nì wumsɨ̂ zɨ̀ bòm ta wù n-kelɨ wi adyaʼ sɨ kɨ̀ŋtɨ zɨ. Alêʼ kì a yi n-lêytɨ̀ ateyn a Ijìb ɨ nì gvî kɨ nɨ̀ ngeʼ sɨ̂ zɨ̀.

⁴Nô mɨ ta ghelɨ ghɨ tisɨnɨ ghɨ li a Judà sɨ ghɨ a Zowàn, ma ghelɨ ghì a àŋena tum ndu meyn chèm a Hanès, ⁵ghɨ nì wumsɨ̂ àŋena nô ghɨ̀ jɨ̀m bòm ta àŋena tî nà yeʼtɨ̂ ɨwùyn nɨ̀ ghelɨ ma ghɨ kàʼ ghɨ bû læ̀ gàmtɨ̀ àŋena, ma ghɨ kàʼ ghɨ bû fù nô sœ ì lì sɨ̂ àŋena. Ilaʼ ateyni nɨn ghɨ sɨ wumsɨ kɨ wumsɨ àŋena.

⁶Ɨyêyn nɨ̀n ghɨ saʼgha zɨ̀ a Fɨyini fɨ fù sɨ̂ mà kûm nyamsɨ ɨtwaʼ sìsɨ̀ a sɨ n-ghɨ a nse iyum a Negèv (abàs itsɨyn) bê na,

“Anôyn a ghelɨ ghɨ tisɨnɨ a Judà nɨ̀n jelɨ̀ toynɨ̂ a (nse iyum) ilaʼ yi bem kɨ tèyn sɨ ndù a Ijìb. Àŋena nɨn toynɨ̂ ilaʼ bzɨ̀nkem sɨ kisɨ nɨn sɨ lûmnɨ̀sɨ̀ ɨ ghɨ ateyn kɨ tɨ̀nki tɨ̀ jɨ̀m. Àŋena beʼi meyn ìghaʼ i àŋena atu. Njàkâysɨ ɨ bèʼì tɨ̀fu tɨ ɨkwo ɨtwo nɨ̀ àŋena atû kàmêlsɨ̀ nà ndû sɨ fu sɨ̂ ghelɨ ilaʼ ma ilaʼ ateyni kàʼ yi bû gàmtɨ̀ àŋena.

⁷Ghelɨ Ijìb kàʼ ghɨ bû gàmtɨ̀ àŋena nô sakos. À ti iwo zɨ̀ a mɨ n-toŋtɨ (jâŋ) àŋena na Lahàb zɨ̀ a yì n-fu wi ngeʼ sɨ̂ wùl. (Lahàb nɨ̀n ghɨ nyam ì lì chî a jvâ fu wi ngeʼ sɨ̂ wùl).

Ghelɨ ghì a ghɨ n-to nɨ̀ àtu-a

⁸Fɨyini fɨ nɨn bê meyn sɨ̂ Isayà na, “(Ndu) Nyàʼ awo nâ kèynà abàŋ a ngòʼ sɨ̂ àŋena lvɨ̂yn. Nyaʼ lèm awo ateyn a ŋwàʼlɨ̀ ta ka kɨ læ̂ nà ghɨ ta n-chwò nsaʼ zɨ̀ a yì fàŋ meyn samoʼ a mɨ̂chi ghè a mɨ̀ n-koʼ gvî asɨ.

⁹Yi na ghɨ tèyn bòm ta ghelɨ nâ ghèyn nɨn to nɨ̀ ɨ̀tu, fî wama. À n-ghɨ ghelɨ ma ghɨ leʼ meyn na ghɨ na yvɨnɨ̂ wì isaʼ i Fɨyini.

¹⁰Àŋena nɨn bê sɨ̂ àsɨ a baynɨ-a nɨ̀ àŋena na, “Ka yi n-fì fèʼtɨ̀ àwo kì sɨ̂ ghès a Fɨyini fɨ nɨn dyêyn sɨ̂ zɨ̀ a jem,” fî bê sɨ̂ nfèʼtɨ̀ sɨ ghaʼnɨsɨ na, “Ka yì fî fèʼtɨ̀ jemsɨ sɨ̂ ghès kûm àwo kì a wù bè na kɨ n-ghɨ àtì-ati. Yì na fêʼtɨ̀ àwo a juŋà kì sɨ̂ ghès a ghès nɨn kôŋ sɨ nà yvɨtɨ-à nô mɨ ɨlvɨ ta kɨ n-ghɨ wi samoʼ.

¹¹Yì leʼ sɨ a ghès a dzɨ̀, ka yi n-fì fèyn dzɨ sɨ̂ ghès. Ka yi n-fì fèʼtɨ̀ àwo sɨ̂ ghès kûm Fɨyini fɨ laynɨfɨ nɨ̀ ghelɨ Isìlæ̀.

¹²À ti iwo zɨ̀ a Fɨyini fɨ laynɨfɨ nɨ̀ ghelɨ Isìlæ̀ bè na,

“Ta yì chàs meyn ntum yem, faŋ nà yeʼtɨ̂ kɨ ghelɨ fî wam ɨ̀nkfaŋ, ¹³ngeʼ i bemnɨ nɨn gvɨ̂tɨ̀ kolî zɨ̀. Ngeʼ àteyn nɨn gvî kɨ ta azɨ a ndo a kɨ (nî kɨ) zɨ̀tɨ̀ sɨ kaʼtɨ abàs ikuè, ɨ kaʼtɨ kàli kɨ têyn kɨ gvɨ̀tɨ fe/bɨ̀sà.

¹⁴Azɨ a ndo nâ kì nɨn bɨ̀sà kɨ ta ntòyn àchàʼ a ghɨ jèl zuèlɨ nɨ̀ ɨ̀toŋ ɨ yafɨnɨ yì kfɨlɨ nô ì jɨ̀m, nô fɨ̀bêʼnɨ̀fɨ̀ na bu ghɨ wi ta ghɨ kàʼ a ghɨ chuf ɨvɨs ateyn kèsa sɨ sebtɨ mu ateyn ibɨ.”

¹⁵Bôbo Fɨyini ɨ Bò Ɨ̀dwaʼ ɨ̀ Jɨ̀m ɨ Fɨyini fɨ laynɨfɨ nɨ̀ ghelɨ Isìlæ̀ bè na, “Yi nì tɨm yɨ kɨ ɨlvɨ ta yì bèynlɨ̀ sa a yi a mbɨsɨ kàsi gvì sɨ̂ mà nɨ̀ mɨ̀têm ɨ ɨ̀nyvɨ̀tɨnɨ̂, ma yì kæ chimi kɨ têyn moŋ nà samsɨ̂ kɨ sɨ̂ mà, a yì na kelɨ kɨ kelɨ adyaʼ. Mɨtì yi n-kôŋ wì sɨ (ni nô ìwo ìmòʼ ta mà bè) nà samsɨ̂ mà.

¹⁶Yì kwo bè na, “Ɨ̀ngaŋ! Ghès nɨn leʼ mbàynɨ̀ seysɨ atu nyàmsɨ kfaŋ afî a sɨ n-nyɨŋ nô sɨ a ŋaŋ. Yi ti ndyèyn na yi nì leʼa. Yi n-kfâʼtɨ̀ na nyamsɨ kfaŋ nɨ̀ zɨ̀sɨ nɨn nyɨŋ nô sɨ a ŋaŋ mɨtì mbàynɨ̀ sìsɨ̀ a sɨ n-nyɨŋ a yi ibàm ɨ ghɨ sɨ na nyɨŋ nô sɨ a ŋaŋ.

¹⁷Sugèyʼ sisi nkam læ̀/nì nyɨŋ leʼnɨ-à, a nyɨŋ kɨ sugèyʼ mbàynɨ̀sɨ̀ ìmòʼ a àŋena ibàm. Yi læ̀ yeyn sugèyʼsɨ mbàynɨ̀sɨ̀ kɨ sɨ̀ tâyn, nyɨŋ leʼnɨ̂ nô ghɨ̀ jɨ̀m. Sugèyʼ sisɨ læ̀ faŋ kɨ sɨ ilæ, nà ghɨ kɨ ta mbàŋ ndzɨ ìwòŋ a yì n-tì atû kfɨ̀yn kɨ nìnyɨŋ, ghɨ kɨ ta nchwæ ìwo a ghɨ chɨ̀yn ghàŋsɨ abàs a ndzɨsɨ atû kfɨ̀yn.”

¹⁸Mɨtì Bôbo Fɨyini nɨn kôŋ/chîtɨ̀ sɨ dyeyn atem a juŋà sɨ̂ zɨ̀. Wù n-gvɨ̂tɨ̀ sɨ dyèyn ikôŋ i ŋweyn sɨ̂ zɨ̀. Bôbo Fɨyini nɨn ghɨ Fɨyini, saʼ ghelɨ ghɨ̀ jɨ̀m kɨ ighel. Njùŋ nɨ̀n ghɨ sɨ̂ ghelɨ ghì a ghɨ n-samsɨ/chîtɨ̀ kɨ Bôbo Fɨyini.

¹⁹Zɨ̀ ghelɨ Zayòn ghì a yi n-chi a Jèlusalèm, yì læ̀ bu fì dzɨ̂ wì nô sakos. Wu nì dyêyn àtem a juŋà sɨ̂ zɨ̀ ɨlvɨ ta yì dzɨ̀ sɨ̂ ŋweyn na wù gamtɨ zɨ, wù yvɨ ìdzɨ̂ ì zɨ-i nô mɨ ɨlvɨ gha, a wù beynsɨ ijêm ì zɨ-i. ²⁰(Nô mɨ ta) Bôbo fù meyn ngeʼ sɨ̂ zɨ̀, kɨ̀ ta wù n-fu ɨfwo ɨ yɨnɨ sɨ̂ zɨ̀ nɨ̀ mu. Wù n-ghɨ ndyèynsɨ̀ vzɨ, bu fì ghɨ wi sɨ lèytɨ ngêŋ ŋweyn sɨ̂ zɨ̀. Yi nì/læ̀ yeyn ŋweyn kɨ̀ nô nɨ̀ àsɨ à ki-a.

²¹Yì kæ lè dzɨ nà ndû dzɨ a ɨkœ nɨ̂nkœ̀ kèsa yi ndû dzɨ ɨkœ ɨtwo a yì yvɨ gyâ ŋweyn a yi ibàm ta wù bè na, “Ɨyêyn nɨn ghɨ dzɨ zɨ̀ a yi n-kelɨ sɨ nà jelɨ̀ ateyn. Yì na jûmtɨ̀ kɨ̀ ɨ̀nyeyn.” ²²Yì læ̀ se sɨ yvɨnɨ Fɨyini tì, ɨ̀ bèbsɨ ɨ̀nfyèʼsɨ mɨyini nɨ̀ zɨ̀ vzɨ̀ a yì lom/faytɨ nɨ̀ àso ɨkwo a baŋnɨ-a baʼsɨ̂ nɨ̀ a fɨfâ. Yì læ̀ maʼì ɨ̀fwo ateyn kɨ̀ ta ɨfwo a wu n-layn wi ta isaʼi nɨn dyêyn, bè sɨ̂ ɨ̀fwo ateyn na, “Yì lu/leʼ sɨ a ghès a ngùŋ.”

²³Yì na tôʼ ɨ̀fwo ɨ yɨnɨ nɨ̀ zɨ̀ nô mɨ ɨlvɨ gha, Bôbo Fɨyini ɨ tum ivɨ yi suʼi ɨ nì wu lema. Ɨfwo ɨ yɨnɨ ɨ jûŋ ɨ nì nà koʼ a yi ilaʼ kɨ̀ sɨ idvɨ̀. À læ̀ nà ghɨ ɨtuʼ nâ ghè yi kelɨ ɨ̀twaʼ ta nyâm sisɨ na yɨ ateyn wu ghaʼ kɨ tèyn. ²⁴Mbòŋ sîsɨ̀ a sɨ n-felɨ̀ gvêyn sisɨ baʼsɨ̂ nɨ̀ njàkâysɨ̀ læ̀ nà yɨ kɨ ɨ̀fwo ɨ yɨnɨ ɨ jûŋ ma ghɨ faytɨ meyn sàŋtɨ̀ nɨ̀ àntàs a tɨ̂chɨ̀ a baʼsɨ̂ nɨ̀ fɨ àtì-ati. ²⁵À læ̀ nà ghɨ achi ghè a ghɨ zuètɨ mbàynɨ̀ sisɨ, kòytɨ̀/bɨ̀ytɨ̀ ɨ̀bwaŋ nchì nɨ̀ àŋena, a jvasɨ na fvɨ̂ kalì a kfɨyn sɨ ghaʼlɨnɨsɨ, kalì kɨmɨ atû kfɨ̀yn sɨ dyeblɨnɨsɨ nô sɨ̀ jɨ̀m. ²⁶Njoŋ læ̀ nà bayn kɨ ta ɨchfɨ̂ iyvɨ achi nâ ghè, ɨchfɨ̂ iyvɨ i ɨ bayn chwò ta yi lum bayn ìngal nsòmbo. Ɨchfɨ̂ iyvɨ i læ̀ bayn achi nâ ghè kɨ ta ibayn zɨ̀ a yi n-chɨ̂yntɨ̀ bayn sɨ a mɨ̂chi nsòmbo. Yi læ̀ gâyn tèyn ɨtuʼ ta Bôbo Fɨyini gàmtɨ̀ ghelɨ ŋweyn sɨ a ngeʼ, (kul idzɨ̂ i ghelɨ ŋweyn) fì chuʼ ɨlwêʼ ɨ yafɨnɨ vzɨ̀ a wù tî nì àŋena keli.

²⁷Yì yeyna, Bôbo Fɨyini nɨn gvi-à, yì kàg a yì yeyn iŋwâʼ i ŋweyn nô a ndyèyn. Wù n-gvi-à, ɨtoŋ ŋweyn ɨ yaf nô sɨ a ŋaŋ ma fɨleʼ fɨ jɨ̂ŋ meyn kàli ŋweyn fɨ̂m kɨ tèyn tìk. Wù n-taŋî nɨ̀ ɨ̀toŋ ɨ yafɨnɨ. Awo kì a kɨ n-fvɨ̂ a ŋweyn ɨchfɨ̀ ɨ nyôʼ kɨ ta ɨvɨs a wu bèbsɨ kɨ ɨfwo ɨ̀ jɨ̀m.

²⁸Wù n-tɨm àzuê a ŋweyn kɨ nà kalì ta jva a ànkuŋa fvɨ̀ ateyn, kɨŋ sɨ lɨmsɨ/li ghelɨ. Wu n-sîsɨ̀ tɨ̀laʼ a nchèkèlèʼ sɨ bebsɨ tɨlaʼ tìtɨ̀ a tɨ(nî awo a bɨ-a) n-ghaŋsɨ ɨwuyn. Wù wê meyn nchaʼsɨ achfɨ̀ nɨ̀ ghelɨ tɨ̂laʼ nâ tìtɨ̀, sɨ fu ngeʼ sɨ̂ àŋena/na ka àŋena ni awo kì a ghɨ bàʼtɨ.

²⁹Zɨ̀ (ghelɨ Fɨyini) læ̀ nà saŋlɨ-à, yem njàŋsɨ̀ kɨ̀ ta yi nì nà yem nɨ̀ntuʼ ɨlvɨ ta yi n-yɨ asɨ a laynɨ-a. Isaŋlɨ-i læ̀ nà ghɨ a yi a mɨ̂tèm kɨ̀ ta yi nî yi nà ghɨ ɨlvɨ ta ghɨ n-yem njàŋsɨ̀ toŋ ndoŋsɨ, ta ghelɨ nɨn koʼ a ndo/kfɨyn nɨ̀ Bôbo Fɨyini ɨ Fɨyini fìfɨ̀ a fɨ n-kɨ̂ŋtɨ̀ ghelɨ Isìlæ̀.

³⁰Bôbo Fɨyini læ̀ ni-à a ghelɨ yvɨ gya ìŋwaʼnɨ nɨ̀ ŋweyn, ɨ̀ nì a ghelɨ yeyn ta wù n-gvî nɨ̀ àdyaʼ a bemnɨ-a nɨ̀ ŋweyna sɨ fu ngeʼ sɨ̂ mbàynɨ̀ sɨ ŋweynsɨ, wù læ̀ gvi-à ɨtoŋ ŋweyn ɨ yafɨ nô sɨ a ŋaŋ. Wù læ̀ gvî ta ɨvɨs, nyôʼlɨ̀ bebsɨ̂ kɨ ɨ̀fwo ɨ̀ jɨ̀m, afyef ato-a læ̀ nà chwô, awœ-a ɨ suʼi-à.

³¹Ghelɨ Àsilìyà læ̀ yvɨ gyâ Bôbo Fɨyini nà fâyn sô sɨ a ŋaŋ. Bôbo Fɨyini ɨ nì leŋ bebsɨ̂ àŋena nɨ̀ mbàŋ àdyaʼ nɨ̀ ŋweyn.

³²Bôbo Fɨyini na leŋ àŋena nô mɨ ɨlvɨ gha ta wù n-fu ngeʼ sɨ̂ àŋena, ghelɨ ŋweyn na yem njàŋsɨ̀ buʼ nchùmsɨ, buʼ tɨ̀luŋ, saŋlɨ-à. À læ̀ nû kɨ nô Fɨyini nɨ̀ ngêŋ ŋweyn nù ghelɨ Àsilìyà iwòŋ.

³³Samoʼ, Bôbo Fɨyini sɨ ghɨ ma wù n-læ meyn baʼtɨ lèm àlêʼ kì a ka ghɨ nyoʼ igvɨyn i fòyn Àsilìyà ateyn. Ibɨ i ɨvɨ̀s nâ zɨ̀-i nɨn ghaʼ kɨ tèyn, fî sœ̂ nô sɨ a ŋaŋ, ma ghɨ ndoŋsɨ meyn ɨ̀kâʼ ateyn kɨ̀ sɨ idvɨ̀ sɨ kwo ɨvɨs ateyn. Bôbo Fɨyini nɨn tɨm àzuê a ŋweyn, a kɨ fvɨ ta ilemi ɨvɨ̀s sɨ nyoʼ ɨnkâʼ mɨ̀ àteyn.